KANRAN 15

1Anranw gamuu Judea gana nɛ gowaa, Antiɔse ana nɛ wiyaa, ba unrunw gɔbe bɛrɛ deeru oboi tɔlaabɛin. Kijɛ be gɛɛbe: «Mɔise tɔɔru le kɛukɛu e araa nɔɔli ye, yayabu bɛɛidelei.» 2Sɔɔ kɔɔ le digɛu, siɲɛ diyɛ ingelaabe. Pɔlu lee, Barunabasu lee, inɛw kɔɔbe lee logoro nɛ jiiru diyɛ biyaabe. Kunrin Pɔlu lee, Barunabasu lee, Antiɔse inɛw gamuu leei Jerusalɛmu ana nɛ Yesu jaŋu unrunw tiyaaɲu gɔbe lee, inɛw naw gɔbe lee bɛrɛ, sɔɔ kɔɔ dɛi tiyaabɛin. 3Kunrin Ama inɛw mɔɔnu yoi bemɛ kai kilɛmaa wo kanran, be oju gowaabɛin. Penisi gana lee, Samari gana lee kɛjaa taŋau, be ba unrunw bɛrɛ inɛw Yahutunw tɔgui laain tubu bana yoin, digu le digu le tagaubɛin. Sɔɔ wogɔ ba unrunw bɛrɛ kinɛ ɛɛli oboube. 4Waaru Jerusalɛmu be dɔi le, Ama inɛw mɔɔnu gɔ lee, jaŋu unrunw tiyaaɲu gɔbe lee, inɛw naw gɔbe lee bei sɛgɛraabɛin. Be yaa Ama be le digɛu bana birɛ biru tagaabɛin. 5Nɛɛ, Parisiɛnbe logoro nɛ inɛw gamuu Yesu le gawaa wɔin yabɛin. Pɔlu lee, Barunabasu lee, sɔɔ gɔ ɛgaa, Parisiɛn kɔɔbe ingelaa, waajibi inɛw Yahutunw tɔgui laain, tubu yoin gɔbei araa nɔɔmɔu jaain wɔɔ gin. Iyaa Mɔise tɔɔru gɔ gɛliyɛ ga be bɛrɛ tɔɔrɔun jaain wɔɔ gin. 6Yesu jaŋu unrunw tiyaaɲu gɔbe lee, inɛw naw gɔbe lee, sɔɔ kɔɔ ɛjii marun yɛnɛ ga tunmɔ le mɔrinyaanbɛin. 7Jiiru gɔ ɛjii ɛnyaanbe. Kɔɔ onu nɛ, Piɛru ingelaa, ɔn gin’ be le gi: «Ba unrunw, inɛw Yahutunw tɔgui laain gɔbe, Ama Kibɛru Ɛju sɔɔ gɔ ɛgaa ye, Yesu le gawa ga, Ama waaru wage le baa maa be bɛrɛ waaju taga ga, logoro ebe nɛ mui yɛmaabe ga e igii wɔi. 8Nɛɛ Ama, inɛw wooi kinɛ jugɔnɛ gɔ, Kikinu Pilu gɔ emɛ bɛrɛ bana wo obu gin’, be bɛrɛ yaa kunrin obu. Kɔɔ gin’, unrun be le yabaajɔn ga tagaraabe. 9Iyaa Ama, kinɛ bemɛ, gagawu bemɛ dɛi ɛjɛmu. Kɔɔ biyaai ye, wo emɛ Yahutunw tɔgu gɔbe lee, be lee logoro nɛ kabu turu kanran kunɔlu. 10Nɛɛ, Amai subɔrɔu wɔnɛ biyaai ye, emɛ babe lee, emɛ lee, dɔɔ gɔnrɔnlu emɛ wɔɔ gɔ, wogɔ jaŋu unrunw bɛrɛ duurɔdei ga e wɔɔ gɔ ingei? 