GALASI 2

1Anranguju pɛli naisigɛ galaa wo yaa, kɔɔ waaru le mu Barunabasu le Jerusalɛmu nɛ pilemaa yaabɔn. Mu Titei kanran jijɛ yaabɔn. 2Ama, maa yaa ga mui jugɔmaabe dɛi, mu yaiun. Ama inɛw mɔɔnu nɛ inɛw giru toin gɔbe lee, mu lee, mɔɔnu dɛiin emɛ kanrun gɔ nɛ, inɛw Yahutunw tɔgui laain gɔbe bɛrɛ Kibɛru Ɛju waaju mu tagajɛ gɔ tiyɛ gɔ be bɛrɛ jeɲaa tagaabɔn. Sabu birɛ biraa mu galu gɔ lee, birɛ birɛu mu wɔɔ gɔ lee, kijɛ tiyɛ sɛlɛi biyɛ ga ibɛla bɔun. 3Halu inɛw unrunbei ba unrunwin gɛɛnw gɔbe, logoro emɛ nɛ nɛyaantiyaa yoonw gɔbe, woi araa nɔɔmu ibɛɛ bɛin kanran, Tite mui dimiyaan wɛɛnɛ gɔ, Gɛrɛku tɔgui bee gɔ, araa nɔɔ ga wo bɛrɛ waajibi biyɛlu. Inɛw kɔɔbe Kirisito Yesu le digɛnu hɔɔlɔi bii bɛɛmɔjɛ gɔ bana gɔ jugɔ ga baŋiyaan logoro emɛ nɛ yoin. Be wogɔ yamuluti ye emi Yahutunw tɔɔru gunɔ nɛ kunu ibɛɛ bɛin. 5Kibɛru Ɛju naran gɔ, logoro ebe nɛ biyɛmɔ ga, emɛ sɔɔ bemɛ turu kanran keŋiyɛnnɛ. 6Kaa, inɛw giru toiin ga lugaa sɛin gɔbe, bei inɛw inge tɔgui bɛin ma mu kai mai sɛlɔn, sabu Ama inɛwin kabu kunɔɔlɛ. Inɛw giru toin wogɔbe, Kibɛru Ɛju sɔɔ mu tagabe gɔ nɛ kijɛ baraun turu kanran sɛbenɛ. 7Kaa, bana Yahutunw tɔgu dɛi Kibɛru Ɛju waaju tagu gɔ, Ama Piɛru bɛrɛ sagu gawaraabe gin’, inɛw Yahutunw tɔgui laain gɔbe bɛrɛ Kibɛru Ɛju waaju tagu gɔ, Ama mu bɛrɛ sagu gawaraabe ga, be jugaabɛin. 8Sabu Ama, Piɛrui Yahutunw dɛi Yesu jaŋu ii tiyaaɲui biyɛmɔnɛ gɔ, mui inɛw Yahutunw tɔgui laain gɔbe dɛi Yesu jaŋu ii tiyaaɲui wo biyɛmu. 9Jake lee, Piɛru lee, Jan lee, inɛw ginrun jɛiin gin’ lugaa sɛbɛin gɔbe, birɛ dɛin kɔɔ Ama mu bɛrɛ sagu gawaraabe ga jugaabɛin. Kunrin, be mu lee, Barunabasu lee bɛrɛ numɔ dɛɛraa, numɔ emɛ aa, emɛ wooi birɛbirɛnw tunmɔ bɔɔi sɛɛrɛ gɔ kɔɔ gin’ tagaraabɛin. Emɛ tunmɔ le aaraa, mu lee, Barunabasu lee, emɛ inɛw Yahutunw tɔgui laain gɔbe logoro nɛ yai ye birɛdɛin, be Yahutunw logoro nɛ yai ye birɛdɛin gin. 10Kaa be emaa, Jerusalɛmu Ama inɛw mɔɔnu gɔ nɛ dɛgugunw toin gɔbei ajuba gin. Mu yaa wogɔ kanran ga mainiyaanbɔn. 11Kaa waaru Piɛru Antiɔse ana nɛ wo wɛi le, bana wo kanrun gɔ ɛjula dɛi, mu inɛw giru nɛ woi jarugaabɔn. 