EPƐSE 5

1Ei unrunw Ama ibɛi dɛi, Amai deewin biyɛi. 2Kirisito emi ibiyaabe. Sadaga jiɲu ɛju sin obu, Ama nɛ ɛɛlui biyɛ ga iyaa wo emɛ dɛi kinrun womɔ obaabe. E kanran, kɔɔ gin’ ihibɛ nɛ yoi yaai. 3Ama inɛw le bana dagaa gin’, sala ma, lɔgɔji ma girukakala ma, halu wogɔ sɔɔ sɔɔuwɔi giye kanran logoro ebe nɛ ɛgɛmɔnɔugi. 4Sɔɔ lɔgɔgu ma, sɔɔ bomɔgu ma, sɔɔ salagu ma, sɔɔ sɔi kanran e le jaanla. Kaa Amai birɛpoo tagu sɔɔ sɔɔi. 5Sabu ɛjii jugɔi, inɛ salaginɛ ma, sɔɔ lɔgɔ kanrannɛ ma, girukakalaginɛ ma, wogɔ ɔmɔlɔ bulu le kɛkɛu, Kirisito lee, Ama lee diinɛ nɛ kɛn sɛlɛ. 6Inɛ turu bɛrɛ kanran sɔɔ koolo le ei lelemɔnɔugi. Sabu sɔɔ kɔɔ tunmɔ dɛi, Ama kinɛbanrun, inɛw sɔɔ yabaanɛ kuu nɛ sugojɛ. 7E be le bɔɔi biyɛnɔugi. 8Pɔɔlɔ e ɔlɔ nɛ tobei. Kaa kanɛ Inɛw Baŋa nɛ e wijɛ nɛ toi. Wijɛ unrunw gin’ yoi yaai. 9Sabu wijɛ, ɛhɛju tɔgu puu lee, teitai tɔgu puu lee, naran tɔgu puu lee naranjɛ. 10Mainiyaan ye kijɛ Inɛw Baŋa kinɛ aamɔjɛ gɔ kabugu bɛɛi. 11Birɛ niwɛn sɛlɛ, ɔlɔ birɛ gɔbe mai siyɛnɔugi, kaa wogɔbe ɛlu goonɔi. 12Inɛw kɔɔbe baŋiyaan, sɔɔ be kanranjɛ, halu sɔɔɲu kanran dɔgɔi. 13Kaa kijɛ puu wijɛ nɛ goonaatin ye, bana be wɔɔ tɔitɔi gɔ jujugɔmɔjɛ. 14Sabu kijɛ daii jugɔmaaɲu puu, wijɛi taŋajɛ. Kodigɛu bana sɔɔɲu gin’: “U giri yeiyaa wɔɔ baŋa gɔ, giri yemɛ. U yiun logoro nɛ bulo goo. Kɔɔ biyaai ye, Kirisito ui wiwijɛmɔdo.” 15Yoiyaara ebe bana ɛjii kajubai. Inɛw bomɔgunw yoiyaara yaanɔugi, kaa inɛw hakilɛgunw gin’ biyɛi. 16Waaru koturu kanran kuu ebe nɛ galamɔnɔugi, sabu bai gɔbe mɔɲuniyaain. 17Kodigɛu, hakilɛ sɛlɛ go biyɛnɔugi, kaa Inɛw Baŋa diŋɛ gɔ paamai. 18Kɔɲɔ le bimiliyenɔugi, wogɔ yanwan jɛɛlɛjɛ. Kaa Ama Kikinu le joi ye biyɛi. 19Ama sɔmu nii lee, Ama nii lee, nii Kikinu nɛ goojɛ lee sɔɔ le, tunmɔ le sɔɔ sɔɔi. Nii niinu, kinɛ ebe wooi le Inɛw Baŋai sɔmɔi. 20Inɛw Baŋa emɛ Yesu Kirisito boi le waaru puu, kijɛ puu dɛi Ba Amai birɛpoo tagai. 21Kirisito giriliyɛ dɛi, tunmɔ le tubiyei. 22E yaanw gɔbe, Inɛw Baŋa le tubiyaa e wɔɔ gin’, e igɛbe le tubiyei. 23Sabu Kirisito, Ama inɛw mɔɔnu kuui wɔɔ gin’, igɛnɛ, yaanran kuu gɔ woi. Kirisito, Ama inɛw mɔɔnu, goju womɔi wɔɔ gɔi yabanɛ gɔ woi. 24Ama inɛw mɔɔnu, Kirisito le tubiyejɛ gin’, yaanw gɔbe, kijɛ puu nɛ be igɛbe le be tubiyemɔi. 25E igɛnw gɔbe, Kirisito Ama inɛw mɔɔnui ibiyaa, kinrun unrunmɔ wo dɛi obu gin’, e yaanw ebei ibɛi biyɛi. 26Kirisito kunrin Ama inɛw mɔɔnui dii le, Ama sɔɔ le digɛnu ɛjɛmɔ ye, Ama dɛi dɛiin bojo ga kinrun unrunmɔ obu. 27Iyaa wo giru unrunmɔ nɛ woi dooro le bojo ga kanrun. Wogɔ nɛ lɔgɔ tarala, yalu sunwinyaain tolo, kijɛ kɔɔ tunmɔ turu kanran wɔlɔ, iyaa ɛjaai, jarugu sɛlɛ. 28Kɔɔ bana wɔɔ gin’ igɛnw gɔbe, goju bemɛ bana be ibɛ gin’, yaanw bemɛ ibɛi biyɛun jaain wɔɔ. Inɛ yaanran unrunmɔ ibɛɛ wɔɔ gɔ, kuu unrunmɔ ibɛɛ wɔɔ. 29Inɛ turu kanran asuu goju unrunmɔ ibiliyɛtɛlu, kaa woi kakayamɔjɛ, kakajubajɛ. Kirisito yaa Ama inɛw mɔɔnu dɛi yinkanranjɛ. 30Sabu emɛ, goju womɔ digɛbei. 31“Kɔɔ sabu dɛi, ainɛ, wo ba lee, wo na lee, be le kabi ye, yaanran womɔ le biyɛjɛ. Kunrin be lɛi inɛ turu taŋaɲu.” 32Kɔɔ sɔɔ boŋurun diyɛi, kaa mu Kirisito lee, Ama inɛw mɔɔnu lee dɛi sɔɔuwɔn. 33Kokanran e le yadigɛ. E igɛnw gɔbe, e inɛ tuturu, kuu bana ebe gin’ yaanran womɔi ibɛi e biyɛun jaain wɔɔ. Yaanran kanran wo igɛi babaun jaain wɔɔ.

will be added

X\