KANRAN 27

1Emi Itali gana nɛ, diikoro nɛ kunu ye jɛyaadɛin ga waaru yegeraa kilin le, Pɔlu lee, kajugunw gamuu leei sɔludasu suŋu kuu baŋa turu Juliusu numɔ nɛ kunaabɛin. Wo kɔmɔ numɔ Rɔmɛ ɔgɔnɛ diyɛ mɔi gɛɛɲu gɔ nɛ tobe. 2Diikoro turu Adaramite ana gowaa, Rɔmɛ laamu Asi numɔ diŋirun gɔ nɛ yaaube. Emɛ wogɔ nɛ yowaa yaaubɛin. Maseduanɛ gana Tesalonike ana bɛɛnnɛ turu emɛ le yatobe. Boi womɔ Arisutaruke gɛɛɲu. 3Aga baa yaa gɔ, emɛ Sidɔn ana nɛ dɔwaabɛin. Juliusu, Pɔlu le ɛjii bee dɛi, wo woi pajaa, wo anrungebe bɛrɛ kai womɔ kilɛmɔ ga yaamaabe. 4Kɔɔ nɛ gowaa, ooɲɔ gɔ emɛ le daii bee dɛi, emɛ Sipere diŋirun le galaabɛin. 5Nɛudii gɔ kɛjaa galau, emɛ Silisi lee, Panpili lee gana le bɛrii galaa, Lisi gana Mira ana nɛ dɔwaabɛin. 6Kɔɔ nɛ dɔwaa, sɔludasu kuu baŋa gɔ Alɛsandiri ana diikoro Itali gana nɛ yaau bee turu biyaabe. Wo wogɔ nɛ emi yoomaabe. 7Bai joo, emɛ dii gɔ kuu nɛ dege dege yaaubɛin. Kinide ana daŋaran nɛ emɛ dɔɔmɔ nɛ, emɛ bɛrɛ ɛjii nauniyaanbe. Ooɲɔ gɔ emɛ le daii bee dɛi, emɛ ana kɔɔ sibɛ nɛ digiyaa yaa bɛɛnɛ. Emɛ gana dii gɔŋaa gɛlɛ, Kɛrɛte doɲu gɔ le galaa, Salumɔnɛ sibɛ le yaabɛin. 8Kɛrɛte diŋirun nɛ gala ga emɛ bɛrɛ saii nauniyaanbe. Emɛ kunrin yalu turu nɛ dɔwaabɛin. Yalu wogɔ boi Diikoro Yalu Iŋi Ɛju gɛɛɲu. Yalu gɔ Lase ana le bɛrii wɔɔ. 9Wagadu emɛ puu galaayaabe. Hakɛ mɛɛnu janwan gɔ galaa yaabe dɛi, diikoro le yoi yaa ga paruju diyɛi bee. Wogɔ digɛu, Pɔlu, inɛw gɔbe bɛrɛ tinwinrun obaa kijɛ wo gi: 10«Ba unrunw, yoi ɔn paruju diyɛi biyɛdo ga mu iyeuwɔn. Diikoro gɔ lee, gelu gɔ lee yayanwando. Kaa sigɛ le kinrun emɛ yoyoodo ma liyɛun baa.» 11Kaa sɔludasu kuu baŋa gɔ, Pɔlu sɔɔ gɔ gaai lugobele. Wo sigɛ le diikoro jɔbɔmɔnɛ gɔ lee, diikoro baŋa gɔ lee sɔɔ le gawaa bee. 12Iyaa, kaali waaru le, diikoro yalu iŋiyɛnjɛ kɔɔ nɛ biyɛ ga ɛjula bee dɛi, inɛw joo, kanrun bɛbɛɛmɔdo ye, mainiyaan ye Penikusu nɛ dɔi ye, kaali waaru gɔ kɔɔ nɛ gala ire gin. Wogɔ Kɛrɛte gana, diikoro yalu iŋiyɛnjɛ turui. Yalu wogɔ sibɛ turu tɛŋurun sibɛ gin’ yɛnɛjɛ, sibɛ waja gɔ donɔ sibɛ gin’ yɛnɛjɛ. 13Ooɲɔ wɛi, tɛŋurun sibɛ go gowaa wiyaa suyoube. Inɛw gɔbe sɔɔ unrunbe dɛnɛjɛ biyaaɲu ga ajubaa, inrun diyɛ diikoro iŋiyɛnmɔjɛ gɔ jeɲaa kunaa, gowaa, Kɛrɛte diŋirun le bɛru bɛru yaai tɔlaabɛin. 