KANRAN 1

1Teyɔpile, Yesu birɛ womɔ tɔlaa, alagala woi uni bai yai dɔɔ, kijɛ wo kanrun lee, wo deeru lee sɔɔ, mu dɔn pɔlɔ ma nɛ sɔwaabɔn. Alagala wo ulomɔ nɛ, Kikinu Pilu gɔnrɔn le, wo jaŋu unrunw tiyaaɲu wo yɛmu gɔbe bɛrɛ tɔɔru unrunmɔ obaabe. 3Yesu, wo yinwun onu nɛ, wo ɔnmɔi bana dɛin dɛin joo le jaŋu unrunw tunmɔ kɔɔbe bɛrɛ, bai pɛnai baa daii unruin tagaraa, Ama diinɛ sɔɔ be le sɔɔube. 4Yesu, jaŋu unrunw womɔ le mɔrinyaan wɔu, wo be bɛrɛ ɛɛnnaa sɔwaa, bemaa Jerusalɛmu ana le wageniyɛnnɔu gi. Kijɛ be le wo gi: «Mu Ba kijɛ pui kunaabe ga e bɛrɛ mu tagu gɔ, wogɔ dɔmiyɛin. 5Jan, dii le inɛi batise kanrun. Kaa, e kai, bai gaila nɛ, Kikinu Pilu nɛ ei batise kanrandɛin.» 6Yesu kunrin wo sɔwaa, jaŋu unrunw wo le mɔrinyaan bɛin gɔbe selumaa: «Inɛw Baŋa, Isɛrɛlu tɔgu bɛrɛ pilemu ye laamu womɔ u oboido waaru gɔ kɔɔi ma?» 7Yesu aŋa bemɛ saa: «Ama, kuu womɔ le waaru kɛjaa wo sɛɛ gɔ ma, bai kɛjaa wo sɛɛ gɔ ma jugɔ ga sɔɔ ebei laa. 8Kikinu Pilu, kuu ebe nɛ waaru wo sugaajɛ, e gɔnrɔn bɛbɛɛdei. Kunrin, Jerusalɛmu ana nɛ lee, Judea gana puu nɛ lee, Samari gana nɛ lee, minɛ kale wooi nɛ lee e sɛɛrɛ ma goowin biyɛdei.» 9Sɔɔ kɔɔ sɔwaatiyaa, jaŋu unrunw gɔbe Yesui yɛnɛu be wɔu, woi daa go jeɲaa unaatin. Anrankulumɔ wiyaa giru bemɛ nɛ woi dɛbaati. 10Yesu ulou wo wɔu, jaŋu unrunw gɔbe, giri daa go dɛɛraa yɛnɛu yagɛlɛbɛin. Kɔɔ waaru le, anranw lɛi sɔi pilu le wiyaa giru bemɛ nɛ iŋiyaan, 11kijɛ be gi: «Galile gana bɛɛnw, ɔn nɛ iŋiyaan alagala go yɛnɛu e wɔɔ gɔ ingei? Yesu, logoro ebe nɛ jeɲaa alagala go uni gɔ, bana alagala yaau wo wɔu e iyi gin’ tee, pilemɛ ye yinwɛɛdo.» 12Sɔɔ kɔɔ onu nɛ, jaŋu unrunw tiyaaɲu gɔbe Oliwe tetemɛ gɔ nɛ gowaa, Jerusalɛmu ana nɛ yowaabɛin. Oliwe tetemɛ gɔ Jerusalɛmu le wagela. Kilomɛtɛrɛ turu gin’ wɔɔ. 13Jerusalɛmu nɛ yowaa, jaŋu unrunw gɔbe, ginrun sɔɔrɔ pɔɔlɔ baa be biyɛjɛ gɔ nɛ ulaabɛin. Kɔɔ nɛ inɛw bɛin gɔbe unwɔin: Piɛru lee, Jan lee, Jake lee, Andere lee, Pilipe lee, Tɔmasu lee, Barutelɛmi lee, Matiu lee, Alupe ii Jake lee, Simɔ gana gɔ gunɔ nɛ goo ga mainiyɛunbe gɔ lee, Jake ii Judasu lee. 14Be wooi puu ajubu turu le biyaa, amagɛɛn nɛ mainiyɛunbɛin. Yesu na Mari lee, yaanw gamuu lee, Yesu suŋɔw lee be le yabɛin. 