KANRAN 4

1Piɛru, Jan be lɛi inɛw gɔbe le sɔɔ sɔɔu be gɛlɛu, Ama bɛrɛ sadagadɔɔnɔw gamuu lee, Ama Ginrun Diyɛ garidube kuu baŋa gɔ lee, Saduseyɛn gamuu lee bei wiyaa tɛmaabɛin. 2Piɛru lee Jan lee Yesu bulogu sɔɔ waaju kanraun, yiun bubulodo ga inɛw bɛrɛ deereubɛin dɛi, be kinɛbanrun diyɛ le bɛin. 3Be bei aa, digɛ digiyaayaabe digɛu, ɛjii kaju kunaa gɛlɛu, aga baa yaa gɔ baa dɔwaabɛin. 4Kaa kɔɔ wooi nɛ, inɛw waaju keŋii logoro nɛ, joo sɔɔ gɔ le gawaabɛin. Kunrin inɛw Yesu le gawaaɲu, anranw muɲu numɔrɔn gin’ dɔwaabe. 5Aga ingelaa, Yahutunw inɛw giru toin gɔbe lee, inɛw naw gɔbe lee, Ama tɔɔru deerenw gɔbe lee Jerusalɛmu ana nɛ mɔrinyaanbɛin. 6Inɛw kɔɔbe logoro nɛ, Ama bɛrɛ sadagadɔɔnɔnɛ kuu baŋa, Hanɛ lee, Kayipe lee, Jan lee, Alɛsandere lee yatobɛin. Iyaa, Ama bɛrɛ sadagadɔɔnɔnɛ kuu baŋa maranw puu yatobɛin. 7Be Piɛru lee Jan leei logoro bemɛ nɛ iŋiyɛnmaa, bei selumaa, kijɛ be gi: «Ainɛ gɔi e bajumu gɔ, gɔnrɔn inge le e wogɔ kanraanbei? Maa, aa boi le kanraanbei?» 8Piɛru, Kikinu Pilu le jowaa, saa: «Yahutunw inɛw giru toin lee inɛw naw lee, 9ainɛ jiunginɛ bɛrɛ ɛju emɛ kanrun dɛi, e iye emi selumɛuwɔi. Woi bana baju selumɛuwɔi. 10Aiwa, e ɔn nɛ wɔin gɔbe lee Isɛrɛlu tɔgu gɔ puu lee, e wooi ɛjii jugɔi. Nasarɛtu ana bɛɛnnɛ Yesu Kirisito boi le ainɛ ɔn baju. Yesu, baga nɛ pɛgaa e kanran, Ama yiun logoro nɛ bulomaa goonu gɔ, ainɛ ɔn iye wo kɔrumɔ le sɛɛu bajaa giru ebe nɛ iŋɛ. 11Ɔnhɔn, “E ginrun ujɔnw gɔbe, tibu kamaa e paju gɔ, ginrun sibɛ tibu gɔ woi bii.” Wogɔ Yesu woi. 12Wo le laa ye, inɛ waja turu le kanran yayabu bɛɛmɔɔlɛ. Alagala ɔn doɲu nɛ, boi wogɔi laa ye, boi waja le emi yabaɲu, Ama, inɛw bɛrɛ obolu.» 13Piɛru lee Jan lee jaŋu jaŋanɛ, inɛw peerebei ga, badu badanw diyɛnw gɔbe jugɔubɛin. Kaa kokanran, be liyɛ sɛlɛ go, anrangaju le sɔɔ sɔɔubɛin. Wogɔ, bei ɛjii maunɛ kanraanbe. Kunrin, Piɛru lee Jan lee Yesu le biyaabɛin ga be jugaabɛin. 14Iyaa, ainɛ bajumi gɔ giru bemɛ nɛ yahiŋɛ, be iyeubɛin dɛi, sɔɔ saaɲu sɛbenɛ. 15Be Piɛru bemaa badu yalu gɔ nɛ goo ga tɔɔraabɛin. Kɔɔ onu nɛ, tunmɔ le sɔwaa, 16kijɛ be gi: «Emɛ anranw ɔnbe bɛrɛ inge kanrandɛin? Yɛnɛi, numɔ bemɛ le digɛu taanrinyɛn diyɛ biyaai ga, Jerusalɛmu inɛw puu bɛrɛ jɛnrɛin wɔɔ. Emɛ wogɔ kɔri gɛɛ bɛɛidenɛ. 17Kaa sɔɔ gɔ, kɔɔ dɛi sigɛ inɛw logoro nɛ ginɛnɔu giye, bei liirɛmaa ye, inɛ kɔɔ boi le inɛ turu bɛrɛ kanran bemaa sɔɔ sɔɔnɔu giye tɔɔrɔmɔi.» 18Kunrin tunmɔ le aaraa, be Piɛrubei boonaa jɛɛlaa, bemaa asuu kanran Yesu boi le inɛw bɛrɛ sɔɔ sɔɔnɔu, deeru obonɔu gin. 19Piɛru lee Jan lee aŋa bemɛ saa: «Ama sɔɔ yabalu kanraan ye, sɔɔ ebe yaba ga, wogɔ Ama giru nɛ teitaii wɔɔ ma, kuu ebe le ajubu yɛnɛi. 