KANRAN 19

1Apɔlɔsu, Kɔrɛnte ana nɛ wo wɔu, Pɔlu, kokoo yalu gɔbe kɛjaa taŋaa, Epɛse ana nɛ yaabe. Wo kɔɔ nɛ jaŋu unrunw gamuu tɛmaa, 2be le sɔwaa gi: «Waaru e gawu gɔ le, Kikinu Pilu, kuu ebe nɛ sugaabe ma?» Be saa kijɛ gin: «Kikinu Pilu yɔɔ be giyaa kanran emɛ ɛgɛtɛnɛ.» 3Pɔlu bemaa kɔɔi ye batise be bɛi gɔ batise yɔgɔi ma gi. Be saa batise Jan kanrun gɔi gin. 4Pɔlu be le sɔwaa kijɛ gi: «Bana mɔɲu bemɛ dulomɔ ga, inɛw yabaaɲu gɔbe, Jan bei batise kunɔube. Wo Isɛrɛlu tɔgu inɛw gɔbe le sɔwaa, inɛ onu unrunmɔ nɛ wɛɛido gɔ le gawa gi. Tiyɛ gɔ, Yesu le gawa gi.» 5Inɛw gɔbe sɔɔ kɔɔ be ɛgu onu nɛ, be Inɛw Baŋa Yesu boi le unrunbei batise kanranmaabɛin. 6Pɔlu, kuu bemɛ nɛ numɔ yaŋaraan wo kanran, Kikinu Pilu, kuu bemɛ nɛ sugaabe. Be sɔɔ inɛmɔ sɔɔi tɔlaabɛin. Iyaa, Ama bɛrɛ sɔɔ goi sɔwaabɛin. 7Inɛw gɔbe lugo bemɛ anranw pɛli lɛisigɛ gin’ dɔwaabe. 8Iyepilu taanu baa, Pɔlu waaru puu Ama gɛɛn ginrun nɛ yowaa ye, liliyɛ sɛlɛ go, inɛw puu giru nɛ sɔɔ sɔɔube. Wo Ama diinɛ sɔɔ inɛw bɛrɛ gawamu kaarado ga, bei waajaube. 9Kaa inɛw gamuu kuu ɛɛn le biyaa, sɔɔ gɔ le yabu ibɛla bɛin. Be mɔɔnu gɔ nɛ Inɛw Baŋa oju gɔ yamurinyɛnmɔubɛin. Kunrin wo biyaa, Pɔlu, inɛw kɔɔbe le kabiyaa, jaŋu unrunw gɔbe le dɛiin Tiranusu jaŋuginrun nɛ mɔrinyɛunbe. Wo bai puu wogɔ nɛ be le sɔɔ sɔɔube. 10Anranguju lɛi baa wo kɔɔ gin’ kanraanbe. Wogɔ digɛu, Rɔmɛ laamu Asi numɔ inɛw puu, Yahutunw gɔbe lee, Yahutunw tɔgui laain gɔbe lee puu Inɛw Baŋa sɔɔ ɛgaabɛin. 11Ama, Pɔlu le digɛu taanrinyɛn diyɛ diyɛ kanraunbe. 12Halu Pɔlu goju nɛ sɔi tobe ma, sɔi pɛlɛ tɛmi ma, jiungunw bɛrɛ tɛmɛraanbejɛ ye bajaubɛin. Jinrun yaa wogɔ le inɛw kuu nɛ gooube. 13Yahutunw gamuu, yalu dɛin dɛin nɛ yai ye, inɛw kuu nɛ jinrun nana goonɔ birɛ birɛubɛin gɔbe, be yaa Inɛw Baŋa Yesu boi le inɛw kuu nɛ jinrun nanadɛin ga tɔlaabɛin. Be jinrun gɔbe bɛrɛ ɔn gin’ tɔɔrɔubɛin: «Yesu dɛi Pɔlu, waaju wo kanranjɛ gɔ boi le goo ga emɛ e bɛrɛ tɔɔrɔuwɔin.» 14Kɔɔ gin’ inɛw kanraunbɛin gɔbe, Yahutunɛ, Ama bɛrɛ sadagadɔɔnɔw kuu baŋa turu, Sewa gɛɛbɛin gɔ unrunw sɔi gɔbei. 