11Ai, kaa, bei bana yabin gin’, emɛ kanran Inɛw Baŋa Yesu nɛɛma dɛi emi yabaaɲu ga wogɔ le gawaa wɔin.» 12Piɛru kunrin wo sɔwaa, inɛw gɔbe puu kelemu biyaabɛin. Barunabasu lee, Pɔlu lee, Ama be le digɛu inɛw Yahutunw tɔgui laain logoro nɛ sɛɛrɛ taanrinyɛn lee, yarabirɛ lee, bana wo kanrun tagaabɛin. Inɛw bei keŋiyaanbɛin. 13Sɔɔ bemɛ waaru sugu le, Jake, sɔɔ jeɲaa, ɔn gin’ gi: «Ba unrunw, mui ɛjii keŋiyɛin. 14Ama, inɛw Yahutunw tɔgui laain gɔbe mai siyaa, tɔlɔ gɔ le baa logoro bemɛ nɛ tɔgu womɔi biyɛ ga bana bei wo yɛmu gɔ, Simɔ Piɛru emɛ bɛrɛ tagaabe. 15Sɔɔ wogɔbe inɛw Ama titiyaanw sɔɔ tɔŋi ɔn le yaa sɛgɛraa wɔɔ: 16“Bai wɛɛido nɛ, mu Inɛw Baŋa gɔ, pilemu ye e bɛrɛ wɛwɛɛdɔn. Ɔgɔnɛ Dawide ginrun numaa diin gɔ, mu wogɔ pilemɛ ye uhujɔdɔn. Ɔnhɔn, ginrun wolaa yanwaain gɔ, mu pilemu ye sɛɛu bobojodɔn. Mu ginrun gɔ sɛɛu ihingelemɔdɔn. 17Kunrin inɛw wajunw puu, Inɛw Baŋa Amai dɛdɛnɛdɛin. Ɔnhɔn, tɔgu boonaa maai mu boju gɔbe puu mui dɛdɛnɛdɛin. 18Inɛw Baŋa Ama pɔlɔ pɔlɔ baa sɔɔ kɔɔbe jugɔmɔnɛ gɔ, sɔɔ womɔ kɔɔ woi.” 19Kɔɔ digɛu, ajubu ma nɛ, inɛw Yahutunw tɔgui laain, Ama le tubu kanraanɲu gɔbe, sɔɔ kirɛ kuu bemɛ nɛ emɛ duurɔun jaanla. 20Kaa, waaru wage le baa, Mɔise tɔɔru obu gɔ waaju ana puu nɛ kunɔuwɔin. Iyaa, Ama gɛɛn ginrun nɛ yaa deeliye bai puu wogɔbe jaŋauwɔin. Wogɔ digɛu, dɔn tɔŋaa ye inɛw Yahutunw tɔgui laain gɔbe bɛrɛ tiyaa ye, bemaa ɔmɔlɔ nawan tɛnwɛn ye bei lɔgɔjiyɛmɔnɔu gɛɛmɔi. Bemaa sala nɛ yoonɔu, iyaa nawan ili goolu tɛnwɛnnɔu, ili yaa kayanɔu gɛɛmɔi.» 22Jake kunrin wo sɔwaa, Yesu jaŋu unrunw tiyaaɲu gɔbe lee, Ama inɛw mɔɔnu inɛw naw lee, Ama inɛw mɔɔnu inɛw puu lee, logoro bemɛ nɛ inɛw gamuu yɛmaa ye, Pɔlu lee, Barunabasu lee onu nɛ digɛraa ye Antiɔse ana nɛ tiimɔ gin. Be Jude, boi waja womɔ Barusabasu gɛɛɲu gɔ lee, Silasu lee yɛmaabɛin. Inɛw lɛi kɔɔbe ba unrunw logoro nɛ inɛw giru tobɛin bei. 23Be lɛtɛrɛ tɔŋaa numɔ bemɛ nɛ kunaabɛin. Lɛtɛrɛ gɔ nɛ ɔn gin’ tɔŋɔ: «Ba unrunw Yahutunw tɔgui laain, Antiɔse lee, Siri gana lee, Silisi gana lee nɛ wɔin gɔbe, e ba unrunw, jaŋu unrunw tiyaaɲu gɔbe lee, inɛw naw gɔbe lee emɛ ei poonɔuwɔin. 24Inɛw gamuu emɛ bɛrɛ gowaa, e bɛrɛ yaa, sɔɔ bemɛ le ei ɔɲɔmɔu, hakilɛ ebe yamalauwɔin be giyaa emɛ ɛgaabɛin. Kaa bei emɛ tiilu. 