KANRAN 7

1Ama bɛrɛ sadagadɔɔnɔnɛ kuu baŋa gɔ, Etiɛnui selumaa gi: «Kɔɔ gin’ bii ma?» 2Etiɛnu, aŋa womɔ saa gi: «Mu babe lee mu ba unrunw lee, sɔɔ ma keŋiyɛin. Emɛ ba Abarahamu, Haran gana nɛ waaru dɛinyɛnlu wo bee le, Mɛsopotami gana nɛ wɔu, Ama, dooro baŋa gɔ, wo bɛrɛ unruin tagaraabe. 3Ama wo le kijɛ gi: ‘Gana uwɔ nɛ ingele, u maranw le kabiyɛ. Gana u bɛrɛ mu tagaraido gɔ nɛ yaa dɛinyɛn.’ 4Ama kɔɔ gin’ wo sɔwaa, Abarahamu Kalude bɛɛnw gana gɔ nɛ ingelaa, Haran yaa yindɛinyin. Wo ba yinwaan wo kanran, kɔɔ nɛ ingelaa, kanɛ gana e wɔɔ ɔn nɛ Ama woi yinwɛɛmu. 5Gana ɔn nɛ, Ama, Abarahamu bɛrɛ yalu turu kanran obolu. Halu, numɔ taga gin’ kanran obolu. Kaa, halu Abarahamu wogɔ waaru le ii sɛbele kanran, Ama, gana gɔ wo lee, unrunw womɔ, onu womɔ nɛ wɛɛidɛin lee bɛrɛ ohobodo ga pui kunaabe. 6Ama wo le ɔn gin’ sɔi: ‘Tɔgu u tɔgɔido gɔ, gana turu nɛ yeru dɛdɛinyɛndo. Woi gunɔ kunɔ ye, anranguju suŋu nai baa ɔhɔɲɔmɔdɛin. 7Kaa, tɔgu bei gunɔ kunɔido gɔ, mu Ama, saliyɛ bemɛ mu kiredo. Kɔɔ onu nɛ be gunɔ goi wɛi ye, yalu ɔn nɛ mui bababadɛin.’ 8Kɔɔ onu nɛ, Ama araa nɔɔmu le, Abarahamu le pui jeɲaabe. Kunrin, Abarahamu Isakai naraan, bai gagaraye gɔ le woi araa nɔɔmaabe. Isaka yaa ii womɔ Jakɔbu bɛrɛ kunrin kanraanbe. Jakɔbu yaa unrunw pɛli lɛisigɛ womɔ, tirɛ anranw diyɛnw gɔbe bɛrɛ kunrin kanraanbe. 9«Emɛ babe, tirɛ anranw diyɛnw gɔbe, be suŋɔrɔn Josɛpu sibɛ go ele le biyaa, inɛw Ejipute yaaubɛin bɛrɛ woi gunɔ dɔnraanbɛin. Kaa Ama, Josɛpu le bee. 10Wo ɔɲɛ womɔ wooi nɛ woi goonaabe. Ama Josɛpui baraa, Ejipute ɔgɔnɛ bɛrɛ sɔɔ womɔ ɛjii bee. Ɔgɔnɛ giru nɛ Josɛpu hakilɛ baŋai bee. Kunrin ɔgɔnɛ, Josɛpui, Ejipute gana puu kuu baŋai bojaabe. Iyaa, ginrun unrunmɔ nɛ, sɔɔ puu Josɛpu sagi bojaabe. 11Aiwa, Ejipute gana puu nɛ lee, Kaana gana nɛ lee giyɛ diyɛ yowaabe. Giyɛ gɔ mɔɲuniyaan gabaa, emɛ babe pana kayaɲu bɛɛubenɛ. 12Nɛɛ, Ejipute nɛ dɛnrɛn yɔɔ ga Jakɔbu ɛgaa, wo emɛ babei kubɔ pɔlɔ gɔ dɛnrɛn ɛbɛ ga tiyaabe. 13Kubɔ lɛiye gɔ Ejipute nɛ dɛnrɛn ɛbɛi be yaa, Josɛpu wo ba unrunw bɛrɛ unruin jugɔmaabe. Kunrin, Ejipute ɔgɔnɛ, Josɛpu tɔgu jugaabe. 