12Jake inɛw gamuu tii gɔbe Antiɔse nɛ be wɛɛmɔ nɛ, Piɛru, ba unrunw Yahutunw tɔgui laain gɔbe le mɔrin ye pana kayaube. Kaa inɛw kɔɔbe be wiyaa, Piɛru, jaŋu unrunw Yahutunw tɔgui laain gɔbei inɛw araa nɔɔmɔu jaain wɔɔ gɛɛnw gɔbei liyɛube dɛi, wo ba unrunw Yahutunw tɔgui laain gɔbe le wageniyaan, be le dɛiin biyaabe. 13Piɛru le bariyaa, Yahutunw ba unrunw wajunw gɔbe kanran aŋa lɛilɛi sɔɔ kanraanbɛin. Barunabasui kanran be le bariyaa lelu nɛ yoomaabe. 14Kaa, be Kibɛru Ɛju naran gɔ le kɛkɛu yoi yaabenɛ ga waaru mu iye le, mu inɛw puu giru nɛ Piɛru le ɔn gin’ sɔiun: «U Yahutunw tɔgu gɔ, u Yahutunw atɛmu gɔ pajaatiyaa, inɛw Yahutunw tɔgui laain atɛmu gɔ le kɛukɛu biyaabeu. Nɛɛ, u yani inɛw Yahutunw tɔgui laain gɔbe bemaa Yahutunw bana wɔin gin’ tee biyɛ kaara giye tɔɔru ibɛɛ wɔu?» 15Emɛ kai emi Yahutunw tɔitɔibei. Emi tɔgu waja inɛw, inɛw Ama tɔɔru digɛlain gɔbei laain. 16Kɔɔ wooi logoro nɛ, Ama inɛ teitai wɔɔ ga wo lugojɛ gɔ, wogɔ inɛ Mɔise tɔɔru sɔɔ kibemɔnɛ gɔi laa. Kaa inɛ diyɛ womɔ Yesu Kirisito kuu nɛ daanaa wɔɔ gɔi ga emɛ igii wɔin. Emɛ, Tɔɔru gɔ sɔɔ sɛɛu kibemaaɲu dɛi laa, kaa Kirisito le gawaa emɛ wɔɔ gɔ dɛi emi teitai wɔɔ lugo ga, emɛ kanran kɔɔ dɛi Kirisito Yesu le gawaa wɔin. Kɔɔ gin’ inɛ turu kanran Tɔɔru sɔɔ kibemu dɛi Ama giru nɛ teitai wɔɔ giye lugoidenɛ. 17Kaa nɛɛ waaru Kirisito dɛi Ama giru nɛ teitai bii emɛ dɛnɛjɛ le, emi inɛw Yahutunw tɔgui laain gɔbe le kɛukɛu hakɛ kanranwin biyaain ye, tiyɛ gɔ Kirisito, hakɛ birɛbirɛnɛi biyaai ma? Ai, asuu! 18Kijɛ mu yamulu gɔ iyaa pilemaa mu yegerejɛ ye, tiyɛ gɔ mu mui Tɔɔru yamalanɛi ga tagarauwɔn. 19Ama sibɛ go mui ɔnmɔi biyɛ ga, Tɔɔru le digɛu, Tɔɔru sibɛ go mui yinwaain. Mui Kirisito le baga jai nɛ pɛgaaɲu. 20Nɛɛ, kunrin ɔnmɔi mu wɔɔ gɔ, lee kuu ma le ɔnmɔi wɔlɔn. Kaa Kirisitoi mu nɛ ɔnmɔi biyaa wɔɔ. Kanɛ goju le ɔnmɔi mu wɔɔ gɔ, mu Ama Aini le gawaa mu wɔɔ gɔ digɛu ɔnmɔi wɔun. Wo mui ibiyaa, kuu womɔ mu dɛi obaabe. 21Mu Ama nɛɛma gɔ jumɔlun. Sabu Ama giru nɛ teitai bii gɔ Tɔɔru le bɛɛmɔjɛ ye, Kirisito bamai yinwaain. yinwaain.

will be added

X\