KANRAN 9

1Ainɛ Sɔlu gɛɛɲu gɔ nimɛ kanran Inɛw Baŋa jaŋu unrunw gɔi liirɛmɔube. Wo bei dai dɛnɛube. Kunrin wo, Ama bɛrɛ sadagadɔɔnɔnɛ kuu baŋa gɔi yaa tɛmaa, 2Damasu Ama gɛɛn ginrun gɔbe dɛi lɛtɛrɛ unrun bɛrɛ tɔŋɔ obo ga gɛnyaanbe. Ama ginrun kɔɔbe nɛ, Inɛw Baŋa Yesu oju, inɛw dimɛi yɔin ye, anranw sɛlɛ, yaanw sɛlɛ, wo bei aa kɔmaa ye, Jerusalɛmu ana nɛ jɛɛlɛ ibɛi bee. 3Kunrin, wo oju gowaa yaaube. Damasu ana le bɛrii wo wɔu, kubɔ turu wijɛ alagala gowaa wiyaa, sibɛ womɔ puu wijɛmaabe. 4Woi minɛ nɛ numaa sugaabe. Mii turu wo le sɔɔ sɔɔuwɔ wo ɛgɛube. Mii gɔ ɔn gin’ gɛɛbe: «Sɔlu, Sɔlu, u inge dɛi mui tɔɔɲɔuwɔu?» 5Sɔlu saa kijɛ gi: «Ui aai ma Inɛw Baŋa?» Mii gɔ saa gi: «Mu Yesui. Inɛ tɔɔɲɔu u wɔɔ gɔ mui. 6Ingele, ana kɔlɔ nɛ yoo. Kɔɔ nɛ kijɛ kanraun u jaan gɔ u bɛrɛ tatagadɛin.» 7Sɔlu le digiyaa inɛw yaau bɛin gɔbe puu kinɛ manaa, iŋiyaan dɛɛnrinyaain. Be sɔɔ turu kanran sɔwaa bɛɛnɛ. Be mii ɛgɛubɛin, kaa inɛ turu kanran iyeu benɛ. 8Sɔlu, minɛ nɛ ingelaabe. Wo giri ɛjii gɔmaa gɛlɛbe. Kaa kijɛ kanma iyeu bele. Numɔ womɔ aa, woi dimɛraan, Damasu ana nɛ kuni. 9Bai taanu, wo kijɛ turu kanran iyelu, pana kayalu, dii yaa nɔɔlu. 10Damasu nɛ jaŋu ii turu yabe. Boi womɔ Ananiasu gɛɛbɛin. Inɛw Baŋa, kuu iye nɛ woi boonaa, Ananiasu wo giyaa, Ananiasu saa: «Mu unwɔ, Inɛw Baŋa.» 11Inɛw Baŋa wo le kijɛ gi: «Ingele, ana kɛri Demu wɔɔ gɛɛɲu gɔ nɛ yaa. Ainɛ Judasu gɛɛɲu ginrun dɛnaajɛu ye, Taruse ana bɛɛnnɛ Sɔlui digɛu gɛɛ. Wo kɔɔ nɛ Ama gɛɛun yato. 12Wo kuu iye nɛ u Ananiasui iyaabe. U ginrun wo too gɔ nɛ yowaa, womaa giri iye ga, kuu womɔ nɛ numɔ yaŋaraan, Ama gɛɛun u wɔu wo iyaabe.» 13Ananiasu aŋa womɔ saa: «Inɛw Baŋa, ainɛ kɔɔ inɛw uwɔbe bɛrɛ Jerusalɛmu nɛ mɔɲu bana ɛjii wo kanrun, inɛw joo sɔɔu be wɔu mu ɛgaabɔn. 14Ana ɔn nɛ yaa, inɛw boi uwɔ boonɔw puui pagaa ye yaa ga, wo gɔnrɔn yasɛ. Ama bɛrɛ sadagadɔɔnɔw kuu bɛɛnw, wogɔ gɔnrɔn wo bɛrɛ obaaɲu.» 15Inɛw Baŋa saa: «U kai yaa. Tɔgu wajunw lee, ɔgɔnw bemɛ lee, Isɛrɛlu unrunw lee bɛrɛ boi ma jugɔmɔ ga birɛbirɛnɛ mu yɛmu gɔ kɔɔ woi. 16Boi ma dɛi bana wo ɔɲɔido gɔ mu wo bɛrɛ jujugɔmɔdɔn.» 