EPƐSE 6

1E unrunw gɔbe, ei Inɛw Baŋa mɔi dɛi ei naranw gɔbei babai. Wogɔ teitai wɔɔ. 2“U ba lee, u na lee baba.” Tɔɔru, pui wo le digɛraa wɔɔ pɔlɔ gɔ, tɔɔru kɔɔ woi. 3Pui wo le digɛ gɔ unwɔ: “Kɔɔ biyaai ye, aduna nɛ u jamu lee, kinruntaun lee bɛbɛɛdou.” 4E banw gɔbe, unrunw ebe kinɛ jinwɛnjɛ kanran kanrannɔugi, kaa Inɛw Baŋa teeremu le kɛukɛu, kɔi lee, tinwinrun womɔ lee le bei kɔɔi. 5E gunɔw gɔbe, Kirisito sɔɔ e yabajɛ gin’, liliyɛ le, goju kinwun le, kinɛpilu le, aduna ɔn nɛ e baŋa wɔin gɔbe sɔɔ yabai. 6Inɛw le boi ɛju bɛɛdei gin’, giru bemɛ nɛ sai wogɔ gin’ biyɛnɔugi, kaa Kirisito gunɔw, kinɛ ebe wooi le Ama diŋɛ kanranwin biyɛi. 7Inɛw birɛi birɛɛlɛi, kaa Inɛw Baŋa birɛi birɛjɛi gin’, kinɛ ɛju le gunɔ birɛ ebe birɛi. 8Sabu e igii wɔi, gunɔnɛi wee, hɔɔlɔnɛi wee, inɛ tuturu puu ɛju wo kanrun tujɔi Inɛw Baŋa bɛrɛ bɛɛdo. 9E gunɔw baŋabe, e kanran gunɔw ebe le bana kɔɔ tunmɔ le biyɛi. Bei liirɛmu sɔɔ kanrannɔugi. Sabu e igii wɔi, be lee e lee Baŋa gɔ alagala nɛ yɔɔ, iyaa wo inɛ kabu kunɔɔlɛ. 10Kɔɔbe wooi onu nɛ, nɛɛ e paŋa ebe Inɛw Baŋa nɛ bɛɛi. Gɔnrɔn paŋagu womɔ nɛ bɛɛi. 11Jinrun puu kuu baŋa dabulu nɛ ɛɛn go iŋi bɛɛ ga, e Ama kɔmɔgelu gɔbe puu e nɛ kunɔi. 12Sabu emɛ, Adama unrunw le kɔmɔ taauwɔnɛ. Kaa kuu bɛɛnw lee, paŋagunw lee, ɔlɔ aduna ɔn laamaw gɔbe lee, iyaa alagalabe kikinu mɔɲu gɔbe lee, be le taauwɔin. 13Kodigɛu, Ama kɔmɔgelu gɔbe puu jeɲɛi. Kunrin bai mɔɲu wiyaai ye, e, jaŋunɛ gɔ le iŋi bɛbɛɛdei. Iyaa kunrin kɔmɔ taa donugaa ye, nimɛ kanran e ɛɛn go bii bɛbɛɛdei. 14Nɛɛ ɛɛn go biyɛi, dɔin ebe nɛ, naran gɔ tɛmu gin’ pagiyɛi, teitai gɔ inrun arugoi gin’ kunɔi. 15Jamu Kibɛru Ɛju inɛ mainiyɛnmɔjɛ gɔ, taga gin’ kubɔ ebe nɛ kunɔi. 16Kɔɔbe puu kuu nɛ gagawu gɔ dɛdɛɛ gin’ jeɲɛi. Wogɔ le e Mɔɲu kuu baŋa kɛun, yaun bije goou wɔɔ gɔbe puu dai bɛbɛɛdei. 17Yayabu gɔ, inrun goro gin’ kunɔi, iyaa Kikinu Pilu polukaaba, Ama sɔɔi wɔɔ gɔ jeɲɛi. 18Amagɛɛn tɔgu dɛin dɛin le Ama bɛrɛ kai ebe taganu, waaru puu Ama Kikinu gɔnrɔn le Ama gɛɛin. Wogɔ le kaba kanranlu go ɛjii mainiyɛin. Ama inɛw puu dɛi waaru puu Ama gɛɛin. 19Mu dɛi kanran Ama gɛɛin. Maa aŋa waaru mu koorojɛ puu, sɔɔ bɛi ye, Kibɛru Ɛju sɔɔ boŋurun gɔ inɛw bɛrɛ liyɛ sɛlɛ go jugɔmɔ ga, Ama gɛɛin. 20Mu kaju gɔ nɛ Kibɛru Ɛju wogɔ dɛi sɔɔ sɔɔnɛi biyaa wɔun. Kodigɛu bana sɔɔun mu jaan gin’ maa liyɛ sɛlɛ go taga ga, mu dɛi Ama gɛɛin. 21Ebaa kanran, sɔɔ ma lee, kijɛ mu kanranjɛ lee jugɔ ga, bainɛ ibɛ emɛ Tisike, Inɛw Baŋa birɛbirɛnɛ ɛju, sɔɔ turu baŋai wɔɔ gɔ, e bɛrɛ kibɛru gɔ puu tatagado. 22Womaa bana emɛ wɔɔ e bɛrɛ jugɔmɔ ye, kinɛ ebe kaaliyɛmɔ ga, mu wogɔ dɛi tee woi e bɛrɛ tiiuwɔn. 23Ba Ama lee, Inɛw Baŋa Yesu Kirisito lee, ba unrunw bɛrɛ jamu lee, ihibɛ lee, gagawu lee obo. 24Inɛw Baŋa emɛ Yesu Kirisitoi, ihibɛ dogoolɛ le inɛw ibɛin puu, nɛɛma be le biyɛmɔ.

will be added

X\