KANRAN 23

1Pɔlu, badubadanw diyɛnw mɔɔnu bɛrɛ giri dɛɛraa kijɛ wo gi: «Ba unrunw, mu kinɛjugɔ jarugu sɛlɛ le biyaa iye bai dɔɔ Ama giru nɛ yoi yaauwɔn.» 2Ama bɛrɛ sadagadɔɔnɔnɛ kuu baŋa Ananiasu, inɛw Pɔlu le bɛrii wɔin gɔbei tɔɔraa, bemaa aŋa womɔ laga gi. 3Pɔlu wo le saa: «U kanran, Ama ui lalagado, kijɛ jege piliniyɛnmaaɲu ɔn. Uwaa Tɔɔru le kɛukɛu saliyɛ ma kire ga ui daanaa be kanran, mui laga gɛɛjɛu? Wogɔ Tɔɔru yamuli.» 4Inɛw kɔɔ nɛ bɛin gɔbe saa: «Ama bɛrɛ sadagadɔɔnɔnɛ kuu baŋa, Ama yɛmaajɛ gɔ, u woi duyɔuwɔu ma?» 5Pɔlu saa kijɛ gi: «Ba unrunw, wo Ama bɛrɛ sadagadɔɔnɔnɛ kuu baŋai ma mu inɔn bɔun. Kɔɔi laa ye Ama Dɔn nɛ tɔŋaaɲu: “U tɔgu uwɔ kuu baŋa dɛi sɔɔ mɔɲu sɔɔnɔu.”» 6Badubadanw diyɛnw gɔbe logoro nɛ gamuu Saduseyɛnbei, gamuu Parisiɛnbei ga Pɔlu igii bee. Kɔɔ dɛi wo mii ɛɛn le giru bemɛ nɛ sɔwaa gi: «Ba unrunw, mu Parisiɛin, Parisiɛn ii. Nɛɛ yiun bubulodo diyɛdɔn gɔ dɛi mui badu daanaaɲu.» 7Pɔlu kɔɔ gin’ wo sɔwaa, Parisiɛn gɔbe lee, Saduseyɛn gɔbe lee logoro nɛ jai ingelaai. Mɔɔnu gɔ nɛ inɛw tunmɔ le mii kabiyaai. 8Saduseyɛn gɔbe yiun bulogu lee, Mɛlɛnkɛbe lee, kikinu lee wɔlɔ gɛɛɲu. Kaa Parisiɛn gɔbe kɔɔbe puu le gawaa wɔin. 9Siɲɛ ɛjii yabe. Parisiɛn mɔɔnu nɛ Ama tɔɔru deerenw toin gamuu ingelaa, jiiru diyɛ jiirei tɔlaa, kijɛ be gi: «Emɛ ainɛ ɔn nɛ mɔɲu turu kanran iyenɛ. Kikinu ma, Mɛlɛnkɛ turu wo le sɔɔ sɔwaabe ma aa jugɔjɛ?» 10Jiiru gɔ bariyɛu yaaube dɛi, sɔludasu kuu baŋa diyɛ gɔ, be Pɔlui lagu yamulutiidɛin ma ga, sɔludasu gɔbe bɛrɛ tɔɔraa, woi logoro bemɛ nɛ goonaa ye sɔludasube ginrun diyɛ gɔ nɛ jɛyaa gi. 11Nɛɛ bai wogɔ digɛ gɔ tee, Inɛw Baŋa, Pɔlu bɛrɛ unruin tagaraa, gi: «Liyɛnɔu, anrangaju le biyɛ. Jerusalɛmu nɛ mu dɛi bana sɛɛrɛ u goi gin’, waajibi Rɔmɛ ana nɛ yaa mu dɛi sɛɛrɛ u gooun jaain wɔɔ.» 12Aga baa yaa gɔ, Yahutunw gamuu mɔrinyaan, Pɔlu dɛi dabulu mɔɲu tɛyaabɛin. Be saba sabaa, kuu bemɛ jɛbiyaa, unrunbe Pɔlui daalu go jaa kayaidenɛ, dii nɔɔidenɛ gin. 13Kɔɔ gin’ mɔrinyaan, inɛw sɔɔ yegurin gɔbe, inɛw pɛnai dɛi gaa bee. 14Be Ama bɛrɛ sadagadɔɔnɔw kuu bɛɛnw gɔbe lee, inɛw naw gɔbe leei yaa tɛmaa, kijɛ be gi: «Emɛ Pɔlui daalu go, aŋa emɛ nɛ pana turu kanran kunɔidenɛ ga saba sabaa kuu emɛ jɛbiyaa wɔin. 15Nɛɛ badubadanw diyɛnw mɔɔnu gɔ e wooi yegeraajɛi ye, sɔludasu kuu baŋa diyɛ gɔi yai tɛmɛi. Pɔlu sɔɔ ɛjii marun yɛnɛdei giye, woi e bɛrɛ jɛɛlɛ gɛɛi. Emɛ kai e bɛrɛ wo dɔɔmɔ nɛ, woi daa ga yegeraa wɔin.» 16Pɔlu lejuwenɛ dabulu mɔɲu kɔɔ soo biyaa, sɔludasu ginrun diyɛ gɔ nɛ yaa yowaa, Pɔlu bɛrɛ tagaabe. 