KANRAN 11

1Yesu jaŋu unrunw tiyaaɲu gɔbe lee, Judea gana nɛ ba unrunw wajunw bɛin gɔbe lee, inɛw Yahutunw tɔgui laain yaa Ama sɔɔ le yabaaɲu ga ɛgaabɛin. 2Nɛɛ, Piɛru, Jerusalɛmu nɛ wiyaa waaru wo dɔi le, Yahutunw Yesu le gawaa wɔin gɔbe, woi jarugaa, kijɛ be gi: 3«U inɛw araa nɔɔnɛ ginrun nɛ yowaabeu. Iyaa be le jaa kayaabeu.» 4Kunrin, Piɛru sɔɔ gɔ bana bii, digu le digu le bei tagaabe. Wo sɔwaa gi: 5«Mu Jope ana nɛ bɔun. Ama gɛɛun wɔu, mu kuu iye iyaabɔn. Kijɛ turu sɔi diyɛ gin’, kinrun nai womɔ nɛ suŋu kɔmaa, alagala gowaa sugo sugo mu bɛrɛ baa dɔwaabe. 6Kɔlɔ gɔ nɛ ɛjii yɛnaa, mu kijɛ kubɔ nai lee, olunawan lee, kijɛ minɛ nɛ bumɔɲu lee, alagala sasaabe lee iyaabɔn. 7Mii turu maa Piɛru, ingele ye sɛnwɛn tɛnwɛn gɛɛu wo wɔu mu ɛgaabɔn. 8Kaa mu saa, ai, Inɛw Baŋa, kijɛ kaya danwan ma, kijɛ lɔgɔgu ma, aŋa ma nɛ yootɛlu gun. 9Kunrin mu saa, mii gɔ kubɔ lɛiye alagala gowaa ɛgɛmaa, kijɛ ɛjui, kayi bɛbɛɛmɔjɛ ga Ama giyaajɛ gɔ, kijɛ lɔgɔgu gin’ yɛnɛnɔu gi. 10Kubɔ taanu baa, kunrin bii. Kɔɔ onu nɛ kijɛ gɔ puu biɲaa, daa go yinhuni. 11Sɔɔ kɔɔ galau wo digɛu, anranw taanu Sesare ana nɛ gowaa, mu bɛrɛ bei tiyaa be kanran, wiyaa, ginrun emɛ tobe murɔn aŋa nɛ iŋiyaanbɛin. 12Ama Kikinu, maa jiiru kunɔlu go, be le digi ye yaa gi. Ba unrunw kuloi ɔnbe kunrin mui niinaa, Kɔrunɛye ginrun nɛ emɛ yowaabɛin. 13Kɔrunɛye, mɛlɛnkɛ, ginrun womɔ nɛ iyaabe ga emɛ bɛrɛ tagaabe. Mɛlɛnkɛ gɔ wo le ɔn gin’ sɔi gi: ‘Jope nɛ inɛ tiyaa ye Simɔ Piɛrui boonɔ. 14U lee, ginrun uwɔ bɛɛnw lee sɔɔ le yayabu e bɛɛido gɔ, wo u bɛrɛ tatagado.’ 15Aiwa, sɔɔ tɔlaa sɔɔu mu wɔu, Kikinu Pilu tɔlɔ gɔ le kuu emɛ nɛ bana wɛi gin’, be puu kuu nɛ yaa kɔɔ gin’ tee wiyaabe. 16Kunrin wo biyaa, mu Inɛw Baŋa sɔɔ gɛɛbe ɔn ajubaabɔn: ‘Jan, dii le inɛi batise kanrun. Kaa e kai, Kikinu Pilu le ei batise kanrandɛin.’ 