1 Kɔɔ sabu dɛi mu Pɔlu, Kirisito Yesu dɛi kajuginɛi wɔɔ gɔ, e inɛw Yahutunw tɔgui laain gɔbe dɛi gɛɛnjɔn. 2 Ama, nɛɛma womɔ dɛi birɛ e dɛi birɛ ga mu bɛrɛ wo gawuru gɔ sɔɔ e ɛgaabei woi laa? 3 Tiyɛ gɔ, Ama, sɔɔ taguru le mu bɛrɛ sɔɔ boŋurun unrunmɔ wo jugɔmu sɔɔ gɔ woi. Mu kanɛ wogɔ kuu nɛ sɔɔ dumi tɔŋaabɔn. 4 E wogɔ jaŋaajɛi ye, Kirisito sɔɔ boŋurun bana jugaa mu wɔɔ paamu kanrun bɛbɛɛdei. 5 Waaru galu gɔbe nɛ, boŋurun kɔɔ sɔɔ, Adama unrunw bɛrɛ jugɔmɔnɛ. Kaa kanɛ, Ama, Kikinu womɔ le, jaŋu unrunw tiyaaɲu ɛjaa wɔin womɔbe lee, inɛw Ama titiyaanw ɛjaa wɔin womɔbe lee bɛrɛ jugɔmaabe. 6 Boŋurun sɔɔ wogɔ unwɔ: Kibɛru Ɛju gɔ le digɛu, inɛw Yahutunw tɔgui laain gɔbe, Kirisito Yesu nɛ Yahutunw le bari ye kɛn turu gɔi bɛɛɲu. Iyaa Kirisito nɛ be wooi goju turu gɔ digɛi biyaain, iyaa pui tunmɔ gɔ nɛ toin. 7 Ama, nɛɛma mu bɛrɛ wo obu le kɛukɛu, mu bɛrɛ sin kanraan, gɔnrɔn womɔ bana birɛjɛ le digɛu mu Kibɛru Ɛju wogɔ birɛbirɛnɛi biyaa wɔun. 8 Mu Ama inɛw puu logoro nɛ, dagunw nɛ inɛ mu gaila wɔɔ gɔ, Kirisito arusɛgɛ kale jugɔ dɔɔmɔɔlɛ gɔ Kibɛru Ɛju gɔ, inɛw Yahutunw tɔgui laain bɛrɛ taga ga, nɛɛma wogɔ mu bɛrɛ obaaɲu. 9 Iyaa Ama, sɔɔ boŋurun baŋaraan wo sɛbe kɔɔ, bana birɛ birɛido, maa inɛw puu bɛrɛ ɛjɛmɔ gin. Ama, kijɛ wooi maŋanɛ gɔ, waaru giru go galu puu nɛ sɔɔ boŋurun kɔɔ inɛw wooi bɛrɛ baŋaraan sɛbe. 10 Kunrin, alagalabe nɛ kuu bɛɛnw wɔin gɔbe lee, paŋa wɔin gɔbe lee, bemaa kanɛ Ama inɛw mɔɔnu le digɛnu, Ama hakilɛ, bana dɛin dɛin le aŋai jooi wɔɔ jugɔ dɛii. 11 Ama, asuu sɔɔ bana kɛjaa wo sɛbe le kɛukɛu sɔɔ kɔɔ kanrun. Kirisito Yesu, Inɛw Baŋa emɛ le digɛu wo wogɔ kibemu. 12 Kirisito nɛ, emɛ liyɛ sɛlɛ go, wo le gagawu emɛ sɛɛ gɔ le digɛnu, Ama giru nɛ dɔɔ bɛbɛɛɲu ga, diyɛdɔn le wɔin. 13 Kodigɛu, e dɛi ɔɲɛ mu bɛrɛ dɔɔjɛ gɔbe dɛi anrangaju ebe dogonɔu ga, mu e bɛrɛ gɛɛunwɔn. Ebaa dooro bɛɛ ga wogɔbe biyɛuwɔin. 14 Kɔɔ sabu dɛi, Ba Ama, alagala nɛ lee, minɛ nɛ lee tɔgu wɔin puu boi wo nɛ goonɛ baŋa gɔ, mu giru womɔ nɛ tuŋiyɛunwɔn. 16 Womaa, dooro womɔ bana gaai wɔɔ le kɛukɛu, Kikinu womɔ le kinɛ kɔlɔ ebe gɔi gɔnrɔn le paŋa siyɛmɔ ga, 17 iyaa gagawu le Kirisito kinɛ ebe nɛ toiyo ga gɛɛunwɔn. Iyaa ebaa ihibɛ nɛ duu ebe sibe ye, wogɔ nɛ ɛɛn go daana ga gɛɛunwɔn. 18 Ebaa kunrin Ama bana gɔ e nɛ joi ye kale dɔɔ ga, Ama inɛw puu le, Kirisito ihibɛ wawanu gɔ lee, papala womɔ lee, totoo womɔ lee, gagabu womɔ lee paamu bɛɛ ga gɛɛunwɔn. Iyaa Kirisito ihibɛ, jugɔ wooi dɛi sigɛ gɔ jugɔɲu gɔnrɔn bɛɛ ga mu gɛɛunwɔn. 20 Nɛɛ Ama, gɔnrɔn womɔ emɛ nɛ birɛjɛ gɔ le digɛnu, kijɛ puu emɛ gɛɛnjɛ dɛi sigɛ, halu emɛ ajubajɛ dɛi sigɛ kanrun bɛbɛɛjɛ. 21 Boi sɔmu gɔ, Ama inɛw mɔɔnu nɛ lee, Kirisito Yesu nɛ lee, waaru puu asuu womɔi biyɛmɔ, Amina.
