KANRAN 14

1Ikɔniumu ana nɛ Pɔlu lee, Barunabasu lee iyaa Yahutunw Ama gɛɛn ginrun nɛ yowaa, sɔɔ sɔwaabɛin. Sɔɔ bana be sɔi gɔ digɛu, Yahutunw joo lee, inɛw Yahutunw tɔgui laain joo lee Yesu le gawaabɛin. 2Kaa Yahutunw gamuu kinɛ ɛɛn le biyaa, tɔgu wajabe inɛw gɔbei suuraa, Pɔlu lee, Barunabasu lee dɛi, inɛw kɔɔbe kinɛ banranmaabɛin. 3Kaa kɔɔ wooi nɛ Pɔlu lee, Barunabasu lee Ikɔniumu nɛ tanwaanbɛin. Be Inɛw Baŋa nɛ diyɛdɔn ɛju le biyaa, anrangaju le sɔɔ sɔɔubɛin. Inɛw Baŋa Ama yaa, nɛɛma womɔ sɔɔ be sɔɔbe gɔ narain ga, sɛɛrɛ unrunmɔ tagaraube. Wo sɛɛrɛ taanrinyɛn lee, yarabirɛ lee be le digɛu kanrinyɛnmɔube. 4Ana gɔ nɛ inɛw tunmɔ le mii kabiyaain. Gamuu Yahutunw bɔɔi bɛin. Gamuu Yesu jaŋu unrunw tiyaaɲu gɔbe bɔɔi bɛin. 5Yahutunw gɔbe lee, tɔgu wajabe inɛw gɔbe lee, kuu bɛɛnw bemɛ be wooi, Pɔlu lee, Barunabasu leei ɔɲɔmɔ ye, tibu le bei kama dai ibɛɛ bɛin. 6Pɔlu lee, Barunabasu lee wogɔ soo biyaa, be Likaoni gana nɛ jɔbaa yaabɛin. Gana kɔɔ nɛ, be Lisutere ana lee, Dɛrube ana lee, be le ana bɛrii bɛin lee nɛ yaaubɛin. 7Yalu kɔɔbe nɛ, be Kibɛru Ɛju tagaubɛin. 8Lisutere ana nɛ ainɛ turu yabe. Kubɔ womɔbe sanaai digɛu, wo waaru puu dadaanbe. Woi narin nɛ, wo kɔɔ gin’ yinwɔɔ. Asuu yoi yaatɛlu. 9Wo Pɔlu sɔɔ sɔɔbe gɔ keŋiyɛunbe. Pɔlu wo bɛrɛ giri dɛɛraa, woi yɛnaabe. Ainɛ gɔ Ama unruin bajugu bɛbɛɛdo ga gawaa wɔɔ ga Pɔlu iyaabe. 10Kɔɔ sabu dɛi, mii ɛɛn le sɔwaa kijɛ wo gi: «Ingele ye demu demu kubɔ uwɔ kuu nɛ iŋiyɛn.» Ainɛ gɔ kiliyaa ingelaa, yoi yaai tɔlaabe. 11Pɔlu kijɛ kanrun gɔ inɛw waaru be iye le, be mii goonaa Likaoni gana sɔɔ le ɔn gin’ gɛɛubɛin: «Amabe, inɛw taŋaa emɛ bɛrɛ sugaain.» 12Kunrin be ama bemɛ boi be bɛrɛ kunaabɛin. Barunabasu mɔ Sesu kuni. Pɔlu, sɔɔ gɔ wo sɔɔbe dɛi, boi womɔ Hɛrumɛsu kuni. 13Ana yoogu gɔ nɛ Sesu ginrun buloɲu yabe. Sesu bɛrɛ sadagadɔɔnɔnɛ gɔ, tiun puyo digaa mɔɔnaa, naa jaŋube kole saŋaraan, ana inɛw be wooi mɔrinyaanbɛin. Be Pɔlu lee, Barunabasu lee bɛrɛ, sadaga tɛgɛrɛdɛin ga, ginrun murɔn aŋa gɔ nɛ wiyaabɛin. 