KANRAN 3

1Digɛnai turu, amagɛɛn waaru le, Piɛru lee, Jan lee mɔrinyaan, Ama Ginrun Diyɛ gɔ nɛ uloubɛin. Lɛɛrɛ taanu waaru lei bee. 2Bai puu, inɛw, ainɛ yaaranɛ turui duiyaa jɛɛlaa ye, Ama Ginrun Diyɛ dori Giru Yɛnu Ɛju gɛɛɲu gɔ nɛ daanaubɛin. Ainɛ gɔi yaaranɛi yinnarin. Ama Ginrun gɔ nɛ inɛw yooɲu bɛrɛ gɛɛn gɛɛn bɛɛ giye woi kɔɔ nɛ daanaubɛin. 3Piɛru lee Jan lee Ama Ginrun gɔ nɛ yoodo ga be wɔu, ainɛ gɔ bei iyaa, be bɛrɛ sin obu gɛnyaanbe. 4Piɛru lee Jan lee giri bemɛ ainɛ gɔ nɛ dɛɛraa sɛu, Piɛru wo le ɔn gin’ sɔi: «Emi yɛnɛ.» 5Ainɛ gɔ numɔ bemɛ nɛ kijɛ ingei bɛɛdo ma ga ɛjii bei yɛnɛube. 6Kaa Piɛru wo le kijɛ gi: «Mu sarudu sɛlɔn, kange yaa sɛlɔn. Kaa kijɛ mu sɛɛ gɔ, mu ui obouwɔn. Nasarɛtu ana bɛɛnnɛ, Yesu Kirisito boi le ingele ye yoi yaa.» 7Kɔɔ onu nɛ, wo ainɛ gɔ numɔ iin aa, woi ingelemaabe. Waaru kɔɔ le tee, kubɔ womɔ lee kubɔ kɔkɔlɔ womɔ lee nɛ paŋa yowaabe. 8Ainɛ gɔ kiliyaa ingelaa, yoi yaai tɔlaabe. Wo Piɛru lee Jan lee onu nɛ dimiyaan, Ama Ginrun gɔ nɛ yowaa, yoi yaau kiliyeu, Amai sɔmɔube. 9Yoi yaau, Ama sɔmɔu wo wɔu inɛw puu iyaabɛin. 10Be Ama Ginrun Diyɛ dori Giru Yɛnu Ɛju gɛɛɲu gɔ nɛ gɛɛn gɛɛnnu ainɛ dɛinyɛnjɛ gɔ woi ga jugaabɛin. Kijɛ wo bɛrɛ bii gɔ dɛi, inɛw bɛrɛ saii maunɛ kanraanbe. 11Ainɛ bajumi gɔ Piɛru lee Jan lee onu nɛ pilemɛbele. Inɛw bɛrɛ sɔɔ gɔ ɛjii maunɛ kanraanbe gɔ digɛu, be jɔbaa wiyaa, yalu be bee gɔ nɛ mɔrinyaanbɛin. Yalu gɔ boi Salomɔ togu gɛɛɲu. 12Piɛru wogɔ iyaa, inɛw gɔ le kijɛ wo gi: «Mu ba unrunw Isɛrɛlu bɛɛnw, inge dɛi sɔɔ ɔn e bɛrɛ maunɛ biyaa wɔɔ? Ainɛ gɔi kuu emɛ gɔnrɔn le ma, Ama giru liyɛ emɛ le ma woi yoi emɛ yaamu gin’, emɛ nɛ giri dɛɛraa e wɔɔ gɔ ingei? 13Abarahamu Ama gɔ, Isaka Ama gɔ, Jakɔbu Ama gɔ, emɛ babe puu Ama gɔ, sɔɔ ɔn le digɛu, wo birɛbirɛnɛ womɔ Yesui babauwɔ. E Yesui inin ga, woi ibɛlai ga, Sɛmɛginɛ Pilate giru nɛ yingi. Iyaa, woi numɔ nɛ yinkuni. Kɔɔi laa ye, Pilate woi paju ibɛi bee. 14Yɛnɛi, inɛ ɛjaai Ama bɛrɛ goi gɔ, inɛ teitai gɔ, e woi inin, woi ibɛlai ga, Pilate womaa inɛ daanɛ gɔi e bɛrɛ paja ga gɛnyaanbei. 