KANRAN 25

1Sɛmɛginɛ Pɛsutusu, gana gɔ nɛ wo wɛi, bai taanu galaa wo yaa, wo Sesare ana gowaa, Jerusalɛmu yaabe. 2Kɔɔ nɛ wo yaa, Ama bɛrɛ sadagadɔɔnɔw kuu bɛɛnw gɔ lee, Yahutunw inɛw giru toin lee wo bɛrɛ wiyaa, Pɔlui kijɛ dɛi be jarugajɛ sɔɔ tagaabɛin. Be Pɛsutusu bɛrɛ gɛnyaan, 3Pɔlui Jerusalɛmu jɛɛlɛ gin. Kɔɔ waaru le be tunmɔ le yeguru mɔɲu kunaa, oju nɛ Pɔlui daitiimɔ ga bɛin. 4Pɛsutusu saa, Pɔlu Sesare nɛ kaju too gi. Iyaa, bɛrii unrun kuu unrunmɔ le wogɔ nɛ pilemu yayaadɔn gi. 5Wo baraa ɔn gin’ sɔi: «Pɔlu mɔɲu kanraanbe ye, kuu ebe bɛɛnw, mu le digi ye Sesare nɛ wɛi ye, wo dɛi sɔɔ be sɛɛ be sɔɔmɔi.» 6Jerusalɛmu nɛ Pɛsutusu bai gagara ma, pɛlu ma dɛi sigɛ kanranlu. Wo pilemaa Sesare wiyaabe. Bai wo wɛi aga baa yaa gɔ, wo saliyɛ kiru yalu womɔ nɛ dɛinyaan, Pɔlui jɛɛlɛ ga tɔɔraabe. 7Pɔlu wo wiyaa, Jerusalɛmu gowaa Yahutunw wɛin gɔbe, woi gɔŋaa, womaa sɔɔ mɔɲu mɔɲu joo kanrun ga, woi jaaraabɛin. Kaa sɔɔ gɔbe narain ga be sɔi taguru bɛɛbenɛ. 8Kaa Pɔlu, kuu womɔ goonu dɛi sɔɔ ɔn gin’ sɔi: «Mu Yahutunw tɔɔru sibɛ go ma, Ama Ginrun Diyɛ gɔ sibɛ go ma, Rɔmɛ ɔgɔnɛ diyɛ sibɛ go ma, mɔɲu turu kanran kanranlun.» 9Pɔlu kunrin wo sɔwaa, Pɛsutusu Yahutunw bɛrɛ boi bɛɛdo ga, Pɔlu bɛrɛ ɔn gin’ selumu: «Jerusalɛmu yai ye sɔɔ kɔɔ dɛi giru ma nɛ saliyɛ uwɔ kire ga, u yayabadou ma?» 10Pɔlu ɔn gin’ aŋa womɔ sai: «Mu Rɔmɛ ɔgɔnɛ diyɛ saliyɛ kiru yalu nɛ yaadɔn. Sɔɔ ma yalu kilɛmɔu jaan gɔ woi. Mu Yahutunw bɛrɛ sɔɔ turu kanran kanranlun ga u semu semu jugɔjɛu. 11Jarugu mu le yɔɔ ma, mui daaun baa kijɛ kanraanbɔn ye, wogɔ dɛi mui daadɛin gin ye, mu yayabadɔn. Kaa kijɛ dɛi mui be jarugajɛ gɔ narain laa ye, inɛ turu kanran numɔ bemɛ nɛ mui kunɔ bɛɛidolo. Mu Rɔmɛ ɔgɔnɛ diyɛ saliyɛ kiru dɔmiyɛndɔn.» 12Pɔlu kunrin wo sɔwaa, Pɛsutusu woi tinwɛnrɛnw be wooi tunmɔ paamaa, Pɔlu le ɔn gin’ sai: «Aiwa, u sɔɔ uwɔ Rɔmɛ ɔgɔnɛ diyɛ sagi gu. U wo bɛrɛ yayaadou.» 13Bai gaila onu nɛ, Ɔgɔnɛ Agiripa lee, Berenise lee, Sesare ana nɛ Pɛsutusui poonɔi wiyaabɛin. 