KANRAN 2

1Pantekɔte janwan bai wo dɔwaa, jaŋu unrunw gɔbe puu yalu turu nɛ mɔrinyaan bɛin. 2Kunrin be mɔrɔun, kubɔ turu ooɲɔ diyɛ suyojɛ gin’, siɲɛ alagala gowaa, ginrun be daanbe gɔ nɛ jowaabe. 3Ninɛbe, yaun bije muriin tunmɔ le kabiyɛu be wɔu be iyaabɛin. Ninɛ gɔbe inɛ tuturu puu kuu nɛ dɛinyaanbɛin. 4Jaŋu unrunw gɔbe puu, Kikinu Pilu le jowaa, tɔgu wajabe sɔɔ sɔɔi tɔlaabɛin. Inɛ kanma puu Ama Kikinu aŋa bemɛ nɛ sɔɔ bana kunɔbe gin’ sɔɔubɛin. 5Nɛɛ Yahutunw Ama giri liyɛnw, aduna gana puu nɛ gowaa, Jerusalɛmu ana nɛ wiyaa yadaanbɛin. 6Siɲɛ gɔ wo gowaa, inɛw joo kɔɔbe yalu gɔ nɛ jɔbaa wiyaa mɔrinyaanbɛin. Inɛ tuturu puu, sɔɔ womɔ tɔitɔi le, jaŋu unrunw gɔbe, sɔɔ sɔɔu be wɔu ɛgaa, bei bimiliyaabe. 7Sɔɔ gɔ be bɛrɛ halu maunɛ kanraan, be kijɛ kanranɲu inin bɛin. Kijɛ be gɛɛbe: «Yɛnɛi, inɛw sɔɔ sɔɔnw ɔnbe, Galile gana bɛɛnwin laain ma? 8Emɛ tuturu puu, emɛ ba ginrun sɔɔ aŋa bemɛ nɛ yani ɛgɛuwɔin? 9Emɛ Parute bɛɛnw lee, Mɛdi bɛɛnw lee, Elamu bɛɛnw lee, iyaa, Mɛsopotami gana lee, Judea gana lee, Kapadɔse gana lee, Pɔn gana lee, Rɔmɛ laamu Asi numɔ lee, 10Piriji gana lee, Panpili gana lee, Ejipute gana lee, Libi gana, Sirɛnɛ ana le bɛrii wɔɔ gɔ lee, Rɔmɛ ana lee, 11iyaa Yahutunw lee, Yahutunw oju nɛ inɛw toin lee, Kɛrɛte gana inɛw lee, Arabu tɔgu lee, emɛ gana dɛin dɛin kɔɔbe nɛ inɛw goin gɔbe, sɔɔ emɛ tɔitɔi le Ama ɛju kanrun sɔɔ, aŋa bemɛ nɛ ɛgɛuwɔin.» 12Be puu bɛrɛ saii maunɛ kanraan, be sɔɔ ajubaɲu inin bɛin. Tunmɔ le sɔɔu, kijɛ be gɛɛbe: «Kijɛ ɔn tiyɛ gɔ ingei?» 13Kaa inɛw gamuu, sɔɔ gɔ jairɛ kanraun, saa: «Be kɔɲɔ le bimiliyaa wɔin.» 14Piɛru, jaŋu unrunw tiyaaɲu pɛli turusigɛ wajunw gɔbe be wooi ingelaa wɔu, mii jeɲaa mɔɔnu gɔ le ɔn gin’ sɔi: «Mu ba unrunw Yahutunw gɔbe lee Jerusalɛmu nɛ inɛw wiyaa dɛinyaan wɔin gɔbe lee, sɔɔ ma nɛ suguru dɛɛraa ye, sɔɔ ɔn ɛjii paamu kanrain. 15Inɛw ɔnbe kɔɲɔi nɔwaan bimiliyaa wɔin ga bana ajubaa e sɛɛ gin’ wɔnɛ. Nimɛ nai ɛjii goolu. Aga lɛɛrɛ tuwɔ sai wɔɔ. 16Kaa inɛ Ama titiyainɛ Jowɛlu, sɔɔ bibiyɛdo wo gi gɔ, wogɔ ɔn woi. 17“Ama ɔn gin’ sɔi wa: ‘Waaru dumɔ gɔ le, mu Adama unrunw puu kuu nɛ Kikinu ma ɛjii wɛwɛɛmɔdɔn. Anran unrunw ebe lee unrunw yaanw ebe lee, sɔɔ mu bɛrɛ goi sɔsɔɔdɛin. Sagataranw ebe kuu iye ihiyedɛin. Inɛw naw ebe yaŋawelu weweledɛin. 