KANRAN 8

1Etiɛnu yiun gɔ, Sɔlu kinɛ aabe. Bai wogɔ Jerusalɛmu Ama inɛw mɔɔnu gɔi ɛjii ɔɲɔmɔi tɔlaabɛin. Yesu jaŋu unrunw tiyaaɲu gɔbei laa ye, inɛw wajunw gɔbe puu ginaa, Judea gana go lee, Samari gana go lee yaabɛin. 2Inɛw Ama liyɛnw gamuu Etiɛnu yiun gɔ jeɲaa bojaatiyaa, wo dɛi ɛjii sɔmiyaanbɛin. 3Sɔlu kai, Ama inɛw mɔɔnu suyodo dɛi ɛjii mainiyɛunbe. Wo ginrun ginrun nɛ yowaa ye, jaŋu unrunw, anranw lee, yaanw lee, paŋa le aa ye kaju nɛ kunɔube. 4Inɛw ginaa yain gɔbe, yalu dɛin dɛin nɛ Kibɛru Ɛju waaju tagaubɛin. 5Kunrin Pilipe, Samari ana diyɛ gɔ nɛ yaa, Ama Yabanɛ Diyɛ tii gɔ Yesui ga waaju kanraunbe. 6Inɛw, Pilipe sɔɔ gɔ ɛgaa, taanrinyɛn wo kanranbe gɔ iyaa, ajubu turu le biyaa, sɔɔ womɔ ɛjii keŋiyaanbɛin. 7Jinrunbe kɔun diyɛ kɔnwɔnnu, inɛw joo kuu nɛ gooubɛin. Inɛw goju yinwaan lee, tegutegenw joo lee bajaubɛin. 8Kunrin, ana gɔ nɛ kinɛ ɛɛlu diyɛ yabe. 9Ana kɔɔ nɛ pɔɔlɔ baa, ainɛ turu yabe. Boi womɔ Simɔ gɛɛɲu. Wo dugu womɔ birɛ le Samari inɛwin maunɛ kanranmɔube. Iyaa, unruin inɛ diyɛi ga be bɛrɛ tagaube. 10Kuu bɛɛnw nɛ goi ye, inɛw wajunw nɛ yai dɔɔ puu Simɔi ɛjii keŋiyɛunbɛin. Kijɛ be gɛɛbe: «Inɛ ɔn, Ama gɔnrɔn, gɔnrɔn diyɛ gɔ woi.» 11Simɔ, dugu birɛ womɔ le inɛwin maunɛ kanranmɔi wo tɔlu tanwaain gɔ digɛu, inɛw sɔɔ womɔ keŋiyɛunbɛin. 12Kaa Pilipe, Ama diinɛ Kibɛru Ɛju sɔɔ lee, Yesu Kirisito Kibɛru Ɛju sɔɔ lee waaju wo kanraan, anranw lee, yaanw lee Pilipe sɔɔ gɔ le gawaa, unrunbei batise kunɔmaabɛin. 13Simɔ, wo yaa sɔɔ gɔ le gawaa, unruin batise kunɔmaabe. Wo Pilipe onu nɛ pilemɛubele. Sɛɛrɛ taanrinyɛn lee, birɛ taanrinyɛn waja Pilipe birɛube gɔ lee woi ɛjii maunɛ kanraunbe. 14Nɛɛ, Yesu jaŋu unrunw tiyaaɲu Jerusalɛmu nɛ wɔin gɔbe, Samari bɛɛnw Ama sɔɔ le yabaaɲu ga ɛgaa, be Piɛru lee, Jan lee be bɛrɛ tiyaabɛin. 15Piɛru lee, Jan lee Samari bɛɛnw bɛrɛ yaa, bemaa Kikinu Pilu bɛɛ ga, be dɛi Ama gɛnyaanbɛin. 16Waaru kɔɔ le, Samari bɛɛnwin Inɛw Baŋa Yesu boi le batise kunaabɛin laa ye, inɛ turu kanran kuu nɛ nimɛ Kikinu Pilu sugolu bee. 17Kunrin, Piɛru lee, Jan lee inɛw kuu nɛ numɔ yaŋaraan, Ama gɛnyaanbɛin. Inɛw gɔbe Kikinu Pilu biyaabɛin. 18Jaŋu unrunw tiyaaɲu gɔbe, jaŋu unrunw kuu nɛ numɔ waaru be yaŋaranjɛ le, Ama Kikinu gɔ jaŋu unrunw kuu nɛ sugojɛ ga, Simɔ iyaabe. Wo Piɛru lee, Jan lee bɛrɛ buudu goonaa jɛɛlaa, 19gi: «Mu bɛrɛ yaa gɔnrɔn kɔɔ oboi. Inɛ aai kanran kuu nɛ numɔ yaŋaraanjɔn ye, kɔɔbaŋa Kikinu Pilu bɛɛ ga mu bɛrɛ yaa gɔnrɔn kɔɔ oboi.» 20Piɛru aŋa womɔ saa kijɛ gi: «Ama, inɛ bɛrɛ sin obu wo obojɛ gɔ, buudu le ɛbɛ bɛbɛɛmɔjɛ ga u yinhajubu dɛi u lee, buudu uwɔ lee yasuiyoi. 