15Jinrun gɔ le kunrin be sɔwaa, wo aŋa bemɛ ɔn gin’ sai: «Mu Yesui igii wɔun. Pɔlu aai ma igii wɔun. Kaa e aabei?» 16Kunrin sɔɔu digɛu, ainɛ jinrun kuu womɔ nɛ daan gɔ, Sewa unrunw kuu nɛ gɔnrɔn diyɛ le bana wo sugu gɔ, wo kuu bemɛ nɛ gɔnrɔn biyaa, bei barumaa, be goju ije le ginrun gɔ nɛ jɔbaa goin. 17Epɛse ana nɛ inɛw bɛin puu, Yahutunw ma, Yahutunw tɔgui laain ma, kibɛru wogɔ ɛgaabɛin. Inɛw puu liliyɛ le bɛin. Be Inɛw Baŋa Yesu boi sɔmaabɛin. 18Inɛw Yesu le gawaabɛin gɔbe logoro nɛ, joo wɛi ye, kijɛ mɔɲu be kanrun inɛw puu giru nɛ sɔɔubɛin. 19Inɛw joo dugu birɛ birɛubɛin gɔbe, dugu birɛ biru dɔn bemɛ gɔ jɛɛlaa, inɛw wooi giru nɛ tɛgɛraabɛin. Dɔn gɔbe puu dɔnrun be iijaa, sarudu buudu muɲu pɛnumɔrɔn dɔwaai. 20Kunrin, Inɛw Baŋa sɔɔ gɔ yalu puu nɛ ginɛube. Inɛw puu, sɔɔ gɔ paŋa bana sɛbe iyeubɛin. 21Sɔɔ kɔɔbe galaa wo yaa, Pɔlu Maseduanɛ gana lee, Akayi gana lee kɛjaa taŋaa ye Jerusalɛmu yaado ga ajubaabe. Kijɛ wo gɛɛbe: «Mu kɔɔ nɛ dɔwaaun ye, waajibi Rɔmɛ ana mu iyeun jaain wɔɔ.» 22Kunrin, wo woi baranw logoro nɛ inɛw lɛi, Timɔte lee, Erasute lee giru womɔ nɛ Maseduanɛ nɛ tiyaabe. Wo kuu womɔ le nimɛ kanran waaru gaila le Rɔmɛ laamu Asi numɔ nɛ biyaabe. 23Waaru kɔɔbe le, Inɛw Baŋa oju gɔ dɛi giru giru gaai biyaabe. 24Sarudu birɛbirɛnɛ turu, Demɛtiriusu gɛɛɲu gɔ, sarudu le ɔmɔlɔ ginrun uji uji yegereube. Amayaa, Arutemise ginrun babaɲu gɔi yegereube. Birɛ kɔɔ le birɛbirɛnw gɔbe tinɛ ɛjii bɛɛubɛin. 25Demɛtiriusu, birɛ womɔ birɛnw gɔbe lee, birɛ wogɔ inɛw birɛɲu wajunw gɔbe lee puu mɔɔnaa, be le ɔn gin’ sɔi: «Emɛ puu birɛ kɔɔ le kɛɛlɛ joo bɛɛuwɔin ga e igii wɔi. 26Nɛɛ, Pɔlu kɔɔ kijɛ kanranjɛ gɔ e iyeuwɔi, ɛgɛuwɔi. Numɔ le ama yegeraaɲu gɔbe, amai laa ga wo sɔɔuwɔ. Epɛse nɛ sai laa, kaa Asi numɔ yalu joo nɛ wo inɛw joo bɛrɛ sɔɔ kɔɔ le gawamaa, hakilɛ bemɛ yamalaa biyaajɛ. 27Kunrin, sɔɔ wogɔ birɛ emɛ kuu sunugo ye, birɛ gɔ yanwan yaado. Kɔɔ sai laa, amayaa diyɛ, Arutemise ginrun gɔ kijɛ kanmai laa bojojɛ. Iyaa sigiyaa, Asi numɔ puu lee, aduna wooi lee, boi goonaa kijɛ babau sɛin gɔ, saŋa womɔ sugo yaado.» 