TIMƆTE LƐIYE 4

1Mu Ama giru nɛ lee, Kirisito Yesu, inɛw ɔnmɔi wɔin lee, inɛw yinwaain gɔbe lee saliyɛ kireido baŋa giru nɛ lee, u bɛrɛ daii sɔɔuwɔn. Yesu, wɛɛgu womɔ le unruin wo tagaraido lee, laamu wo kanraindo gɔ lee dɛi u bɛrɛ gɛɛunwɔn: 2Kibɛru Ɛju waaju gɔ u inɛw bɛrɛ taga, waaru sɛgɛraa ma, sɛgɛrɛlu ma, u wogɔ inɛw bɛrɛ gimɛ gimɛ ye taga. Muyɔn diyɛ le inɛwin deeraa ye, inɛw sɔɔ u sɔi gɔ le be yabamɔ, inɛwin jaruga, bei anrangaju obo. 3Sabu waaru yawɛɛjɛ, inɛw, waaru wogɔ le naran sɔɔ keŋiyɛindenɛ. Kaa be deeru tɔgu dɛin keŋi ibɛɛ biyɛdɛin. Kɔɔ gin’ be dedeerenw dɛin dɛin, sɔɔ keŋi be ibɛ, be bɛrɛ sɔɔnw gɔbe, bei gɔŋɔ ye gɛgɛliyɛmɔdɛin. 4Be Ama sɔɔ naran gɔ keŋiyɛn ga yabaidenɛ, kaa be elumɛbe nɛ hakilɛ bemɛ puu bobojodɛin. 5Kaa u kai, waaru wooi hakilɛ uwɔ gɔ daana, ɔɲɛ tariyɛ, u Kibɛru Ɛju taganɛ birɛ birɛ, birɛ uwɔ wooi nɛ Ama birɛbirɛnɛ kibaai biyɛ. 6Nɛɛ, kuu ma sɔɔ sibɛ go, kinrun ma sadaga gin’ Ama bɛrɛ oboɲu waaru gɔ dɔwaai, aduna nɛ mu gooun waaru dɔwaai. 7Mu jobu diyɛ gɔ jɔbaabɔn, tunmɔ galu jobu ma gɔ kilaai, mu gagawu gɔ gɛliyaabɔn. 8Kanɛ baa, teitai ɔgɔdomɔ ma gɔ Ama numɔ nɛ yato, jobu jɔbu nɛ inɛ gɔnrɔn biyaajɛ tujɔ gɔ, Ama, inɛw teitai wɔin gɔbe bɛrɛ tujɔ wo oboido gɔ woi. Saliyɛ kiru bai gɔ, Inɛw Baŋa Yesu saliyɛkirenɛ teitai wɔɔ gɔ, wo tujɔ ma mui ohobodo. Saliyɛ kiru bai wogɔ le, wo mu bɛrɛ sai tujɔ gɔ oboidolo, kaa inɛw dadaaru diyɛ le Inɛw Baŋa wɛi ye unruin wo tagaraido bai gɔ dɔmi gɔbe puu bɛrɛ ohobodo. 9U mainiyaanjɛu ye ɔgu wɛɛ mui tɛmɛ. 10Sabu Demasu, aduna kijɛ ihibɛ dɛi, mui pajaatiyaa, Tesalonike ana nɛ yaai. Kɛrɛsɛn, Galasi gana nɛ yaai, Tite, Dalumasi gana nɛ yaai. 11Luka turu sai mu le wɔɔ. Marukai dimɛraanjɛu ye kole wɛɛ, sabu wo birɛ ma nɛ mui baru bɛbɛɛdo. 12Mu Tisikei, Epɛse ana nɛ tiyaatun. 13Waaru u wɛɛjɛ le, u Toroasu nɛ, Karupusu mɔ nɛ kaali arugoi naa mu paju gɔ, mu bɛrɛ kole wɛɛ. U dɔn ma gɔbe yaa kole wɛɛ, sigɛ le dɔn bɛlu guju le yegeraaɲu gɔbe naŋanɔu. 14Alɛsandere, irunɛ gɔ, wo amasɔgɔjugɔla birɛ mu bɛrɛ biraabe. Inɛw Baŋa, birɛ mɔɲu womɔ le kɛukɛu woi tutujɔdo. 15U kanran, wo dɛi kuu uwɔ kajuba, sabu wo Ama sɔɔ emɛ tagajɛ gɔ le saii jaiyɛuwɔ. 16Kubɔ pɔlɔ, paŋagunw giru nɛ, kuu ma goonu sɔɔ dɛi mui booni le, inɛ turu kanran mui wogɔ dɛi baralu. Be puu mui pajaatiyaa yain. Ama, wogɔ mɔɲu le bei tujɔnɔu. 17Kaa Inɛw Baŋa Yesu wo mui baraa, wo mui paŋa obaabe. Kɔɔ gin’ mu Ama sɔɔ gɔ sɛɛu tagaa, inɛw Yahutunw tɔgui laain gɔbe ɛgaabɛin. Ama, yiun aŋa nɛ mui yabaabe. 18Inɛw Baŋa Yesu mɔɲu wooi nɛ mui yayabado, iyaa wo sɛɛu, jamu le alagala diinɛ womɔ nɛ mui yoyoomɔdo. Boi sɔmu gɔ, asuu nasuu womɔi biyɛmɔ. Amina. 19Mu Pirisilu lee, Akilasu leei poonɔuwɔn, iyaa Onɛsipore ginrun gonɔ bɛɛnw kanran poonɔuwɔn. 20Erasute, Kɔrɛnte ana nɛ biyaai, iyaa mu Toropimɛ jijinwɛnjɛ dɛi, woi Mile nɛ pajaabɔn. 21U kaali waaru dɔɔmɔ nɛ, maini ye wɛɛ. Ebulusu lee, Pudɛnsu lee, Linusu lee, Kulɔdia lee, gagawu nɛ ba unrunw emɛ bɔɔnw gɔbe lee, be puu ui poonɔuwɔin. 22Inɛw Baŋa u le biyɛ. Ama nɛɛma gɔ e le biyɛ.

will be added

X\