KANRAN 5

1Kaa ainɛ turu, boi womɔ Ananiasu gɛɛɲu gɔ, yaanran womɔ Sapira be lɛi aaraa, minɛ bemɛ turu dɔnraanbe. 2Wo minɛ gɔ buudu gamaa gɛliyaabe. Kɔɔ onu nɛ, wo yaanran womɔ le aaraa, buudu waju gɔ gɛliyaa, minɛ gɔ dɔnrin ga, Yesu jaŋu unrunw tiyaaɲu gɔbe numɔ nɛ kunaabe. 3Kɔɔ gin’ wo kanraan, Piɛru kijɛ gi: «Ananiasu, yani Setanu u le yowaa, u bɛrɛ minɛ uwɔ dɔnrun gamamaa, Kikinu Pilu le baa, ɔn gin’ kakalu maŋamɔuwɔ? 4Minɛ gɔ waaru dɔnrɔnlu u bee le uwɔi bele ma? Iyaa minɛ gɔ dɔnraan, buudu u bɛi gɔ le kijɛ u dɛnɛjɛ kanrun bɛɛbeleu ma? Nɛɛ, kɔɔi biyaai ye, birɛ mɔɲu u biru ajubu gɔ, kinɛ uwɔ nɛ yani yoi? Yɛnɛ, u inɛ bɛrɛ kakalu maŋalu. Kaa Ama bɛrɛ maŋu.» 5Ananiasu, Piɛru sɔɔ gɔ ɛgɛu digɛu, numaa sugaa, kinrun gowaai. Inɛw sɔɔ gɔ ɛgin gɔ puu, liliyɛ diyɛ le bɛin. 6Sagatara unrunw ingelaa, Ananiasu yiun gɔ sɔi le munaa, yaa bojaabɛin. 7Lɛɛrɛ taanu gin’ galaa wo kanran, Ananiasu yaanran wiyaa, ginrun gɔ nɛ yowaabe. Sɔɔ bii gɔ wo soo sɛbele. 8Piɛru wo le ɔn gin’ sɔi: «Minɛ ebe e dɔnrun buudu gɔ puu ɔn woi ma mu bɛrɛ taga.» Yaanran gɔ saa, ee buudu gɔ puu kɔɔ woi gi. 9Kɔɔ waaru le Piɛru saa: «U lee u igɛ lee, e lɛi aaraa, yani Inɛw Baŋa Kikinu gɔi subɔraa yɛnɛuwɔi? Yɛnɛ, u igɛ yiun bojonw gɔbe murɔn aŋa nɛ kowɛɛɲu. Be ui yaa duiyi ye yayaadɛin.» 10Piɛru kunrin gɛɛu wo digɛu, Sapira, giru womɔ nɛ numaa sugaa, kinrun gowaai. Sagatara unrunw gɔbe ginrun gɔ nɛ yowaa, Sapira yinwaain tɛmaabɛin. Be woi jeɲaa yaa, wo igɛ genɛ nɛ bojaabɛin. 11Ama inɛw mɔɔnu gɔ nɛ liliyɛ diyɛ inɛw le yabe. Inɛw sɔɔ gɔ ɛgin gɔbe yaa ɛjii liyaabɛin. 12Yesu jaŋu unrunw tiyaaɲu gɔbe, sɛɛrɛ taanrinyɛn lee yarabirɛ lee joo inɛw logoro nɛ kanraunbɛin. Jaŋu unrunw gɔ puu ajubu turu le Salomɔ togu doɲu nɛ mɔrinyɛunbɛin. 13Inɛw wajunw gɔbe be le mɔrinyɛn ga, anrangaju sɛbenɛ. Kaa, inɛw puu bei ɛjii babaubɛin. 14Inɛw Yesu le gawaubɛin gɔbe, anranw lee yaanw lee jojoo bemɛ bariyɛ bariyɛ yaaube. 15Inɛw, jiungunw bemɛ, teenu nɛ ma, sugɔ peere nɛ ma duunaa ye, ana pɔŋɔrɔn nɛ bojoubɛin. Piɛru galanu wo wɔnu, halu kikinɛ womɔi kanran, jiungunw gamuu kuu nɛ jii kanraan ye, bei baja ga kodɛi kanraunbɛin. 