KANRAN 20

1Siɲɛ gɔ waaru dɛɛnrin le, Pɔlu, jaŋu unrunw gɔbei boonaa, be bɛrɛ tinwinrun obaatiyaa, jamu biyɛmɔ giyaa, gowaa, Maseduanɛ yai. 2Maseduanɛ gana gɔ kɛjaa taŋau, Pɔlu, yalu wo galabe wooi nɛ waaju joo le, jaŋu unrunw gɔbe bɛrɛ tinwinrun oboube. Kɔɔ gin’ wo Gɛrɛse gana nɛ yaabe. 3Kɔɔ nɛ wo iyepilu taanu kanraanbe. Kɔɔ onu nɛ wo diikoro nɛ yowaa ye, Siri gana nɛ yaado ga yegeraa sɛbe. Kaa Yahutunw wo dɛi yeguru mɔɲu kunaa wɔin ga soo biyaa, wo Maseduanɛ le pilemɛ ye galado gi. 4Inɛw woi niinaa, wo le yaaubɛin gɔbe unwɔin: Bere ana bɛɛnnɛ, Pirusu ii, Sopatɛru lee, Tesalonike ana bɛɛnw, Arisutaruke lee, Sɛkundusu lee, Dɛrube ana bɛɛnnɛ Gayisu lee, Timɔte lee, iyaa Rɔmɛ laamu Asi numɔ bɛɛnw, Tisike lee, Toropimɛ lee. 5Inɛw kɔɔbe giru emɛ nɛ yaa, Toroasu nɛ emi dɔmɔbɛin. 6Emɛ kai, buru kijɛ pidemu tolo janwan bai gɔbe galaa wo yaa, Pilipi ana nɛ diikoro nɛ yowaa, bai numɔrɔn yaa, Toroasu dɔwaa, emɛ bɔɔnw gɔbei tɛmaabɛin. Kɔɔ nɛ emɛ bai sɔi kanraanbɛin. 7Jugu bai pɔlɔ gɔ, tunmɔ le pana nɛ buru kabala ga, emɛ digɛ mɔrinyaanbɛin. Aga baa yaa gɔ ingelaa ye Pɔlu yayaajɛ ga bee. Kɔɔ sabu dɛi, wo inɛw gɔbe bɛrɛ waaju tagau digɛtaŋu baa dɔwaabe. 8Ginrun sɔɔrɔ emɛ mɔrɔnbe gɔ nɛ lanpa joo yabe. 9Nɛɛ, sagatara ii turu yabe. Boi womɔ Etike gɛɛɲu. Wo dɔlu diŋirun nɛ dɛinyaan bee. Pɔlu, waaju tagau tanwaan wo yaa, wo giri yeiyaai. Giri le bɛnraan wɔu, wo ginrun sɔɔrɔ taaniye gɔ nɛ gowaa, doɲu go ɛliyaa sugaabe. Woi yinwin jeɲi. 10Kaa Pɔlu yasugaa, kuu womɔ nɛ jimiyaan, numɔ unrunmɔ le woi jeɲaa amugiyaa gɛlɛu, ɔn gin’ sɔi: «Liyɛnɔugi, wo ɔnmɔi wɔɔ.» 11Pilemaa daa go ulaa, Pɔlu buru gɔ kabalaa, kayaabe. Nimɛ kanran wo waaju tagau, baayaara baa dɔwaabe. Kɔɔ onu nɛ wo gowaa, yinyai. 12Sagatara ii gɔi ɔnmɔ go jɛyaabɛin. Wogɔ inɛw puu bɛrɛ kinɛ kaalu diyɛ obaabe. 13Emɛ giru galaa, diikoro nɛ yowaa, Asɔsu ana nɛ yaabɛin. Kɔɔ nɛ Pɔlui diikoro gɔ nɛ emɛ jeɲɛu jaain bee. Pɔlu, kubɔ le wɛɛdo ga, kɔɔ gin’ sɔɔ gɔ yegeraabe. 14Asɔsu nɛ emi wiyaa waaru wo dɔi le, emɛ diikoro gɔ nɛ woi jeɲaa, Mitilɛnɛ ana nɛ yaabɛin. 15Kɔɔ nɛ gowaa, nɛudii gɔ digiyaa, aga baa yaa gɔ emɛ Kio ana daŋaran nɛ dɔwaabɛin. Bai lɛiye gɔ, emɛ yalu dii gɔŋaa gɛlɛ Samɔsu nɛ dɔwaabɛin, wogɔ aga baa yaa gɔ emɛ Mile ana nɛ yaa sugaabɛin. 16Rɔmɛ laamu Asi numɔ nɛ bii ye waaru galamɔnu doori ga, Epɛse ana daŋaran nɛ galanu, kɔɔ nɛ iŋiyɛindolo ga, Pɔlu wogɔ le bee. Kanrun bɛbɛɛmɔ ye, ɔgiri ye, Pantekɔte janwan bai gɔ le wo Jerusalɛmu dɔi ibɛɛ bee. 17Nɛɛ Mile ana nɛ wɔu, Pɔlu inɛ tiyaa, Epɛse ana Ama inɛw mɔɔnu inɛw naw gɔbei boonaabe. 