15Kunrin, ɔnmɔ kuu baŋa gɔ, e woi daamaabei. Kaa Ama, yiun logoro nɛ woi bulomaabe. Emɛ wogɔ sɛɛrɛi. 16Yesu boi le gawu gɔ dɛi, boi womɔ gɔnrɔn gɔ, ainɛ e iyejɛ, e jugɔjɛ ɔn nɛ paŋa kunaabe. Iyaa, Yesu boi le gawu gɔ, ainɛ ɔin bana e iyejɛ le kɛukɛu, sɛɛu wo bajumu. 17«Nɛɛ, ba unrunw, e jugɔla dɛi kunrin Yesu bɛrɛ kanrin ga mu igii wɔun. Inɛw giru toin ebe gɔbe yaa jugɔla dɛi kanrin. 18Kaa, giru nɛ baa, Ama, inɛw titiyaanw womɔ puu le digɛu sɔwaa, Yabanɛ Diyɛ unrun tiido gɔ ɔhɔɲɔdo wo gi gɔ, kijɛ e kanrun gɔ le kibemaati. 19Nɛɛ Ama, hakɛ ebe yaaɲu goonɔti ga, bana ebe dulomaajɛ ye, pilemɛ ye Ama bɛrɛ wɛi ye, wo le tubiyei. 20Kɔɔ biyaai ye, Inɛw Baŋa Ama, e bɛrɛ kinɛ kaalu waaru ohobodo. Iyaa, Yabanɛ Diyɛ e dɛi giru nɛ bojaa wo sɛbe, Yesu gɔ, e bɛrɛ titiido. 21Kijɛ puu pilemɛ ye sɛɛu yegereidɛin waaru dɔɔido baa, waajibi Yesu kɔɔ, alagala nɛ yabiyɛdo. Ama pɔɔlɔ baa, inɛw titiyaanw ɛjaa womɔbe le digɛu, kijɛ puu pilemɛ ye yeyegeredo ga sɔwaabe. 22Kunrin, inɛ Ama titiyainɛ Mɔise kijɛ gi unwɔ: “Inɛw Baŋa, Ama ebe gɔ, inɛ Ama titiyainɛ, mu gin’ e ba unrunw logoro nɛ gogoomɔdo. Sɔɔ wo gɛɛido wooi nɛ e woi keŋiyɛin. 23Kaa inɛ aai kanran inɛ Ama titiyainɛ wogɔi keŋiyɛɛnlɛ ye, woi Ama tɔgu inɛw logoro nɛ goonɔ ye susuyodɛin.” 24Inɛw Ama titiyaanw sɔɔ sɔin gɔbe puu, Samuɛlu nɛ gowaa, onu womɔ nɛ wɛin gɔbe, be dinrɛn le dinrɛn le, bai ɔnbe dɛi sɔɔ sɔwaabɛin. 25Aiwa, inɛw Ama titiyaanw le pui wo kunu gɔ nɛ ei toiyo ga, Ama kunrin boju. Iyaa, Abarahamu le digɛu emɛ babe le aaru aaraa, aduna inɛw puu Abarahamu tɔgu le digɛnu duba bɛɛdɛin gi. Pui wogɔ nɛ yaa ei yato. 26Kɔɔi biyaa ye, Ama, birɛbirɛnɛ womɔ ingelemaa, ei duba kanran ga, e bɛrɛ laa woi tii. Wo e tuturu puui dulomaa ye, mɔɲu e kanraun bee gɔ nɛ gogoomɔdo.»

will be added

X\