TIMƆTE LƐIYE 3

1U sɔɔ ɔn jugi biyɛ: Aduna dogogu le waaru nau wɛwɛɛdo. 2Kɔɔ gin’ Adama unrunw kuu unrunbemɛ sai dɛnɛdɛin, kɛɛlɛ saii ibɛɛ biyɛdɛin, saba sabawin biyɛdɛin, kuu ulo ulowin biyɛdɛin. Be Ama boi yamalawin biyɛdɛin, iyaa bei naranw sɔɔ yabaidenɛ, yogosɛlɛ sɛlɛwin biyɛdɛin, be kijɛ ɛjaa wɔɔ dɛi baba turu kanran siyɛidenɛ. 3Be inɛw ihibɛ sɛnɛ, amasɔgɔjugɔ sɛnɛ, inɛw wajunw sɔɔ mɔɲu sɔɔnw, kinɛ ɔgu banranmɔw, inɛw kiijiun sɛnɛ, inɛw ɛju le jaŋuwin biyɛdɛin. 4Be inɛw jamajamaw, inɛw kolo, kuu ulo le jowaa wɔin biyɛdɛin, be inɛw yɔgɔrɔ sɔɔ Ama dɛi sigɛ ibɛin biyɛdɛin. 5Bain go bei yɛnaa ye, emɛ wooi Ama giri liyɛ tunmɔ gɔ sɛin gin’ wɔɔ, kaa be Ama giri liyɛ wogɔ gɔnrɔn gɔ le yabaidenɛ. U inɛw kɔɔbe le yaa wagee biyɛ. 6Logoro bemɛ nɛ inɛw gamuu ginrun nɛ koi yooɲu, be yaanw gɔnrɔn sɛnɛ gɔbei, yaanw hakɛ joo kanraan, dadaaru mɔɲu tɔgu dɛin dɛin kanran ga daariyaa be wɔɔ onu nɛ dimiyaan wɔin gɔbei dɔdɔbɔrɔɲu. 7Be waaru wooi sɔɔ dei ibɛɛ wɔin, kaa asuu naran gɔ jugu bɛɛidenɛ. 8Bana Jannɛsu lee, Janbɛrɛsu lee, Mɔise le be jaiyaabe gin’, inɛw kɔɔbe kanran, naran gɔ le jaiyɛuwɔin. Bei inɛw kuu sɛnɛbei, gagawu bemɛ gɔ tiyɛ turu kanran sɛlɛ. 9Kaa be sɔɔ kɔɔ nɛ giru bɛɛ yaaidenɛ. Sabu bana Jannɛsu lee, Janbɛrɛsu lee mɔ bii gin’, inɛw puu weje bemɛ sɔɔ gɔ jugɔtiidɛin. 10Kaa u, deeru ma gɔbe nɛ lee, yoiyaara ma nɛ lee, kijɛ kanrando ga mu bee gɔbe nɛ lee, gagawu ma nɛ lee, muyɔn ma nɛ lee, ihibɛ ma nɛ lee, ɛɛn go aŋai mu bee nɛ lee, 11tɔɔɲɔ ma gɔbe nɛ lee, ɔɲɛ ma gɔbe nɛ lee, mui ɛjii kajubaabeu. U Antiɔse nɛ lee, Ikɔniumu nɛ lee, Lisutere nɛ lee kijɛ mu bɛrɛ dɔwaabe gɔbe puu igii wɔu. Iyaa, tɔɔɲɔ mu bɛrɛ dɔi gɔbe igii wɔu. Kaa Inɛw Baŋa, tɔɔɲɔ kɔɔbe wooi nɛ mui yabaa goonaabe. 12Kaa inɛw Kirisito Yesu nɛ, Ama oju nɛ teitai yai ibɛɛ wɔin gɔbe puu, tɔɔɲɔ be bɛrɛ dɔdɔɔdo. 13Kaa inɛw mɔɲu lee, inɛw kakalu le wɔin gɔbe lee, mɔɲu bemɛ bariyɛ bariyɛ yaado, inɛwin lelelemɔdɛin, kuu bemɛ yaa lelelemɔdɛin. 14U kai, naran ui deerin gɔbe, naran le saii gawaa u wɔɔ gɔbe ɛjii gɛliyɛ. Sabu u, inɛw ui dedeerenw gɔbe le diyɛ daanu bɛbɛɛdou. 15Kɔɔ gin’, dagi uwɔ le baa, u Ama Dɔn ɛjaai gɔbe igii wɔu. Kirisito Yesu le gawu gɔ le digɛnu, Ama Dɔn wogɔ, hakilɛ yayabu kɔɔ obojɛ gɔ ui obu bɛbɛɛdo. 16Ama sɔɔ tɔŋɔmu puu, Ama Kikinu gɔnrɔn le tɔŋaaɲu. Naran deere ga niwɛn yasɛ, lelu lee, teitai laa lee goonɔ ga, bana ɛjii biyɛɲu dedeerejɛ. 17Kɔɔ le digɛnu Ama inɛ gɔi sɛɛu deeraa ye, birɛ ɛju tɔgu dɛin dɛin sɛɛu birɛ bɛɛ ga yeguru kunaa wɔɔ.

will be added

X\