17Inɛw Baŋa kunrin wo sɔwaa, Ananiasu gowaa, yinyai. Wo ginrun gɔ nɛ dɔwaa, Sɔlu kuu nɛ numɔ yaŋaraan, ɔn gin’ wo le sɔi: «Mu bainɛ Sɔlu, oju nɛ wɛɛu u wɔu, Inɛw Baŋa Yesu, unruin u bɛrɛ tagaranɛ gɔ, uwaa pilemɛ ye giri iye ga, uwaa, Kikinu Pilu le jooi biyɛ ga, mui u bɛrɛ wo tii.» 18Ananiasu kunrin gɛɛu wo digɛu, Sɔlu giri nɛ kogo gin’ kijɛ gowaa bagaabe. Wo pilemaa, giri iyeube. Wo ingelaa, batise yowaabe. 19Kɔɔ onu nɛ wo jaa kayaa, paŋa biyaabe. Damasu ana nɛ jaŋu unrunw toin gɔbe le Sɔlu bai gaila biyaabe. 20Tanwanlu, ɔgu kɛu wo Ama gɛɛn ginrun gɔbe nɛ Yesu dɛi waaju kunɔu, Ama Aini gɔ woi gɛɛube. 21Inɛw sɔɔ womɔ ɛgɛnw puu bɛrɛ maunɛ kanraunbe. Kijɛ be gɛɛbe: «Jerusalɛmu nɛ Yesu boi boonɔwin ainɛ ɔɲɔmɔu bee gɔ, ɔn woi laa ma? Damasu nɛ Yesu boi boonɔw aa pagaa ye, Ama bɛrɛ sadagadɔɔnɔw kuu bɛɛnw bɛrɛ jɛyaado ga, wo kodɛi tee ɔn nɛ wɛɛlu ma?» 22Kaa Sɔlu, waaju womɔ bai puu paŋa kunɔ kunɔ yaaube. Ama Yabanɛ Diyɛ tii gɔ Yesu woi ga jugɔmaa wo jɛ ye, Damasu nɛ Yahutunw bɛin gɔbe sɔɔ saaɲu bɛɛubenɛ. 23Kɔɔ gin’ bai dagaa galaa wo yaa, Yahutunw tunmɔ le aaraa Sɔlui daitiimɔ gin. 24Sɔlu, yeguru bemɛ soo biyaabe. Be woi daadɛin ga ana murɔn aŋa gɔ, aga lee, digɛ lee dɔmiyɛunbɛin. 25Kaa digɛ turu jaŋu unrunw womɔbe woi tomɔ diyɛ nɛ kunaa, jege gɔ le bain go sunugaabɛin. 26Nɛɛ, Jerusalɛmu ana nɛ waaru wo dɔi le, Sɔlu, jaŋu unrunw logoro nɛ yoi dɛnaabe. Kaa jaŋu unrunw gɔbe puu woi liyɛubɛin. Wo Yesu jaŋu ii biyaai ga, be wogɔ le ɛjii gawanɛ. 27Kunrin wo wɔu, Barunabasu woi dimɛraan, jaŋu unrunw tiyaaɲu gɔbe bɛrɛ jɛyaabe. Damasu oju nɛ Sɔlu, Inɛw Baŋai bana wo iyi lee, Inɛw Baŋa wo le sɔɔ bana sɔi lee, be bɛrɛ tagaabe. Iyaa, Damasu ana nɛ, Yesu boi le anrangaju le waaju bana wo kanrun be bɛrɛ tagaabe. 28Kɔɔ gin’ wo Jerusalɛmu ana yalu be yoobe wooi nɛ, be le yadigɛbe. Wo anrangaju le Inɛw Baŋa Yesu boi le waaju kanraunbe. 29Sɔlu iyaa, Yahutunw inɛw Gɛrɛku sɔɔ sɔɔnw gɔbe le sɔɔ sɔɔube. Be wooi jiiru jiireubɛin. Kaa kɔɔbɛɛnw woi daa ga dɛnɛubɛin. 