KANRAN 16

1Pɔlu kunrin Dɛrube ana lee, Lisutere ana lee nɛ dɔwaabe. Lisutere nɛ, jaŋu ii turu Timɔte gɛɛɲu gɔ yabe. Wo na Yahutunɛ, Yesu le gawaa beei. Wo ba Gɛrɛku tɔgui bee. 2Lisutere lee, Ikɔniumu ana lee ba unrunw gɔbe, Timɔte dɛi sɛɛrɛ ɛju gooubɛin. 3Pɔlu, Timɔte wo le digi ye yaa ga ibɛi bee. Wo unrun le woi jeɲaabe. Yahutunw, gana kɔɔbe nɛ bɛin gɔbe puu Timɔte ba, Gɛrɛku tɔgu inɛi ga igii bɛin gɔ digɛu, Pɔlu woi araa nɔɔmaabe. 4Ana be galabe wooi nɛ, Yesu jaŋu unrunw tiyaaɲu gɔbe lee, Jerusalɛmu ana Ama inɛw mɔɔnu inɛw naw lee, sɔɔ bana aarin gɔ, jaŋu unrunw bɛrɛ tagaubɛin. Iyaa, inɛw wogɔ le yaba ga gɛɛubɛin. 5Ama inɛw mɔɔnu gɔbe gagawu nɛ ɛɛn go biyɛ biyɛ yaaubɛin. Bai puu inɛw bariyɛubɛin. 6Rɔmɛ laamu Asi numɔ nɛ, Pɔlu lee, wo bɔɔnw lee, Ama sɔɔ taga ga, Kikinu Pilu yabalu gɔ digɛu, be Piriji gana lee, Galasi gana lee kɛjaa taŋaabɛin. 7Misi gana le bɛrii dɔwaa, be Bitini gana nɛ yai dɛnaabɛin. Kaa Yesu Kikinu gɔ be kɔɔ nɛ yaa ga yabalu. 8Wogɔ digɛu, be Misi galaa, Toroasu ana nɛ sugaabɛin. 9Digɛ, Pɔlu kuu iye iyaabe. Maseduanɛ gana bɛɛnnɛ turu giru womɔ nɛ iŋiyaan, ɔn gin’ gɛɛunbe: «Maseduanɛ nɛ wɛɛ ye emi bara.» 10Pɔlu kuu iye kɔɔ wo iye onu nɛ, emɛ ɔgu kɛu Maseduanɛ yai dɛnaabɛin. Kibɛru Ɛju gɔ taga ga, Ama kɔɔ nɛ emi boonɔuwɔ ga emɛ gawaabɛin. 11Toroasu ana nɛ diikoro nɛ yowaa, emɛ demu demu Samɔtarase, minɛ dii gɔŋaa gɛlɛ gɔ nɛ yaabɛin. Kɔɔ onu nɛ, aga baa yaa gɔ emɛ Nɛyapolise ana nɛ yaabɛin. 12Kɔɔ nɛ gowaa, emɛ ana Pilipi gɛɛɲu gɔ nɛ yaabɛin. Maseduanɛ gana sibɛ turu nɛ ana diyɛ gɔ woi. Rɔmɛ bɛɛnw anai. Ana kɔɔ nɛ emɛ bai gaila kanraanbɛin. 13Deeliye bai wo dɔwaa, emɛ ana gɔ nɛ gowaa, goro turu nɛ, Yahutunw mɔrin ye, Ama yalu be gɛɛnjɛ yɔɔ ma yalu emɛ ajubu turu nɛ yaabɛin. Emɛ kɔɔ nɛ dɛinyaan, yaanw yalu gɔ nɛ mɔrinyaan bɛin gɔbe le sɔɔ sɔɔi tɔlaabɛin. 14Yaanw kɔɔbe logoro nɛ Ama giri liyɛnɛ turu Lidi gɛɛbɛin gɔ yatobe. Wo Tiatire ana bɛɛnnɛi. Sɔi sigɛ banrun gɔ tɔŋutɔŋɔnɛi. Inɛw Baŋa kinɛ womɔ pinɛlaa, wo Pɔlu sɔɔ gɔ ɛjii keŋiyaanbe. 