KANRAN 28

1Emɛ wooi puu sɛɛu jamu le gowaain onu nɛ, minɛ dii gɔŋaa gɛlɛ gɔ boi Malute gɛɛɲu ga emɛ ɛgaabɛin. 2Inɛw tɔgu yeru kɔɔ nɛ bɛin gɔbe, bana emi ɛjii be sɛguru gɔ, emɛ kɔɔ tunmɔ joo iyetɛnɛ. Anran miiube, iyaa kaali yabe dɛi, be yaun diyɛ tanugaa, emɛ wooi puu boonaa wogɔ nɛ dɔɔnaabɛin. 3Pɔlu yaa, tinrun uji sulɔ balaa, yaun nɛ kunɔdo ga jɛɛlaabe. Tinrun gɔ yaun gɔ nɛ kamaa kunɔu wo digɛu, yaun uju gɔ dɛi yuguru kɔkɔju tinrun gɔ nɛ gowaa, Pɔlu numɔ nɛ kɛraa digiyaabe. 4Yuguru gɔ numɔ womɔ nɛ kɛraa digiyaa jeleu wo wɔu iyaa, gana gɔ inɛw tunmɔ le kijɛ be gɛɛbe: «Ainɛ ɔn naran go inɛ daanɛi. Wo nɛudii nɛ ɛliyaa gowaai, kaa womaa ɔnmɔi biyɛ ga Teitai yabalu.» 5Kaa Pɔlu, numɔ unrunmɔ yigaa, yuguru gɔ yaun nɛ kunaabe. Wo jiun turu kanran jugɔlu. 6Inɛw wajunw gɔbe Pɔlu goju pipidedo ma, woi ɛli sugu ye koyinwɛndo ma dɔmiyaan bɛin. Kaa dɔmiyaan be ɔɲaa, wo bɛrɛ sɔɔ kanma biyɛlu wo kanran, be ajubu bemɛ dulomaa, woi ama turui gin. 7Yalu emɛ bee gɔ, gana gɔ inɛ diyɛ minɛ le bɛrii bee. Wogɔ baŋa boi Pubiliusu gɛɛɲu. Wo emi ɛjii sɛgɛraa, bai taanu baa emi ɛjii gɛliyaabe. 8Pubiliusu ba gɔ kɛbaamu lee, bɛrɛ saliyɛ lee, woi ɔɲɔmɔu teenu nɛ diinbe. Pɔlu woi yaa yɛnaa, wo dɛi Ama gɛnyaan, numɔ kuu womɔ nɛ yaŋaraan, woi bajamaabe. 9Kɔɔ wo biyaa, gana gɔ jiungunw puu wiyaabɛin. Be puu bajaabɛin. 10Be bana dɛin dɛin le emi ɛjii babaabɛin. Kunrin, waaru yai emɛ dɔi le, be kijɛ kai emɛ sɛbe puu emɛ bɛrɛ obaabɛin. 11Iyepilu taanu emɛ Malute gana gɔ nɛ biyaabɛin. Kɔɔ onu nɛ, diikoro Alɛsandiri gowaa wɛi turu nɛ yowaa yaabɛin. Diikoro wogɔ sɛɛrɛ womɔ ama jiŋɛi bee. Diikoro kɔɔ kaali waaru gɔ puu gana kɔɔ nɛ yakanrun. 12Emɛ kunrin Sirakuse ana nɛ dɔwaabɛin. Emɛ bai taanu kɔɔ nɛ biyaabɛin. 13Kɔɔ nɛ gowaa, dii diŋirun gɔ digiyaa, emɛ Rɛgio ana nɛ dɔwaabɛin. Aga baa yaa gɔ tɛŋurun sibɛ go ooɲɔ goojɛ gɔ suyoube digɛu, bai lɛi nɛ sai, emɛ Pujɔle ana nɛ dɔwaabɛin. 14Ana kɔɔ nɛ emɛ jaŋu unrunw gamuu tɛmaabɛin. Be emɛ bɛrɛ gɛnyaan, unrunbe le bai sɔi biyɛ gin. Rɔmɛ bana emɛ dɔi gɔ kɔɔ woi. 15Rɔmɛ ba unrunw gɔbe kibɛru emɛ biyaabɛin gɔ digɛu, be Apiusu ibɛ gɔ nɛ lee, Yerunw Ginrun Sugo Taanu gɛɛɲu gɔ lee nɛ baa wiyaa, emi sɛgɛraabɛin. Bei iyeu digɛu, Pɔlu Amai birɛpoo tagaa, anrangaju biyaabe. 16Rɔmɛ ana nɛ waaru emɛ dɔi le, Pɔlu dɛiin, sɔludasu woi kajubanɛ turu le biyɛ ga yabaabɛin. 