21Ai, u kinɛpilu le Amai digɛlau. Kɔɔ sabu dɛi Ama sin obu ɔn sɔɔ nɛ ui tolo, gamulu uwɔ wɔlɔ. 22Wogɔ digɛu, ajubu mɔɲu u sɛɛ gɔ pajaatiyaa ye, Inɛw Baŋa bɛrɛ ajubu mɔɲu kɔɔ dɛi ui yaabu kanrun bɛbɛɛmɔdo ma gɛɛn. 23Kɔɔi laa ye, u hakɛ le pagiyaa, ajubu mɔɲu le jowaa wɔu ga mu iyeuwɔn.» 24Simɔ, aŋa womɔ saa kijɛ gi: «Mɔɲu mu bɛrɛ wɛwɛɛdo u gi kɔɔbe turu kanran mu bɛrɛ dɔɔnɔu giye, e kuu ebe le mu dɛi Inɛw Baŋa bɛrɛ gɛɛin.» 25Kunrin, Samari nɛ sɛɛrɛ gowaa, Inɛw Baŋa sɔɔ waaju kanraantiyaa, Piɛru lee, Jan lee Jerusalɛmu pilemaa yaabɛin. Samari gana ana be galabe joo nɛ, be Kibɛru Ɛju gɔ waaju kanraunbɛin. 26Inɛw Baŋa mɛlɛnkɛ turu Pilipe le sɔwaa kijɛ wo gi: «Ingele, tɛŋurun sibɛ go yaa. Jerusalɛmu goi ye Gaja oju sugojɛ, olusolo oju gɔ aa.» 27Pilipe ɔgu kɛu ingelaa yaabe. Oju nɛ Etiopi ainɛ turu be lɛi sɛgɛraabe. Ainɛ wogɔ, Etiopi ɔgɔ yaanran birɛbirɛnɛ diyɛi bee. Kijɛ womɔ puu, ainɛ kajubanɛ gɔ woi. Ainɛ kɔɔ, Ama demɛniyɛnmɔ ga Jerusalɛmu wiyaa, 28pilemaa yaau, wogotoro womɔ nɛ inɛ Ama titiyainɛ Esayi dɔn jaŋaube. 29Ama Kikinu, Pilipe le sɔwaa, kijɛ gi: «Wogotoro kɔɔi yai dɔɔ.» 30Pilipe jɔbaa yaa, Etiopi ainɛ gɔ Esayi dɔn jaŋau wo wɔu ɛgaabe. Pilipe wo bɛrɛ selumaa gi: «Kijɛ u jaŋajɛ gɔ tiyɛ paamu kanraunwɔu ma?» 31Ainɛ gɔ saa: «Inɛ mu bɛrɛ tiyɛ gɔ tagajɛ wɔlɔ ye, mu yani paamu kanrun bɛɛdɔn?» Kunrin sɔwaatiyaa, wo Pilipei gɛnyaan, womaa wogotoro gɔ nɛ wɛɛ yoo dɛinyɛn gi. 32Ainɛ gɔ Ama Dɔn yalu wo jaŋabe gɔ unwɔ: “Peju dimɛrɛn ye sɛnwɛin bana yaaɲu gin’, woi dimɛraan yaabɛin. Peju ii, kukuli womɔ goonɔnu be wɔnu, piilɛ bana wɔɔ gin’, wo yaa aŋa gɔmaa, sɔɔ sɔɔlu. 33Wo bɛrɛ dɔgɔ tagaraabɛin. Naran wo bɛrɛ obo ga yabanɛ. Aduna nɛ woi daabɛin. Nɛɛ, tɔgu womɔ sɔɔ, inɛ sɔɔ bɛɛido gɔ aai?” 34Ainɛ gɔ Pilipe le kijɛ wo gi: «Inɛ Ama titiyainɛ gɔ sɔɔ ɔn aa dɛi sɔɔjɛ ma, mainiyaanjɛu ye mui taga. Kuu womɔ sɔɔi sɔɔjɛ ma, inɛ waja dɛi sɔɔjɛ?» 35Ainɛ gɔ kunrin wo sɔwaa, Pilipe yalu kɔɔ nɛ sɔɔ tɔŋɔ le tɔlaa, Yesu Kibɛru Ɛju sɔɔ wo bɛrɛ tagaabe. 36Be oju bemɛ digiyaa yaau, dii yalu nɛ dɔwaabɛin. Etiopi ainɛ gɔ gi: «Dii unwɔ. Batise yoo ga kijɛ inge mui tɛŋɛjɛ?» [ 37Pilipe aŋa womɔ saa gi: «Kinɛ uwɔ wooi le gawaa wɔu ye, wogɔ kanran bɛbɛɛmɔdo.» Ainɛ gɔ iyaa saa, ɔn gin’ sɔi: «Yesu Kirisito, Ama Ainii ga mu gawaa wɔun.»] 38Kunrin sɔwaatiyaa, wo wogotoro gɔ iŋiyɛnmɔ ga tɔɔraabe. Pilipe lee, wo lee wogotoro gɔ nɛ sugaa, dii nɛ yowaabɛin. Kunrin, Pilipe woi batise kunaabe. 39Dii gɔ nɛ waaru be goi le, Inɛw Baŋa Kikinu, Pilipei jeɲaajɛ. Etiopi ainɛ gɔ waja woi iyelu. Kaa wo kinɛ ɛɛli le oju unrunmɔ digiyaa yaaube. 40Pilipe kai wo unruin Ajɔte ana nɛ wɔɔ tɛmaabe. Kɔɔ onu nɛ, Sesare ana nɛ wo dɔɔido baa, wo ana wo galu puu nɛ Kibɛru Ɛju waaju gɔ kanraanbe.

will be added

X\