1 «Mu delebe lee, mu babe lee, kuu ma goonɔ dɛi sɔɔ mu sɛɛ gɔ keŋiyɛin.» 2 Pɔlu be le Yahutunw sɔɔ le sɔɔuwɔ ga ɛgaa, be sigɛ le kelemu biyaabɛin. Pɔlu ɔn gin’ sɔi: 3 «Mu Yahutunɛi, Silisi gana Taruse ana nɛ mui narin. Kaa Jerusalɛmu ana ɔn nɛ mui kɔin. Emɛ babe tɔɔru gɔ sɛɛu digiyɛ ga, mu Gamaliɛlu le jaŋu jaŋun. Iye e wooi puu bana e wɔɔ gin’, mu yaa kunrin Ama le ɛjii maai bɔun. 4 Inɛw Baŋa Yesu oju nɛ inɛw tobɛin gɔbe, mu yiun nɛ yai dɔɔ baa bei ɔɲɔmɔubɔn. Anranw sɛlɛ, yaanw sɛlɛ, mu bei aa kɔmaa ye kaju nɛ kunɔubɔn. 5 Ama bɛrɛ sadagadɔɔnɔnɛ kuu baŋa gɔ lee, inɛw naw mɔɔnu nɛ inɛw toin puu lee, be sɛɛrɛ ma goo bɛbɛɛdɛin. Halu, mu numɔ bemɛ nɛ lɛtɛrɛ biyaa, emɛ ba unrunw Damasu nɛ wɔin gɔbe bɛrɛ jɛyaabɔn. Kɔɔ nɛ yai ye jaŋu unrunw wɔin gɔbei aa kɔmaa ye, Jerusalɛmu jɛɛlɛ ye ɔɲɔmɔ ga mu numɔ bemɛ nɛ lɛtɛrɛ biyaabɔn.» 6 «Kunrin oju nɛ tou, Damasu ana le bɛrii mu wɔu, naitege waaru le kubɔ turu wijɛ alagala gowaa wiyaa, sibɛ ma puu wijɛmaabe. 7 Mui minɛ nɛ numaa sugaa, mii turu mu le ɔn gin’ sɔɔu wo wɔu ɛgaabɔn: ‘Sɔlu, Sɔlu, inge dɛi mui tɔɔɲɔuwɔu?’ 8 Mu saa, Inɛw Baŋa, ui aai ma gun. Wo saa kijɛ gi: ‘Mu Nasarɛtu bɛɛnnɛ Yesui. Inɛ tɔɔɲɔu u wɔɔ gɔ mui.’ 9 Inɛw mu le bɛin gɔbe wijɛ gɔ iyaabɛin, kaa inɛ mu le sɔɔ sɔɔube gɔ mii ɛgɛnɛ. 10 Mu iyaa ɔn gin’ gun: ‘Inɛw Baŋa, mu nɛɛ inge kanrandɔn?’ Inɛw Baŋa saa gi: ‘Ingele, Damasu nɛ yaa. Kijɛ uwaa kanran ga Ama tɔɔru gɔ puu u bɛrɛ tatagadɛin.’ 11 Wijɛ gɔ dooro gɔ dɛi mui girumiyaan yaabe gɔ digɛu, inɛw mu le bɛin gɔbe, numɔ ma aa, mui dimɛraan, kunrin mu Damasu dɔwaabɔn. 12 «Kɔɔ nɛ ainɛ Ama digiyɛnɛ ɛju turu, Ananiasu gɛɛbɛin gɔ yabe. Wo tɔɔru emɛ sɔɔ le yabaube. Damasu Yahutunw gɔbe puu wo dɛi sɛɛrɛ ɛju gooubɛin. 13 Ainɛ kɔɔ giru ma nɛ wiyaa iŋiyaan, mu le kijɛ wo gi: ‘Mu bainɛ Sɔlu, pilemu ye giri iye.’ Waaru kɔɔ le tee giri ma pinɛlaa, mu woi iyaabɔn. 14 Wo gimaa ɔn gin’ sɔi: ‘Emɛ babe Ama gɔ, uwaa, diŋɛ unrunmɔ jugɔ, Teitai Baŋa gɔi giri le iye ye, aŋa womɔ nɛ sɔɔ ɛgɛ ga, giru nɛ baa ui yɛmaabe. 15 Sabu u inɛw puu giru nɛ kijɛ u iyi lee, u ɛgu lee dɛi sɛɛrɛ womɔ goonɛi biyɛdou. 16 Nɛɛ ingei dɔmɔu? Ingele, Inɛw Baŋa boi boonaa ye, batise yowaajɛu ye, hakɛ uwɔ u le wo goomɔ.’ » 17 «Kunrin, Jerusalɛmu waaru pilemaa mu wɛi le, Ama Ginrun Diyɛ gɔ nɛ Ama gɛɛun tou, mu kuu iye iyaabɔn. 18 Mu Inɛw Baŋa Yesui iyaabɔn, wo mu le ɔn gin’ sɔi: ‘Ɔgiriyɛ, ɔgu Jerusalɛmu ana nɛ goo. Mu dɛi sɛɛrɛ u gooido gɔ, ana ɔn bɛɛnw wogɔ le yabaidenɛ.’ 19 Mu saa: ‘Inɛw Baŋa, mu ana ana nɛ, Ama gɛɛn ginrunbe nɛ yai yai ye, inɛw u le gawaa wɔin gɔbei kaju kunɔ lee, laga lee kanraunbɔn ga be kuu bemɛ le igii wɔin. 20 Iyaa sɛɛrɛ uwɔ goonɛ, Etiɛnui waaru daaubɛin le, mu kuu ma le kɔɔ nɛ yabɔn. Inɛw gɔ kanran gɔ kinɛ ma aabe, iyaa, inɛw woi daaubɛin gɔ sɔi mu gɛlɛbe.’ 21 Kɔɔ waaru le, Inɛw Baŋa saa gi: ‘Yaa. Mu yalu wage nɛ, inɛw Yahutunw tɔgui laain bɛrɛ ui tiidɔn.’ » 22 Sɔɔ kɔɔ nɛ yai dɔɔ, mɔɔnu gɔ nimɛ sɛɛu Pɔlui keŋiyɛun yabe. Kaa sɔɔ kɔɔ wo sɔwaa, be mii ɛɛn le ɔn gin’ gɛɛi tɔlin: «Ainɛ kɔɔi manuguti. Inɛ ɔn tunmɔ ɔnmɔi pajaun jaanla.» 23 Be ɛjii kɔnwɔunbɛin. Arugoi bemɛ daa go kamu kamu tii lee, minɛ ugunu balu balu tii lee kanraunbɛin. 24 Kunrin wo biyaa, sɔludasu kuu baŋa diyɛ gɔ, Pɔlui ginrun diyɛ gɔ nɛ kunaa ye, bɔɔniyɛn le lagaa ye, inge dɛi inɛw gɔbe wo dɛi ɔn baa kɔnwɔunwɔin ma wo sɔɔmɔ gi. 25 Kaa woi kɔmaa ye, lagadɛin ga waaru be bee le, Pɔlu, sɔludasu suŋu kuu baŋa, yalu gɔ nɛ iŋɛbe gɔ le ɔn gin’ sɔi: «Rɔmɛ bɛɛnnɛ tɔitɔi, saliyɛ womɔ kirelu go, woi laga ga jaain wɔɔ ma?» 26 Sɔludasu suŋu kuu baŋa gɔ sɔɔ kɔɔ ɛgaa, sɔludasu kuu baŋa diyɛ gɔ bɛrɛ yaa tagaa kijɛ wo gi: «Ainɛ gɔ Rɔmɛ ii, nɛɛ u yani kanrandou?» 27 Kuu baŋa diyɛ gɔ wiyaa, Pɔlu le ɔn gin’ sɔi: «Mu bɛrɛ taga, u Rɔmɛ ii ma?» Pɔlu saa, ee gi. 28 Kuu baŋa diyɛ gɔ gi: «Rɔmɛ ii tɔitɔi biyɛ ga mu buudu diyɛ goonaa, biyaabɔn.» Pɔlu saa, unruin kai Rɔmɛ ii yinnarin gi. 29 Pɔlu kunrin gɛɛu wo digɛu, inɛw wo bɛrɛ lagu le selumu selumɛdɛin ga bɛin gɔbe genɛ womɔ nɛ dɔraa gowaain. Kuu baŋa diyɛ gɔ, wo yaa Pɔlu, Rɔmɛ ii ga ɛgaa, woi yɔgu le wo kɔmɔmu gɔ digɛu, liyaai. 30 Sɔludasu kuu baŋa diyɛ gɔ, Yahutunw Pɔlui kijɛ inge dɛi tee jarugaɲu ma jugɔ ibɛi bee. Wogɔ digɛu, aga baa yaa gɔ wo Pɔlui kɔmɔlaatiyaa, Ama bɛrɛ sadagadɔɔnɔw kuu bɛɛnw gɔbe lee, badubadanw diyɛnw gɔbe puu lee mɔrinyɛn ga tɔɔraabe. Kɔɔ onu nɛ wo Pɔlui jɛɛlaa, giru bemɛ nɛ iŋɛraanbe.
