KANRAN 26

1Nɛɛ Agiripa, Pɔlu le sɔwaa kijɛ gi: «U kuu uwɔ dɛi sɔɔ sɔi bɛbɛɛdou.» Kɔɔ waaru le, Pɔlu numɔ jeɲaa, kuu womɔ goonɔ dɛi sɔɔ sɔwaa kijɛ wo gi: 2«Ɔgɔnɛ Agiripa, iye giru uwɔ nɛ iŋi ye, Yahutunw mui kijɛ nɛ jarugaɲu puu dɛi sɔɔ sɔɔ ga, mu bɛrɛ wogɔ kinɛ ɛɛli sɔɔi. 3U Yahutunw atɛmu ɛjii igii wɔu, iyaa sigɛ le be wooi logoro nɛ jiiru bana too gɔ, u igii wɔu. Wogɔ digɛu, mainiyaan muyaanjɛu ye, mui keŋiyɛn. 4«Dagi ma le baa, ana ma inɛw logoro nɛ lee, Jerusalɛmu ana nɛ lee bana mu biyaabe gɔ, Yahutunw logoro nɛ inɛw puu igii wɔin. 5Mui be jugu ɛjii tanwaan wɔɔ. Be sɛɛrɛ ma goi ibɛɛ wɔin ye, Yahutunw mɔɔnu oju wo gaara teitai wɔɔ gɔ, mu mɔɔnu wogɔ nɛ tobɔn ga be igii wɔin. Wogɔ Parisiɛnbe mɔɔnu gɔ woi. 6Kaa, Ama, emɛ babe le pui wo kunu gɔ nɛ diyɛ ma daanaa mu sɛɛ gɔ dɛi, mu iye saliyɛ kiru yalu nɛ wɔun. 7Tɔgu emɛ pɛli lɛisigɛ inɛw gɔbe yaa, maini diyɛ le Amai babau, pui wogɔ kibeido gɔ diyɛdɔn le wɔin. Ɔgɔnɛ, diyɛdɔn wogɔ mu sɛɛ dɛi, Yahutunw mui jarugauwɔin. 8Ama, yiun bubulomɔjɛ ga, wogɔ le gawa bɛɛmɔɔlɛ gin’ e Yahutunw gɔbe, e bɛrɛ yinwɔɔ ma? 9«Mu kuu ma le Nasarɛtu bɛɛnnɛ Yesu boi dɛi, gɔnrɔn ma kale wooi le jaiyɛun jaain wɔɔ ga ajubaabɔn. 10Jerusalɛmu nɛ kijɛ mu kanrun gɔ yaa woi. Ama bɛrɛ sadagadɔɔnɔw kuu bɛɛnw, mu bɛrɛ gɔnrɔn obaa, mu kuu ma le Ama inɛw joo kaju nɛ kunaabɔn. Bei daamɔ ga saliyɛ gɔ yinkɛjin ye, mu wogɔ le yabaubɔn. 11Waaru joo, Ama gɛɛn ginrun nɛ, mu bei ɔɲɔmɔubɔn, iyaa, bemaa Yesu le gawaa be wɔɔ gɔ paŋa le kɔɔrɔmɔti ga ibɛɛ bɔun. Be le mɔɲuniyaan gabaa, halu mu bei digi ye, gana waja ana nɛ yai ye, ɔɲɔmɔubɔn.» 12«Kunrin, Ama bɛrɛ sadagadɔɔnɔw kuu bɛɛnw gɔbe mu bɛrɛ gɔnrɔn obaa, Damasu ana nɛ mui tiyaabɛin. 13Oju nɛ mu tou, ɔgɔnɛ, naitege le mu yɛnɛu, wijɛ diyɛ alagala gowaa wiyaa, mu lee, yoi yaanw mu bɔɔnw lee gɔŋaabe. Wijɛ gɔ nai dɛi sigɛ dooroube. 14Emɛ wooi puu minɛ nɛ numaa sugaabɛin. Mii turu Yahutunw sɔɔ le ɔn gin’ mu le gɛɛu wo wɔu mu ɛgaabɔn: ‘Sɔlu, Sɔlu, u inge dɛi mui tɔɔɲɔuwɔu? Mu le pirigiyenu doori.’ 15Mu saa Inɛw Baŋa u aai ma gun. Inɛw Baŋa saa kijɛ gi: ‘Mu Yesui. Inɛ tɔɔɲɔu u wɔɔ gɔ mui. 16Kaa ingele ye kubɔ uwɔ kuu nɛ iŋiyɛn. Uwaa birɛbirɛnɛ mai biyɛ ga, iyaa sɛɛrɛ mai bii ye, mu le kijɛ u iyi lee, u bɛrɛ kijɛ mu tagaido lee, inɛw bɛrɛ taga ga mu ui yɛmaabɔn. Iye, u bɛrɛ kijɛ dɛi mui mu taguru gɔ kɔɔ woi. 17Mu Yahutunw lee, tɔgu wajabe inɛw lee bɛrɛ ui titiidɔn. Numɔ bemɛ nɛ ui yayabadɔn. 