KANRAN 10

1Sesare ana nɛ sɔludasu suŋu kuu baŋa turu yabe. Boi womɔ Kɔrunɛye gɛɛɲu. Wo sɔludasu numɔ, Itali bɛɛnw numɔ kuu baŋa turui bee. 2Ainɛ kɔɔ Ama giri liyɛnɛi bee. Wo lee, ginrun womɔ inɛw puu lee, be tunmɔ le Ama demɛniyɛnmɔubɛin. Wo Yahutunw inɛw, naugunw gɔbe bɛrɛ ɛjii kijɛ oboube. Iyaa, wo amagɛɛn le ɔɲɔbele. 3Digɛnai turu, lɛɛrɛ taanu waaru le wo kuu iye iyaabe. Sɛɛn wo yɛnɛu, mɛlɛnkɛ turu ginrun womɔ nɛ yowaa, womaa: «Kɔrunɛye.» 4Kɔrunɛye giri gɔmaa woi yɛnɛu, kinwɛun, ɔn gin’ sai: «Mu baŋa, ingei?» Mɛlɛnkɛ gɔ saa: «Gɛɛn uwɔbe lee, naugunw bɛrɛ kijɛ u obu gɔbe lee, Ama yabaajɛ. Wo ui ajubaajɛ. 5Nɛɛ, kanɛ inɛ goonaajɛu ye, Jope ana nɛ tiyaa ye, ainɛ Simɔ Piɛru gɛɛɲu gɔi boonu jɛɛlɛ. 6Wo ainɛ guju birɛbirɛnɛ turu Simɔ gɛɛɲu ginrun nɛ sugaa wɔɔ. Ainɛ wogɔ ginrun nɛudii genɛ nɛ wɔɔ.» 7Mɛlɛnkɛ wo le sɔɔ sɔi gɔ yaau wo digɛu, Kɔrunɛye, birɛbirɛnw le gawaa wo wɔɔ lɛi lee, sɔludasu woi gɛlɛin logoro nɛ Ama giri liyɛnɛ turu lee boonaabe. 8Wo sɔɔ wo bɛrɛ biyaabe gɔ puu bei tagaa, kɔɔ onu nɛ bei Jope tiyaabe. 9Aga baa yaa gɔ, inɛw kɔɔbe oju nɛ tou, Jope le bɛrii be wɔu, Piɛru naitege waaru le Ama gɛɛndo ga dala ulaabe. 10Giyɛ woi yasɛbe dɛi, wo pana kaya ibɛɛ bee. Kunrin, wo dɛi pana birɛu be wɔu, wo kuu iye iyaabe. 11Alagala pinɛlaa, kijɛ turu, sɔi diyɛ gin’ kinrun nai womɔ suŋu le kɔmaa, minɛ nɛ sunugou be wɔu wo iyaabe. 12Kijɛ kubɔ nai tɔgu puu lee, kijɛ minɛ nɛ bumɔɲu lee, alagala sasaabe lee, sɔi diyɛ gin’ kijɛ sugobe gɔ nɛ yatobɛin. 13Mii turu Piɛru le kijɛ gi: «Piɛru, ingele, kijɛ kɔɔbe sɛnwɛn tɛnwɛn.» 14Kaa Piɛru aŋa saa: «Ai, Inɛw Baŋa, mu kijɛ kaya danwan ma, kijɛ lɔgɔgu ma turu kanran kayatɛlun.» 15Kɔɔ gin’ wo saa, mii gɔ kubɔ lɛiye gɔ ɛgɛmaa, wo le kijɛ gi: «Kijɛ ɛjui, kaya bɛbɛɛmɔjɛ ga Ama giyaajɛ gɔ, kijɛ lɔgɔgui gin’ yɛnɛnɔu.» 16Kubɔ taanu baa, sɔɔ kɔɔ kunrin biyaabe. Kɔɔ onu nɛ ɔgu kɛu kijɛ gɔbei alagala go biɲaa unaabɛin. 17Kuu iye gɔ nɛ Piɛrui manaa, tiyɛ gɔ ingei ma ajubau wo wɔu, Kɔrunɛye anranw tii gɔbe, Simɔ ginrun selumaa, murɔn aŋa gɔ nɛ waaru wogɔ le tee wiyaa dɔwaabɛin. 