GALASI 3

1Hei, Galasi bɛɛnw, e hakilɛ sɛnɛ de! Yesu Kirisitoi bana baga jai nɛ pɛgaa dain gɔ, e inɛw bɛrɛ sɛɛu ɛjɛmaa jugɔmaabɛin gɔbe, inɛ aa ei dugaabe ma? 2Mu selumu ɔn sai e sai ye ibɛɛ wɔun: E, Ama Kikinu gɔ, Tɔɔru sɔɔ kibemu le bɛɛi ma, maa, e Kibɛru Ɛju gɔ ɛgaa, wogɔ le gawaabei dɛi bɛɛi? 3E yani kanraan ɔn gin’ hakilɛ sɛnɛ bii? E Ama Kikinu le tɔlaa, kanɛ kuu ebe gɔnrɔn le donugu ibɛɛ wɔi ma? 4Sɔɔ ɔn puu e bɛrɛ bamai biyaabe ma? Bamai kai biyɛun jaanla. 5Ama, Kikinu womɔ e bɛrɛ obaa, taanrinyɛn birɛ logoro ebe nɛ biraa wo taguru gɔ, wogɔ ebaa Tɔɔru kijɛ kanran gɛɛjɛ gɔbe kibemɔuwɔi ga kanrun ma, maa Kibɛru Ɛju gɔ ɛgaa, iyaa wogɔ le gawaabei dɛi kanrun? 6Kɔɔ sibɛ go Ama Dɔn bana Abarahamu dɛi sɔɔjɛ gin’: “Abarahamu Ama le gawaabe. Gagawu womɔ digɛu, Ama, woi teitai wɔɔ ga lugaabe.” 7Kɔɔ gin’ inɛw gagawu oju nɛ toin gɔbe, Abarahamu tirɛ unrunw tɔitɔi gɔbe bei ga e jugɔun jaain wɔɔ. 8Ama Dɔn nɛ pɔɔlɔ baa sɔwaa, Ama, inɛw Yahutunw tɔgui laain gɔbe, gagawu bemɛ dɛi inɛw teitai wɔin ga lulugodo gi. Kunrin, wage nɛ baa, Ama Dɔn Abarahamu bɛrɛ kibɛru ɛju ɔn tagaabe: “Ama u dɛi tɔgu wooi duba kakanrando.” 9Abarahamu, Ama le gawaabe dɛi, Ama woi duba kanraanbe. Kɔɔ gin’ inɛw gagawu oju nɛ toin gɔbe puu, Abarahamu gin’ Ama bei duba kakanrando. 10Tɔɔru sɔɔ kibemu nɛ inɛw diyɛ bemɛ daanaa sɛin gɔbe, jebu kuu bemɛ nɛ yɔɔ. Sabu Ama Dɔn kijɛ gi: “Inɛ waaru wooi Tɔɔru dɔn nɛ sɔɔ tɔŋaaɲu gɔ puu kibemɔɔlɛ baŋa gɔ jɛbi biyɛmɔ.” 11Inɛ turu kanran, Tɔɔru ɛjii kibemɔuwɔ dɛi, Ama woi teitai wɔɔ ga lugoidolo ga daii wɔɔ. Sabu Ama Dɔn nɛ tɔŋaa gi: “Inɛ gagawu le digɛu teitai wɔɔ gɔ, woi ɔnmɔi bibiyɛdo.” 12Tɔɔru kibemu gɔ gagawu le digɛla. Kaa, bana Ama Dɔn sɔɔjɛ gin’: “Inɛ Tɔɔru kijɛ kanran gɛɛjɛ kanranjɛ gɔ, Tɔɔru gɔ digɛnu woi ɔnmɔi bibiyɛdo.” 13Kirisito, dilɛ emɛ nɛ woi jɛbi biyaa, Tɔɔru jebu gɔ nɛ emi dɔrugaabe. Ama Dɔn nɛ tɔŋaa gi: “Inɛ baga nɛ jelaaɲu gɔ jɛbi biyɛmɔ.” 14Ama, Abarahamu bɛrɛ duba ohobodo ga pui wo kunu gɔ, inɛw Yahutunw tɔgui laain gɔbe bemaa kanran Kirisito Yesu le digɛnu duba wogɔ bɛɛ ga, iyaa emaa gagawu gɔ dɛi, Ama pui kunaa Kikinu ohobodo wo gi gɔ bɛɛ ga, Kirisito emi dɔrugaabe. 