18Uwaa giri bemɛ pinɛlɛ ga be bɛrɛ ui tiidɔn. Uwaa ɔlɔ nɛ bei goonu ye, wijɛ nɛ jɛɛlɛ ga, Setanu paŋa nɛ bei ɛlɛ ye, Ama bɛrɛ jɛɛlɛ ga, iyaa bemaa mu Yesu le gawa ye, hakɛ yaabu kanrun bɛɛ ye, inɛw Ama mɔi wɔin logoro nɛ yalu bɛɛ ga, wogɔ dɛi ui be bɛrɛ tiidɔn.’ » 19«Aiwa, Ɔgɔnɛ Agiripa, alagala gowaa kuu iye mu iye gɔ le yabalu kanranlun. 20Mu Damasu bɛɛnw bɛrɛ laa waaju tagaabɔn. Kɔɔ onu nɛ Jerusalɛmu bɛɛnw lee, Judea gana puu nɛ lee, inɛw Yahutunw tɔgui laain lee bɛrɛ waaju tagaabɔn. Bemaa bana mɔɲu bemɛ dulomaa ye, Ama sibɛ go kigelemɔ ga mu bei tagaabɔn. Iyaa bana kana bemɛ le birɛ sɛgɛrɛjɛ birɛ ga tagaabɔn. 21Kɔɔ sabu dɛi, Ama Ginrun Diyɛ gɔ nɛ waaru mu tobe le, Yahutunw mui aa daadɛin ga bɛin. 22Kaa Ama gɛli gɔ digɛu, mu iye baa dɔwaa wɔun. Inɛw diyɛnw sɛlɛ, dagunw sɛlɛ, mu ɔn nɛ iŋiyaan, inɛw puu giru nɛ sɛɛrɛ goouwɔn. Inɛw Ama titiyaanw gɔbe lee, Mɔise lee sɔɔ bibiyɛdo ga be gi gɔ, wogɔ kuu nɛ mu sɔɔ turu kanran baraa sɔɔuwɔlɔn. 23Be Ama Yabanɛ Diyɛ tii, ɛjii ɔhɔɲɔdo, wo pɔlɔi yiun logoro nɛ bulo goi ye, emɛ Yahutunw lee, tɔgu wajabe lee bɛrɛ yayabu wijɛ gɔ bɛbɛɛmɔdo ga tatagado gin.» 24Pɔlu kunrin kuu womɔ goonu sɔɔ sɔɔu wo wɔu, Pɛsutusu mii ɛɛn le ɔn gin’ sɔi: «Pɔlu, u wejeginɛi. Jugɔ diyɛ uwɔ ui wejegiyemaati.» 25Pɔlu saa: «Pɛsutusu inɛ ɛju, weje mui sɛlɛ. Kaa sɔɔ mu sɔɔjɛ ɔnbe puu narain, iyaa sɔɔ oju sɛɛi. 26Ɔgɔnɛ Agiripa kai, sɔɔ ɔnbe puu jugaa wɔɔ digɛu, mu liyɛ sɛlɛ go wo le sɔɔ bɛbɛɛdɔn. Sɔɔ gɔbe baŋiyaan kanrannɛ gɔ digɛu, kijɛ soo sɛlɛ wo wɔɔ wɔlɔ ga mu gawaa wɔun. 27Ɔgɔnɛ Agiripa, u inɛw Ama titiyaanw sɔɔ le gawaa wɔu ma? U gawaa wɔu ga mu igii wɔun.» 28Agiripa saa: «Waaru gaila nɛ u mui Kirisito inɛi tanugu bɛbɛɛdou ga wɔu ma?» 29Pɔlu gi: «Waaru gailai wee, waaru gailai laa wee, u sai laa, kaa inɛw iye mui keŋiyɛnw gɔbe puu, mui pagaa unsɛin gɔ tolo go, e wooi puu mu gin’ biyɛ ga Ama bɛrɛ kijɛ mu gɛɛnjɛ gɔ woi.» 30Kunrin, ɔgɔnɛ gɔ ingelaabe. Sɛmɛginɛ gɔ lee, Berenise lee, be wooi inɛw daanbɛin gɔ puu lee yaa ingelaabɛin. 31Waaru gaila be wageni le, be tunmɔ le sɔɔubɛin: «Ainɛ ɔn woi daaun jaan sɔɔ ma, kaju kunɔu jaan sɔɔ ma turu kanran kanranlu.» 32Agiripa yaa Pɛsutusu le sɔwaa: «Ainɛ ɔn Rɔmɛ ɔgɔnɛ diyɛ bɛrɛ sɔɔ unrunmɔ dɔɔnɔ gɛɛlu bee ye, woi paja ye yaamɔ bɛbɛɛmɔbe.»

will be added

X\