KANRAN 13

1Antiɔse Ama inɛw mɔɔnu nɛ, inɛw Ama titiyaanw lee, jaŋudeerenw lee yatobɛin. Inɛw wogɔbe unwɔin: Barunabasu lee, Simɛyɔn guju gɛun boonɔubɛin gɔ lee, Sirɛnɛ ana bɛɛnnɛ Lusiusu lee, Manayɛn, Sɛmɛginɛ Herɔde Antipasu be lɛi gabi gɔ lee, Sɔlu lee. 2Inɛw Baŋai Amai sɔmɔu, aŋa pagaa, Ama gɛɛun be wɔu, Kikinu Pilu be le sɔwaa kijɛ gi: «Barunabasu lee, Sɔlu lee bei birɛ dɛi mu boonu gɔ dɛi dɛiin bojoi.» 3Kunrin aŋa pagaa, Ama gɛnyaan kilaa, be Barunabasu lee, Sɔlu lee kuu nɛ numɔ yaŋaraan, Ama duba be dɛi gɛnyaan, bei pajaa yaamaabɛin. 4Barunabasu lee, Sɔlu lee, Kikinu Pilu kunrin bei tiyaa wo kanran, be Selesi ana nɛ yaabɛin. Kɔɔ nɛ gowaa, diikoro nɛ yowaa, be Sipere gana dii gɔŋaa gɛlɛ gɔ nɛ yaabɛin. 5Salaminɛ ana nɛ dɔwaa, be Yahutunw Ama gɛɛn ginrun gɔbe nɛ Ama sɔɔ tagaabɛin. Jan Maruka bei bara ga be le yadigɛbe. 6Sipere gana gɔ puu kɛjaa taŋaa, be Papɔsu ana nɛ baa dɔwaabɛin. Kɔɔ nɛ be ainɛ dugu birɛ birɛjɛ turu sɛgɛraabɛin. Yahutunɛ inɛ titiyainɛ kakaluginɛ turui bee. Boi womɔ Baru-Yesu gɛɛɲu. 7Wo Sɛmɛginɛ Sɛrujiusu Pɔlusu le bee. Sɛmɛginɛ kɔɔ hakilɛ ɛjii yasɛbe. Wo Ama sɔɔ ɛgɛ ga ɛjii dadaaru le bee dɛi, inɛ tiyaa, Barunabasu lee, Sɔlu lee boonaabe. 8Kaa dugu birɛbirɛnɛ gɔ, Elimasu, be le ɛjii jiiru jiireube. Gɛrɛku sɔɔ le Baru-Yesu gɔ Elimasu boonɔbɛin. Sɛmɛginɛ gɔ Ama sɔɔ le yaba ga wo tɛŋɛ ibɛi bee. 9Kunrin wo wɔu, Sɔlu, boi womɔ Pɔlu yaa boonɔɲu gɔ, Kikinu Pilu le jowaa, giri Elimasu bɛrɛ dɛɛraa gɛlɛu, 10wo le kijɛ wo gi: «U sasai lee, nabara tɔgu dɛin dɛin lee le, inɛ jowaa wɔɔ gɔ, u jinrun puu kuu baŋa ii gɔ, sɔɔ teitai puu jaŋunɛ gɔ, Inɛw Baŋa Ama oju naran gɔbe kɔri bojodo ga u wɔɔ gɔ pajaidolou ma? 11Aiwa yɛnɛ, Ama ui lagaa girumiyɛnmaa ye, waaru gaila u nai wijɛ iyeidolou.» Pɔlu kunrin gɛɛu wo digɛu, Elimasu giri nɛ ɔlɔ kanraan, woi girumiyaain. Wo sibɛ sibɛ kigelemɔu, inɛ woi teeremɔido dɛnɛube. 