20Kaa, emɛ kai, kijɛ emɛ iyi lee kijɛ emɛ ɛgu lee sɔɔ sɔɔlu kanran bɛɛidenɛ.» 21Kunrin, badu inɛw gɔbe pilemaa bei liirɛmaa, pajaa yaamaabɛin. Be, bei ɔɲɔmɔ ibɛi bɛin. Kaa inɛw be le yabaidenɛ ga, be igii bɛin. Inɛw puu sɔɔ bii gɔ dɛi Amai sɔmɔubɛin. 22Ainɛ taanrinyɛn le bajumi gɔ, anranguju womɔ pɛnai dɛi gaa bee. 23Piɛru lee Jan lee bei pajau be digɛu, jaŋu unrunw wajunw bɛrɛ yaa, Ama bɛrɛ sadagadɔɔnɔw kuu bɛɛnw gɔbe lee Yahutunw inɛw naw gɔbe lee sɔɔ be bɛrɛ gin gɔ puu tagaabɛin. 24Jaŋu unrunw gɔbe, sɔɔ gɔ ɛgaa, be wooi puu mii turu le mii jeɲaa, ɔn gin’ Ama gɛɛin: «Inɛw Baŋa Ama, alagala lee, minɛ lee, nɛudii lee, kɔlɔ bemɛ nɛ kijɛ toin puu lee maŋanɛ gɔ, 25Kikinu Pilu gɔnrɔn le, birɛbirɛnɛ uwɔ, emɛ ba Dawide bɛrɛ sɔɔmaa, ɔn gin’ u sɔi: “Inge dɛi tɔgu wajunw gɔbe kinɛ banranmaa ingelaa wɔin? Inge dɛi be aaru tiyɛ sɛlɛ tunmɔ le aaraa wɔin? 26Yɛnɛi, aduna ɔn ɔgɔnw gɔbe kɔmɔ dɛi unrunbei yegeraa wɔin. Kuu bɛɛnw gɔbe Inɛw Baŋa Ama lee, Yabanɛ Diyɛ wo tii lee dɛi tunmɔ mɔɔnaa wɔin.” 27Narain, Herɔde lee, Pɔnse Pilate lee, tɔgu wajabe lee, Isɛrɛlu tɔgu inɛw lee ana ɔn nɛ tunmɔ mɔɔnaa, birɛbirɛnɛ uwɔ, inɛ ɛjaai Ama bɛrɛ goi, nii togokɔɔru le u jugɔmu gɔ, Yesu dɛi ingelaabɛin. 28Kunrin pɔɔlɔ baa, gɔnrɔn uwɔ le, diŋɛ uwɔ le kɛukɛu sɔɔ kɛjaa u boju gɔ, be sɔɔ wogɔ kanraanbɛin. 29Nɛɛ Inɛw Baŋa Ama, bana emi liirɛmɔu be wɔɔ gɔ yɛnɛ. Emɛ, birɛbirɛnw uwɔ gɔbe bɛrɛ anrangaju obo ye, liyɛ sɛlɛ go, sɔɔ uwɔ tagu emɛ bɛɛmɔ. 30Numɔ uwɔ wajaraa ye, birɛbirɛnɛ uwɔ inɛ ɛjaai Ama bɛrɛ goi Yesu, boi womɔ le inɛw bajamɔ, sɛɛrɛ taanrinyɛn biyɛmɔ, iyaa, yarabirɛ biyɛmɔ.» 31Kɔɔ gin’ Ama gɛnyaan be kilaa, yalu nɛ mɔrinyaan be bee gɔ jigaabe. Be wooi puu Kikinu Pilu le jowaa, liyɛ sɛlɛ go anrangaju le Ama sɔɔ gɔ tagaubɛin. 32Inɛw joo Yesu le gawaa bɛin gɔbe, ihibɛ turu gɔ nɛ be ajubu turu le bɛin. Inɛ turu kanran kijɛ wo sɛbe wo turu mɔi ga gɛɛbele. Kaa kijɛ bemɛ puu mɔɔnu gɔ mɔi bee. 33Yesu jaŋu unrunw tiyaaɲu gɔbe, gɔnrɔn diyɛ le Inɛw Baŋa Yesu bulogu sɛɛrɛ gooubɛin. Ama nɛɛma diyɛ jaŋu unrunw puu le yabe. 34Logoro bemɛ nɛ inɛ kai kilɛlu tobele. Sabu inɛw minɛ sɛbɛin lee ginrun sɛbɛin lee, wogɔbe dɔnraan ye, buudu be bɛi gɔbe jɛɛlaa ye, 35Yesu jaŋu unrunw tiyaaɲu gɔbe numɔ nɛ kunɔubɛin. Kunrin inɛ tuturu bɛrɛ kai womɔ le kɛukɛu buudu gɔ gamalaubɛin. 36Sipere gana inɛ turu yabe. Wo Lewi tɔgu inɛi. Boi womɔ Josɛpu gɛɛɲu. Kaa jaŋu unrunw tiyaaɲu gɔbe boi womɔ Barunabasu kuni. Tiyɛ gɔ inɛw mainiyɛnmɔnɛ. 37Wo minɛ wo sɛbe turu dɔnraan, buudu gɔ kɛu jɛɛlaa, jaŋu unrunw tiyaaɲu gɔbe numɔ nɛ kunaabe.

will be added

X\