17Pɔlu, sɔludasu suŋu kuu baŋa turu boonaa, wo le ɔn gin’ sɔi: «Sagatara ii ɔin sɔludasube kuu baŋa gɔ bɛrɛ dimɛrɛn jɛyaa. Wo, wo bɛrɛ sɔɔ tagaɲu turu yasɛ.» 18Sɔludasu suŋu kuu baŋa gɔ, sagatara ii gɔi dimɛraan, sɔludasu kuu baŋa diyɛ gɔ bɛrɛ jɛyaa, ɔn gin’ sɔi: «Kajuginɛ Pɔlu mui boonaa, ii ɔn u bɛrɛ sɔɔ tagaɲu yasɛ ga, u bɛrɛ woi dimɛrɛn jɛyaa gi.» 19Sɔludasube kuu baŋa gɔ sagatara ii gɔ numɔ aa, dɔraa gowaa, ii gɔi selumaabe: «U sɔɔ ingei mu bɛrɛ tagai wɛiu?» 20Sagatara ii gɔ ɔn gin’ sai: «Yahutunw tunmɔ le yegeraa, Pɔlu sɔɔ gɔ ɛjii marun yɛnɛdɛin giyaa ye, uwaa yogo bei badubadanw diyɛnw bɛrɛ jɛɛlɛ gɛgɛɛdɛin. 21Sɔɔ bemɛ keŋiyɛnnɔu. Be logoro nɛ inɛw pɛnai dɛi sigɛ, Pɔlui daadɛin ga, wo dɛi dabulu mɔɲu kunaa wɔin. Inɛw kɔɔbe saba sabaa, Pɔlui daalu go jaa kayaidenɛ, dii nɔɔidenɛ ga kuu bemɛ le jɛbiyaa wɔin. Kanɛ yeguru bemɛ kilaai. Aŋasaara uwɔi laa ye kijɛ be dɔmɔ wɔlɔ.» 22Sagatara ii gɔ kunrin sɔwaa wo kilaa, sɔludasube kuu baŋa gɔ womaa sɔɔ unrun bɛrɛ wo jugɔmu gɔ inɛ turu bɛrɛ kanran sɔɔnɔu giyaatiyaa, kɔɔ gin’ woi tii. 23Kɔɔ onu nɛ, wo sɔludasu suŋu kuu bɛɛnw lɛi boonaa, kijɛ wo gi: «Sɔludasu unrunw suŋu lɛi lee, sɔludasu sɔun bɛɛnw pɛsɔi lee, saru bɛɛnw suŋu lɛi lee mɔɔnaa ye, digɛ lɛɛrɛ tuwɔ waaru le gin’, Sesare ana nɛ yai dɛi yeguru be kunɔmɔi. 24Pɔlui, Sɛmɛginɛ Pelikusu bɛrɛ sɛɛu jamu le dɔɔnɔ ga, sɔun wajabe yaa yegerei.» 25Kɔɔ onu nɛ wo lɛtɛrɛ ɔn gin’ tɔŋaa obu: 26«Mu Kulɔde Lisiasu, Sɛmɛginɛ Pelikusu bɛrɛ lɛtɛrɛ ɔn tiiuwɔn. Mu ui poonɔuwɔn. 27Ainɛ ɔn, Yahutunw woi aa daadɛin ga be wɔu, Rɔmɛ ii tɔitɔii ga ɛgaa, mu sɔludasu mabe emɛ wooi yaa, numɔ bemɛ nɛ woi yabaabɔn. 28Kijɛ inge dɛi be woi jarugauwɔin ma mu jugɔ ibɛɛ bɔun dɛi, Yahutunw badubadanw diyɛnw mɔɔnu nɛ woi jɛyaabɔn. 29Tɔɔru bemɛ sɔɔ dɛi laa ye, jarugu waja wo le wɔlɔ ga mu iyaabɔn. Woi daaun jaan sɔɔ ma, kaju nɛ kunɔu jaan sɔɔ ma turu kanran wo nɛ tɛmɛmɔlu. 30Nɛɛ wo dɛi Yahutunw dabulu mɔɲu kunaa wɔin ga ɛgaa, mu ɔgu kɛu woi u bɛrɛ tiyaabɔn. Inɛw woi jaruganw gɔbe bemaa yaa wo le sɔɔ yasin ye, u bɛrɛ yai taga gun.» 31Sɔludasu gɔbe, be bɛrɛ bana tɔɔrin le kɛukɛu, Pɔlui jeɲaa, digɛ gɔ le woi dimɛraan, Antipatirise ana baa yaabɛin. 32Aga baa yaa gɔ, sɔun bɛɛnw gɔbe le Pɔlui tiyaatiyaa, be pilemaa sɔludasube ginrun diyɛ gɔ nɛ wiyaabɛin. 33Sesare dɔwaa, sɔun bɛɛnw gɔbe lɛtɛrɛ gɔ sɛmɛginɛ bɛrɛ obaa, Pɔlui numɔ womɔ nɛ kunaabɛin. 34Lɛtɛrɛ gɔ jaŋaa, sɛmɛginɛ gɔ, Pɔlu, gana kɛju yagɔ nɛ too ma selumaabe. Silisi gana nɛ goi ga ɛgaa, 35unrun, woi jaruganw gɔbe wiyaain ye woi yinkeŋiyɛndɔn gi. Wo Pɔlui, Ɔgɔnɛ Herɔde sɛmɛginɛ ginrun uju gɔ nɛ gɛliyɛ ga tɔɔraabe.

will be added

X\