KANRAN 6

1Waaru kɔɔbe le, jaŋu unrunw lugo gɔ ɛjii bariyɛube. Logoro bemɛ nɛ Yahutunw inɛw, Gɛrɛku sɔɔ sɔɔnw gɔbe, yapanuw unrunbemɛi, bai wooi puu jaa gamulu gɔ nɛ lugoonɛ ga, Yahutunw pɔɔlɔ baa gana gɔ nɛ daanbɛin gɔbe dɛi guguun gunwaanbɛin. 2Kɔɔ gin’ wo biyaa, jaŋu unrunw tiyaaɲu pɛli lɛisigɛ gɔbe, jaŋu unrunw gɔbe puui boonaa mɔɔnaa kijɛ be gi: «Emɛ Ama sɔɔ tagu gɔ pajaatiyaa ye, jaa gamulu birɛ nɛ yoo ga, wogɔ jaanla. 3Wogɔ digɛu, ba unrunw, logoro ebe nɛ anranw sɔi yɛmɛi. Inɛw puu sɛɛrɛ ɛju bemɛ goouwɔin be biyɛmɔi. Iyaa, Ama Kikinu lee hakilɛ lee jowaa wɔin be biyɛmɔi. Emɛ, inɛw wogɔbe bɛrɛ, birɛ kɔɔ sagu duduurɔdɛin. 4Emɛ kai, amagɛɛn nɛ lee Ama sɔɔ tagu birɛ gɔ nɛ lee mamainiyɛndɛin.» 5Jaŋu unrunw tiyaaɲu gɔbe sɔɔ gɔ, inɛw puu kinɛ aabe. Kunrin inɛw be yɛmu gɔbe, gagawu baŋa, iyaa Kikinu Pilu le inɛ jowaa wɔɔ, Etiɛnu lee, iyaa Pilipe lee, Porokɔre lee, Nikanɔru lee, Timɔ lee, Parumɛna lee, iyaa Antiɔse ana bɛɛnnɛ, Yahutunw oju nɛ too, Nikolasu lee bee. 6Mɔɔnu gɔ, inɛw kɔɔbei yɛmaa Yesu jaŋu unrunw tiyaaɲu gɔbe bɛrɛ bei tagaraabɛin. Jaŋu unrunw tiyaaɲu gɔbe inɛw gɔ dɛi Ama gɛnyaan, numɔ kuu bemɛ nɛ yaŋaraanbɛin. 7Ama sɔɔ gɔ ɛjii giru yaaube. Jerusalɛmu nɛ jaŋu unrunw lugo gɔ ɛjii bariyɛube. Iyaa, Ama bɛrɛ sadagadɔɔnɔw joo naa joo gawaabɛin. 8Ainɛ Etiɛnu gɛɛɲu gɔ, Ama nɛɛma wo le ɛjii yabe. Iyaa, Ama gɔnrɔn wo le ɛjii yabe. Wo yarabirɛ joo lee sɛɛrɛ taanrinyɛn lee inɛw logoro nɛ kanraunbe. 9Inɛw gamuu Etiɛnu le jiiru jiirei tɔlaabɛin. Inɛw wogɔbe gamuu Ama gɛɛn ginrun, inɛw gunɔ gowaa wɔin gɛɛɲu gɔbe mɔɔnu nɛ tobɛin. Be Sirɛnɛ lee Alɛsandiri lee Yahutunwin bɛin. Gamuu iyaa, Silisi lee Rɔmɛ laamu Asi numɔ lee Yahutunwin bɛin. 10Kaa Etiɛnu, hakilɛ lee Ama Kikinu gɔnrɔn lee le sɔɔ sɔɔbe dɛi, be wo le iŋi bɛɛubenɛ. 11Kɔɔ gin’ wo biyaa, be inɛw gamuui suuraa, ɔn gin’ sɔɔmi: «Ainɛ ɔn, Mɔise lee Ama lee dɛi sɔɔ mɔɲu wo sɔɔu emɛ ɛgaabɛin.» 12Kunrin sɔɔmaa, be inɛw joo lee Yahutunw inɛw naw lee, Ama tɔɔru deerenw lee Etiɛnu dɛi ingelemaa, paŋa le woi aa, badubadanw diyɛnw mɔɔnu nɛ jɛyaabɛin. 13Badu yalu gɔ nɛ, be Etiɛnu dɛi inɛw sɛɛrɛ kakalu goonw yaa jɛɛlaabɛin. Wogɔ bɛɛnw kijɛ be gɛɛbe: «Ainɛ ɔn, Ginrun Diyɛ Ama mɔi ga ujaaɲu gɔ lee Mɔise tɔɔru lee dɛi waaru wooi sɔɔ mɔɲu sɔɔuwɔ. 14Wo saa, Yesu, Nasarɛtu bɛɛnnɛ kɔɔ, Ginrun Diyɛ ɔn dama susunugodo gi. Iyaa, Mɔise bɛrɛ atɛmu emɛ bɛi gɔ puu, Yesu dudulomɔdo gi ga wo sɔɔu emɛ ɛgaabɛin.» 15Badu gɔ nɛ inɛw daanbɛin gɔbe puu Etiɛnu bɛrɛ giri dɛɛraa gɛlɛbɛin. Be girupala womɔ gɔ mɛlɛnkɛ girupala gin’ iyeubɛin.

will be added

X\