KANRAN 21

1Epɛse ana Ama inɛw mɔɔnu inɛw naw emɛ wooi kabiyaa, emɛ diikoro nɛ yowaa, demu demu Kɔsu ana nɛ yain. Kɔɔ onu nɛ aga baa yaa gɔ, emɛ yalu dii gɔŋaa gɛlɛ Rode nɛ dɔwaa, kɔɔ nɛ gowaa, Patara yaabɛin. 2Kɔɔ nɛ emɛ diikoro Penisi gana kɛjɛ taŋajɛ biyaa, wogɔ nɛ yowaa yain. 3Minɛ dii gɔŋaa gɛlɛ, Sipere, waaru emɛ iyi le, emɛ numɔ nana emɛ sibɛ go woi pajaatiyaa, oju emɛ digiyaa, Siri gana yain. Emɛ Tire ana nɛ yaa iŋiyaanbɛin. Diikoro gɔ, kɔɔ nɛ dɔɔ womɔ sunugoun jaain bee. 4Kɔɔ nɛ emɛ jaŋu unrunw tɛmaa, be le bai sɔi biyaabɛin. Ama Kikinu bei damaa, be Pɔlu le sɔɔu, womaa, Jerusalɛmu yaanɔu gɛɛubɛin. 5Kaa bai sɔi gɔ galaa wo yaa, emɛ oju emɛ digiyaabɛin. Be wooi puu yaanw bemɛ lee, unrunw bemɛ lee, emi niinaa, ana gɔ nɛ goonaabɛin. Nɛudii diŋirun gɔ nɛ emɛ wooi puu tuŋiyaan, Ama gɛnyaanbɛin. 6Kɔɔ onu nɛ tunmɔ le jamu biyɛmɔ giyaatiyaa, emɛ diikoro nɛ yoin. Be pilemaa, ginrun bemɛ nɛ yain. 7Tire nɛ gowaa, emɛ Putolemayise ana nɛ yain. Diikoro le yoi yai emɛ, kɔɔ nɛ yakali. Emɛ kɔɔ nɛ ba unrunw gɔbei poonaa, bai turu be le biyaabɛin. 8Aga baa yaa gɔ oju gowaa, emɛ Sesare ana nɛ dɔwaabɛin. Kɔɔ nɛ emɛ Kibɛru Ɛju taganɛ Pilipe ginrun nɛ yaa, womɔ nɛ sugaabɛin. Jerusalɛmu nɛ inɛw sɔi birɛ dɛi yɛmi gɔbe logoro nɛ turu gɔ woi. 9Wo unrunw yaanw gulɔi nai yasɛbe. Be Ama bɛrɛ sɔɔ goi sɔɔubɛin. 10Kɔɔ nɛ biyaa, bai joo kanraan emɛ wɔu, inɛ Ama titiyainɛ turu Judea gana nɛ gowaa wiyaabe. Boi womɔ Agabusu gɛɛɲu. 11Wo wiyaa emi tɛmaa, Pɔlu tɛmu jeɲaa, kole kubɔ unrunmɔ lee, numɔ unrunmɔ lee kɔmaa, ɔn gin’ sɔi: «Kikinu Pilu sɔɔ sɔɔjɛ unwɔ: ‘Tɛmu ɔn inɛ mɔi wɔɔ gɔ, Yahutunw ɔn gin’ Jerusalɛmu nɛ woi kɔmaa ye, inɛw Ama inin numɔ nɛ woi kukunɔdɛin.’ » 12Sɔɔ kɔɔ waaru emɛ ɛgu le, emɛ lee, ana bɛɛnw lee, Pɔlu bɛrɛ gɛɛun, womaa Jerusalɛmu yaanɔu gin. 13Kaa Pɔlu ɔn gin’ sai: «Pii piiu anrangaju ma donugou e wɔɔ gɔ ingei? Inɛw Baŋa Yesu dɛi Jerusalɛmu nɛ kɔmu sai laa, kaa yinwɛn ga yaa mu yeguru le wɔun.» 14Emɛ kanrinyaan ɔɲaa, wo bɛrɛ gɛnyaan bɛɛnɛ. Inɛw Baŋa diŋɛ womɔ kanran giyaatiyaa, kunrin pajin. 