KANRAN 24

1Bai numɔrɔn galaa wo kanran, Ama bɛrɛ sadagadɔɔnɔnɛ kuu baŋa Ananiasu, inɛw naw gamuu le Sesare ana nɛ wiyaabe. Rɔmɛ bɛɛnw tɔɔru jugɔnɛ turu yaa be le yabe. Boi womɔ Tɛrutulusu gɛɛɲu. Be Pɔlu le jarugu be sɛɛ sɛmɛginɛ gɔ bɛrɛ tagaabɛin. 2Kunrin Pɔlui boonaa jɛɛlaa, Tɛrutulusu sɔɔ jeɲaa Pɔlui jarugaabe. Kijɛ wo gi: «Sɛmɛginɛ Pelikusu, u kɔrumɔ le gana ɔn jamu diyɛ le wɔɔ. Iyaa, sɔɔ bana yeguru u jugaa wɔɔ digɛu, gana ɔn inɛw dɛi, ɛju dɛin dɛin kanraanjɛu. 3Wogɔ emɛ bɛrɛ sɔɔ ɛjui. Emɛ yalu puu nɛ waaru wooi ui birɛpoo tagauwɔin. 4Kaa sɔɔ joo le ui ɔɲɔmɔnu biyɛnu doori digɛu, mu u bɛrɛ gɛɛunwɔn, ɛhɛju uwɔ dɛi, waaru gaila sɔɔ emɛ keŋiyɛn. 5Jaabu jiun inɛw logoro nɛ bana yanwan tɛbɛjɛ gin’, ainɛ ɔn kunrin yanwan tɛbɛnɛ diyɛi biyaa wɔɔ. Wo aduna sibɛ nai puu nɛ Yahutunw logoro nɛ sɔɔ puu ligijiyemaati. Nasarɛtu bɛɛnnɛ oju kakalugu, kuu baŋa gɔ yaa woi. 6Halu wo Ama Ginrun Diyɛ gɔ purɔmɔdo ga tɔlaabe. Kaa emɛ woi aabɛin. [Tɔɔru emɛ le kɛukɛu emɛ saliyɛ womɔ kire ibɛɛ bɛin. 7Kaa sɔludasu kuu baŋa diyɛ Lisiasu wiyaa, numɔ emɛ nɛ paŋa le woi ɛlaabe. 8Wo woi jaruganw gɔ bemaa u bɛrɛ wɛɛ ga tɔɔraabe.] U kuu uwɔ le woi selumu ye kijɛ dɛi woi emɛ jarugajɛ gɔ narain ga jujugɔdou.» 9Yahutunw gɔbe yaa wo le mii turu biyaa, sɔɔ gɔ kunrin tee yinwɔɔ gin. 10Sɛmɛginɛ gɔ Pɔlu bɛrɛ sɔɔ wo obaa, wo sɔɔ jeɲaa ɔn gin’ gi: «Anranguju joo u tɔgu ɔn saliyɛ kirɛnɛi biyaa wɔu ga mu igii wɔun. Kɔɔ sabu dɛi mu giru uwɔ nɛ, kuu ma goonɔ dɛi sɔɔ mu sɛɛ gɔ, diyɛdɔn le sɔɔdɔn. 11Jerusalɛmu nɛ Amai babai mu wɛi iye bai pɛli lɛisigɛ dɛi gaa laa. Wogɔ narain ma u kuu uwɔ le marun yɛnu bɛbɛɛdou. 12Ama Ginrun Diyɛ gɔ nɛ ma, Ama gɛɛn ginrun gɔbe nɛ ma, ana kɔlɔ nɛ ma, inɛ turu le kanran jiiru jiireu mu wɔu, iyemɔlu. Maa inɛw suuraa ingelemɔ ga kanranlun. 13Inɛw ɔnbe kanɛ kijɛ nɛ mui be jarugajɛ gɔ narain ga, sɛɛrɛ goo bɛɛnɛ. 