15Waaru kɔɔbe le, bai turu jaŋu unrunw suŋu le pɛɛlɛi gin’ mɔrinyaanbɛin. Piɛru, logoro bemɛ nɛ ingelaa ɔn gin’ sɔi: 16«Ba unrunw, Ama Dɔn sɔɔ kibe ga waajibi bee. Pɔɔlɔ baa, Kikinu Pilu, Dawide bɛrɛ Ama Dɔn gɔ nɛ Judasu dɛi sɔɔ sɔɔmaabe. Kunrin, Judasu, inɛw Yesui aai wɛin gɔbe giru teeremɔnɛi biyaabe. 17Wo emɛ bɔɔi bee. Emɛ le woi lugoubɛin. Iyaa, Ama birɛ ɔn nɛ woi yaa yatobe.» 18Kaa sɔɔ mɔɲu wo kanrun tujɔ gɔ le, wo minɛ ɛbaabe. Wo, bɛrɛ womɔ kuu nɛ bagaa sugaa, bɛrɛ gɔ pojaa kɔruja gɔ minɛ nɛ buriyaa gowaabe. 19Jerusalɛmu ana bɛɛnw puu sɔɔ wogɔ saii igii bɛin. Wogɔ dɛi, be minɛ gɔ boi, sɔɔ bemɛ le Hakɛludama kuni, tiyɛ gɔ ili minɛ. 20«Nɛɛ Sɔmu dɔn gɔ nɛ tɔŋaaɲu: “Ginrun womɔ kooloi wo biyɛmɔ. Inɛ turu kanran, waja wogɔ nɛ biyɛnɔu.” Iyaa tɔŋaa gi: “Birɛ womɔ inɛ waja wo jeɲɛmɔ.” 21Kɔɔ sabu dɛi, Jan waaru batise kanraun bee nɛ gowaa, Yesui logoro emɛ nɛ jeɲaa alagala uni bai wɛɛ dɔɔ, waaru puu, Inɛw Baŋa Yesu onu nɛ, emɛ le inɛw dimɛbɛin logoro nɛ, waajibi inɛ turu emɛ le bari ye, Yesu bulogu sɛɛrɛi biyɛun jaain wɔɔ.» 23Kɔɔ dɛi, inɛw gɔbe, inɛw lɛi siiraa tagurin: Josɛpu lee Matiasu lee. Josɛpu boi, inɛw Barusabasu boonɔubɛin. Iyaa boi waja womɔ Jusutusu gɛɛbɛin. 24Kɔɔ onu nɛ, be ɔn gin’ Ama gɛɛin: «Inɛw Baŋa, u inɛw puu kinɛ jugɔnɛ gɔ, inɛw lɛi ɔnbe logoro nɛ, inɛ u yɛmu gɔ tagara. 25Kɔɔbaŋa, Yesu jaŋu ii tiyaaɲui bii ye, birɛ ɔn nɛ Judasu dilɛ nɛ wo yoomɔ. Judasu, birɛ gɔ pajaatiyaa, yalu wo yaaun jaan nɛ yaai.» 26Kunrin Ama gɛnyaantiyaa, be inɛw lɛi gɔbe dɛi keri tɛŋaabɛin. Keriteŋu gɔ Matiasu kuu nɛ sugu. Kunrin, Yesu jaŋu unrunw tiyaaɲu pɛli turusigɛ gɔbe kuu nɛ woi baraabɛin.

will be added

X\