14Kaa tanwanlu, ooɲɔ diyɛ naa diyɛ, Kɛrɛte sibɛ go gowaa suyoi tɔlaabe. Ooɲɔ wogɔ boi Erakilɔn gɛɛɲu. 15Ooɲɔ gɔ diikoro gɔi balaa yaaube. Emɛ kanrinyaan ɔɲaa, diikoro gɔi gɔnrɔnnɛ kanraan, ooɲɔ gɔ bɛrɛ woi yapajin. 16Kunrin, minɛ dii gɔŋaa gɛlɛ dagi turu Kɔda gɛɛɲu gɔ, ooɲɔ gɔ gaila tɛŋaa wo sɛu, emɛ mainiyaan, pɛrɛ pɛrɛ diikoro dagi biɲaa emɛ sɛbe gɔi diikoro diyɛ gɔ nɛ jeɲaa kunaabɛin. 17Diikoro nɛ birɛbirɛnw gɔbe, diikoro dagi gɔi jeɲaa kunaa, ooɲɔ gɔ woi yamalanɔu ga, suŋu le ɛjii jaŋaa kɔmaabɛin. Nɛɛ, diikoro gɔ Libi gana diŋirun sɔsɔun nɛ yai ye pipiriyedo ma liyaayaa, be diikoro sɔi diyɛ gɔbe sunugaa, ooɲɔ bɛrɛ emi balaa yaamɔubɛin. 18Ooɲɔ diyɛ gɔ emi ɛjii jigemɔube digɛu, aga baa yaa gɔ, dɔɔ gamuu dii gɔ nɛ kamu kunɔi tɔlaabɛin. 19Bai taaniye gɔ, be numɔ bemɛ le, diikoro gelu gamuu jeɲaa, dii gɔ nɛ kamaa kunaabɛin. 20Bai lugo joo nɛ, nai ma, tolobe ma, turu kanran iyemɔlu. Iyaa ooɲɔ gɔ nimɛ kanran paŋa le suyou yagɛlɛbe dɛi, kuu emɛ gogoodo ma diyɛdɔn turu kanran sɛbenɛ. 21Bai lugo joo emɛ pana kayanɛ. Pɔlu, inɛw gɔbe giru nɛ iŋiyaan, ɔn gin’ be le sɔi: «Ba unrunw, sɔɔ ma yaba ye, Kɛrɛte nɛ goolu e kanrun ire bee. E sɔɔ ma yabaabei ye, ɔɲɛ ɔn lee, yanwan ɔn lee biyɛbele. 22Kaa nimɛ kanran anrangaju le biyɛi. Diikoro gɔi laa ye, logoro emɛ nɛ inɛ turu kanran kinrun suiyoidolo. 23Mui Ama mɔi wɔɔ gɔ, Ama mu babajɛ gɔ, mɛlɛnkɛ womɔ turu yaa digɛ wiyaa, genɛ ma nɛ dɔwaa, 24mu le ɔn gin’ sɔi: ‘Pɔlu, liyɛnɔu. Waajibi Rɔmɛ ɔgɔnɛ diyɛ gɔ saliyɛ kiru yalu nɛ u iŋiyɛun jaain wɔɔ. Iyaa, Ama ɛhɛju womɔ gaai wɔɔ digɛu, wo u le yoi yaanw gɔ puu kinrun u dɛi yayabado.’ 25Kɔɔ sabu dɛi, ba unrunw, diyɛdɔn le biyɛi. Sɔɔ gɔ puu mu bɛrɛ bana sɔin gin’ tee yinbiyɛdo ga mu wogɔ gagawu Ama le yasɔn. 26Kaa waajibi ooɲɔ emi damu ye, minɛ dii gɔŋaa gɛlɛ turu nɛ jajanrinyɛnmɔdo.» 27Mɛditɛranɛ nɛudii kuu nɛ ooɲɔ gɔ emi taŋa taŋa balu jɛyaaube. Kunrin kanraun, bai pɛli naisigɛye gɔ wo dɔwaa, digɛtaŋu waaru le, diikoro nɛ birɛbirɛnw gɔbe, emɛ minɛ maa turu le bɛruniyaan ga ajubaabɛin. 28Be suŋu tunwɔn yɛni dii gɔ nɛ kamaa kunaa tunwaanbɛin. Dii gɔ totoo mɛtɛrɛ pɛtaanu sɔisigɛ bee. Gaila yaa, be iyaa tunwaan yɛnaa, dii gɔ totoo mɛtɛrɛ pɛɛlɛi gagarasigɛ bee. 29Diikoro gɔ dumɔna nɛ yai ye jajanrinyɛndo ma liyaa yaa, be inrun diyɛ diikoro iŋiyɛnmɔjɛ gɔ, diikoro onu gɔ nɛ kamaa kunaabɛin. Baa yaaido gɔ be bɛrɛ ɛjii tanwaanbe. 