30Ba unrunw wogɔ soo biyaa, Sɔlui dimɛraan, Sesare ana nɛ jɛyaa, Taruse ana nɛ tiyaabɛin. 31Kunrin, Judea gana lee, Galile gana lee, Samari gana lee puu nɛ, Ama inɛw mɔɔnu jamu le bee. Ɛjii paŋa kunɔube. Inɛw Baŋa giri liyɛ le yaaube. Kikinu Pilu kɔrumɔ le bariyɛube. 32Piɛru, gana kɔɔ puu nɛ gɔŋɔlɔube. Kunrin, wo Lida ana nɛ Ama inɛw wɔin gɔbei yɛnɛi yaabe. 33Ana kɔɔ nɛ wo ainɛ turu tɛmaabe. Boi womɔ Enɛ gɛɛbɛin. Anranguju gagara baa, goju yinwaan, wo teenu nɛ diinbe. 34Piɛru wo le kijɛ gi: «Enɛ, Yesu Kirisito ui bajamɔuwɔ. Ingele, kuu uwɔ le teenu uwɔ bile.» Ɔgu kɛu Enɛ ingelaai. 35Lida ana bɛɛnw puu lee, Sarɔn yalu wanu nɛ inɛw daain gɔbe lee woi iyaa, Inɛw Baŋa le tubiyaabɛin. 36Jope ana nɛ yaanran jaŋu ii turu yabe. Boi womɔ Tabita gɛɛɲu. Gɛrɛku sɔɔ le Dɔruka gɛɛɲu, tiyɛ gɔ wilu. Yaanran kɔɔ birɛ ɛju joo birɛube. Iyaa, naugunw bɛrɛ ɛjii kijɛ oboube. 37Piɛru Lida ana nɛ waaru bee gɔ le tee, yaanran kɔɔ jiun sugaa, yinwaain. Inɛw, yiun gɔ inɛraan, ginrun sɔɔrɔ nɛ dabaraabɛin. 38Nɛɛ, Jope lee, Lida lee wagela bee dɛi, jaŋu unrunw Jope nɛ wɔin gɔbe, Piɛru Lida nɛ yɔɔ ga ɛgaa, inɛw lɛi goonaa tiyaa, Piɛru bɛrɛ gɛnyaan, womaa, tanwanlu go ɔgu unrunbe bɛrɛ wɛɛ gin. 39Piɛru ɔgu kɛu inɛw wɛin gɔbe le digiyaa yaabe. Waaru Jope nɛ be dɔi le, be woi dimɛraan, ginrun sɔɔrɔ gɔ nɛ unaabɛin. Yapanuw kɔɔ nɛ bɛin gɔbe puu Piɛru genɛ nɛ ɛjii sɔmiyɛun wiyaabɛin. Dɔruka be le wɔu, arugoi diyɛ lee, dagibe lee ajaraa, be bɛrɛ wo obu gɔ, be wogɔ Piɛru bɛrɛ tagaraubɛin. 40Piɛru, ginrun gɔ nɛ inɛw gɔ puu goonɔmaatiyaa, tuŋiyaan Ama gɛnyaanbe. Kɔɔ onu nɛ yiun sibɛ go unruin kigelemaa, kijɛ wo gi: «Tabita, ingele.» Kunrin wo giyaa, Tabita giri kumɔlaabe. Piɛrui iyaa, wo ingelaa dɛinyaanbe. 41Piɛru wo bɛrɛ numɔ dɛɛraa, woi jeɲaa ingelemaabe. Kɔɔ onu nɛ, wo yapanuw gɔbe lee, Ama inɛw wajunw gɔbe lee boonaa, Tabita ɔnmɔi be bɛrɛ tagaraabe. 42Jope ana puu, sɔɔ gɔ ɛgaabe. Inɛw joo Inɛw Baŋa le gawaabɛin. 43Jope nɛ Piɛru, waaru gaila, ainɛ guju birɛbirɛnɛ turu Simɔ gɛɛɲu ginrun nɛ biyaabe.

will be added

X\