KANRAN 17

1Pɔlu lee, Silasu lee, Anpipolise ana lee, Apɔlɔni ana lee digɛu, Tesalonike ana nɛ yaabɛin. Yahutunw, kɔɔ nɛ Ama gɛɛn ginrun yasɛbɛin. 2Pɔɔlɔ baa wo kanranbe gin’, Pɔlu kɔɔ nɛ yowaabe. Deeliye bai taanu baa wo inɛw kɔɔ nɛ bɛin gɔbe be wooi tunmɔ le Ama Dɔn kuu nɛ sɔɔ sɔwaabɛin. 3Ama Yabanɛ Diyɛ tii gɔ, ɔɲɛ iye ye iyaa yiun logoro nɛ bulo ye gogoodo ga Dɔn yingi ga, wo be bɛrɛ ɛjɛmaa ye tagaube. Yesu dɛi be bɛrɛ unrun sɔɔjɛ gɔ, Ama Yabanɛ Diyɛ tii gɔ woi ga wo gɛɛube. 4Logoro bemɛ nɛ inɛw gamuu, sɔɔ gɔ le yabaa, Pɔlu lee, Silasu lee sibɛ go bariyaabɛin. Gɛrɛku tɔgu inɛw Ama giri liyɛnw joo lee, inɛw diyɛnw yaanw joo lee yaa be le bariyaabɛin. 5Kaa Yahutunw gɔbe ele le jowaa bɛin. Be ana pɔŋɔrɔn nɛ inɛw koolo dɛnaa, unrunbe le baraa, inɛw mɔɔnaa, ana gɔ nɛ giru giru kanraunbɛin. Be Jasɔn ginrun nɛ yaa, Pɔlu lee, Silasu leei inɛw giru nɛ jɛɛlɛdɛin ga bei dɛnɛubɛin. 6Kaa be bei iyenɛ. Be Jasɔn lee, ba unrunw gamuu lee aa, paŋa le kuu bɛɛnw giru nɛ jɛyaa, mii ɛɛn le ɔn gin’ gɛɛubɛin: «Inɛw kɔɔbe aduna puu nɛ inɛw hakilɛ ingelemɔuwɔin. Kunrin kanraun kanɛ ɔn nɛ be dɔwaa, 7Jasɔn, ginrun unrunmɔ nɛ bei sɛgɛraabe. Be wooi puu Rɔmɛ ɔgɔnɛ diyɛ tɔɔru birɛ birɛɛnɛ. Be ɔgɔnɛ waja yɔɔ gɛɛɲu. Boi womɔ Yesu gɛɛɲu wa.» 8Kunrin be sɔwaa, mɔɔnu gɔ inɛw lee, kuu bɛɛnw gɔbe lee, hakilɛ bemɛ ginaai. 9Jasɔn lee, inɛw wajunw gɔ lee bɛrɛ waja bei aamɔidenɛ sɛɛrɛ duunɔmaa, kɔɔ gin’ bei pajin. 10Digɛ digiyɛu wo digɛu, ba unrunw gɔbe Pɔlu lee, Silasu leei Bere ana nɛ yaamaabɛin. Kɔɔ nɛ dɔɔu digɛu, be Yahutunw Ama gɛɛn ginrun nɛ yowaabɛin. 11Bere Yahutunw gɔbe, sɔɔ keŋi nɛ Tesalonike ana bɛɛnw dɛi ire bɛin. Be kinɛ ɛju le sɔɔ gɔ keŋiyɛunbɛin. Iyaa, sɔɔ be bɛrɛ tagau bɛin gɔ narain ma, bai puu Ama Dɔn nɛ lubo lubo yɛnɛubɛin. 12Logoro bemɛ nɛ inɛw joo Yesu le gawaabɛin. Gɛrɛku tɔgu inɛw diyɛnw yaanw joo lee, anranw joo lee yaa gawaabɛin. 13Kaa Pɔlu, Bere nɛ yaa Ama sɔɔ tagauwɔ ga, Tesalonike Yahutunw gɔbe jugaa, be kɔɔ nɛ kanran yawiyaa, inɛw hakilɛ ligijiyemaa, bei ingelemaabɛin. 14Ɔgu kɛu ba unrunw gɔbe Pɔlui, nɛudii sibɛ go yaamaabɛin. Kaa Silasu lee, Timɔte lee kɔɔ nɛ biyaabɛin. 15Inɛw Pɔlui niinaa gɛlɛbɛin gɔbe, woi dimɛraan, ana diyɛ Atɛnɛ gɛɛbɛin gɔ nɛ baa yaabɛin. Pilemaa Bere wɛɛu be wɔu, Pɔlu be le tagaa tiyaa, Silasu lee, Timɔte lee bemaa, tanwanlu go Atɛnɛ nɛ unruin wɛɛ tɛmɛ gi. 16Kunrin Atɛnɛ nɛ Silasu lee, Timɔte leei dɔmɔu, Pɔlu, ana gɔ, ɔmɔlɔ le bana jowaa wo wɔɔ iyaa, wo bɛrɛ sɔɔ mɔɲu diyɛi biyaai. 17Kunrin Yahutunw Ama gɛɛn ginrun gɔ nɛ, wo Yahutunw gɔbe lee, inɛw wajunw Ama giri liyɛnw gɔbe lee bɛrɛ Ama sɔɔ sɔɔube. Tai nɛ kanran, bai puu inɛw wo sɛgɛrɛu bee le sɔɔube. 