30Birɛbirɛnw gɔbe diikoro gɔ nɛ goi ye bana jɔbɔɲu dɛnɛubɛin. Be diikoro dagi gɔ kɔmɔlaa, dii gɔ nɛ sunugaa, unrunbe diikoro giru go, inrun diyɛ diikoro iŋiyɛnmɔjɛ gɔ kamu kunɔi yaaɲu gin’ kanraun be wɔu, 31Pɔlu, sɔludasu suŋu kuu baŋa gɔ lee, sɔludasu wajunw lee bɛrɛ sɔwaa, inɛw kɔɔbe diikoro gɔ nɛ yabiyɛnɛ ye, be inɛ turu kanran kuu gooidolo gi. 32Kunrin wo sɔwaa, sɔludasu unrunw gɔ diikoro dagi suŋu gɔ kɛjaa, dii gɔ nɛ woi bagaa yoomaabɛin. 33Inɛw, baa yaaido dɔmiyaan be wɔu, Pɔlu be puu bɛrɛ sɔwaa, bemaa pana kaya gi. Kijɛ wo gi: «E dɔmiyaan, pana kayalu e wɔɔ, ɔn iye bai pɛli naisigɛ wɔɔ. 34Wogɔ digɛu, mainiyaanjɛi ye pana kayai. Kinrun ebe yaba ga e wogɔ kai yasɛi. Logoro ebe nɛ inɛ turu kanran, halu kuu womɔ kukuli koturu kanran manaidolo.» 35Kunrin sɔwaatiyaa, Pɔlu buru jeɲaa, inɛw puu giru nɛ Amai birɛpoo tagaatiyaa, kabalaa kayai tɔlu. 36Inɛw puu anrangaju biyaa, pana kayaabɛin. 37Diikoro gɔ nɛ inɛw tobɛin puu, emɛ inɛw suŋu lɛi, pɛsɔi kuloisigɛ bɛin. 38Waaru ɛjii pana kayaa bei bai le, diikoro gɔ wɛii biyɛ ga, be alukama gɔ puu nɛudii gɔ nɛ kamaa kunaabɛin. 39Baa yaa wo kanran, diikoro birɛbirɛnw gɔ yalu gɔ jugɔnɛ. Kaa be nɛudii jai turu iyaabɛin. Wogɔ diŋirun nɛ sɔsɔun yabe. Be, kanrun bɛbɛɛmɔdo ye, diikoro gɔ wogɔ nɛ dama jɛyaadɛin gin. 40Kunrin be inrun diyɛ diikoro iŋiyɛnmɔjɛ gɔbe kɔmɔlaa, dii gɔ doɲu go pajaa yoomaabɛin. Iyaa, kijɛ diikoro kigelemɔɲu suŋu gɔbe kɔmɔlaabɛin. Kɔɔ onu nɛ, ooɲɔ diikoro gɔi damaa ye yaa ga, be giru go sɔi diyɛ kunaa, dii diŋirun sibɛ go yaaube. 41Kunrin yaau, be nɛudii numɔ lɛi yalu sɛgɛrɛjɛ nɛ dɔwaabɛin. Wogɔ sɔsɔun yalui bee digɛu, diikoro gɔi aajɛ. Diikoro giru gɔ sɔsɔun nɛ ɛjii piriyaa yowaa bee. Nɛɛ, diigunu, paŋa le onu gɔ ɛjii lagaa ye kabalaube. 42Kajugunw gɔbe boni le goi ye jɔbɔ yaadɛin ma liyaa yaa, sɔludasu unrunw gɔbe, be puui dai ibɛɛ bɛin. 43Kaa sɔludasu suŋu kuu baŋa gɔ, Pɔlui yabu ibɛɛ bee dɛi, wogɔ be bɛrɛ kanranmɔlu. Inɛw boni jugɔnw gɔbe laa dii gɔ nɛ kiliyaa yowaa ye, minɛ maa nɛ dɔɔ ga tɔɔraabe. 44Inɛw wajunw gɔ bemaa baga pepenu ma, diikoro kabala gɔbe ma jeɲaa ye wogɔ nɛ ulo ye, minɛ maa nɛ dɔɔ ga tɔɔraabe. Kunrin, inɛw puu sɛɛu jamu le minɛ maa nɛ dɔwaa biyaabɛin.

will be added

X\