18Inɛ boonaa selumaa, Simɔ Piɛru gɛɛɲu gɔ, ginrun nɛ sugaa wɔɔ gɔ ɔn woi ma gin. 19Piɛru nimɛ kanran kuu iye gɔ dɛi ajubau yagɛlɛbe. Kunrin wo wɔu, Ama Kikinu wo le kijɛ gi: «Anranw taanu ui dɛnɛu kowɔin. 20Ingelaajɛu ye, sugo ye, jiiru kunɔlu go be le yaa. Sabu bei ɔn nɛ mu tii.» 21Kunrin Piɛru, anranw gɔbe bɛrɛ sugaa, kijɛ wo gi: «Mu unwɔun. Inɛ e dɛnɛjɛ gɔ mui. Ɔn nɛ e wɛi gɔ, inge dɛi ma mui jugɔmɔi.» 22Inɛw gɔbe saa: «Sɔludasu suŋu kuu baŋa, Kɔrunɛye emi tii. Kɔrunɛye inɛ teitai, Ama giri liyɛnɛi, Yahutunw puu wo dɛi sɛɛrɛ ɛju goouwɔin. Ama, mɛlɛnkɛ ɛjaa unrunmɔ turu tiyaa, Kɔrunɛye womaa ginrun womɔ nɛ ui boonaa ye, sɔɔ u gɛɛido keŋiyɛn gi.» 23Kunrin be sɔwaa, Piɛru bei sɛgɛraa ginrun kunaa baa yaa baa dɔwaabe. Aga baa yaa gɔ, wo ingelaa, be le digiyaa yaabe. Jope ba unrunw gamuu wo le yaabɛin. 24Bai lɛiye gɔ be Sesare dɔwaabɛin. Kɔrunɛye bei yadɔmɔbe. Wo ginrun womɔ nɛ wo maranw lee, wo anrunge ɛju gɔbe lee boonaa mɔɔnaa gɛlɛbe. 25Piɛru, ginrun gɔ nɛ wo yoou, Kɔrunɛye yaa woi sɛgɛraa, giru womɔ nɛ tuŋiyaan woi demɛniyɛnmaabe. 26Kaa Piɛru woi jeɲaa ingelemaa kijɛ gi: «Ingele, mu kanran inɛi koi.» 27Kunrin sɔɔ sɔɔu gɛlɛu, wo Kɔrunɛye le ginrun gɔ nɛ yowaa, inɛw joo be mɔrɔun tɛmaabe. 28Be le kijɛ wo gi: «E igii wɔi, Yahutunw, tɔgu waja inɛ le digiyɛ ma, inɛ tɔgu waja ginrun nɛ yoo ma, wogɔ danwan. Kaa Ama mu bɛrɛ jugɔmaa, inɛ lɔgɔi ma, inɛ mui danwan ma bojonɔu gi. 29Wogɔ digɛu inɛ tiyaa, mui e boonaa, mu jiiru kunɔlu go wiyaabɔn. Nɛɛ, kijɛ dɛi mui boonaa e jɛɛlu gɔ mui jugɔmɔi.» 30Piɛru kunrin wo sɔwaa, Kɔrunɛye aŋa womɔ saa gi: «Iye bai nai dɔwaai, mu ginrun ma nɛ digɛnai lɛɛrɛ taanu waaru le Ama gɛɛun tobɔn. Ama gɛɛun mu wɔu, ainɛ turu giru ma nɛ wiyaa iŋiyaanbe. Sɔi womɔ ɛjii dooroube. 31Mu le sɔwaa, maa Kɔrunɛye, Ama, gɛɛn ma saajɛ, naugunw bɛrɛ kijɛ mu obu gɔbe yabaajɛ, Ama mui ajubaajɛ wa. 32Nɛɛ, maa Jope nɛ inɛ tiyaa ye, Simɔ Piɛrui boonɔ jɛɛlɛ gi. Wo guju birɛbirɛnɛ Simɔ ginrun nɛ sugaa wɔɔ. Ginrun gɔ nɛudii genɛ nɛ wɔɔ gi. 33Kunrin, ɔgu kɛu mu inɛ tiyaa, ui boonaabɔn. U yaa, u wɛi gɔ yegiyaai. Nɛɛ, emɛ wooi puu Ama giru nɛ unwɔin. Inɛw Baŋa uwaa emɛ bɛrɛ sɔɔ obo wo gi gɔ, emɛ wogɔ keŋiyɛndɛin ga dɔmiyaan wɔin.» 34Kunrin, Piɛru sɔɔ jeɲaa gi: «Nɛɛ kai Ama, inɛi kabu kunɔɔlɛ ga mu paamu kanraanjɔn. 