12Sɛmɛginɛ gɔ sɔɔ kɔɔ waaru wo iyi le, Inɛw Baŋa deeru sɔɔ gɔ, woi maunɛ kanraanbe. Wo Yesu le gawaabe. 13Papɔsu nɛ gowaa, Pɔlu lee, wo bɔɔnw lee, diikoro nɛ yowaa, Panpili gana, Pɛruje ana nɛ yaabɛin. Jan Maruka kɔɔ nɛ be le kabiyaa, pilemaa, Jerusalɛmu yai. 14Be Pɛruje gowaa, oju bemɛ digiyaa, Pisidi gana, Antiɔse ana nɛ dɔwaabɛin. Deeliye bai gɔ, be Ama gɛɛn ginrun nɛ yowaa, dɛinyaanbɛin. 15Mɔise tɔɔru dɔn gɔ lee, inɛw Ama titiyaanw dɔn gɔbe lee jaŋaa waaru kilin le, Ama gɛɛn ginrun kuu bɛɛnw gɔbe, be bɛrɛ inɛ tiyaa, be le ɔn gin’ sɔin: «Ba unrunw, inɛw mainiyɛnmɔ ga, sɔɔ be bɛrɛ tagaɲu yasɛi ye, e sɔi bɛbɛɛdei.» 16Pɔlu ingelaa, numɔ le inɛw bemaa kelemu biyɛ giyaatiyaa, ɔn gin’ sɔi: «E Isɛrɛlu inɛw gɔbe lee, e Ama giri liyɛnw gɔbe lee, sɔɔ ma keŋiyɛin. 17Isɛrɛlu tɔgu Ama gɔ, pɔɔlɔ baa, emɛ babei wo yɛmu. Ejipute gana nɛ yeru waaru be daanbe le, wo tɔgu gɔi narinyɛnmaa, jooi bojaabe. Kɔɔ onu nɛ wo gɔnrɔn diyɛ unrunmɔ le bei Ejipute gana nɛ goomaabe. 18Anranguju pɛnai gin’ wo olusolo nɛ bei muyaanbe. 19Kaana gana nɛ tɔgu sɔi suyaatiyaa, Ama, gana bemɛ gɔ jeɲaa, emɛ babe mɔi boju. 20Anranguju suŋu nai pɛnumɔrɔn gin’ gana gɔ numɔ bemɛ nɛ yatobe. «Kɔɔ onu nɛ, Ama emɛ babe bɛrɛ saliyɛkirenw obaabe. Inɛ Ama titiyainɛ Samuɛlu waaru yai dɔɔ, saliyɛkirenw gɔbe yabɛin. 21Kɔɔ onu nɛ emɛ babe, ɔgɔnɛ kuu unrunbemɛ nɛ daana ga gɛnyaanbɛin. Ama, Kisu ii Sɔlu, Bɛnjamɛ tɔgu gɔ, be bɛrɛ obaabe. Wo anranguju pɛnai laamu kanraanbe. 22Ama Sɔlui pajaatiyaa, Dawidei jeɲaa, emɛ babe kuu nɛ ɔgɔ daanaabe. Ama, kuu womɔ le Dawide dɛi ɔn gin’ sɔi: ‘Mu Jɛse ii Dawidei iyaajɔn. Kinɛ ma, inɛ le yabaajɛ gɔ woi. Kijɛ wo bɛrɛ mu dɛnɛjɛ puu, wo kanrun kikibemɔdo.’ 23Nɛɛ Ama, pui wo kunu le kɛukɛu, Dawide tiruwɛnɛ Yesui, Isɛrɛlu yabanɛi bojaabe. 24Yesu wo wɛɛmɔ nɛ, Ama, Jan Batisei tiyaa, wo Isɛrɛlu inɛw bɛrɛ waaju kunaa, bemaa bana mɔɲu bemɛ dulomɔ ye batise yoo gi. 25Jan birɛ womɔ dogoido waaru dɔwaa wo kanran, ɔn gin’ sɔi: ‘E mui aai ga sɛi? Inɛ e dɔmɔ gɔ wogɔ mui laa. Kaa yɛnɛi, inɛ wogɔ onu ma nɛ yawɛɛjɛ. Taga womɔ suŋu kɔmɔlɔ ga mu le jaanla.’ 