17Aiwa, Inɛw Baŋa Yesu Kirisito le waaru emɛ gawu le, Ama emɛ bɛrɛ sin obu wo obu gɔ, be bɛrɛ yaa obaajɛ. Nɛɛ, Ama le mu jaiyɛun jaain bee ma?» 18Piɛru kunrin wo sɔwaa, be wooi puu sɔɔ gɔ dɛɛnrinyaain. Ama sɔmɔu kijɛ be gɛɛbe: «Inɛw Yahutunw tɔgui laain bɛrɛ yaa ajubuduli obaa, bemaa ɔnmɔ gɔ bɛɛ ga Ama yabaajɛ.» 19Etiɛnui waaru daiin le, jaŋu unrunw dɛi ɔɲɔmu diyɛ biyaabe. Ɔɲɔmu wogɔ dɛi inɛw ginaa yain gɔbe, Penisi gana lee, Sipere gana lee, Antiɔse ana lee nɛ baa yaabɛin. Be Yahutunw bɛrɛ laa ye, inɛ waja bɛrɛ Ama sɔɔ tagaubenɛ. 20Kaa jaŋu unrunw gamuu, Sipere lee, Sirɛnɛ lee bɛɛnw, Antiɔse yaa, inɛw Yahutunw tɔgui laain gɔbe bɛrɛ yaa Inɛw Baŋa Yesu Kibɛru Ɛju waaju kanraanbɛin. 21Inɛw Baŋa Ama gɔnrɔn gɔ be le yabe. Kunrin, inɛw joo sɔɔ gɔ le gawaa, Yesu le tubiyaabɛin. 22Jerusalɛmu Ama inɛw mɔɔnu inɛw gɔbe, sɔɔ kɔɔ kibɛru biyaa, be Barunabasui, Antiɔse nɛ baa tiyaabɛin. 23Antiɔse nɛ waaru wo dɔi le, Ama nɛɛma gɔ bana birɛ wo biru iyaa, wo kinɛ ɛɛliyɛmaabe. Wo jaŋu unrunw gɔi tinwɛnraan, bemaa, Inɛw Baŋa Yesu nɛ naran le ɛɛn go tari ye biyɛ gi. 24Barunabasu inɛ ɛjui bee. Kikinu Pilu le jowaa bee, gagawu baŋai bee. Kunrin, inɛw joo Inɛw Baŋa Yesu bɛrɛ wiyaabɛin. 25Kɔɔ onu nɛ Barunabasu, kɔɔ nɛ gowaa, Taruse ana nɛ Sɔlui dɛnɛi yai. 26Sɔlui iyaa, Barunabasu woi dimɛraan, Antiɔse jɛɛlaabe. Anranguju turu kɛu baa, be lɛi Ama inɛw mɔɔnu kɔɔ le biyaa, inɛw jooi deeraabɛin. Yesu jaŋu unrunw boi “Kirisito inɛw” gɛi gɔ, Antiɔse nɛ tɔlin. 27Waaru kɔɔ le, inɛw Ama titiyaanw gamuu Jerusalɛmu gowaa, Antiɔse wiyaabɛin. 28Logoro bemɛ nɛ turu baŋa boi Agabusu gɛɛɲu gɔ ingelaa, Ama Kikinu woi damaa, aduna gɔ puu nɛ bɛrii giyɛ yoyoodo gi. Bana wo sɔi gin’ Rɔmɛ Ɔgɔnɛ diyɛ Kulɔde waaru le giyɛ wogɔ biyaabe. 29Jaŋu unrunw tunmɔ le sɔwaa, inɛ tuturu puu gɔnrɔn womɔ bana wɔɔ le kɛukɛu buudu sɛgaa ye, Judea gana nɛ jaŋu unrunw wɔin gɔbe bɛrɛ baru tiimɔ gin. 30Be kunrin buudu sɛgaa, sin obu bemɛ Barunabasu lee, Sɔlu lee numɔ nɛ kunaa, Judea Ama inɛw mɔɔnu inɛw naw bɛrɛ tiyaabɛin.

will be added

X\