1 Sɔɔ kɔɔbe waaru le, Ɔgɔnɛ Herɔde Agiripa, Ama inɛw mɔɔnu inɛw gamuui ɔɲɔmɔ ga kuu bemɛ nɛ numɔ kunaabe. 2 Wo polukaaba le Jan bainɛ Jakei daamaabe. 3 Sɔɔ wogɔ Yahutunw kinɛ aa wɔɔ ga iyaa, wo Piɛrui yaa aamaabe. Buru kijɛ pidemu tolo janwan waaru gɔbe le sɔɔ kɔɔbe bii. 4 Kunrin Piɛrui aa kaju kunaatiyaa, wo sɔludasu unrunw nai nai gojo nai baa bojaa, dinrɛn le dinrɛn le kajuginrun gɔ dɔmiyɛnmaabe. Taŋagalu janwan gɔ galaai ye, wo mɔɔnu gɔ giru nɛ Piɛru saliyɛ kiredo ga bee. 5 Kunrin, kajuginrun gɔ nɛ Piɛrui ɛjii gɛliyaa yinbɛin. Kaa deeliye sɛlɛ go Ama inɛw mɔɔnu wo dɛi Ama bɛrɛ ɛjii gɛɛunbe. 6 Baa yaa ye Herɔde, Piɛru saliyɛ kikiredo gɛɛu wo bee digɛ gɔ, Piɛru, sɔludasu unrunw lɛi logoro nɛ diinbe. Yɔgu lɛi le woi kɔmaa gɛlɛbɛin. Kajuginrun murɔn aŋa gɔ nɛ yaa domudɔmiyɛnw yahiŋɛbɛin. 7 Kunrin wo wɔu, kubɔ turu Inɛw Baŋa mɛlɛnkɛ turu wiyaa, Piɛru ginrun tobe gɔ nɛ yowaa, ginrun gɔ wijɛ le jowaabe. Mɛlɛnkɛ gɔ Piɛrui aa jigemaa, woi yemɛlaa, ɔgiri ingele gi. Kɔɔ waaru le numɔ womɔ nɛ yɔgu tobe gɔ kɔmɔlaa bagaai. 8 Kɔɔ onu nɛ mɛlɛnkɛ gɔ womaa tɛmu womɔ pagiyaa ye taga womɔ kunɔ gi. Piɛru kunrin kanraanbe. Mɛlɛnkɛ gɔ iyaa womaa arugoi diyɛ womɔ kunaa ye unruin dimiyɛn gi. 9 Kunrin Piɛru gowaa, mɛlɛnkɛ gɔi dimiyaanbe. Mɛlɛnkɛ kijɛ kanraun bee gɔ Piɛru, wogɔ narain ga bele. Kaa wo kuu iyei iyeuwɔ ga bee. 10 Mɛlɛnkɛ gɔ lee, Piɛru lee domu pɔlɔ gɔ nɛ galaa, lɛiye gɔ nɛ galaa, inrun taan le digɛnu ana kɔlɔ nɛ yooɲu gɔ nɛ dɔwaabɛin. Taan wogɔ giru nɛ be dɔwaa, taan gɔ tunmi pinɛlaai. Be gowaa, ana pɔŋɔrɔn turu nɛ yowaabɛin. Ɔgu kɛu Mɛlɛnkɛ gɔ Piɛrui pajaa yaai. 11 Hakilɛ womɔ wo le kɛu waaru bii le, Piɛru kijɛ gi: «Nɛɛ kai, naran go Inɛw Baŋa mu bɛrɛ mɛlɛnkɛ womɔ tiyaa, Herɔde numɔ nɛ lee, Yahutunw mu bɛrɛ mɔɲu kanran be ibɛɛ bee nɛ lee, mui yabaajɛ ga mu jugaajɔn.» 12 Kunrin waaru paamu wo kanrun le, Piɛru gowaa, Jan, boi waja womɔ Maruka gɛɛɲu na, Mari ginrun nɛ yai. Wogɔ nɛ inɛw joo mɔrinyaan, Ama gɛɛunbɛin. 13 Waaru Piɛru taan gɔ wo tɔgu le, iyaa birɛbirɛnɛ turu Rode gɛɛɲu gɔ, aai ma yɛnɛi wiyaabe. 14 Wo Piɛru mii jugaa, kinɛ ɛɛli le jowaa gabaa, taan gɔ pinɛlɛ dɛi, inɛw wajunw bɛrɛ jɔbaa yaa, Piɛrui murɔn aŋa gɔ nɛ wiyaa wɔɔ ga tagu. 15 Kunrin wo tagaa, be aŋa womɔ saa: «U weje ulaau.» Kaa, iyaa gɔ mainiyaan ɛjii sɔwaa, sɔɔ gɔ narain gi. Be iyaa saa kɔɔi ye mɛlɛnkɛ womɔi gin. 16 Kaa Piɛru nimɛ kanran taan gɔ tɔgɔu yadigɛbe. Be yaa, taan pinɛlaa, Piɛrui iyaa, bei saii maunɛ kanraanbe. 17 Piɛru bemaa kelemu biyɛ ga numɔ daii kanraanbe. Kɔɔ onu nɛ Inɛw Baŋa, kaju nɛ bana woi goonu gɔ, wo be bɛrɛ jugɔmaabe. Iyaa be le kijɛ wo gi: «Jake lee, ba unrunw wajunw gɔbe lee bɛrɛ tagai.» Kunrin sɔwaatiyaa, wo gowaa yalu waja yai. 18 Aga, baa wo yaa, sɔludasu unrunw gɔbe kinɛmana diyɛ le bɛin. Piɛru yago yai ma be inin bɛin. 19 Herɔde woi dɛnɛmaa iyelu. Wo sɔludasu kajuginrun gɔ dɔmɔbɛin gɔbe saliyɛ kiraa, bei daa ga tɔɔraabe. Kɔɔ onu nɛ Herɔde Judea gana nɛ gowaa, Sesare ana nɛ gaila biyɛi yaabe. 20 Herɔde, Tire lee, Sidɔn lee ana bɛɛnw le kinɛbanrun le bee. Ana kɔɔbe inɛw, pana bemɛ Herɔde laamu nɛ goobe digɛu, be sɔɔ gɔ yegeredɛin ga tunmɔ le aaraabɛin. Kunrin be Herɔde ginrun diinyɛnjɛ kuu baŋa, Balasutusu le anrunge laabɛin. 21 Sɔɔ sɔɔmɔ ga bai be kɛju gɔ dɔwaa wo kanran, Herɔde ɔgɔ arugoi unrunmɔ kunaa, ɔgɔdɔin gɔ nɛ dɛinyaan, sɔɔ diyɛ diyɛ sɔɔi tɔlaabe. 22 Sɔɔ sɔɔu wo wɔu inɛw mii ɛɛn le ɔn gin’ woi sɔmɔubɛin: «Ɔn, ama turu mii. Inɛ mii laa.» 23 Kɔɔ gin’ kɔun kɔnwɔun waaru be bee gɔ le tee, Inɛw Baŋa mɛlɛnkɛ turu woi lagaabe. Herɔde, Ama bɛrɛ boi obolu dɛi kɔɔ biyaabe. Susuu woi kayaa, daati. 24 Kaa, Inɛw Baŋa Ama sɔɔ gɔ, yalu puu nɛ ginaa, giru yaaube. 25 Barunabasu lee, Sɔlu lee, birɛ bemɛ kilɛmaatiyaa, Jerusalɛmu gowaa pilemaa yaabɛin. Be Jan Maruka gɛɛɲu gɔ dimɛraan kole yain.
