TIMƆTE LƐIYE 2

1U kai, ii ma, Kirisito Yesu nɛ nɛɛma bɛɛmɔjɛ gɔ nɛ paŋa uwɔ bariyɛmɔ. 2Iyaa, inɛw joo giru nɛ aŋa ma nɛ sɔɔ u ɛgu gɔ, u wogɔ inɛw sɔɔ turu nɛ iŋɛw, inɛw wajabe bɛrɛ pilemɛ ye deeru bɛɛidɛin bɛrɛ sagu duurɔ. 3Kirisito Yesu sɔludasu ɛju gin’ ɔɲɛ gamulu uwɔi wɔɔ gɔ jeɲɛ. 4Sɔludasu ii kɔmɔ tai dɛi unruin yegeraa wɔɔ gɔ, wo kuu womɔ baŋa kinɛ aamɔ ibɛɛ wɔɔ dɛi, wo aduna sɔɔ wajunw nɛ toii ye, unruin gaaniyɛnmɔɔlɛ. 5Inɛ tunmɔ galu jobu jɔbɔnɛ gɔ, wo tɔɔru daanaaɲu gɔ le kɛukɛu jobu gɔ jɔbɔlu ye, wo tujɔ diyɛ gɔ bɛɛidolo. 6Woluwalanɛ saii birɛ nɛ mainiyaanbe gɔ, wo laa gamulu womɔ bɛɛun jaain wɔɔ. 7Sɔɔ u bɛrɛ mu tagu gɔi ajubu yɛnɛ, sabu Inɛw Baŋa Yesu, kijɛ puu nɛ paamukanrun hakilɛ u bɛrɛ ohobodo. 8Yesu Kirisito, Ama yiun nɛ bulomu gɔi, Ɔgɔnɛ Dawide tiruwɛnɛ gɔ, waaru wooi ajuba. Kibɛru Ɛju sɔɔ mu tagu gɔ kɔɔ woi. 9Kibɛru Ɛju gɔ tagauwɔn dɛi mu ɔɲɛ nɛ toun, inɛ sɔɔ mɔɲu kanrannɛ gin’ mui yɔgu le kɔmaa sɛin. Kaa Ama sɔɔ gɔi yɔgu le kɔmɔnɛ. 10Kɔɔ sabu dɛi, inɛw Ama yɛmu gɔbe dɛi, bemaa yayabu Kirisito Yesu le bɛɛmɔjɛ gɔ lee, Ama le dooro sɔgɔ bɛɛ ga lee, mu kijɛ puu tariyɛuwɔn. 11Sɔɔ ɔn narain: “Emɛ Yesu Kirisito le yinwaain ye, emɛ iyaa wo le ɔnmɔi bibiyɛdɛin. 12Emɛ wo le bariyaa ɔɲɔuwɔin ye, emɛ iyaa wo le asuu laamu kakanrandɛin. Emɛ woi inin gin ye, wo yaa emi inɛɛ gɛgɛɛdo. 13Emɛ wo sibɛ go sɔɔ turu nɛ iŋɛlain ye, wo kai sɔɔ turu baŋai. Sabu wo pui wo kunu gɔ nɛ gooidolo.” 14Kijɛ inɛw uwɔ gɔbe bɛrɛ u naŋaranmɔu jaan gɔ unwɔ: Sɔɔ kuu nɛ jiiru kunɔnɔu giye, Ama giru nɛ be le daii sɔɔ. Inɛw kekeŋiyɛnw gɔbe suyoi laa ye jiiru wogɔ niwɛn turu kanran sɛlɛ. 15U gɔnrɔn uwɔ wooi le biraa ye, Ama giru nɛ birɛbirɛnɛ sɔmu biyaajɛi, iyaa dɔgɔ sɛlɛi biyɛ. Ama sɔɔ gɔ bana jaan gin’ deere. 16Jiiru tiyɛ sɛlɛ lee, jiiru gagawu sɔɔ le sɛgɛrɛɛlɛ lee le wagee biyɛ. Jiiru wogɔbe, Ama le inɛwin wawageniyɛnmɔɲu. 17Inɛw jiiru kɔɔbe tunmɔ kunɔw deeru gɔbe, mirun mɔɲu gojui kayajɛ gin’ wɔin. Inɛw deeru wogɔbe deerenw logoro nɛ Himɛnɛ lee, Pilɛte lee yatoin: 18Be naran oju gɔi pajaatiyaa, jaŋu unrunw gamuu gagawu yamalauwɔin. Be gɛɛuwɔin, emɛ jaŋu unrunw gɔbe kanɛ baa yinwaan bulaain, bulogu sɔɔ lee wɔlɔ. 19Kaa Ama bɔlɔtei ɛju daanu gɔ wogɔ sɛɛu bibiyɛdo. Bɔlɔtei wogɔ nɛ sɔɔ ɔnbe tɔŋaaɲu: “Inɛw Baŋa Ama, inɛw womɔi wɔin gɔbe igii wɔɔ.” Iyaa: “Inɛ aai kanran, unruin Inɛw Baŋa Ama mɔi gɛɛjɛ gɔ, kɔɔbaŋa sɔɔ teitai wɔlɔ le kabiyɛ.” 20Ginrun diyɛ kɔlɔ nɛ kange gelu ma, sarudu gelu ma turu sai tolo. Kaa baga le gelu yegeraaɲu lee, nage le gelu yegeraaɲu lee yaa yatoin. Gelu gamuu gɔ bai diyɛ dɛi, gamuu bai peere mɔi. 21Jaŋu ii deeru mɔɲu kɔɔbe dɛi kuu unrunmɔ sɛɛu gɛliyaajɛ gɔ, woi gelu bai diyɛ dɛi dɛiin bojaaɲui, sabu woi Ama dɛi dɛiin bojaaɲu, wo Baŋa gelui, kai kilu ɛjui, birɛ ɛju wooi dɛi woi yegeraa sɛin. 22U sagataranw dadaaru gɔbe le wagee biyɛ. Inɛw kinɛ pilu le Inɛw Baŋa boi boonɔw gɔbe le bari ye, teitai lee, gagawu lee, ihibɛ lee, jamu lee dɛnɛ. 23Kaa jiiru bomɔgu lee, jiiru tiyɛ sɛnɛ gɔbe leei paja, sabu wogɔ jai narinyɛnmɔjɛ. 24Inɛw Baŋa birɛbirɛnɛ, jai jaiyɛun jaanla. Kaa wo inɛw wooi le kaali bii ye, deeru deerenɛ ɛju, muyɔn baŋai biyɛun jaan. 25Inɛw deeru womɔ le jaiyɛnw gɔbei tɛgɛ sɛlɛ le bei deeru wo deereun jaain wɔɔ. Ama be bɛrɛ bana duli obu ye, be naran gɔ jujugɔdɛin bibiyɛ. 26Be kɔɔ waaru le hakilɛ bemɛ dɛdɛinyɛndo. Jinrun puu kuu baŋa diŋɛ unrunmɔ kanran ga, bei aa pɛnrɛn unrunmɔ nɛ kunaa wo sɛɛ gɔ nɛ, be ɛli goo bɛbɛɛdɛin.

will be added

X\