GALASI 1

1Mu Pɔlu, Yesu jaŋu ii tiyaaɲu gɔ, lɛtɛrɛ ɔn mu tiiuwɔ. Yesu jaŋu ii tiyaaɲui bii ma gɔ, inɛw sɔɔ aaru le digɛla, iyaa inɛ turu kanran mui tiilu. Kaa Yesu Kirisito lee, Ba Ama yiun nɛ woi bulomɔnɛ gɔ lee, mui be tii. 2Ba unrunw ɔn nɛ mu le wɔin gɔbe, mu le bariyaa lɛtɛrɛ ɔn Galasi gana nɛ Ama inɛw mɔɔnu gɔbe bɛrɛ tiiuwɔin. 3Ama emɛ Ba lee, Inɛw Baŋa Yesu Kirisito lee, e bɛrɛ nɛɛma lee, jamu lee obo. 4Ama emɛ, emɛ Bai wɔɔ gɔ diŋɛ le kɛukɛu, hakɛ emɛ nɛ emi yaba ye aduna mɔɲu ɔn numɔ nɛ emi yabu goonɔ ga, Yesu kuu unrunmɔ obaabe. 5Boi sɔmu gɔ asuu nasuu Ama mɔi biyɛmɔ. Amina. 6Bana, Ama, Kirisito nɛɛma dɛi ei boonɔnɛ gɔi ɔgu pajaatiyaa, kibɛru ɛju waja sɔɔ e yabu gɔ, wogɔ mu bɛrɛ maunɛ kanrun. 7Naran sɔɔ gin ye, kibɛru ɛju waja wɔlɔ. Inɛw hakilɛ ebe bimiliyemɔw, inɛw Kirisito Kibɛru Ɛju gɔ dulomaa ye yamulu ibɛɛ wɔin gɔbe sai yɔɔin. 8Kaa, halu emɛ ma, mɛlɛnkɛ alagala gowaa wɛi ma wiyaa, Kibɛru Ɛju e bɛrɛ emɛ tagu gɔi laa go, kibɛru ɛju waja tagaajɛ ye, baŋai jɛbi biyɛmɔ. 9Emɛ e bɛrɛ tagaabɛin, iyaa kanɛ pilemaa sɔɔuwɔn: Kibɛru Ɛju le e yabu gɔi laa go, waja inɛ e bɛrɛ tagaajɛ biyaai ye, baŋai jɛbi biyɛmɔ. 10Nɛɛ kanɛ sɔɔ mu sɔi gɔ nɛ, mu inɛw bemaa mui sɔmɔ ga ibɛun ma, Ama womaa mui sɔmɔ ga ibɛun? Maa, mu inɛw kinɛ aamɔ ibɛun ma? Iye bai dɔɔ mu inɛw kinɛ aamui ibɛun ye, mu Kirisito birɛbirɛnɛi biyɛbelɔn. 11Ba unrunw, sɔɔ ɔn ɛjii jugɔi: Kibɛru Ɛju mu tagajɛ gɔ, wogɔ inɛw bɛrɛ goolu. 12Mu wogɔ inɛw le bɛɛlun. Iyaa inɛ turu kanran wogɔ mu bɛrɛ deerelu. Kaa Yesu Kirisito kuu womɔ le, mu bɛrɛ wogɔ wo jugɔmu. 13Laa waaru Yahutunw oju mu dimɛbe le bana mu bee gɔ, e wogɔ ɛgaabei. Mu waaru wogɔ le Ama inɛw mɔɔnu gɔi gaai ɔɲɔmɔubɔn. Mu woi suyo ibɛɛ bɔun. 14Yahutunw oju bana mu dimɛbe nɛ, mu kadagabe logoro nɛ, tɔgu ma inɛw joo dɛi sigɛ giru go yaaubɔn. Emɛ tirɛ anranw atɛmu sɔɔ nɛ mu kuu ma saii obaa sɛbɔn. 15Kaa Ama, nɛɛma womɔ dɛi, mui naranmɔ nɛ baa, mui dɛiin bojaa, mui birɛ womɔ dɛi boonaabe. Kɔɔ gin’, maa inɛw Yahutunw tɔgui laain gɔbe bɛrɛ Aini womɔ Kibɛru Ɛju gɔ taga ga, waaru Aini womɔ mu bɛrɛ jugɔmɔ ga kinɛ womɔ ai le, mu Adama ii turu kanran tinwinrun dɛnɛlun. 17Iyaa, inɛw giru ma nɛ Yesu jaŋu unrunw tiyaaɲui biyin gɔbei iye ga, mu Jerusalɛmu kanran yaalun. Kaa mu ɔgu kɛu Arabi gana nɛ yaabɔn. Kɔɔ onu nɛ Damasu ana nɛ pilemaa wiyaabɔn. 18Kɔɔ onu nɛ anranguju taanu galaa wo yaa, mu kɔɔ gin’, Piɛrui iye dɛi Jerusalɛmu nɛ yaabɔn. Mu bai pɛli numɔrɔnsigɛ wo le biyaabɔn. 19Jake, Inɛw Baŋa suŋɔrɔn gɔi laa ye, jaŋu unrunw tiyaaɲu gɔbe logoro nɛ inɛ turu kanran iyelun. 20Mu Ama dɛi sɔɔuwɔn, sɔɔ mu gɛɛjɛ ɔn narain. Mu kakalui maŋaalɔn. 21Kɔɔ onu nɛ, mu Rɔmɛ laamu Siri numɔ nɛ lee, Silisi numɔ nɛ lee yaabɔn. 22Ama inɛw mɔɔnu Judea gana nɛ Kirisito le bɔɔi biyaa wɔin gɔbe nimɛ girupala ma iyetɛnɛ bɛin. 23Be inɛw wajunw mu dɛi sɔɔ sɔɔu be bee ɔn sai ɛgɛubɛin: «Inɛ pɔɔlɔ emi ɔɲɔmɔu bee gɔ, laa gagawu yamala ga saii mainiyɛun wo bee gɔ, wo gagawu wogɔ dɛi kanɛ waaju tagauwɔ.» 24Kɔɔ gin’, be mu dɛi Ama boi sɔmɔubɛin.

will be added

X\