EPƐSE 4

1Mu Inɛw Baŋa birɛ dɛi inɛ kaju too gɔ, mu e bɛrɛ gɛɛunwɔn, yoiyaara ebe gɔ, boonu ei booni gɔ le sɛgɛrɛmɔi. 2Waaru wooi puu kuu sunugu le biyɛi, tɛgɛ sɛlɛ go biyɛi, muyɔn le biyɛi. Ihibɛ le tunmɔ sɔɔ kanran muyɔin. 3Mainiyaanjɛi ye, jamu tunmɔ le ei pagaa sɛɛ gɔ le digɛnu, turui bii Ama Kikinu e bɛrɛ jɛɛlu gɔ, wogɔ gɛliyɛi. 4Ama boonu ei wo boonu gɔ le diyɛdɔn digɛ gɔ koturu wɔɔ. Emɛ goju turu wɔin, iyaa Ama Kikinu koturu sai wɔɔ. 5Inɛw Baŋa koturu sai wɔɔ, gagawu koturu sai wɔɔ, batise koturu sai wɔɔ, 6Ama koturu sai wɔɔ, inɛw puu Ba gɔ woi. Wo inɛw puu kuu nɛ wɔɔ, inɛw puu le digɛnu birɛjɛ, inɛw puu nɛ too. 7Kaa emɛ tuturu puu, Kirisito, gamulu emɛ bɛrɛ wo obu le kɛukɛu, nɛɛma biyaa yasin. 8Kɔɔ sabu dɛi, Ama Dɔn sɔwaa gi: “Daa yalu gɔbe nɛ waaru wo ulu le, wo gunɔw kole yai. Wo inɛw bɛrɛ sin obube obaabe.” 9Nɛɛ, “wo ulu” tiyɛ gɔ ingei? Wo laa gɔ, minɛ doɲu yalu too gɔ nɛ sugaabe gɔ woi laa ma? 10Susugonɛ gɔ, aduna puu wo le jooi biyɛ ga, alagala puu daa nɛ ulonɛ gɔ yaa woi. 11Kɔɔbaŋa, inɛw bɛrɛ birɛ bemɛ wo obu: Gamuu Yesu jaŋu unrunw tiyaaɲui, wajunw inɛw Ama titiyaanwin, wajunw Kibɛru Ɛju tagawin, wajunw inɛw teeremɔw lee, jaŋudeerenw leebei. 12Ama inɛw gɔbei, Ama birɛ dɛi yegere ye, Kirisito goju gɔ paŋa bariyɛmɔ ga wo kɔɔ gin’ boju. 13Kunrin emɛ wooi puu gagawu nɛ turu, Ama Ainii jugu nɛ turu biyaain baa yai dɔɔ, iyaa inɛw na, Kirisito bana kibaa wɔɔ nɛ baa dɔwaain biyɛ ga kanrun. 14Kɔɔ biyaai ye, waja emɛ unrunwin biyɛidenɛ. Ooɲɔ diikoro balaa ye sibɛ sibɛ nɛ yaajɛ gin’, inɛw nabaragunw, sosoŋɔ inɛ manamu bemɛ le inɛ lelemɔw gɔbe, deeru bemɛ emi jigemɔidolo. 15Kaa, emɛ ihibɛ le naran sɔɔuwɔin ye, kijɛ puu nɛ bariyɛnu, Kirisito gin’ biyɛdɛin. Kirisito, goju kuu gɔ woi. 16Wo kɔrumɔ le goju yalu dɛin dɛin gɔbe ɛjii tunmɔ aa gɛliyaa, goju na gɔ digu digu gɔbe puu le digɛu sɛɛu turu biyaa wɔɔ. Kunrin, goju yalu gɔ puu, birɛ womɔ bana jaan gin’ birɛu, goju na gɔ gabiyɛu, ihibɛ le paŋa bariyɛuwɔ. 17Nɛɛ Inɛw Baŋa boi le sɔɔ e bɛrɛ sɔwaa, ɛjɛmɔu mu wɔɔ gɔ unwɔ: Inɛw Ama inin, ajubu koolo bemɛ le yaauwɔin gɔbe, yoiyaara ebe nɛ waja be gin’ yaanɔugi. 18Be, hakilɛ bemɛ dɛdɛbɛ. Kuu ɛɛn bemɛ lee, sɔɔ jugɔla be nɛ too gɔ lee dɛi, ɔnmɔ Ama obojɛ gɔ sibɛ go bei yerunwin. 19Kinɛ bemɛ, sɔɔ dɔgɔgu kabugu pajaati. Be kuu sɛlɛ nɛ unrunbei obaa, kanran lɔgɔgu tɔgu dɛin dɛin puu kanraun, iŋi bɛɛnɛ. 20Kaa e kai, Kirisito sɔɔ e dei gɔ kɔɔ gin’ laa. 21E bɛrɛ sɔɔ womɔ sɔwaabɛin, iyaa jaŋu unrunw bɛrɛ kanranɲu gin’ e Yesu nɛ naran too gɔ deeru biyaabei ye kai. 22Waajibi jige pɛi le yaau e bee gɔ, dadaaru inɛ lelemu le digɛu ei yamalau wɔɔ gɔi pajai. 23Kikinu ebe lee, ajubu ebe lee sɛɛu kanai e biyɛmɔu jaain wɔɔ. 24Iyaa e jige kana gɔ kunɔi. Wogɔ Ama le murin maŋaaɲu. Iyaa teitai bii lee, Ama kinɛ aamu lee naran nɛ goojɛ gɔ le woi jugɔmɔjɛ. 25Kɔɔ sabu dɛi, emɛ tunmɔ le goju turu digɛbei dɛi, kakalu pajati ye, e inɛ tuturu puu wo bɔɔnɛ bɛrɛ naran sɔɔ. 26Kinɛ ebe banraain ye, kinɛbanrun ebe hakɛ nɛ ei jɛyaamɔnɔugi. Kinɛbanrun le wɔnu nai numɔnɔugi. 27Jinrun puu kuu baŋa bɛrɛ yalu yooɲu obonɔugi. 28Inɛ gunyɔn gunyɔun bee gɔ, waja gunyɔn gunyɔnnɔu, kaa inɛ kai le wɔɔi bara bɛɛ ga wo mainiyaan ye, numɔ womɔ le birɛ ɛjii wɔɔ birɛ. 29Aŋa ebe nɛ sɔɔ mɔɲu turu kanran goomɔnɔugi. Kaa sɔɔ sɔsɔɔdei biyaai ye, sɔɔ ɛju, inɛw, kai bana be sɛɛ le kɛukɛu, sɔɔ bei bariyɛmɔjɛ, inɛw kekeŋiyɛnw bɛrɛ nɛɛma jɛɛlɛjɛ sɔɔi biyɛmɔi. 30Ama Kikinu Pilu, kuu goonu bai dɛi kole ei sɛɛrɛ kunaaɲu gɔ, kinɛ womɔ jinwɛnmɔnɔugi. 31Kinɛ mɔɲu puu lee, kinɛ ingelemu lee, kinɛbanrun lee, siɲɛ ingelemu lee, boi yamulu lee, iyaa mɔmɔɲu tɔgu puu lee, e nɛ be goomɔi. 32Tunmɔ le ɛjii biyɛi, tunmɔ amasɔgɔ jugɔi. Kirisito le digɛu, Ama ei yaabu kanrun gin’, tunmɔi yaabu kanrain.

will be added

X\