14Sesare nɛ be bai joo biyaabɛin digɛu, Pɛsutusu, Pɔlu sɔɔ jeɲaa be bɛrɛ tagaa ɔn gin’ sɔi: «Sɛmɛginɛ Pelikusu, ainɛ turu kaju nɛ wo pajaa, ɔn nɛ yɔɔ. 15Waaru Jerusalɛmu nɛ mu yai le, Ama bɛrɛ sadagadɔɔnɔw kuu bɛɛnw lee, inɛw naw lee mu bɛrɛ wiyaa, woi jarugaa, maa saliyɛ kiraa ye woi daa gin. 16Mu aŋa bemɛ saa, inɛ saliyɛ giru nɛ iŋɛraanɲu gɔ, inɛw woi jaaranw gɔbe be wooi sɔɔ sɔɔmɔlu go, iyaa kijɛ dɛi woi jaarau wɔin dɛi kuu womɔ goonɔ ga wo bɛrɛ sɔɔ obolu go, Rɔmɛ bɛɛnw atɛmu nɛ inɛ wogɔi numɔ nɛ kunɔidenɛ gun. 17Kunrin, be mu le digiyaa, ɔn nɛ wiyaabɛin. Mu sɔɔ gɔ duunɔlun. Aga baa yaa gɔ saliyɛ kiru yalu ma nɛ dɛinyaan, ainɛ gɔi jɛɛlɛ gun. 18Inɛw woi jaruganw gɔbe wiyaa, sɔɔ sɔwaabɛin. Kaa ainɛ gɔ kijɛ mɔɲu kanraanbe ma mu ajubaabe sɔɔ turu kanran gɛɛnɛ. 19Ama digu oju dɛin bemɛ sɔɔ lee, ainɛ turu Yesu gɛɛɲu lee kuu nɛ be wooi jiiru biyaa wɔin. Yesu gɔ yinwaain. Kaa Pɔlu womaa ɔnmɔi wɔɔ gi. 20Kijɛ kɔɔ tunmɔ sɔɔ yani sɔɔɲu ma, mu inɛɛ bɔun. Wogɔ digɛu, mu Pɔlu bɛrɛ selumaa, Jerusalɛmu yai ye sɔɔ wogɔ dɛi saliyɛ womɔ kire ga yayabado ma gun. 21Kaa Pɔlu, sɔɔ unrunmɔ Rɔmɛ ɔgɔnɛ diyɛ sagi ga, wo bɛrɛ unruin tii gi. Kunrin, ɔgɔnɛ diyɛ bɛrɛ woi tii mu bɛɛido baa, kaju nɛ woi gɛliyɛ ga tɔɔraabɔn.» 22Agiripa saa, unrun ainɛ gɔi keŋi ibɛɛ wɔun gi. Pɛsutusu womaa yogo woi ɛhɛgɛdo gi. 23Kunrin aga baa yaa gɔ, Agiripa lee, Berenise lee, inɛw bɛrɛ unrunbei ɛjii tuŋɔmaa, saliyɛ kiru ginrun gɔ nɛ wiyaa yowaabɛin. Sɔludasu kuu bɛɛnw diyɛnw gɔbe lee, ana inɛw diyɛnw gɔbe lee, be wooi wɛin. Pɛsutusu tɔɔru obou wo digɛu, Pɔlui jɛɛlaabɛin. 24Pɛsutusu sɔɔ jeɲaa ɔn gin’ gi: «Ɔgɔnɛ Agiripa lee, e inɛw ɔn nɛ emɛ le toin gɔ puu lee, Jerusalɛmu nɛi ma, ana ɔn nɛi ma, Yahutunw joo, ainɛ ɔn ɔnmɔi wo biyɛun jaanla ga, kɔnwɔun mu bɛrɛ bana be wɛi, e iyaabei. 25Mu kai, woi daaun baa kijɛ mɔɲu wo kanranlu ga paamaabɔn. Kaa wo kuu unrunmɔ le, unrun Rɔmɛ ɔgɔnɛ diyɛ bɛrɛ yaadɔn gi digɛu, mu woi wogɔ nɛ titiidɔn gun. 26Wo dɛi ɔgɔnɛ diyɛ bɛrɛ sɔɔ tɔŋɔu jaan tee iyelun. Ɔgɔnɛ diyɛ bɛrɛ, maa kijɛ tɔŋɔɲu bɛɛ ga, mu wogɔ dɛi ebaa woi selumɛ ga, giru ebe nɛ woi iŋiyɛnmu. Sigɛ le ɔgɔnɛ Agiripa, giru uwɔ nɛ woi iŋiyɛnmu. 27Kajuginɛ inɛ bɛrɛ tii ye, sɔɔ dɛi woi jarugin sɛɛu ɛjɛmaa sɔɔnɛ ye, mu bɛrɛ wogɔ tiyɛ sɛlɛ gin’ wɔɔ.»

will be added

X\