14Kɔɔ onu nɛ, Josɛpu, titii tagaa tiyaa, unrun ba Jakɔbu womaa, wo maranw puu le, Ejipute wɛɛ dɛinyɛn gi. Be inɛ pɛsɔi numɔrɔnsigɛ bɛin. 15Jakɔbu kunrin Ejipute yaa dɛinyaanbe. Wo lee, emɛ ba gɔbe lee puu kɔɔ nɛ yayinwin. 16Bei duiyaa, Sisɛmu nɛ jɛyaabɛin. Abarahamu, Hemɔru unrunw bɛrɛ buudu le ɔnsain Sisɛmu ana nɛ wo ɛbu gɔ nɛ bei duunaabɛin. 17«Ama, Abarahamu le pui wo kunu kibeido waaru bɛruniyaan wo kanran, Ejipute nɛ, inɛw emɛ gɔbe ɛjii narinyɛin tɔlaabɛin. 18Kunrin, ɔgɔnɛ waja turu Ejipute kuu nɛ dɛinyaanbe. Wo Josɛpui inɛɛ bee. 19Ɔgɔnɛ wogɔ, tɔgu emɛ sibɛ go jama le biyaa, emɛ babei ɛjii ɔɲɔmaabe. Ɔɲɔmu gɔ bana mɔɲii bee gɔ, emɛ babe, unrunw banrin bemɛ ginrun nɛ kara gɛliyɛɲu sɛbenɛ. Be bain go, unrunw gɔi yiun aŋa nɛ kamu pajaubɛin. 20Mɔisei, waaru kɔɔ le narin. Anran ɛju bana wo sɛbe gɔ gabaai. Wo na, iyepilu taanu ginrun nɛ woi aramaabe. 21Kaa, woi waaru kamaa pajin le, ɔgɔnɛ iyaa gɔ woi jeɲaa, ii unrunmɔ gin’ kɔwaabe. 22Kunrin, Ejipute bɛɛnw kijɛ jugɔjɛ puu nɛ Mɔisei deeraabɛin. Sɔɔ womɔ nɛ lee, birɛ womɔ nɛ lee Mɔise ɛjii gɔnrɔn yasɛbe. 23«Anranguju pɛnai waaru wo bɛi le, Mɔise wo ba unrunw, Isɛrɛlu tɔgu gɔbei yɛnɛi yai ajubu biyaabe. 24Kunrin, Ejipute bɛɛnnɛ turu wo ba ii ɔɲɔmɔu wo wɔu iyaa, Mɔise wo ba ii boru bariyaabe. Wo Ejipute bɛɛnnɛ gɔi daa, wo bainɛ duguru gowaabe. 25Mɔise ajubu nɛ, Ama wo le digɛnu bei yabado ga, wo ba unrunw paamu kakanrandɛin ga sɛbe. Kaa wo ba unrunw gɔbe wogɔ paamu kanrannɛ. 26Bai wogɔ aga baa yaa gɔ, Isɛrɛlu unrunw lɛi tunmɔ le jaiyɛu be wɔu Mɔise sɛgɛraabe. Wo be lɛi aŋurun ye, bemaa jamu le biyɛ ga dɛnaabe. Wo gi: ‘Yɛnɛi, e lɛi ba unrunwin. E inge dɛi tunmɔi ɔɲɔmɔuwɔi?’ 27Inɛ wo bainɛi ɔɲɔmɔu bee gɔ, woi damaa, wo le kijɛ gi: ‘Kuu emɛ nɛ ui aa daanu? Maa ui saliyɛkirenɛ emɛi ga aa gi? 28Yaa Ejipute bɛɛnnɛ gɔi bana u dai gin’, u mui dai ibɛɛ wɔu ma?’ 29Sɔɔ kɔɔ sabu dɛi, Mɔise Ejipute gana nɛ jɔbaa, Madian gana nɛ yaa bii. Kɔɔ nɛ wɔu wo anranw unrunw lɛi naraanbe. 30«Anranguju pɛnai galaa wo kanran, mɛlɛnkɛ turu, olusolo nɛ Sinayi kokoo le bɛrii, uriye tiun yaun bije nɛ tou, Mɔise bɛrɛ unruin tagaraabe. 