16Halu ana Jerusalɛmu le bɛrii wɔin gɔbe nɛ goi ye, inɛw joo jiungunw lee inɛw jinrun bei ɔɲɔmɔu gɛlɛ gɔbe lee joo jɛɛlɛubɛin. Be puu bajaubɛin. 17Kaa, Ama bɛrɛ sadagadɔɔnɔnɛ kuu baŋa gɔ lee wo bɔɔnw, Saduseyɛn gɔbe lee, be Yesu jaŋu unrunw tiyaaɲu gɔbe sibɛ go ele le jowaa, be dɛi ingelaabɛin. 18Be bei aa, kajuginrun poroba gɔ nɛ kunaabɛin. 19Kaa digɛ waaru le, Inɛw Baŋa mɛlɛnkɛ turu wiyaa, kajuginrun murɔn aŋa gɔ pinɛlaa, bei goomaa, ɔn gin’ be le sɔi: 20«Ama Ginrun Diyɛ gɔ nɛ yaai, ɔnmɔ kana sɔɔ bana wɔɔ puu inɛw bɛrɛ tagai.» 21Sɔɔ gɔ keŋiyaan, aga baa yaa gɔ, agapaali Ama Ginrun Diyɛ gɔ nɛ yowaa, be inɛwin deereubɛin. Ama bɛrɛ sadagadɔɔnɔnɛ kuu baŋa gɔ, wo bɔɔnw be wooi Yahutunw inɛw naw boonaa, badubadanw diyɛnw gɔbei mɔɔnaabe. Kɔɔ onu nɛ, garidubei tiyaa, jaŋu unrunw tiyaaɲu gɔbei kajuginrun nɛ goonu jɛɛlɛ ga tɔɔraabɛin. 22Garidu gɔbe yaa jaŋu unrunw tiyaaɲu gɔbei kajuginrun gɔ nɛ tɛmɛnɛ. Be pilemaa wiyaa, inɛw bei tiin gɔbe bɛrɛ kibɛru tagaa, gin: 23«Emɛ kajuginrun murɔn aŋa gɔbe puu ɛjii bana jaan gin’ pinaa wɔɔ tɛmaabɛin. Murɔn aŋa dɔmiyɛnw gɔbe puu yalu bemɛ nɛ sɛɛu be iŋɛu tɛmaabɛin. Kaa taan sɔgɔraa, emɛ kɔlɔ gɔ nɛ bei tɛmɛnɛ.» 24Sɔɔ kɔɔ ɛgaa, Ama Ginrun Diyɛ garidube kuu baŋa gɔ lee, Ama bɛrɛ sadagadɔɔnɔw kuu bɛɛnw gɔbe lee, bei sɔɔ gɔ nɛ manaai. Be tunmɔi selumɛu, sɔɔ gɔ dumɔrɔn womɔ yani biyɛdo ma gɛɛubɛin. 25Inɛ turu wiyaa, ɔn gin’ be le sɔi: «Yɛnɛi, inɛw kaju nɛ e kunu gɔbe, Ama Ginrun Diyɛ gɔ nɛ inɛw deereu yatoin.» 26Inɛ gɔ kɔɔ gin’ wo sɔwaa, Ama Ginrun Diyɛ garidube kuu baŋa gɔ lee garidu gɔbe lee yaa, jaŋu unrunw tiyaaɲu gɔbei aa jɛɛlaabɛin. Kaa bei tibu le kakamadɛin ma, be liyɛubɛin gɔ dɛi, be jaŋu unrunw tiyaaɲu gɔbe bɛrɛ paŋa turu kanran tagaranɛ. 27Jaŋu unrunw tiyaaɲu gɔbei aa jɛɛlaa, badubadanw diyɛnw gɔbe giru nɛ, badu daanaabɛin. Ama bɛrɛ sadagadɔɔnɔnɛ kuu baŋa gɔ, jaŋu unrunw tiyaaɲu gɔbei selumaa kijɛ wo gi: 28«Ainɛ kɔɔ boi le ebaa waja inɛ deerenɔu ga, emɛ e bɛrɛ ɛɛnnaa sɔɔnɛ ma? Yɛnɛi, e Jerusalɛmu ana gɔ deeru ebe le joonaati. Iyaa, ainɛ kɔɔ yiun gɔ, e kuu emɛ nɛ sunugodei ga wɔi.» 29Kɔɔ gin’ wo sɔwaa, Piɛru lee Yesu jaŋu unrunw tiyaaɲu wajunw gɔbe lee aŋa womɔ saa, kijɛ be gi: «Inɛw diŋɛ kanran dɛi, waajibi emɛ Ama diŋɛ kanrandɛin. 