15Kunrin wo lee, wo maranw lee, batise yowaabɛin. Batise be yoi onu nɛ, wo ginrun womɔ nɛ emi boonaabe. Wo ɔn gin’ sɔi: «Mui Inɛw Baŋa Yesu jaŋu ii ga e gawaa wɔi ye, ginrun ma nɛ wɛɛ sugo ye biyɛi.» Wo mainiyaan, emɛ bɛrɛ ginrun womɔ nɛ yaamaa kaaru. 16Bai turu amagɛɛn yalu gɔ nɛ yaau emɛ wɔu, gunɔ yaanran turu emɛ wooi sɛgɛraabe. Jinrun kuu iye iyemɔnɛ wo nɛ yatobe. Sɔɔ wɛɛido inɛw bɛrɛ wo tagabe gɔ digɛu, wo baŋabe wo le buudu ɛjii bɛɛubɛin. 17Yaanran kɔɔ Pɔlu lee, emɛ lee onu nɛ digiyaa, mii ɛɛn le ɔn gin’ sɔɔube: «Anranw ɔnbe Ama daa naa daa go wɔɔ gɔ birɛbirɛnwin. Be yayabu oju sɔɔ e bɛrɛ tagauwɔin.» 18Bai lugo joo yaanran gɔ kunrin kanraanbe. Pɔlu sɔɔ womɔ gɔ le kinraan yaa, kigelemaa, jinrun gɔ le ɔn gin’ sɔi: «Yesu Kirisito boi le mu u bɛrɛ tɔɔrɔuwɔn, yaanran kɔɔ kuu nɛ goo.» Waaru wogɔ le tee, jinrun gɔ yaanran gɔi pajaati. 19Kaa yaanran gɔ, wo baŋabe, waja wo le buudu bɛɛidenɛ ga jugaa, be Pɔlu lee, Silasu leei aa, badu yalu nɛ saliyɛkirenw bɛrɛ jɛyaabɛin. 20Be Rɔmɛ saliyɛkirenw bɛrɛ bei jɛyaabɛin. Kijɛ be gi: «Anranw ɔnbe, ana gɔ nɛ giru giru jɛɛlɛuwɔin. Be Yahutunw tɔgu inɛwin. 21Atɛmu sɔɔ be sɔɔjɛ gɔ, emɛ Rɔmɛ bɛɛnw wogɔ le yaba bɛɛidenɛ, wogɔ birɛ yaa, birɛ bɛɛidenɛ.» 22Mɔɔnu gɔbe yaa, Pɔlu lee, Silasu lee dɛi ingelaabɛin. Rɔmɛ inɛw kuu bɛɛnw gɔbe, Pɔlu lee, Silasu lee arugoi paŋa le goonaatiyaa, bei baga le laga ga tɔɔraabɛin. 23Kunrin bei baga le ɛjii lagaa, bei kaju kunaa, kajuginrun kajubanɛ gɔ womaa ɛjii bei kajuba gin. 24Kajuginrun kajubanɛ gɔ sɔɔ kɔɔ ɛgaa, bei kajuginrun dɛun giru go damaa kunaa, kubɔ bemɛ baga lolugu nɛ kunaabe. 25Digɛtaŋu waaru le Pɔlu lee, Silasu lee, Ama gɛɛun, Ama sɔmu nii niiubɛin. Kajugunw wajunw gɔbe bei keŋiyɛunbɛin. 26Kunrin wo wɔu, ginsɛsai minɛ ɛjii jigaa, kajuginrun bɔlɔtei gɔbe puu jigaai. Waaru wogɔ le tee, kajuginrun taan gɔbe puu pinɛlaai. Kajugunw yɔgu gɔbe puu digɛraa gowaai. 