31Mɔise wogɔ iyaa, wo bɛrɛ maunɛ biyaabe. Genɛ gɔ nɛ dɔi ye yɛnɛdo ga kanraun wo wɔu, Ama mii ɛgɛmaabe: 32‘U babe Ama gɔ mui. Abarahamu lee, Isaka lee, Jakɔbu lee Ama gɔ mui.’ Mɔise, yalu gɔ nɛ kinwɛun, uriye gɔ yɛnɛ ga yababele. 33Inɛw Baŋa wo le kijɛ gi: ‘Taga uwɔbe kubɔ uwɔ nɛ goonɔti. Yalu u iŋɛ gɔ minɛ ɛjaa wɔɔi. Yalu diyɛi. 34Mu inɛw ma, Ejipute nɛ wɔin gɔbe ɔɲɛ iyaajɔn. Mu duru bemɛ ɛgaa, bei yabai sugun. Wogɔ digɛu wɛɛ, ui Ejipute nɛ mu tiimɔ.’ 35«Mɔise le yabalu be kanrun gɔ, inɛ bɛrɛ sɔwaa, ‘Aa ui kuu emɛ nɛ daanu, aa ui saliyɛkirenɛ emɛi boju’ be gɛɛbe gɔ, Ama iyaa Mɔise wogɔ tee kuu bemɛ baŋai ga tii. Mɛlɛnkɛ uriye logoro nɛ unruin taguru gɔ, woi baraa ye bei yaba ga tii. 36Mɔise wogɔ, yarabirɛ lee, sɛɛrɛ taanrinyɛn lee kanraan, emɛ babe, Isɛrɛlu unrunwin Ejipute gana nɛ gunɔ wo goonu. Ejipute nɛ lee, nɛudii Banrun yalu gɔ nɛ lee, iyaa, olusolo nɛ anranguju pɛnai baa, wo taanrinyɛn kanraanbe. 37Iyaa, Mɔise wogɔ, Isɛrɛlu unrunw bɛrɛ ɔn gin’ sɔi: ‘Ama, inɛ Ama titiyainɛ, mu gin’ e ba unrunw logoro nɛ gogoomɔdo.’ 38Iyaa, Mɔise wogɔ, olusolo mɔɔnu diyɛ gɔ nɛ, Sinayi kokoo nɛ, mɛlɛnkɛ wo le sɔɔ sɔɔu bee gɔ lee, emɛ babe lee logoro nɛ wo iŋɛbe. Wo Ama sɔɔ ɔnmɔ gɔ biyaa, emɛ bɛrɛ obaabe. 39«Kaa emɛ babe Mɔise sɔɔ keŋiyɛn ga yabanɛ. Be wo le gowaa Ejipute gana nɛ pilemu ye yai daariyaabɛin. 40Be Mɔise dele Aarɔn le sɔwaa, kijɛ be gi: ‘Giru emɛ nɛ yoi ye ama emi teeremɔnu yaaido emɛ bɛrɛ yegere obo. Kɔɔi laa ye, Mɔise, Ejipute gana nɛ emi goonu gɔ, wo bɛrɛ sɔɔ dɔi emɛ inin.’ 41Kunrin bai kɔɔbe le, emɛ babe naa ii yegeraabɛin. Be dege gɔ dɛi sadaga jɛɛlaa, numɔ bemɛ le kijɛ be yegeraajɛ gɔ dɛi kinɛ ɛɛliyɛmaabɛin. 42Aiwa, Ama be le onu dulaa, inɛw Ama titiyaanw dɔn nɛ bana tɔŋaaɲu ɔn le kɛukɛu, wo alagala tolobei babu nɛ bei pajaabe. “Isɛrɛlu inɛw, anranguju pɛnai olusolo nɛ e bee gɔ, bɛlu sɛnwɛn lee, sadaga waja goonɔ lee e kanranbe gɔ, wogɔ e mu bɛrɛ kanrin ma? 43Ai. Ɔmɔlɔ Mɔlɛku sɔi kuru gɔ lee, ɔmɔlɔ Repan tolo gɔ lee, e duiyaabei. E ɔmɔlɔ kɔɔbei babadei ga, bei yegeraabei. Kɔɔ biyaai ye, mu ei gunɔ aamɔ ye, Babilɔnɛ gana giru go baa yayaamɔdɔn.” 