KANRAN 18

1Atɛnɛ ana nɛ kunrin sɔɔ sɔwaatiyaa, Pɔlu gowaa, Kɔrɛnte ana nɛ yai. 2Kɔɔ nɛ wo ainɛ Yahutunɛ turu tɛmaabe. Boi womɔ Akilasu gɛɛɲu. Rɔmɛ laamu Pɔn numɔ bɛɛnnɛi. Wo lee, yaanran womɔ Pirisilu lee, bɛrii Itali gana nɛ gowaa wɛin. Rɔmɛ Ɔgɔnɛ diyɛ, Kulɔde, Yahutunw tɔgu puu Rɔmɛ ana nɛ goo ga wo tɔɔraa, be kɔɔ gin’ jɔbaa wɛin. Pɔlu bei yaa tɛmaa, 3nɛɛ, be wooi birɛ turu bee digɛu, wo ginrun bemɛ nɛ biyaa, be wooi birɛ birɛube. Birɛ bemɛ guju kuru yegurui bee. 4Pɔlu, Ama gɛɛn ginrun nɛ Yahutunw lee, Gɛrɛku tɔgu lee bɛrɛ, sɔɔ womɔ le gawamu kaarado gɛ, deeliye bai puu be le sɔɔ sɔɔube. 5Nɛɛ Silasu lee, Timɔte lee Maseduanɛ gana nɛ gowaa be wiyaa, Pɔlu waaju tagu gɔ nɛ sai biyaabe. Ama Yabanɛ Diyɛ tii gɔ, Yesu woi ga wo Yahutunw gɔbe bɛrɛ sɛɛrɛ gooube. 6Kaa Yahutunw gɔbe sɔɔ mɔɲu mɔɲu le wo le jaiyɛubɛin. Pɔlu giru bemɛ nɛ sɔi unrunmɔbe yigaatiyaa, ɔn gin’ sɔi: «Ili ebe kuu ebe nɛ yasugo. Mu kai, e sibɛ go jarugu le wɔlɔn. Kanɛ baa, mu tɔgu wajabe inɛw bɛrɛ yaajɔn.» 7Kunrin Pɔlu be nɛ gowaa, ainɛ Ama giri liyɛnɛ turu ginrun nɛ yai. Ainɛ wogɔ boi Titiusu Jusutusu gɛɛɲu. Ginrun womɔ amagɛɛn ginrun le bɛrii bee. 8Kaa kɔɔ wooi nɛ Ama gɛɛn ginrun kuu baŋa, Kirisupusu, wo maranw puu le, be Inɛw Baŋa Yesu le gawaabɛin. Kɔrɛnte bɛɛnw Pɔlui keŋiyɛunbɛin gɔbe yaa joo gawaabɛin. Be batise yowaabɛin. 9Digɛ turu kuu iye nɛ Inɛw Baŋa ɔn gin’ Pɔlu le gi: «Liliyɛ le biyɛnɔu. Deeliye sɛlɛ go waaju kanran. 10Mu u le yɔɔun. Inɛ turu kanran mɔɲu kanrando giye u bɛrɛ numɔ dɔɔnɔidolo. Ana ɔn nɛ, inɛw ma joo yatoin.» 11Kunrin Kɔrɛnte nɛ Pɔlu anranguju turu iyepilu kuloi biyaa, inɛw bɛrɛ Ama sɔɔ deereube. 12Nɛɛ, Rɔmɛ sɛmɛginɛ, Galiɔn, Akayi gana nɛ waaru wo daanbe le, Yahutunw mii turu biyaa, Pɔlu dɛi ingelaabɛin. Be woi saliyɛ kiru yalu nɛ jɛɛlaa, 13ɔn gin’ sɔin: «Ainɛ ɔn, Ama baba ga bana wo deerejɛ gɔ tɔɔru le sɛgɛrɛɛlɛ. Kaa wo wogɔ inɛw hakilɛ nɛ kunɔ kaarado ga wɔɔ.» 14Kunrin be sɔwaa, Pɔlu sɔɔ bemɛ gɔ sai ibɛɛ bee. Kaa Galiɔn, sɛmɛginɛ gɔ, Yahutunw gɔbe le ɔn gin’ sɔi: «Yɛnɛi, kanran dagalu turu sɔɔi ma, yanwan tɛbu sɔɔi bee ye, e Yahutunw gɔbe, ei muyɔn ye, mu keŋiyɛun jaain wɔɔ. 15Kaa, sɔɔ tiyɛ kuu nɛi ma, boi kuu nɛi ma, kuu ebe tɔɔru sɔɔ kuu nɛ, e tunmɔ le jiiru biyaa wɔi ye, kɔɔ sɔɔ ebei. Mu wogɔ saliyɛ kirɛnɛi biyɛidolɔn.» 