15Ba unrunw, emɛ, Adama unrunw bana kanranɲu gin’, sɔɔ gɔ emɛ wogɔ le tunwɔn yɛnɛmɔi: Inɛw lɛi tunmɔ le aaru aaraa, dɔn tɔŋɔmaa kilaai ye, inɛ waja turu kanran wogɔ kɔɔlɔmu ma, sɔɔ waja wogɔ nɛ bara ma kanrun bɛɛidolo. 16Aiwa, Ama, Abarahamu lee, tiruwɛnɛ womɔ lee bɛrɛ pui kunaabe. Ama Dɔn nɛ, “tirɛ unrunw womɔ bɛrɛ” gɛɛnɛ, tiyɛ gɔ inɛw joo. Kaa, “tiruwɛnɛ uwɔ bɛrɛ” tɔŋaaɲu, tiyɛ gɔ inɛ turu sai. Tiruwɛnɛ wogɔ Kirisitoi. 17Sɔɔ sɔi mu ibɛ gɔ unwɔ: Ama aaru aaraa, tɔŋaa duunaa yasɛbe. Wo wogɔ kikibemɔdo gi. Kunrin anranguju suŋu nai pɛtaanu galaa wo yaa Tɔɔru wɛi gɔ, Ama pɔɔlɔ baa aaru aaru gɔi kɔɔlɔmu ye, wogɔ le digɛnu Ama pui kunu gɔi yamulu bɛɛidolo. 18Sabu Ama sin obu kɛn gin’ obojɛ gɔ, wogɔ Tɔɔru le digɛnu bɛɛmɔjɛ ye, nɛɛ kɛn gɔ waja pui le kijɛ digɛ wɔlɔ. Kaa Ama Abarahamu bɛrɛ pui le digɛu kɛn gɔ obu. 19Nɛɛ kunrin biyaai ye, Tɔɔru gɔ inge dɛi daani? Tɔɔru gɔ pui kuni onu nɛ daani, Tɔɔru yamulu gɔ jugɔmɔ dɛi daani. Abarahamu tiruwɛnɛ, inɛ dɛi pui gɔ kuni gɔ wɛɛido baa, Tɔɔru gɔ biyɛun jaain bee. Tɔɔru wogɔ, mɛlɛnkɛ gɔbe le digɛu, iyaa sɔɔ yegerenɛ turu le digɛu obaabɛin. 20Inɛ sɔɔ yegerenɛ, inɛw tɔgu turu sai dɛi yoi yaalɛ. Kaa Ama kai koturu. 21Tɔɔru gɔ, Ama pui gɔ le jajaiyɛjɛ ma? Asuu! Kaa, inɛi ɔnmɔi biyɛido tɔɔru yabe biyaai ye, kɔɔ waaru le inɛw, tɔɔru le digɛnu Ama giru nɛ teitai bii bɛbɛɛbɛin. 22Kaa, gagawu bemɛ dɛi, inɛw Yesu Kirisito le gawaa wɔin gɔbe bɛrɛ Ama pui kunu gɔ obo ga, Ama Dɔn sɔwaa, Adama unrunw puu hakɛ gunɔ nɛ toin gi. 23Gagawu gɔ waaru dɔɔmɔ nɛ, Tɔɔru gɔ emi kaju kunaa gɛlɛbe, gagawu waaru wɛɛido bai tagaraidɛin baa, emi aa pinaa gɛlɛbe. 24Kɔɔ gin’, emaa Ama giru nɛ gagawu gɔ dɛi teitai biyɛ ga, Kirisito wɛɛido baa, Tɔɔru, emi teeremɔnɛi bii. 25Nɛɛ, iye gagawu waaru gɔ wiyaa dɔwaai dɛi, emi lee Tɔɔru numɔ nɛ tolo. 26E gagawu nɛ Kirisito Yesu le pagu turu e bii gɔ le digɛu Ama unrunwin bii. 27E puu, ei batise kanranmaabei. Kɔɔ gin’ e Kirisito le tunmɔi biyaai. Kanɛ e Kirisito bana gɔ jeɲaa wɔi. 28Nɛɛ, kɔɔ biyaai ye, waja Yahutunɛ ma, Yahutunɛi laa ma sɔɔ wɔlɔ, gunɔnɛ ma, gunɔ tolo ma sɔɔ wɔlɔ, ainɛ ma, yaanran ma sɔɔ wɔlɔ. E puu Kirisito Yesu pagu turu bii gɔ nɛ koturu. 29Nɛɛ, ei Kirisito mɔi ye, ei Abarahamu tirɛ unrunwin. Kunrin, Ama pui kunu gɔ bɛbɛɛdei.

will be added

X\