18Waaru wo bɛrɛ wiyaa be dɔi le, wo be le ɔn gin’ sɔi: «Rɔmɛ laamu Asi numɔ nɛ bai pɔlɔ kubɔ mu kunu gowaa, e le waaru mu bii puu nɛ, e le bana mu wɔɔ e igii wɔi. 19Mu kuu sunugu lee, giridii lee, Yahutunw mu dɛi dabulu mɔɲu be kunɔbe ɔɲɛ nɛ lee, Inɛw Baŋa birɛ biraabɔn. 20Sɔɔ turu kanran e bɛrɛ baŋaranlu go, inɛw wooi giru nɛ lee, ginrun ginrun nɛ lee mu sɔɔ e bɛrɛ niwɛn siyɛido puu ei tagaabɔn, ei deeraabɔn. 21Yahutunw gɔbe lee, Yahutunw tɔgui laain gɔbe lee puu Ama le tubi ye, Inɛw Baŋa emɛ Yesu le gawa ga tagaabɔn. 22Kanɛ Ama Kikinu mui damaa, mu Jerusalɛmu unyaajɔn. Wogɔ nɛ ingei mu bɛrɛ dɔɔdo ma inɔn. 23Kaa Kikinu Pilu mu bɛrɛ sɛɛrɛ goou, ana ana nɛ, kaju lee, ɔɲɛ lee mui yadɔmin ga sɔɔuwɔ. 24Kaa kɔɔ wooi nɛ kinrun ma kijɛ diyɛi gin’ lugaa wɔlɔn. Kinrun ma too toolɔn. Jobu ma sɛɛu donugu bɛɛ, iyaa, Inɛw Baŋa Yesu mu bɛrɛ birɛ sagu duuru gɔ kibemaa biyaajɔn ye koi. Wogɔ Ama nɛɛma Kibɛru Ɛju waaju tagu gɔ woi. 25«Aiwa, yɛnɛi, mu logoro ebe nɛ gɔŋɔlaa, Ama diinɛ waaju inɛ kanrun gɔ, e, waja mui iyeidelei ga mu igii wɔun. 26Kɔɔ sabu dɛi, mu daii iye e le sɔɔuwɔn, e wooi puu, ili ebe hakɛ turu kanran kuu ma nɛ wɔlɔ. 27Sabu Ama diŋɛ sɔɔ puu mu e bɛrɛ tagaabɔn. Kijɛ mu baŋurun turu kanran wɔlɔ. 28Nɛɛ, kuu ebe ɛjii kajubai, iyaa, peju kulɔ gɔ ɛjii kajubai. Kikinu Pilu, ei wogɔ kajubawin bojaabe. Ama, Aini womɔ ili le inɛw womɔ mɔɔnu wo ɛbaajɛ gɔ, ɛjii gɛliyɛi. 29Mu yaaun ye, logoro ebe nɛ olunawan mɔɲube yoi ye peju gɔbe kuu nɛ susugodɛin ga mu igii wɔun. 30Halu logoro ebe nɛ tee inɛw ingele ye, jaŋu unrunw gɔ bemaa unrunbei digiyɛ giye, kakalu mamaŋadɛin. 31Wogɔ digɛu, kuu kajubu le biyɛi. Anranguju taanu baa, aga sɛlɛ, digɛ sɛlɛ, mu giridii le, e tuturu puui tinwinrun pajalun ga naŋanɔugi. 32«Nɛɛ, mu Ama lee, nɛɛma womɔ sɔɔ lee nɛ ei sagu duurɔuwɔn. Wo paŋa ebe bariyɛmu bɛbɛɛjɛ. Iyaa Ama, inɛw womɔi wɔin puu dɛi kɛn wɔɔ gɔ, e bɛrɛ obo bɛbɛɛjɛ. 33Mu inɛ turu kange ma, sarudu ma, sɔibe ma, turu kanran daariyɛlun. 34Mu numɔ ma le birɛ biraa, mu lee, mu bɔɔnw lee kai kilaabɔn ga e igii wɔi. 35Kijɛ puu nɛ kɔɔ gin’ birɛ birɛ ye, inɛw gɔnrɔn sɛnɛ gɔbei baraun jaan ga mu e bɛrɛ tagaraabɔn. Iyaa, Inɛw Baŋa Yesu kuu womɔ le sɔɔ wo sɔi ɔn ajubai: ‘Bɛi nɛ dɛi obu nɛ gaara duba too.’ » 36Sɔɔ kɔɔbe sɔwaatiyaa, Pɔlu tuŋiyaan, be wooi mɔrinyaan, Ama gɛnyaanbɛin. 37Be wooi puu pii le Pɔlu kɔkɔlɔ nɛ waagiyaa ye, woi amugiyɛubɛin. 38Pɔlu bemaa waja unruin iyenɛ wo gi gɔ, sigɛ le kinɛ bemɛ kijɛ sɔmiyɛnmɔu bee gɔ woi. Kɔɔ onu nɛ, be woi niinaa, diikoro gɔ nɛ baa yaabɛin.

will be added

X\