17Bai taanu galaa wo kanran, Pɔlu, Yahutunw inɛw giru toin gɔbei boonaa yalu womɔ nɛ jɛɛlaabe. Waaru be mɔrin le, Pɔlu be le ɔn gin’ sɔi: «Ba unrunw, tɔgu emɛ bɛrɛ ma, emɛ tirɛ anranw atɛmu le ma, mu mɔɲu turu kanran kanranlun. Kaa kɔɔ wooi nɛ Jerusalɛmu ana nɛ mui aa Rɔmɛ bɛɛnw numɔ nɛ kunaabɛin. 18Rɔmɛ bɛɛnw mui selumaa, mui daaun baa mɔɲu kanranlun ga iyaa, mui paja ibɛɛ bɛin. 19Kaa Yahutunw gɔbe wogɔ le yabanɛ. Kunrin, sɔɔ ma Rɔmɛ ɔgɔnɛ diyɛ bɛrɛ dɔɔnɔ ga mu bɛrɛ waajibi biyaabe. Kaa mu tɔgu ma jarugadɔn ajubu le wɔlɔn. 20Ei sɔɔ dɛi iye mu ibɛɛ bee gɔ kɔɔ woi. Kɔɔ dɛi ei boonu. Ɔnhɔn, Isɛrɛlu tɔgu gɔ, inɛ le diyɛ daanaa be sɛɛ gɔ, inɛ wogɔ dɛi iye ɔn nɛ mui yɔgu le kɔmaa sɛin.» 21Inɛw gɔbe aŋa womɔ saa, kijɛ be gi: «Judea gana nɛ gowaa, emɛ u dɛi lɛtɛrɛ turu kanran bɛɛnɛ. Emɛ ba unrunw logoro nɛ inɛ turu kanran wiyaa, kibɛru uwɔ ma, uwaa mɔɲu kanraanbe sɔɔ ma emɛ le sɔɔlu. 22Kaa yalu puu nɛ, inɛw, oju kɔɔ le jiiru kunɔuwɔin. Wogɔ digɛu emɛ oju kɔɔ sibɛ go ajubu uwɔ gɔ jugɔ ibɛɛ wɔin.» 23Pɔlu lee, be lee bai kɛjaabɛin. Bai wogɔ, inɛw joo wiyaa, Pɔlu ginrun tobe gɔ nɛ woi tɛmaabɛin. Waaju womɔ nɛ Pɔlu, Ama diinɛ sɛɛrɛ be bɛrɛ gooube. Iyaa, Mɔise tɔɔru dɔn gɔ lee, inɛw Ama titiyaanw dɔn gɔbe lee sɔɔ le digɛnu, Yesu dɛi sɔɔ bana wɔɔ, be bɛrɛ jugɔmɔdo ga mainiyɛunbe. Aga goi ye, digɛnai dɔɔ Pɔlu kɔɔ gin’ kanraunbe. 24Inɛw gamuu sɔɔ wo gɛɛbe gɔ le gawaabɛin. Gamuu kinɛ ɛɛn le biyaa, sɔɔ gɔ le yabanɛ. 25Inɛw gɔbe kunrin tunmɔ le mii kabu le gowaa yaau be wɔu, Pɔlu sɔɔ ɔn sai be le sɔi: «Kikinu Pilu gɔ, inɛ Ama titiyainɛ Esayi le digɛu e babe le sɔɔ wo sɔi gɔ, wo naran yasɛbe. 26Kijɛ wo gi: “‘E sɔɔ ɛhɛgɛdei, kaa tiyɛ gɔ paamu kanraindelei. E giri le yɛyɛnɛdei, kaa e iyeidelei.’ 27Nɛɛ, tɔgu ɔn inɛw, kinɛ bemɛ ɛɛnnaatin. Hakilɛ bemɛ sɔɔ paamu kanrun ye, bemaa mu sibɛ go kigelemu ye, maa bei bajuganɔu ga, giri bemɛ kijɛ iyenɔu dɛi, suguru bemɛ sɔɔ ɛgɛnɔu dɛi, suguru bemɛ duŋaatin, giri bemɛ dɛbaatin.” 28Nɛɛ jugi biyɛi, yayabu sɔɔ gɔ, Ama inɛw Yahutunw tɔgui laain gɔbe bɛrɛ obaajɛ. Be kai, sɔɔ gɔ kekeŋiyɛndɛin.» [ 29Pɔlu kunrin wo sɔwaa, be tunmɔ le ɛjii jiireu, yinyain.] 30Kɛɛlɛ tujɔu ginrun nɛ wo tobe gɔ nɛ, Pɔlu, anranguju lɛi sɛɛu biyaabe. Wo inɛw woi yɛnɛi wɛɛɲu gɔbe puui sɛgɛrɛube. 31Wo Ama diinɛ waaju kanraunbe. Liyɛ sɛlɛ go, inɛ turu kanran woi tɛŋɛlu go wo Inɛw Baŋa Yesu Kirisito dɛi deeru oboube.

will be added

X\