25Kɔɔ sabu dɛi emɛ tunmɔ le sɔwaa, ba unrunw ibɛ emɛ, Pɔlu lee, Barunabasu lee onu nɛ, inɛ digɛraa ye e bɛrɛ tiimɔ gin. 26Pɔlu lee, Barunabasu lee, be kinrun bemɛ pajaatiyaa, Inɛw Baŋa emɛ Yesu Kirisito birɛ birɛuwɔin. 27Aiwa, kunrin emɛ Jude lee, Silasu lee, e bɛrɛ tiiuwɔin. Be aŋa bemɛ le sɔɔ emɛ tɔŋu ɔnbe e bɛrɛ tatagadɛin. 28Kijɛ waajibi wɔɔ gɔbei laa ye, dɔɔ waja e bɛrɛ duurɔun dagalu ga, Kikinu Pilu yabaajɛ, emɛ yaa yabaaɲu. 29Tiyɛ gɔ, ɔmɔlɔ nɛ nawan sɛnwaanɲu tɛnwɛnnɔugi, ili kayanɔugi, nawan ili goolu tɛnwɛnnɔugi, iyaa sala nɛ yoonɔugi. Kijɛ kɔɔbe nɛ kuu ebe gɛliyaajɛi ye, ɛjii bibiyɛdo. Ama jamu le emɛ sɛgɛrɛmɔ.» 30Lɛtɛrɛ gɔ kunrin tɔŋaa, inɛw tiin gɔbei pajaa, Antiɔse yaamaabɛin. Be jaŋu unrunw gɔ puu mɔɔnaa, lɛtɛrɛ gɔ obaabɛin. 31Lɛtɛrɛ gɔ jaŋaa, kole digɛu anrangaju be bɛi gɔ dɛi, be kinɛ ɛɛliyɛmaabɛin. 32Jude lee, Silasu lee, be inɛw Ama titiyaanwin bɛin gɔ digɛu, ba unrunw gɔbei sɔɔ joo le anrangaju obaa ye, paŋa bemɛ bariyɛmɔu tanwaanbɛin. 33Be waaru gaila le kɔɔ nɛ biyaa, kɔɔ onu nɛ ba unrunw gɔbe oju bemɛ dɛi Ama duba gɛnyaan, bei pajaa, inɛw bei tiin gɔbe bɛrɛ pilemaa yaamaabɛin. [ 34Kaa, Silasu bɛrɛ be le biyɛ ga ɛjii biyaai.] 35Pɔlu lee, Barunabasu lee, Antiɔse nɛ biyaabɛin. Inɛw wajunw joo be wooi Ama sɔɔ deereu, Inɛw Baŋa Kibɛru Ɛju sɔɔ tagaubɛin. 36Bai gaila galaa wo yaa, Pɔlu, Barunabasu le ɔn gin’ sɔi: «Inɛw Baŋa sɔɔ ana emɛ tagu puu nɛ pilemaa yaa ye, ba unrunw gɔbe yani wɔin ma yɛnɛmɔ.» 37Barunabasu, wo Jan, boi waja womɔ Maruka gɛɛɲu gɔ, be le digi yaa ga ibɛɛ bee. 38Kaa Maruka, Panpili gana nɛ baa be le kabi. Wo be le bariyaa birɛ gɔ birɛlu. Kɔɔ sabu dɛi pilemɛ ye Maruka be le yaa ga, Pɔlu kinɛ iyelu. 39Sɔɔ kɔɔ dɛi Pɔlu lee, Barunabasu lee logoro nɛ jiiru diyɛ biyaabe. Dumɔ gɔ, be tunmɔ le kabiyaain. Barunabasu, Marukai wo le dimɛraan, diikoro nɛ yowaa, Sipere gana oju ai. 40Pɔlu kai, Silasui dimɛraan yai. Ba unrunw Inɛw Baŋa nɛɛma nɛ woi sagu duuraa, be yinyain. 41Silasu be lɛi, wo Siri gana lee, Silisi gana lee kɛjaa taŋaabe. Ama inɛw mɔɔnu gana kɔɔ nɛ bɛin gɔbe puu paŋa bariyɛmɔube.

will be added

X\