14Kaa mu sɔɔ ɔn nɛ giru uwɔ nɛ ihiŋiyɛndɔn: Be kakalu ojui ga be gɛɛjɛ gɔ, mu oju wogɔ digiyaa, emɛ babe Ama gɔi babauwɔn. Mɔise tɔɔru dɔn gɔ lee, inɛw Ama titiyaanw dɔn gɔbe lee, mu wogɔbe le gawaa wɔun. 15Iyaa inɛw teitai lee, teitai laa lee puu bubulodɛin ga diyɛdɔn wogɔ mu Ama bɛrɛ biyaa yasɔn. Be yaa bulogu wogɔ yadɔmi. 16Wogɔ digɛu, Ama sibɛ go ma, inɛw sibɛ go ma, kinɛ ma mui jaruganɔu ga, kuu ma le ɛjii mainiyɛunwɔn. 17«Jerusalɛmu nɛ mu goi anranguju joo galaai. Kaa tɔgu ma inɛw bɛrɛ sin obu jɛɛlɛ ga, iyaa Ama bɛrɛ sadaga goonɔ ga, mu pilemaa wiyaabɔn. 18Mu mui ɛjɛmaatiyaa, Ama Ginrun Diyɛ gɔ nɛ mu tou, be kɔɔ waaru le wiyaa mui tɛmi. Wogɔ nɛ mɔɔnu diyɛ bele, giru giru bele. 19Kaa Yahutunw gamuu Rɔmɛ laamu Asi numɔ nɛ gowaa wiyaa yabɛin. Be kuu bemɛ le ɔn nɛ giru uwɔ nɛ iŋi ye, mu le sɔɔ yasin ye, sɔɔ sɔɔun jaan bee. 20Maa, badubadanw diyɛnw mɔɔnu nɛ waaru sɔɔ ma sɔin le, yiun bubulodo ga gawaa mu wɔɔ gɔ dɛi, iye mui giru ebe nɛ badu daanaaɲu ga mii ɛɛn le mu sɔi gɔi laa go, jarugu inge mu nɛ tɛmɛmu ma inɛw unwɔin gɔbe be sɔɔmɔ.» 22Pelikusu kanran, Inɛw Baŋa oju gɔ dɛi sɔɔ ɛjii igii bee. Kaa kɔɔ wooi nɛ, wo unrun bai waja sɔɔ gɔ sɔɔdo ga bei tiyaabe. Kijɛ wo gi: «Sɔludasu kuu baŋa diyɛ Lisiasu wiyaai ye, mu sɔɔ ebe gɔ kɔɔ gin’ marun yɛnɛdɔn.» 23Kunrin sɔwaatiyaa, wo sɔludasu suŋu kuu baŋa, Pɔlui kajubanɛ gɔ bɛrɛ tɔɔraa, woi kaju nɛ yagɛliyɛ gi. Kaa kaju yɔrui bojaa ye, inɛw womɔ bɛrɛ kai womɔ kilɛmɔ ga tɛŋɛnɔu gi. 24Bai gaila galaa wo yaa, Pelikusu, yaanran unrunmɔ Durusile le wiyaabe. Yaanran womɔ Yahutunɛi bee. Pelikusu inɛ tiyaa, Pɔlui boonaabe. Kirisito Yesu le gawu sɔɔ Pɔlu sɔɔbe gɔ wo keŋiyɛunbe. 25Kaa Pɔlu teitai sɔɔ lee, kuu gɛli sɔɔ lee, Ama saliyɛ wɛɛido sɔɔ lee sɔɔube dɛi, Pelikusu liyaa, ɔn gin’ sɔi: «Kanɛ u yai bɛbɛɛdou. Waaru biyaajɔn ye, mu pilemɛ ye ui boboonɔdɔn.» 26Pelikusu, Pɔlu wo bɛrɛ buudu ohobodo ma yaa ajubaube. Kɔɔ dɛi wo bɛru bɛru woi boonu boonu ye, wo le sɔɔ sɔɔube. 27Kɔɔ gin’ wɔu, anranguju lɛi baa galu. Sɛmɛginɛ Pelikusu dilɛ nɛ Pɔrusiusu Pɛsutusu daani. Pelikusu, Yahutunw bɛrɛ boi bɛɛdo ga, Pɔlui kaju gɔ nɛ yapaju.

will be added

X\