27Kajuginrun kajubanɛ gɔ giri yemaa, kajuginrun taan gɔbe pinɛlaa wɔɔ ga waaru wo iye le, kajugunw gɔbe jɔbaain ga ajubaabe. Wo polukaaba unrunmɔ bɔwaa goonaa, kuu unrunmɔ daado ga bee. 28Kaa Pɔlu, mii ɛɛn le wo le ɔn gin’ sɔi: «Kuu uwɔ nɛ mɔɲu turu kanran kanrannɔu. Emɛ puu ɔn nɛ yatoin.» 29Kɔɔ waaru le kajuginrun kajubanɛ gɔ lanpa selumaa, ɔgu jɔbaa, kajuginrun gɔ nɛ yowaa, Pɔlu lee, Silasu lee giru nɛ kinwɛun numaa sugaabe. 30Wo bei bain go dimɛraan goonaa kijɛ wo gi: «Mu baŋabe, yayabu bɛɛ ga kijɛ inge mu kanraun jaan?» 31Be saa kijɛ be gi: «Inɛw Baŋa Yesu le gawa. Kɔɔ biyaai ye ui yayabadɛin. U lee, u maranw lee.» 32Kunrin sɔwaatiyaa, be Inɛw Baŋa Yesu sɔɔ gɔ, wo lee, ginrun womɔ nɛ inɛw bɛin gɔbe lee bɛrɛ tagaabɛin. 33Waaru wogɔ le tee, digɛ gɔ nɛ, kajuginrun kajubanɛ gɔ bei dimɛraan yaa mirun bemɛ mɔŋaabe. Kɔɔ onu nɛ, ɔgu kɛu wo lee, wo maranw puu lee batise yowaabɛin. 34Wo iyaa ginrun unrunmɔ nɛ bei unaa, pana bei obaa kayamaabe. Wo lee, wo maranw lee, Ama le wo gawu gɔ dɛi kinɛ ɛɛli diyɛ le bɛin. 35Aga, baa yaa wo kanran, Rɔmɛ inɛw kuu bɛɛnw gɔbe, kajuginrun kajubanɛ gɔ bɛrɛ garidu tiyaa, anranw kɔɔbei paja gin. 36Kajuginrun kajubanɛ gɔ wiyaa, Pɔlu lee, Silasu lee bɛrɛ tagaabe. Kijɛ wo gi: «Kuu bɛɛnw gɔbe inɛ tiyaa, ei paja ga tɔɔraabɛin. Nɛɛ, e wɛɛ gooi. Jamu le yaai.» 37Kaa Pɔlu, garidu gɔbe le sɔwaa kijɛ wo gi: «Emɛ Rɔmɛ bɛɛnw tɔitɔi gɔ, saliyɛ wɔlɔ go inɛw puu giru nɛ emi baga le lagaa, kaju nɛ emi aa pinin. Kanɛ be baŋi ye emi pajadɛin ga yinwɔin ma? Ai, emɛ wogɔ yabaidenɛ. Bemaa kuu bemɛ le wɛɛ emi kaju goonɔ wa.» 38Garidu gɔbe sɔɔ kɔɔ yaa be tagaa, kuu bɛɛnw gɔbe Pɔlube, Rɔmɛ inɛw tɔitɔii ga ɛgaa, liliyɛ diyɛ le biyaabɛin. 39Be kuu bemɛ le wiyaa, bemaa muyɔn kanran ga ɛjii gɛnyaan, kaju nɛ bei goonaabɛin. Be bei gɛnyaan, bemaa ana gɔ nɛ goojɛ gin. 40Pɔlu lee, Silasu lee kaju gowaa, Lidi ginrun nɛ yaabɛin. Kɔɔ nɛ ba unrunw gɔ be wooi tunmɔ iyaa, be bɛrɛ tinwinrun obaatiyaa, kɔɔ gin’ yain.

will be added

X\