35Tɔgu yagɔbe logoro nɛi kanran, inɛ giri womɔ liyaa, teitai kanranjɛ gɔ, inɛ wogɔ wo bɛrɛ ɛjii wɔɔ. 36Yɛnɛi, Ama, sɔɔ unrunmɔ Isɛrɛlu unrunw bɛrɛ obaa, Yesu Kirisito le jamu bɛɛmɔjɛ Kibɛru Ɛju gɔ bei tagaabe ga e igii wɔi. Yesu wogɔ inɛw puu baŋa gɔ woi. 37Jan, batise kanrun dɛi waaju wo kunu onu nɛ, Galile gana nɛ tɔlaa, Judea gana puu nɛ sɔɔ bii gɔ e igii wɔi. 38Ama, Kikinu Pilu gɔnrɔn, Nasarɛtu bɛɛnnɛ Yesu bɛrɛ bana wo obu gɔ e igii wɔi. Iyaa, Yesu, yalu dɛin dɛin nɛ yai yai, ɛju kanran lee, jinrun puu kuu baŋa, gɔnrɔn womɔ le inɛw pagaa wo sɛbei bajamɔ lee, bana wo kanranbe e igii wɔi. Ama wo le yabe dɛi, wo kɔɔbe kanraunbe. 39Yahutunw gana nɛ lee, Jerusalɛmu ana nɛ lee, kijɛ wo kanrun puu sɛɛrɛ gɔ emi. Be baga nɛ woi pɛgaa daabɛin. 40Bai taaniye gɔ, Ama woi bulomaa, woi iyemɔ ga yabaabe. 41Wo Yahutunw inɛw puu bɛrɛ unruin tagaralu, kaa emaa sɛɛrɛi biyɛ ga pɔɔlɔ baa, Ama emi inɛw yɛmu gɔbe, emɛ bɛrɛ unruin taguru. Yesu wo bulu onu nɛ, emɛ wo le jaa kayaa, dii nɔiin gɔbe, emɛ bɛrɛ unruin taguru. 42Yesu emaa, inɛw bɛrɛ waaju kanraan ye, inɛw ɔnmɔi wɔin gɔbe lee, inɛw yinwaain gɔbe lee saliyɛ kire ga, Ama inɛ tii gɔ unruin ga jugɔmɔ gi. 43Inɛw Ama titiyaanw puu Yesu dɛi sɛɛrɛ gowaa, inɛ aai kanran, wo le gawaajɛ ye, boi womɔ le hakɛ yaabu kanrun bɛbɛɛdo gin.» 44Piɛru kɔɔ gin’ sɔɔ sɔɔu wo wɔu, inɛw sɔɔ gɔ keŋiyɛun bɛin puu kuu nɛ Kikinu Pilu sugaabe. 45Yahutunw Yesu le gawaa wɔin, Piɛru le digiyaa wɛin gɔbe, Ama, Kikinu Pilu, sin obu go, inɛw Yahutunw tɔgui laain kuu nɛ wɛɛmaajɛ ga iyaa, be bɛrɛ ɛjii maunɛ kanraanbe. 46Inɛw gɔbe sɔɔ waja sɔɔu, Amai babau be wɔu, be ɛgaabɛin. 47Piɛru iyaa sɔɔ jeɲaa, gi: «Kikinu Pilu kuu emɛ nɛ bana wɛi gin’, inɛw ɔnbe kuu nɛ yaa yinwɛi. Nɛɛ, inɛw wogɔbei dii nɛ batise kanranlu kanrun bɛbɛɛmɔjɛ ma?» 48Kunrin sɔwaatiyaa, wo inɛw gɔbei Yesu Kirisito boi le batise kanran ga tɔɔraabe. Kɔɔ onu nɛ, inɛw gɔbe woi gɛnyaan, womaa bai gaila unrunbe le biyɛ gin.

will be added

X\