TIMƆTE LƐIYE 1

1Mu Pɔlu, Ama diŋɛ le Kirisito Yesu jaŋu ii tiyaaɲui biyaa wɔɔ gɔ, inɛw Kirisito Yesu le bɔɔi wɔin gɔbe bɛrɛ Ama pui kunu gɔ, maa inɛw bɛrɛ ginɛge ga, Ama mui tii. 2Aini ii ma gin’ mu ibɛ gɔ, Timɔte, mu lɛtɛrɛ ɔn u bɛrɛ tiiuwɔn. Ba Ama lee, Kirisito Yesu, Inɛw Baŋa emɛ lee, nɛɛma lee, amasɔgɔjugɔ lee, jamu lee ui obo. 3Bana mu tirɛ anranw kanrun gin’, mu kinɛjugɔ jarugu sɛlɛ le, Ama dɛi birɛ birɛu mu wɔɔ gɔi birɛpoo tagauwɔn. Mu aga lee, digɛ lee, waaru Ama mu gɛɛnjɛ wooi, ui ajubauwɔn, Amai birɛpoo tagauwɔn. 4Mu giridii uwɔ gɔbe ajubauwɔn, iyaa, maa kinɛ saii ɛɛliyɛmu bɛɛ ga, mu ui pilemɛ ye iye ga gaai daariyaa wɔun. 5Mu gagawu tɔitɔi u sɛɛ gɔ naŋalun. U na na Loyise lee, u na Yunise lee, gagawu tɔgu be laa siyaabɛin gɔ, u yaa gagawu wogɔ le wɔu ga mu saii igii wɔun. 6Kɔɔ sabu dɛi mu u bɛrɛ naŋaranmɔuwɔn, numɔ ma waaru kuu uwɔ nɛ mu yaŋurun le sin obu Ama u bɛrɛ obu gɔ, u wogɔ le birɛ ɛju birɛnɛi biyɛ. 7Sabu Kikinu Ama emɛ bɛrɛ obu gɔ liliyɛ obolu. Kaa, Kikinu gɔ, gɔnrɔn lee, ihibɛ lee, kuu kajubu le bii lee obojɛ. 8Inɛw Baŋa emɛ dɛi sɛɛrɛ goo ga dɔgɔ ui aamɔnɔu. Iyaa mu, inɛ wo dɛi kanɛ kaju nɛ too gɔ dɛi kanran dɔgɔ ui aamɔnɔu. Kaa u, bana mu kanranjɛ gin’, Ama, gɔnrɔn u bɛrɛ obojɛ gɔ le kɛukɛu, Kibɛru Ɛju gɔ dɛi ɔɲɛ gamulu uwɔi wɔɔ gɔ jeɲɛ. 9Ama emi yabaabe, iyaa wo emaa inɛw womɔi biyɛ ga emi boonaabe. Ama, birɛ emɛ biru gɔ dɛi wogɔ kanranlu. Kaa wo sɔɔ unrunmɔ wo kɛju gɔ lee, nɛɛma unrunmɔ lee dɛi kanraanbe. Aduna maŋamɔ nɛ, Ama, nɛɛma wogɔ, Kirisito Yesu le digɛu emɛ bɛrɛ obaabe. 10Kaa, kanɛ Ama, emi Yabanɛ Kirisito Yesu wɛɛgu le digɛu, nɛɛma wogɔ emɛ bɛrɛ tagaraabe. Yesu, yiun kuu nɛ gɔnrɔn biyaabe, iyaa, Kibɛru Ɛju gɔ le digɛu, wo ɔnmɔsɔgɔ emɛ bɛrɛ tagaraabe. 11Ama, maa, Kibɛru Ɛju ginɛgenɛ lee, deerenɛ leei biyɛ ga, iyaa Kibɛru Ɛju dɛi Yesu jaŋu ii tiyaaɲui biyɛ ga mui boonaabe. 12Iyaa kijɛ dɛi ɔɲɛ nɛ mu too gɔ kɔɔ woi. Kaa dɔgɔ mui aalu, sabu inɛ le gawaa mu wɔɔ gɔ inɛ aai ma mu igii wɔun. Iyaa wo Kibɛru Ɛju sɔɔ mu bɛrɛ sagu wo duuru gɔ, wo bai dumɔ gɔ baa wogɔ sɛɛu gɛliyɛun gɔnrɔn yasɛ ga mu gawaa wɔun. 13Kirisito Yesu nɛ gagawu lee, ihibɛ lee bɛɛmɔjɛ gɔ nɛ bii ye, naran sɔɔ u bɛrɛ mu deeru gɔ giri teeremu gin’ ɛjii ai gɛliyɛ. 14Kijɛ ɛju u bɛrɛ sagu duuraaɲu gɔ ɛjii gɛliyɛ. U wogɔ, Kikinu Pilu emɛ nɛ too gɔ gɔnrɔn le ɛjii gɛliyɛ. 15Rɔmɛ laamu Asi numɔ nɛ jaŋu unrunw toin gɔbe puu mui pajaatin ga u igii wɔu. Inɛw wogɔbe logoro nɛ Pijɛle lee, Hɛrumɔjɛnɛ lee yatoin. 16Ama, Onɛsipore ginrun gonɔ gɔ amasɔgɔ wo aamɔ. Sabu wo waaru joo kinɛ ma kaaliyɛmaabe, iyaa maa kaju nɛ too dɛi, mu dɛi dɔgɔ woi aalu. 17Kaa waaru Rɔmɛ ana nɛ wo dɔi le, wo mui ɛjii dɛnaa iyaabe. 18Saliyɛ kiru bai gɔ le Ama, amasɔgɔ womɔ woi aamɔ. Epɛse ana nɛ mu dɛi bana kijɛ dɛin dɛin wo kanrun gɔ, u saii igii wɔu.

will be added

X\