14Kaa Yesu jaŋu unrunw tiyaaɲu gɔbe wogɔ ɛgaa, arugoi unrunbemɛ aa kaaraatiyaa, mɔɔnu gɔ logoro nɛ yowaa, mii ɛɛn le ɔn gin’ gɛɛbɛin: 15«E inge dɛi kɔɔ kanraunwɔi? Emɛ yaa e gin’ inɛbei. Emɛ Kibɛru Ɛju gɔ e bɛrɛ jɛɛlɛuwɔin. Ebaa ɔmɔlɔ ɔnbe kijɛ kanmai laa ga, wogɔ pajaa ye, Ama ɔnmɔ, alagala lee, minɛ lee, nɛudii lee, kɔlɔ bemɛ nɛ kijɛ toin puu lee maŋanɛ gɔ sibɛ go ei kigelemɔ ga, e bɛrɛ tagauwɔin. 16Waaru galu gɔ le, Ama tɔgu puui oju yai be ibɛ nɛ pajaa sɛbe. 17Kaa kɔɔ wooi logoro nɛ, ɛju wo kanranjɛ le, wo bana unrunmɔ inɛw bɛrɛ waaru puu jugɔmaabe. Alagala goi ye wo anrandii e bɛrɛ tiiuwɔ. Dɛnrɛn gɔbe waaru bemɛ le e bɛrɛ obouwɔ. Pana joo e bɛrɛ obouwɔ. Kinɛ ebe nɛ kinɛ ɛɛli kunɔuwɔ.» 18Halu be kɔɔ gin’ sɔwaabɛin kanran, mɔɔnu gɔ be bɛrɛ sadaga tɛgɛrɛnɔu ga, be pɛrɛ pɛrɛ tɛŋaa bɛɛin. 19Antiɔse ana lee, Ikɔniumu ana lee nɛ gowaa, Yahutunw gamuu wiyaa, inɛw jooi dɔbɔraa unrunbe bɔɔi bojaabɛin. Be Pɔlui tibu le kamaa, woi yinwaain ga ana laara go bumaa goonaabɛin. 20Kaa jaŋu unrunw gɔbe yaa, woi gɔŋaa be kanran, wo ingelaa, ginrun yowaabe. Aga baa yaa gɔ, Barunabasu be lɛi Dɛrube ana nɛ yaabɛin. 21Pɔlu lee, Barunabasu lee, Dɛrube ana nɛ Kibɛru Ɛju waaju kanraan, jaŋu unrunw joo biyaabɛin. Kɔɔ onu nɛ be pilemaa, Lisutere ana le digɛu, Ikɔniumu ana nɛ wiyaa, Antiɔse ana nɛ yaabɛin. 22Be jaŋu unrunw gɔbe anrangaju bariyɛmɔu, bemaa gagawu nɛ ɛɛn go biyɛ ga, bei tinwɛnrɛunbɛin. Kijɛ be gɛɛbe: «Ama diinɛ nɛ emɛ yoomɔ nɛ, waajibi emɛ ɔɲɛ joo ihiyedɛin.» 23Ama inɛw mɔɔnu be galabe puu nɛ, be Ama inɛw mɔɔnu inɛw naw daanaubɛin. Aŋa pagaa, Ama gɛnyaan ye, be Inɛw Baŋa le be gawu gɔ bɛrɛ, bei sagu duurɔubɛin. 24Kɔɔ onu nɛ be Pisidi gana gɔ kɛjaa galaa, Panpili gana nɛ dɔwaabɛin. 25Pɛruje ana nɛ Ama sɔɔ tagaatiyaa, be Atali ana nɛ yain. 26Kɔɔ nɛ gowaa, be diikoro nɛ yowaa, birɛ kanɛ be kibemu gɔ dɛi yalu nɛ bei Ama nɛɛma nɛ gawurin Antiɔse nɛ yaabɛin. 27Antiɔse waaru be dɔi le, be Ama inɛw mɔɔnu inɛw gɔ puu mɔɔnaa, be le digɛu, Ama birɛ biru puu tagaabɛin. Inɛw Yahutunw tɔgui laain, Yesu le gawa ga, Ama bana taan pinɛlaa sɛɛ gɔ yaa tagaabɛin. 28Be kɔɔ nɛ jaŋu unrunw gɔbe le bai joo biyaabɛin.

will be added

X\