44«Olusolo nɛ emɛ babe, Ama, logoro bemɛ nɛ yato sɛɛrɛi ga guju kuru Ama Ginrun yaduyɔbɛin. Kuru wogɔ, Ama Mɔise bɛrɛ bana tɔɔru gin’ tee yinyegurin. Ama Mɔise bɛrɛ tɔɔraa, kuru wo bɛrɛ tagaraa be kanran wo iyi gɔ, wogɔ tunmɔ tee yegere gi. 45Kuru wogɔ emɛ babei wo dinraan, Josue, giru bemɛ nɛ yowaa, bei teeremaa, be kuru gɔ gana ɔn nɛ jɛɛlaabɛin. Ama, gana gɔ inɛwin giru bemɛ nɛ nanaa, gana gɔ emɛ ba bemɛi bojaabe. Kuru wogɔ, Dawide waaru dɔɔ baa yabe. 46Dawide sɔɔ, Jakɔbu Ama gɔ bɛrɛ ɛjii bee. Wo Ama wogɔ bɛrɛ ginrun ujɔdɔn ga gɛnyaanbe. 47Kaa Dawide ii Salomɔ, ginrun gɔ wo uju. 48Kɔɔ wooi nɛ, Ama, daa naa daa go wɔɔ baŋa gɔ, numɔ le ginrun ujaaɲu nɛ toiyoolɛ. Wogɔ inɛ Ama titiyainɛ sɔɔ ɔn le sɛgɛraa wɔɔ. 49“Alagala, ɔgɔdɔin mai. Minɛ, kubɔ duunu mai. Nɛɛ mu dɛi e ginrun inge tɔgu ujɔdei? Yalu nɛ wɛi ye mu deeliyeido, yago yeguru bɛɛmɔjɛ? Kijɛ kɔɔbe puu mu maŋalu ma? Inɛw Baŋa Ama kunrin sɔi.” 51«E inɛw kɔkɔlɔ maagunw gɔbe, Ama sɔɔ sibɛ go e kinɛ ebe ɛɛnnaati, suguru ebe duŋaati. E babe bana kanrun gin’, e waaru puu Kikinu Pilu sɔɔ le yabaalɛi. 52E babe, inɛ Ama titiyainɛ tɔɔɲɔlu be kanrun gɔ yagɔi? Iyaa, Teitai Baŋa gɔ wɛwɛɛdo ga, inɛw Ama titiyaanw gin gɔbe puu e babe bei daatin. E yaa kanɛ Teitai Baŋa wogɔi jamaa daati. 53E mɛlɛnkɛbe numɔ nɛ inɛw Tɔɔru bɛɛnw gɔbe, tɔɔru wogɔbe gɛliyɛli.» 54Badubadanw diyɛnw gɔbe Etiɛnu sɔɔ gɔ ɛgaa, bei tɛgaa galaa, kinɛbanrun dɛi tɔnrɔn tɛnwɛunbɛin. 55Kaa Etiɛnu, Kikinu Pilu le jowaa, giri alagala go dɛɛraa, Ama dooro iyaabe. Wo Yesu, Ama numɔ iin sibɛ nɛ wo iŋɛu iyaabe. 56Kijɛ wo gi: «Keŋiyɛin, alagala pinɛlaa, Inɛ Aini gɔ, Ama numɔ iin sibɛ nɛ iŋiyaan wɔɔ, mu iyeuwɔn.» 57Kɔɔ waaru le, inɛw gɔbe mii diyɛ le kɔnwaan, suguru bemɛ duŋaabɛin. Be wooi puu giru giru kanraan, Etiɛnu kuu nɛ sugaa, 58ana laara go woi goonaa, tibu le kamaa daabɛin. Etiɛnu dɛi inɛw sɛɛrɛ goonw gɔbe, arugoi bemɛ kolaa, sagatara ii turu giru nɛ duuni. Sagatara ii wogɔ boi Sɔlu gɛɛbɛin. 59Kunrin tibu le woi kamau be wɔu, Etiɛnu, Ama gɛɛunbe. Kijɛ wo gɛɛbe: «Inɛw Baŋa Yesu, kikinu ma sɛgɛrɛ.» 60Kɔɔ onu nɛ wo yɔŋɔrɔn kuu nɛ numaa sugaa, paŋa womɔ puu le kɔnwaan gi: «Inɛw Baŋa, hakɛ ɔn kuu bemɛ nɛ sunugonɔu.» Kunrin sɔwaatiyaa, wo kinrun gowaai.

will be added

X\