28Demɛtiriusu sɔɔ gɔ ɛgaa, inɛw gɔbe kinɛ ingelemaa, mii ɛɛn le ɔn gin’ gɛɛi tɔlin: «Epɛse bɛɛnw Arutemise gɔ wo gaai wɔɔ, Epɛse bɛɛnw Arutemise gɔ wo gaai wɔɔ.» 29Kunrin giru giru gɔ ana gɔ puu nɛ dɔwaabe. Inɛw gɔ puu giru giru kanraan, Arisutaruke lee, Gayisu leei paŋa le biɲaa, yalu mɔɔnu diyɛ be kunɔjɛ nɛ yaabɛin. Inɛw lɛi kɔɔbe Maseduanɛ bɛɛnwin. Pɔlu yoi yaanw bɔɔwin. 30Pɔlu mɔɔnu gɔ bɛrɛ kuu unrunmɔ taguru ibɛɛ bee. Kaa jaŋu unrunw gɔbe woi tɛŋaabɛin. 31Halu Asi numɔ inɛw kuu bɛɛnw, Pɔlu anrungebe gamuu, wo bɛrɛ tagaa tiyaa, womaa, mainiyaan ye mɔɔnu yalu gɔ nɛ wɛɛnɔu gin. 32Mɔɔnu yalu gɔ nɛ, inɛw kanran gɔ ɛjii ligijiyaa bee. Inɛw gamuu kijɛ turu dɛi kɔnwɔunbɛin. Inɛw wajunw gɔbe kijɛ waja dɛi kɔnwɔunbɛin. Inɛw joo yalu gɔ nɛ wiyaa kowɔin laa ye, kijɛ inge dɛi mɔrinyaan wɔin ma kanran inin bɛin. 33Sɔɔ gɔ tiyɛ, mɔɔnu gɔ nɛ ainɛ turu Alɛsandere gɛɛɲu turu bɛrɛ tagaabɛin. Yahutunw, woi giru go gaanaabɛin. Alɛsandere Yahutunwin sɔɔ gɔ nɛ tolo tagado ga, inɛw bemaa kelemu biyɛ ga numɔ daii kanraanbe. 34Kaa wo Yahutunɛi ga waaru be jugu le, be wooi puu mii ɛɛn le lɛɛrɛ lɛi gin’ baa, ɔn gin’ gɛɛubɛin: «Epɛse bɛɛnw Arutemise gɔ, wo gaai wɔɔ, Epɛse bɛɛnw Arutemise gɔ, wo gaai wɔɔ.» Be kɔɔ gin’ kɔnwɔunbɛin. 35Dumɔ gɔ, ana dɔn tɔŋɔnɛ gɔ mɔɔnu gɔi kelemu biyɛmaa, ɔn gin’ sɔi: «Epɛse bɛɛnw, Arutemise ginrun diyɛ babaɲu gɔ lee, dege womɔ alagala gowaa bagaa sugu gɔ lee, bei Epɛse ana sagi ga inɛ inɛɛ gɔ aai? 36Inɛ wogɔ jiiru bɛɛjɛ wɔlɔ. Kɔɔi biyaai ye, hakilɛ ebe daanaajɛi ye, ɔgiri ye kijɛ turu kanran kanrannɔugi. 37Yɛnɛi, e inɛw ɔnbe ɔn nɛ aa jɛɛlaa unsɛin. Kaa ɔmɔlɔ ginrun emɛ nɛ be yanwan turu kanran tɛbɛnɛ, iyaa amayaa emɛ gɔ dɛi yaa sɔɔ mɔɲu turu kanran sɔɔnɛ. 38Nɛɛ, Demɛtiriusu lee, birɛbirɛnw wo bɔɔnw lee, inɛ turu le sɔɔ yasin ye, Rɔmɛ inɛw kuu bɛɛnw gɔbe saliyɛ bai be kirejɛ dɛiin yɔɔ. Bai wogɔbe le wɛi ye, be inɛw gɔbei boonu bɛbɛɛdɛin. 39E sɔɔ waja yasɛi ye, ana bɛɛnw tɔitɔi puu, waaru mɔrinyɛindɛin le kilɛmɔdɛin. 40Iye sɔɔ ɔn le digɛnu emaa murutui kanranɲu giye emi jaaru bɛbɛɛmɔjɛ. Mɔɔnu gɔ tiyɛ sɔɔ giyaa ye, emɛ sai bɛɛnɛ.» Kunrin sɔwaatiyaa, wo mɔɔnu gɔi ginrun tiyaabe.

will be added

X\