18Ɔnhɔn, bai wogɔbe nɛ, gunɔ anranw ma lee gunɔ yaanw ma lee kuu nɛ Kikinu ma togo titiidɔn. Kunrin, be sɔɔ mu bɛrɛ goi sɔsɔɔdɛin. 19Mu daa go, alagala nɛ yarabirɛ kanrun ye tatagaradɔn. Minɛ nɛ sɛɛrɛ taanrinyɛn kakanrandɔn. Ili lee, yaun lee, kukumɔ diyɛ lee ihiyemɔdo. 20Inɛw Baŋa bai wɛɛido, bai diyɛ naa diyɛ gɔ wo dɔɔmɔ nɛ, nai wijɛ gɔ, ɔlɔi taŋayaado. Iyepilu banraan ye, ili gin’ biyɛdo. 21Kɔɔ waaru le, inɛ aai kanran, Inɛw Baŋa boi boonaajɛ gɔ woi yayabadɛin.’” 22«Aiwa, Isɛrɛlu anranw, sɔɔ ɔn keŋiyɛin: Yesu, Nasarɛtu ana bɛɛnnɛ gɔ, e woi igii wɔi. Bana e jugaajɛ gin’, Ama wo le yabaajɛ tagara ga, taanrinyɛn lee, yarabirɛ lee, sɛɛrɛ taanrinyɛn lee wo bɛrɛ, logoro ebe nɛ kanranmaabe. 23Ama pɔɔlɔ baa, wo dɛi sɔɔ bibiyɛdo ga wo kɛju gɔ, sɔɔ wogɔ, Yesu, bana wo jugaa bee le kɛukɛu, woi numɔ nɛ kunaabɛin. E mɔɲu kanranw numɔ nɛ woi kunaa, baga nɛ pɛgaa daamaabei. 24Kaa Ama woi bulomaa, yiun ɔɲɛ nɛ yabaa goonaabe. Yiun woi ai gɛliyɛ ga, wogɔ gɔnrɔn sɛbele. 25Yɛnɛi, Dawide, wo dɛi ɔn gin’ sɔi: “Mu waaru puu Inɛw Baŋai giru ma nɛ iyeubɔn. Kijɛ turu kanran mui jigemɔnɔu ga, wo numɔ iin ma sibɛ nɛ bee. 26Kɔɔ digɛu, mu kinɛ ɛɛli le wɔun, iyaa sɔɔ mu sɔɔjɛ gɔbe kinɛ ɛɛlu sɔɔi. Halu mui goju nawain kanran, mu diyɛdɔn le wɔun. 27Sabu Ama, u kikinu ma yinwunrun nɛ pajaidolou. Iyaa, inɛ yɛmaa dɛiin u bojaajɛ gɔ, yiun womɔ ɔmaai biyɛ ga yabaidolou. 28U mu nɛ, ɔnmɔ oju gɔbe tagaraabeu. U mu le wɔu dɛi, u mui kinɛ ɛɛli le jojoonɔdou.” 29«Aiwa, ba unrunw mabe, emɛ tirɛ ainɛ diyɛ Dawide dɛi e bɛrɛ naran mu sɔɔmɔi: Woi yinwaan, bojaatin. Iye bai dɔɔ, ɔnsain womɔ logoro emɛ nɛ kowɔɔ. 30Kaa wo inɛ Ama titiyainɛi bee. Iyaa, Ama, kuu unrunmɔ le jɛbiyaa, wo tiruwɛnɛ turu, dilɛ womɔ nɛ ɔgɔ dɛdɛinyɛndo gi ga wo igii bee. 31Wogɔ digɛu, Ama Yabanɛ Diyɛ tii gɔ bulogu sɔɔ gɔ, wo pɔɔlɔ baa iyaa, sɔɔ kɔɔbe le digɛu sɔwaabe. “Kikinu womɔ gɔ yinwunrun nɛ pajanɛ. Iyaa, sɛgɛ womɔ biyaa sainyɛnlu.” 32Yesu wogɔ, Ama woi bulogaabe. Emɛ wooi puu, sɔɔ wogɔ sɛɛrɛbei. 