1 Pɔɔlɔ e aduna ɔn bana jeɲaa yaaubei. Iyaa daa go kikinu mɔɲube kuu baŋa, inɛw Ama le yabaanɛbe nɛ kanɛ kikinu birɛjɛ gɔ, e bana womɔ le kɛukɛu yaaubei. Kɔɔ gin’, e sɔɔ yabala ebe le digɛu, hakɛ ebe le digɛu, ei yinwaan yaabe. 3 Emɛ kanran, emɛ puu inɛw kɔɔbe gin’ bɛin. Emɛ pɔɔlɔ dadaaru mɔɲu kinɛ emɛ nɛ goojɛ diŋɛ le kɛukɛu yaaubɛin. Emɛ goju emɛ lee, ajubu emɛ lee diŋɛi kanraunbɛin. Emi bana narin le kɛukɛu, emɛ kanran wajunw gin’, Ama kinɛbanrun panai bɛin. 4 Kaa Ama, amasɔgɔjugɔ womɔ gaai wɔɔ dɛi, iyaa ihibɛ diyɛ le emi ibɛɛ wo bii gɔ dɛi, 5 emɛ sɔɔ yabala emɛ le digɛu inɛw yinwaan yaabɛin gɔ, wo Kirisito le emi ɔnmɔi bojaabe. Nɛɛma le sai ei yabaaɲu. 6 Kirisito Yesu nɛ pagu turu emɛ wɔɔ gɔ nɛ, Ama, Kirisito le emi tunmɔ go bulogaabe. Iyaa, Kirisito le emi tunmɔ go alagala nɛ laamu kanranmaabe. 7 Waaru wɛɛido gɔbe nɛ, Kirisito Yesu nɛ, emɛ sibɛ go Ama ihibɛ wo sɛɛ gɔ le digɛnu, nɛɛma diyɛ kale jugɔmɔɔlɛ womɔ tagara ga, wo kɔɔ kanrun. 8 Sabu nɛɛma le sai ei yabin, gagawu le digɛu bii. Wogɔ e nɛ goolu, Ama sin obui. 9 Inɛ turu kanran kuu unrunmɔ unɔ bɛɛnɔu ga, wogɔ, birɛ le bɛɛmɔlu. 10 Sabu emi Ama numɔbirui. Emaa sɔɔ ɛju kanran ga, Kirisito Yesu nɛ emi maŋi. Emaa sɔɔ ɛju wogɔbe nɛ yaa ga, Ama, giru nɛ baa bei yegeraa boju. 11 Yahutunw, goju guju nɛ sɛɛrɛ inɛw kunɔɲu dɛi, unrunbe araa nɔwaan wɔin gɛɛɲu. E goju sibɛ go tɔgu waja inɛw gɔbe, ebaa araa nɔɔnɛi ga be ei yinboonɔɲu. E inɛw kɔɔ gin’ ei boonɔɲu gɔbe, e pɔɔlɔ bana e bee gɔ naŋanɔugi. 12 Pɔɔlɔ, e Kirisito e le wɔlɔ go bei, e yerunwin bɛin, Ama tɔgu yɛmu inɛwin laai bei. Ama, pui kunaa, aaru wo aaru gɔbe nɛ ei tolo bee. Aduna nɛ e Ama inin go bei, diyɛdɔn sɛbelei. 13 Kaa kanɛ, Kirisito Yesu nɛ, e pɔɔlɔ inɛw wagee bɛin gɔbe, Kirisito ili le digɛu, ei bɛruniyɛnmaaɲu. 14 Sabu Kirisito, emɛ bɛrɛ jamu wo jɛɛlu. Yahutunw lee, tɔgu wajunw lee logoro nɛ kabu kunu jege gɔ, jaŋu be logoro nɛ tobe gɔ, wo wogɔ wolugaa, bei turu bojaabe. 15 Wo tɔgu lɛi gɔbe, unrun le pagu turu wɔnu, bei tɔgu kana turu bojo ga, yiun womɔ le digɛu, Tɔɔru lee, Tɔɔru kijɛ kanran gi gɔ lee, bana kanran wo gi gɔ lee, kijɛi laa boju. Wo be lɛi logoro nɛ kunrin jamu jɛɛlu. 16 Kirisito, baga jai nɛ wo yinwun gɔ le digɛu, jaŋu bemɛ donugaati. Baga jai gɔ le digɛu, wo bei goju turu bojaa, Ama lee, be lee logoro nɛ sɔɔ yegeraabe. 17 Kunrin, e inɛw Ama le wagee bɛin gɔbe lee, be inɛw Ama le bɛrii bɛin gɔbe lee, e puu bɛrɛ Kirisito, jamu Kibɛru Ɛju gɔ tagai wɛi. 18 Sabu emɛ puu, Yahutunw gɔ ma, Yahutunwin laain gɔ ma, Kirisito le digɛnu, Ba Ama giru nɛ Kikinu Pilu turu gɔ le dɔɔ bɛɛɲu. 19 Kɔɔ biyaai ye, nɛɛ e yerunwin laai, kuuseguwin laai. Kaa e Ama inɛw baginrun unrunwin, Ama ginrun gonɔ bɛɛnwin. 20 Ei Yesu jaŋu unrunw tiyaaɲu gɔbe lee, inɛw Ama titiyaanw lee bɔlɔtei gɔ nɛ daanaaɲu. Kirisito Yesu, wo kuu womɔ le ginrun sibɛ tibu gɔ woi biyaa wɔɔ. 21 Ginrun gɔ puu wo nɛ sɛɛu tunmɔ aa, Inɛw Baŋa nɛ Ama Ginrun Diyɛ dɛiin wɔɔi biyɛ ga ulouwɔ. 22 E kanran, Kirisito nɛ wajunw gɔ le mɔrinyaan, Ama, Kikinu womɔ le ginrun nɛ wo toi biyɛ ga, ei ujiyɛuwɔ.