15Kɔɔ nɛ bai gaila biyaa, emɛ gelu yegeraa, Jerusalɛmu yaabɛin. 16Sesare ana jaŋu unrunw gamuu yaa emi niinaa, jaŋu unrunw pɔlɔ tubu kanrin logoro nɛ Sipere bɛɛnnɛ turu Manasɔn gɛɛɲu mɔ nɛ jɛyaabɛin. Emɛ ginrun womɔ nɛ sugoun jaan bee. 17Jerusalɛmu nɛ emɛ dɔwaa, ba unrunw gɔbe kinɛ ɛɛli le emi sɛgɛraabɛin. 18Aga baa yaa gɔ, Pɔlu emɛ wooi Jake ginrun nɛ yaabɛin. Ama inɛw mɔɔnu inɛw naw gɔbe puu kɔɔ nɛ wiyaa mɔrinyaanbɛin. 19Kibɛru kanraan sunugaatiyaa, Pɔlu, inɛw Yahutunw tɔgui laain logoro nɛ wo le digɛu, Ama bana birɛ biru puu tuturu jeɲaa, be bɛrɛ tagaabe. 20Woi keŋiyaan kilaa, be Ama sɔmaabɛin. Kɔɔ onu nɛ be wo le ɔn gin’ sɔin: «Emɛ bainɛ, Yahutunw logoro nɛ inɛw muɲu joo naa joo bana Yesu le gawaa be wɔɔ gɔ u iyeuwɔu. Be wooi puu Tɔɔru sɔɔ nɛ kuu ɛjii obaa wɔin. 21Inɛw be bɛrɛ tagaa, uwaa Yahutunw inɛw, tɔgu wajunw logoro nɛ daain gɔbe, bemaa Mɔise tɔɔru gɔ dimiyɛnnɔu, unrunw bemɛ araa nɔɔmɔnɔu, iyaa atɛmu emɛ sɔɔ yaa paja gi wa. 22Nɛɛ, uwaa wiyaai ga be ɛhɛgɛdɛin laa, emɛ yani kanrandɛin? 23Aiwa, sɔɔ u bɛrɛ emɛ gɛɛido ɔn kanran. Logoro emɛ nɛ inɛw nai, Ama le pui kunaa yɔin. 24Bei dimɛraan yaajɛu ye, be le ui ɛjɛmaajɛu ye, kuu bemɛ kaa dɛi buudu gɔ tujɔ. Kunrin, u dɛi be bɛrɛ sɔɔ sɔin gɔ narain laa ga be jujugɔdɛin. U kanran Tɔɔru sɔɔ gɔbe gɛliyaa, birɛ gɔbe birɛuwɔu ga be ihiyedɛin. 25Nɛɛ, inɛw Yahutunw tɔgui laain, Yesu le gawin gɔbe, emɛ tunmɔ le sɔwaa, be bɛrɛ tɔŋaa tiyaa, bemaa ɔmɔlɔ nɛ nawan sɛnwaanɲu lee, ili lee, nawan ili goolu lee, sala lee nɛ kuu bemɛ gɛliyɛ gin.» 26Kunrin aga baa yaa gɔ, Pɔlu inɛw nai gɔbei gɛliyaa, be le unruin ɛjɛmaa, be wooi Ama Ginrun Diyɛ gɔ nɛ yowaabɛin. Ɛjɛmu bemɛ bai kibeido gɔ lee, inɛw gɔbe tuturu puu dɛi sadaga bai goonɔidɛin gɔ lee, wo tagaabe. 27Bai sɔi gɔbe dogu bɛrii wo wɔu, Yahutunw gamuu Rɔmɛ laamu Asi numɔ nɛ gowaa wiyaa, Pɔlui Ama Ginrun Diyɛ gɔ nɛ iyaabɛin. Be mɔɔnu gɔ puu suuraa, ingelemaa, Pɔlui aabɛin. 28Be mii ɛɛn le ɔn gin’ gɛɛbɛin: «Isɛrɛlu inɛw, wɛɛ emi barai. Yalu puu nɛ inɛw wooi bɛrɛ, Isɛrɛlu tɔgu lee, Mɔise tɔɔru lee, Ama Ginrun Diyɛ gɔ lee dɛi, ainɛ sɔɔ mɔɲu sɔɔnɛ gɔ ɔn woi. Halu, wo inɛw Yahutunw tɔgui laain Ama Ginrun gɔ nɛ kunaa, yalu Ama bɛrɛ dɛiin emɛ pajaajɛ gɔ tomɔmaati.» 