33Nɛɛ, woi jeɲaa alagala go unaa, Ama numɔ iin sibɛ nɛ daani onu nɛ, wo, wo Ba Kikinu wo bɛrɛ ohobodo ga pui kunu gɔ biyaabe. Kijɛ emɛ nɛ e iyejɛ gɔ lee e ɛgɛjɛ gɔ lee, wogɔ Kikinu Pilu wo tiyaajɛ gɔi. 34Yɛnɛi, Dawide alagala ulolu. Kaa kuu womɔ le, wo ɔn gin’ sɔɔ sɔi: “Inɛw Baŋa Ama, Inɛw Baŋa ma le ɔn gin’ gi: ‘Jaŋuw uwɔ gɔbe gɔnrɔn ye kubɔ uwɔ doɲu nɛ yai mu kunɔido baa, uwɔ numɔ iin ma sibɛ nɛ wɛɛ dɛinyɛn.’” 36«Aiwa, wogɔ digɛu, Isɛrɛlu inɛw puu, naran go sɔɔ ɔn jugɔi: Yesu, baga nɛ e pɛgu gɔ, Ama, woi Inɛw Baŋai boju. Iyaa, Yabanɛ Diyɛ wo tii gɔ woi.» 37Piɛru sɔɔ gɔ kinɛ bemɛ ɛjii jigemaabe. Kɔɔ sabu dɛi waaru sɔɔ womɔ kilu le, be Piɛru lee Yesu jaŋu unrunw tiyaaɲu wajunw gɔbe lee bɛrɛ kijɛ be gi: «Ba unrunw, emɛ inge kanraun jaan?» 38Piɛru be le saa: «Hakɛ ebe yaabu kanran ga, bana ebe dulomaajɛi ye, Yesu Kirisito boi le ei batise kunɔmɔi. Kɔɔ biyaai ye, Kikinu Pilu gɔ, e bɛrɛ sin obu go ohobodɛin. 39Ɔnhɔn, pui gɔ e lee unrunw ebe lee bɛrɛ kuni. Inɛw yalu wage nɛ wɔin dɛi kuni. Iyaa, Inɛw Baŋa, Ama emɛ, inɛw joo wo bɛrɛ boonu wo jɛɛlɛido gɔbe bɛrɛ kuni.» 40Kunrin sɔɔ waja dɛin dɛin le, Piɛru, inɛw gɔbe bɛrɛ sɛɛrɛ goou, bei tinwɛnrɛun, bemaa kanɛ inɛw mɔɲu ɔnbe kanran gɔ nɛ jɔbɔ goo ye, kuu bemɛ goonɔ gɛɛube. 41Inɛw sɔɔ womɔ le yabin gɔbe puui batise kunaabɛin. Bai wogɔ, inɛw muɲu taanu gin’ be nɛ bariyaabe. 42Be wooi puu, Yesu jaŋu unrunw tiyaaɲu gɔbe deeru gɔ nɛ lee, tunmɔ le bɔɔi bii gɔ nɛ lee, tunmɔ le mɔrin ye pana kayi gɔ nɛ lee, amagɛɛn gɔbe nɛ lee ɛjii kuu kunaa, mainiyɛunbɛin. 43Yesu jaŋu unrunw tiyaaɲu gɔbe le digɛu, yarabirɛ lee sɛɛrɛ taanrinyɛn lee joo biyɛube. Kɔɔ sabu dɛi, inɛw puu liliyɛ le bɛin. 44Inɛw Yesu le gawaa bɛin gɔbe puu, tunmɔ le bɛin. Be kijɛ bemɛ puu tunmɔ le gamalaubɛin. 45Kunrin, kijɛ be sɛbe ma, minɛ bemɛ ma dɔnraan ye, buudu gɔ mɔɔnaa ye, inɛ tuturu bɛrɛ kai womɔ le kɛukɛu gamalaubɛin. 46Bai puu maini le, be Ama Ginrun Diyɛ gɔ nɛ ajubu turu le yaaubɛin. Be tunmɔ le mɔrin mɔrin, ginrun ginrun nɛ pana kayaubɛin. Be wogɔ kinɛ ɛɛli le, iyaa kinɛpilu le kanraunbɛin. 47Be iyaa Ama sɔmɔubɛin. Inɛw puu bɛrɛ sɔɔ bemɛ ɛjii bee. Inɛw Baŋa yaa bai puu kuu bemɛ nɛ inɛw yabaaɲu baraube.

will be added

X\