18Jugɔ jugɔnw Epikuriɛn gɛɛɲu gɔbe lee, Sitoyisiɛn gɛɛɲu gɔbe lee gamuu yaa Pɔlu le jiiru jiireubɛin. Kunrin inɛw gamuu kijɛ gɛɛbe: «Sɔɔ diyɛ sɔɔnɛ ɔn inge gɛɛuwɔ?» Pɔlu, Yesu Kibɛru Ɛju sɔɔ tagaube, iyaa bulogu sɔɔ sɔɔube. Wogɔ digɛu, gamuu iyaa ɔn gin’ sɔɔubɛin: «Ɔn baŋa, ama yerube sɔɔi sɔɔjɛ gin’ wɔɔ.» 19Kunrin be Pɔlui dimɛraan, badu yalu diyɛ bemɛ Areyopaje gɔ nɛ jɛyaa, wo le ɔn gin’ sɔin: «Deeru kana sɔɔ u sɔɔjɛ gɔ ingei ma, u emɛ bɛrɛ taga bɛbɛɛdou ma? 20Sɔɔ u sɔɔjɛ kɔɔbe suguru emɛ nɛ sɔɔ yerui. Wogɔ digɛu, emɛ sɔɔ gɔ tiyɛ paamu kanrun ibɛɛ wɔin.» 21Atɛnɛ bɛɛnw lee, yerunw logoro bemɛ nɛ daain gɔbe lee, deeru kana keŋiyɛn lee, taga lee, birɛ bemɛ kɔɔ woi. 22Pɔlu, badu yalu gɔ nɛ inɛw gɔbe logoro nɛ iŋiyaan, ɔn gin’ sɔi: «Atɛnɛ anranw, amabei bulu sɔɔ nɛ e maai wɔi ga mu iyeuwɔn. 23Ana ebe nɛ gɔŋɔlaa, mu kijɛ e babajɛ yalu joo iyaabɔn. Halu yalu turu nɛ “Ama inɛɛ emɛ wɔɔ sadaga goonu yalu” gɛ tɔŋaa wo wɔu mu iyaabɔn. Aiwa, kijɛ inɛɛ wɔu e babajɛ gɔ, mu wogɔ sɔɔi e bɛrɛ sɔɔuwɔn. 24Aduna ɔn lee, kɔlɔ womɔ kijɛ puu lee, Ama maŋanɛ gɔ, Ama alagala lee, minɛ lee Baŋa gɔ, Ama wogɔ, numɔ le ginrun ujaaɲu nɛ toiyoolɛ. 25Wo inɛw bɛrɛ ɔnmɔ lee, ninu lee, kijɛ puu lee obonɛ gɔ, kai womɔ inɛ kilɛjɛ gin’, be wo nɛ kijɛ obo ga, wo kai sɛlɛ. 26Wo inɛ turu le digɛu tɔgu puu biyɛmaa, aduna yalu wooi nɛ bei daanaabe. Wo inɛw dɛi waaru dɛin dɛin kɛjaabe. Iyaa inɛw puu yalu be biyɛun jaan kale kɛjaabe. 27Ama, inɛw bemaa unruin dɛnɛ ga bei maŋu. Ɔnhɔn, inɛw tau tau kanrannu wɔnu, Ama iye bɛbɛɛmɔ ma dɛi wo bei maŋu. Kaa Ama, emɛ tuturu puu le wagela. 28Yɛnɛi, “Ɔnmɔ gɔ, emɛ Ama nɛ bɛɛɲu. Wo kɔrumɔ le goju emɛ bɔnrinyɛnmɔɲu. Iyaa, emɛ wo kɔrumɔ le wɔin.” Nii niiw ebe gamuu yaa sɔɔ kɔɔ tunmɔ sɔwaabɛin. Kijɛ be gi: “Emɛ yaa unrunw womɔi.” 29Nɛɛ, emɛ Ama unrunwin biyaain ye, Ama gɔ kange le ma, sarudu le ma, tibu le ma dege yegeraaɲu gin’ wɔɔ ma emɛ ajubaun jaanla. Kijɛ kɔɔbe, inɛw, ajubu bemɛ lee, jugɔ bemɛ lee digɛu yegeraaɲu. 30Aiwa, jugɔla waaru gɔ, Ama wogɔ inɛw bɛrɛ lugoolɛ. Kaa kanɛ inɛw puu bemaa, yalu puu nɛ, bana mɔɲu bemɛ dulomɔ ga, wo tagauwɔ. 31Wo aduna puu saliyɛ teitai le bai wo kirɛido kɛjaa yasɛ. Inɛ saliyɛ gɔ kirɛido yaa yɛmaa yasɛ. Wogɔ dɛi wo sɛɛrɛ inɛw bɛrɛ obaabe. Sabu wo inɛ wogɔi bulomaa yiun nɛ goonaabe.» 32Inɛw gɔbe yiun bulogu sɔɔ waaru be ɛgu le, gamuu Pɔlui mɔmɔubɛin. Gamuu iyaa unrunbe sɔɔ kɔɔ dɛi bai waja woi keŋiyɛndɛin gin. 33Pɔlu kɔɔ gin’ bei pajaatiyaa yai. 34Kaa kɔɔ wooi nɛ inɛw gamuu Pɔlu le bariyaabɛin. Be Yesu le gawaabɛin. Inɛw wogɔbe logoro nɛ Areyopaje badubadanw mɔɔnu inɛ turu yatobe. Boi womɔ Dɛnisu gɛɛɲu. Yaanran turu, boi womɔ Damarise gɛɛɲu gɔ yaa yatobe. Inɛw wajabe yaa yatobɛin.

will be added

X\