26«Aiwa, ba unrunw, e Abarahamu tɔgu gɔbe lee, e tɔgu waja inɛw, Ama giri liyɛnw gɔbe lee, yayabu sɔɔ ɔn emɛ bɛrɛ tiin. 27Yɛnɛi, Jerusalɛmu bɛɛnw lee, inɛw giru toin bemɛ gɔbe lee, Yesu aai ma paamu kanrannɛ. Iyaa, deeliye bai puu, inɛw Ama titiyaanw dɔn nɛ sɔɔ jaŋaɲu gɔ yaa paamu kanrannɛ. Kaa, Yesu kuu nɛ jarugu be duuru gɔ, be inɛw Ama titiyaanw sɔɔi kibemi. 28Halu jarugu turu kanran be Yesu nɛ tɛmɛnɛ kanran, be Pilate bɛrɛ gɛnyaan woi daa gin. 29Kunrin Yesu dɛi sɔɔ tɔŋi gɔ puu kanraan kibemaa, be baga jai kuu nɛ woi sunugaa, ɔnsain turu nɛ duunaabɛin. 30Kaa Ama yiun nɛ woi bulomaabe. 31Galile gana nɛ gowaa, wo le digiyaa, inɛw Jerusalɛmu ulin gɔbe, Yesu, bai lugo joo nɛ unruin be bɛrɛ tagaraabe. Kanɛ inɛw wogɔbe Isɛrɛlu tɔgu logoro nɛ Yesu sɛɛrɛi biyaa wɔin. 32Emɛ yaa kuu emɛ le Kibɛru Ɛju e bɛrɛ emɛ jɛɛlu gɔ unwɔ: Emɛ babe bɛrɛ Ama kijɛ pui kunu gɔ, 33emɛ unrunw gɔbe sibɛ go, Ama, pui wogɔ kibemaati. Ama Sɔmu dɔn, nii lɛiye gɔ nɛ bana tɔŋɔ ɔn le kɛukɛu, Ama Yesui yiun nɛ bulomaa pui wogɔ kibemaati: “Ui Aini mai, iye mu ui narun.” 34Ama iyaa Yesui yiun nɛ bulomaa ye, asuu waja woi yinwɛindolo gi. Wo ɔn gin’ sɔi: “Dawide le pui mu kunu gɔ, mu duba dɛin kɔɔliyɛɛlɛ wogɔ, kuu ebe nɛ susugomɔdɔn.” 35Kɔɔ sabu dɛi, yalu waja nɛ yaa Sɔmu dɔn ɔn gin’ gi: “Inɛ yɛmaa dɛiin u bojaajɛ gɔ, yiun womɔ ɔmaai biyɛ ga u yabaidolou.” 36Nɛɛ Dawide, waaru unrunmɔ le, Ama bana dɛnɛjɛ gin’, birɛ womɔ biraa, yinwaain. Wo babe le yiun womɔ bojaa, sɛgɛ womɔ sainyaain. 37Kaa Ama inɛ bulomu gɔ woi ɔmɔlu. 38«Aiwa, ba unrunw, nɛɛ sɔɔ ɔn paamu kanrain: Yesu le digɛnu hakɛ yaabu kanrun bɛɛmɔjɛ ga emɛ e bɛrɛ tagauwɔin. Mɔise tɔɔru gɔ ei teitai bojaa bɛɛlu. Kaa Yesu le inɛw gawaɲu gɔbe, wo le digɛnu bei teitai bojaaɲu. Inɛ aai kanran, Yesu le gawaajɛ ye, hakɛ wogɔbe kuu nɛ gɔnrɔn bɛbɛɛjɛ. 