EPƐSE 1

1Mu Pɔlu, Ama diŋɛ le Kirisito Yesu jaŋu ii tiyaaɲui wɔɔ gɔ, Ama inɛw, iyaa inɛw Kirisito Yesu nɛ sɔɔ turu bɛɛnwin biyaa, Epɛse ana nɛ wɔin gɔbe, e bɛrɛ lɛtɛrɛ ɔn tiiuwɔn. 2Ama emɛ Ba lee, Inɛw Baŋa Yesu Kirisito lee, e bɛrɛ nɛɛma lee, jamu lee obo. 3Inɛw Baŋa emɛ Yesu Kirisito Ama gɔ, iyaa wo Ba gɔ, Kirisito le digɛu, kikinu sibɛ go duba tɔgu puu le alagalabe nɛ emi duba kanraanjɛ baŋa gɔ, woi sɔmɔmɔi. 4Sabu Ama emaa giru unrunmɔ nɛ inɛw ɛjaa, jarugu sɛnɛi biyɛ ga, aduna maŋamɔ nɛ baa, Kirisito nɛ wo emi yɛmaabe. Ama, ihibɛ womɔ sabu dɛi, 5giru nɛ baa, diŋɛ womɔ dɛnɛ le kɛukɛu, Yesu Kirisito le digɛnu emi unrunw unrunmɔi bojodo ga kɛjaatiyaabe. 6Aini ibɛ womɔ le digɛu nɛɛma diyɛ emɛ bɛrɛ wo obu gɔ dɛi emaa unruin sɔmɔ ga wo wogɔ kanrun. 7Aini gɔ ili le emɛ kuu goonu biyaa, hakɛ yaabu kanrun biyaaɲu. Ama, nɛɛma womɔ bana gaai wɔɔ gɔ kɔɔ gin’ emɛ bɛrɛ taguru. 8Nɛɛma wogɔ, wo emɛ bɛrɛ gagaa gɔ tiyaa, jugɔ puu lee, hakilɛ puu lee emi obaajɛ. 9Wo diŋɛ womɔ sɔɔ boŋurun, wo bɛrɛ ɛju gin’ kɛjaa, Kirisito le digɛnu kibemɔdo ga wo sɛbe gɔ, emɛ bɛrɛ jugɔmaabe. 10Wogɔ unwɔ: Alagala nɛ kijɛ toin wooi lee, minɛ nɛ kijɛ wɔin wooi lee, puu mɔɔnaa ye kuu baŋa turu bojodɛin. Wogɔ Kirisitoi. Waaru gɔbe kibaain biyaai ye, Ama kijɛ kanrando ga kɛjaa wo wɔɔ gɔ kɔɔ woi. 11Iyaa, Ama, Kirisito nɛ emaa inɛw unrunmɔi biyɛ ga emi yɛmaabe. Wo kuu womɔ diŋɛ le sɔɔ kɛjɛjɛ baŋa gɔ, giru nɛ baa diŋɛ womɔ le kɛukɛu sɔɔ wogɔ kɛjaatiyaabe. 12Emɛ, inɛw emɛ laa Kirisito nɛ gagawu emɛ kuni gɔbe, Ama, boi womɔ gaai wɔɔ dɛi emaa unruin sɔmɔ ga wogɔ kanrun. 13E kanran, naran sɔɔ gɔ, tiyɛ gɔ Kibɛru Ɛju sɔɔ le yayabu e bɛi gɔ, wogɔ e ɛgu onu nɛ, e Kirisito le gawaabei. Iyaa Kirisito nɛ pui kunaa Kikinu Pilu obin gɔ le e nɛ sɛɛrɛ kunaabɛin. 14Kikinu Pilu wogɔ, kɛn emɛ giruduunu gɔ woi. Ama, boi womɔ gaai wɔɔ dɛi, unruin sɔmɔ ga, inɛw unrunmɔi wo boju gɔbe kuu goonu ye, be bɛrɛ kɛn wo oboido gɔ giruduuni. 15Kɔɔ sabu dɛi, Inɛw Baŋa Yesu le gagawu e sɛɛ lee, Ama inɛw wooi le ihibɛ e sɛɛ lee sɔɔ sɔɔu be wɔu ɛgaa, 16mu kai e dɛi Amai birɛpoo tagu pajalun. Mu amagɛɛn ma nɛ ei naŋauwɔlɔn. 17Inɛw Baŋa emɛ Yesu Kirisito Ama gɔ, Ba dooro baŋa gɔ, ebaa woi jugɔ ga, Kikinu, hakilɛ lee, jugɔ lee ei obojɛ womaa e bɛrɛ obo ga gɛɛunwɔn. 18Iyaa ebaa boonu ei wo boonu gɔ le diyɛdɔn digɛ gɔ jugɔ ga, ebaa inɛw womɔ bɛrɛ kɛn ɛju naa ɛju wo oboido gɔ bana gaai wɔɔ gɔ jugɔ ga, iyaa, emɛ inɛw gawaa wɔin nɛ gɔnrɔn diyɛ kale sɛlɛ womɔ bana birɛ birɛjɛ ebaa jugɔ ga, Ama womaa kinɛ ebe giri wijɛmɔ ga, mu gɛɛunwɔn. Gɔnrɔn kɔɔ, paŋa diyɛ womɔ le kɛukɛu birɛ birɛjɛ. 20Paŋa diyɛ kɔɔ le Ama, Kirisitoi yiun logoro nɛ bulomaa goonaa, alagala nɛ woi numɔ iin unrunmɔ sibɛ nɛ dɛinyɛnmu. 21Wo kɔɔ nɛ woi kuu bɛɛnw wooi kuu nɛ lee, paŋa wooi kuu nɛ lee, gɔnrɔn wooi kuu nɛ lee, laamu wooi kuu nɛ lee iyaa aduna ɔn nɛ sai laa, halu aduna wɛɛido nɛ boi boo bɛɛmɔjɛ puu kuu nɛ lee daanaa sɛɛ. 22Ama, kijɛ puu Kirisito kubɔ doɲu nɛ kunaa, Ama inɛw mɔɔnu, Kirisito gojui wɔɔ gɔ nɛ kijɛ puu kuu baŋa gɔ woi bojaabe. Kirisito, kijɛ puu, yalu puu nɛ sɛɛu joonɔnɛ baŋa gɔ, Ama inɛw mɔɔnu nɛ sɛɛu jowaa wɔɔ.

will be added

X\