16Kunrin sɔwaatiyaa, wo saliyɛ kiru yalu nɛ bei digaa goonaabe. 17Kunrin wo biyaa, inɛw gɔbe, Ama gɛɛn ginrun kuu baŋa Sɔsutɛnɛi aa, yalu saliyɛ kiru giru gɔ nɛ woi lagai tɔlaabɛin. Kaa be ingei kanranɲu ma, Galiɔn gaila kanran gɔnaa yɛnɛlu. 18Pɔlu nimɛ kanran Kɔrɛnte ana nɛ gaila tanwaanbe. Kɔɔ onu nɛ Pɔlu, Ama le pui jeɲaa sɛbe gɔ digɛu, kuu unrunmɔ kaamaa, jaŋu unrunw gɔbe le jamu biyɛmɔ giyaatiyaa, wo lee Pirisilu lee, Akilasu lee, Sankere nɛ diikoro Siri gana nɛ yaajɛ turu nɛ yowaabɛin. 19Epɛse ana nɛ dɔwaa, wo Akilasu lee, Pirisilu lee kɔɔ nɛ pajaabe. Wo Ama gɛɛn ginrun nɛ yowaa, Yahutunw le Ama sɔɔ sɔɔube. 20Be wo bɛrɛ gɛnyaan, womaa bai lɛi unrunbe le biyɛ gin. Kaa wo yabalu. 21Bei pajaa yaau, wo be le sɔwaa gi: «Ama yabaajɛ ye mu e bɛrɛ pilemɛ ye wɛwɛɛdɔn.» Epɛse nɛ gowaa, Pɔlu diikoro nɛ yowaa, 22Sesare ana yaa sugu. Kɔɔ le digɛu, wo Jerusalɛmu ulaa, Ama inɛw mɔɔnu gɔi poonaatiyaa, Antiɔse ana nɛ sugu. 23Wo kɔɔ nɛ waaru gaila kanraan, pilemaa Galasi lee, Piriji lee gana nɛ gɔŋɔlaa, jaŋu unrunw gɔbe puu paŋa bariyɛmaabe. 24Ainɛ Yahutunɛ turu Epɛse ana nɛ dɔwaabe. Boi womɔ Apɔlɔsu gɛɛɲu. Alɛsandiri ana bɛɛnnɛi. Ainɛ kɔɔ sɔɔ ɛjii sɔi bɛbɛɛjɛ. Ama Dɔn yaa ɛjii jugaa wɔɔ. 25Inɛw Baŋa oju sɔɔ wo bɛrɛ deeraabɛin. Wo kinɛ unrunmɔ wooi le, lelu tolo go Yesu sɔɔ sɔɔu, deeru deereube. Kaa jugɔ womɔ batise Jan kanranbe sɔɔ nɛ galalu bee. 26Wo Ama gɛɛn ginrun nɛ daii sɔɔ sɔɔi tɔlaabe. Pirisilu lee, Akilasu lee woi keŋiyaan, woi dimɛraan unrunbe le bojaa, Ama sɔɔ oju gɔ sigɛ le ɛjɛmaa, wo bɛrɛ tagaabɛin. 27Apɔlɔsu gɔ Akayi gana go galu ibɛi bee dɛi, ba unrunw wogɔ nɛ wo bɛrɛ anrangaju obaabɛin. Be jaŋu unrunw gɔ bɛrɛ lɛtɛrɛ tɔŋaa tiyaa, bemaa woi ɛjii sɛgɛrɛ gin. Nɛɛ, Akayi nɛ dɔwaa, Ama nɛɛma dɛi, inɛw Yesu le gawaa bɛin gɔ sibɛ nɛ Apɔlɔsu niwɛn diyɛi biyaabe. 28Sabu, wo gɔnrɔn diyɛ le inɛw puu giru nɛ Yahutunw gɔbe sɔɔ kɔɔlɔmɔube. Ama Dɔn sɔɔ le digɛnu, naran go Ama Yabanɛ Diyɛ tii gɔ, Yesui ga inɛw bɛrɛ jugɔmɔube.

will be added

X\