30Yɛnɛi, e Yesui baga nɛ pɛgaa daabei. Kaa emɛ babe Ama gɔ woi bulogaabe. 31Ama woi jeɲaa, numɔ iin unrunmɔ sibɛ go unaa, woi ɔgɔnɛi, iyaa, yabanɛi bojaabe. Isɛrɛlu tɔgu inɛw bemaa bana bemɛ dulomɔ ye, hakɛ yaabu kanrun bɛɛ ga, Ama kunrin kanraanbe. 32Emɛ sɔɔ wogɔbe sɛɛrɛi, iyaa Kikinu Pilu, Ama, sɔɔ womɔ yabanw bɛrɛ wo obojɛ gɔ, Kikinu wogɔ yaa sɔɔ wogɔ sɛɛrɛi.» 33Yesu jaŋu unrunw tiyaaɲu gɔbe kɔɔ gin’ sɔɔ be sɔwaa ɛgaa, badubadanw diyɛnw gɔbe kinɛ banraan gabaa, bei daaɲu dɛnɛbɛin. 34Kaa, Parisiɛn turu yabe. Boi womɔ Gamaliɛlu gɛɛbɛin. Wo Ama tɔɔru deerenɛi bee. Inɛw puu woi ɛjii lugaa yasɛbɛin. Wo mɔɔnu gɔ logoro nɛ ingelaa, jaŋu unrunw tiyaaɲu gɔbe waaru gaila le bain be goomɔ gi. 35Kɔɔ onu nɛ badu inɛw gɔbe le sɔwaa gi: «Isɛrɛlu inɛw, inɛw ɔnbe bɛrɛ kijɛ kanrando ga e wɔɔ sibɛ go kuu ebe kajubai. 36Yɛnɛi, tanwanlu, Tedasu ɔn nɛ ingelaa, unruin inɛ diyɛi gin’ bojaabe. Inɛw suŋu nai gin’ wo le dimiyaanbɛin. Kaa woi daa, inɛw woi dimɛbɛin gɔbe puu ginɛmaa, waja sɔɔ bemɛ ɛgɛmɔlu. 37Tedasu onu nɛ, lugo waaru gɔ le, Galile bɛɛnnɛ Judasu ingelaabe. Wo inɛw joo onu womɔ nɛ boonaa digɛraabe. Kaa woi yaa daa, inɛw womɔ gɔbe puu ginɛmaabɛin. 38Nɛɛ mu e bɛrɛ tagauwɔn, inɛw ɔnbe sɔɔ gɔ yapajai. Bei pajaa ye yaamɔi. Sɔɔ ɔn ma, birɛ ɔn ma, inɛ nɛ goi ye, susuiyodo. 39Kaa Ama bɛrɛ goi ye, e suyo bɛɛidelei. Wogɔ digɛu, kuu ebe kajubai. Ama le jai jaiyɛuwɔi ma liyɛi.» Gamaliɛlu kɔɔ gin’ wo sɔwaa, inɛw gɔbe puu sɔɔ womɔ gɔ le yabaabɛin. 40Kaa be jaŋu unrunw tiyaaɲu gɔbei boonaa, bei baga le lagamaa, Yesu boi le waja asuu sɔɔ sɔɔnɔu ga gimaa sɔwaabɛin. Kɔɔ onu nɛ be bei pajaa, yaamaabɛin. 41Jaŋu unrunw tiyaaɲu gɔbe, badu yalu gɔ nɛ gowaa, yaabɛin. Be kinɛ ɛɛli diyɛ le yaabɛin. Inɛw Baŋa Yesu boi dɛi dɔgɔ be iyi gɔ, wogɔ, baba biyaaɲu gin’ be lugaabɛin. 42Bai puu Ama Ginrun Diyɛ gɔ nɛ lee ginrun ginrun nɛ lee yoi yoi inɛw deere lee, Ama Yabanɛ Diyɛ tii, Yesu Kibɛru Ɛju gɔ taga lee kanran ga pajanɛ.

will be added

X\