40Kɔɔ sabu dɛi, inɛw Ama titiyaanw sɔɔ be sɔi ɔn kuu ebe nɛ sugonɔu giye, kuu ebe kajubai: 41“Inɛw sɔɔ yau kanranw gɔbe, e yɛnɛi, e bɛrɛ maunɛ kanranmu ye, manajɛɛi. Ɔnhɔn, waaru ebe le, mu sɔɔ turu kakanrandɔn bai, e bɛrɛ tiinɛ tagin bee ye, e wogɔ le gawaidelei.”» 42Pɔlu lee, Barunabasu lee Ama gɛɛn ginrun gɔ nɛ waaru be goobe le, inɛw be bɛrɛ gɛnyaan, deeliye bai wɛɛido gɔ le yaa bemaa sɔɔ kɔɔbe kuu nɛ pilemu ye unrunbe le sɔɔ sɔɔ gin. 43Mɔɔnu gɔ kilaa wo kanran, Yahutunw joo lee, inɛw Yahutunw oju nɛ toin joo lee, be Pɔlu lee, Barunabasu lee onu nɛ dimiyaanbɛin. Be inɛw gɔbe le sɔɔu, Ama nɛɛma gɔ nɛ yabiyɛ ga ɛjii bei tinwɛnrɛunbɛin. 44Deeliye bai waja wo dɔwaa, Inɛw Baŋa sɔɔ keŋiyɛn ga ana inɛw ɛjii mɔrinyaanbɛin. Inɛ kɔɔ nɛ wɛɛlu joo laa. 45Yahutunw inɛw, mɔɔnu diyɛ gɔ iyaa, ele be le jowaa, Pɔlu sɔɔ gɔ kɔɔrɔmɔu, woi duyɔubɛin. 46Kunrin kanraun be wɔu, Pɔlu lee, Barunabasu lee be le daii sɔwaa, kijɛ be gi: «Ama sɔɔ gɔ e Yahutunw bɛrɛ laa taga ga waajibi bee. Kaa e sɔɔ gɔ le yabaalɛi, iyaa ɔnmɔsɔgɔ e le jaanla ga, e kuu ebe le tagarauwɔi digɛu, emɛ tɔgu wajabe inɛw bɛrɛ yaadɛin. 47Yɛnɛi, Inɛw Baŋa Ama emɛ bɛrɛ tɔɔru obu gɔ unwɔ: “Uwaa, tɔgu wajabe inɛw wijɛi biyɛ ga, mu ui yɛmaa daanu. Iyaa, yayabu gɔ aduna kale wooi nɛ dɔɔnɔ ga ui yɛmu.”» 48Inɛw Yahutunw tɔgui laain gɔbe, sɔɔ kɔɔ waaru be ɛgu le kinɛ bemɛ ɛɛliyaa, be Inɛw Baŋa sɔɔ gɔ sɔmɔubɛin. Kunrin, inɛw ɔnmɔsɔgɔ bɛɛ ga bojaaɲu gɔbe puu, Yesu le gawaabɛin. 49Gana wogɔ yalu puu nɛ Ama sɔɔ ginaabe. 50Kaa Yahutunw, yaanw diyɛnw Ama giri liyɛnw gɔbe lee, ana inɛw diyɛnw gɔbe leei suuraa, Pɔlu lee, Barunabasu lee dɛi ingelemaabɛin. Be bei ɔɲɔmaa, gana bemɛ nɛ nanaa goonaabɛin. 51Pɔlu lee, Barunabasu lee, be dɛi kubɔ unrunbemɛ nɛ ugunu tara gɔ pogaatiyaa, Ikɔniumu ana nɛ yain. 52Antiɔse nɛ, jaŋu unrunw gɔbe kai, kinɛ ɛɛli le jowaabɛin. Kikinu Pilu yaa be le jooi bee.

will be added

X\