29Be ana kɔlɔ nɛ, Pɔlu, Epɛse ana bɛɛnnɛ Toropimɛ le wo yalau iyaabɛin digɛu, sɔɔ kɔɔ sɔɔubɛin. Pɔlu woi Ama Ginrun Diyɛ gɔ nɛ kunaabe ga be sɛbɛin. 30Ana gɔ nɛ sɔɔ kɔɔ dɛi siɲɛ diyɛ biyaai. Sibɛ puu nɛ gowaa inɛw jɔbaa wiyaabɛin. Be Pɔlui aa, Ama Ginrun Diyɛ gɔ nɛ goonaa, taan gɔbe puu ɔgu pinaabɛin. 31Waaru Pɔlui daa ga be dɛnɛbe le, Jerusalɛmu puu giru giru wɔɔ ga sɔludasu kuu baŋa diyɛ gɔ bɛrɛ tagaabɛin. 32Wo ɔgu kɛu sɔludasu unrunw lee, sɔludasu suŋu kuu bɛɛnw lee gɛliyaa, be bɛrɛ jɔbaa wiyaabe. Sɔludasu kuu baŋa diyɛ gɔ lee, sɔludasu unrunw gɔbe leei, waaru be iyi le, be Pɔlui lagu gɔ pajaabɛin. 33Sɔludasu kuu baŋa diyɛ gɔ, Pɔlu genɛ nɛ dɔwaa, woi aa, yɔgu lɛi le woi kɔmɔ ga tɔɔraabe. Kɔɔ onu nɛ woi aai ma, wo inge kanrun ma sɔludasu kuu baŋa gɔ selumaabe. 34Kaa, mɔɔnu gɔ nɛ, inɛw gamuu kijɛ turu dɛi kɔnwɔunbɛin. Inɛw wajunw kijɛ waja dɛi kɔnwɔunbɛin. Siɲɛ gɔ le sɔludasu kuu baŋa diyɛ gɔ sɔɔ tiyɛ le wo paamu bele dɛi, wo Pɔlui, sɔludasu unrunw ginrun diyɛ toin gɔ nɛ jɛyaa ga tɔɔraabe. 35Pɔlui gɛliyaa yaau, yalu tei uhuli gɔ nɛ dɔwaa, mɔɔnu gɔ yanwinrinyaan bee gɔ digɛu, sɔludasu unrunw gɔbe woi jeɲɛ le jeɲaa yain. 36Sabu mɔɔnu gɔ Pɔlu onu nɛ digiyaa, mii ɛɛn le woi daa, woi daa, gɛɛube. 37Sɔludasube ginrun diyɛ nɛ waaru woi kunɔdɛin ga bɛin le, Pɔlu, sɔludasu kuu baŋa diyɛ gɔ le kijɛ wo gi: «Mu u bɛrɛ sɔɔ turu sɔi bɛbɛɛdɔn ma?» Sɔludasu kuu baŋa gɔ saa gi: «U Gɛrɛku sɔɔ igii wɔu ma? 38Kɔɔi ye, Ejipute bɛɛnnɛ kanɛ bɛrii unrun yabalun ga, ingelaa, inɛw daanw muɲu nai dimɛraan, olusolo nɛ yai gɔ ui laa ma?» 39Pɔlu saa kijɛ gi: «Mu Yahutunɛi, Silisi gana Taruse ana bɛɛnnɛi. Mu ana boi gowaa wɔɔ ii. Mu u bɛrɛ gɛɛunwɔn, mainiyaanjɛu ye mɔɔnu gɔ bɛrɛ sɔɔ mu sɔɔmɔ.» 40Sɔludasu kuu baŋa diyɛ gɔ yabaabe. Pɔlu, tei uhuli gɔ nɛ iŋɛu, mɔɔnu gɔ womaa kelemu biyɛ ga, numɔ daii kanraanbe. Inɛw puu kelemu biyaabɛin. Pɔlu Yahutunw sɔɔ le be le sɔwaa, ɔn gin’ gi:

will be added

X\