TESALONIKE LƐIYE 3

1Kɔɔ wooi onu nɛ, ba unrunw, bana logoro ebe nɛ bii gin’ Inɛw Baŋa sɔɔ gɔ ɔgu ginɛ ga, baba siyɛ ga, e, emɛ dɛi Ama gɛɛin. 2Ama womaa inɛw mɔɲube lee, inɛw teitai laain lee numɔ nɛ emi yaba ga, e emɛ dɛi Ama gɛɛin. Sabu inɛw puu gawa ga yabaidenɛ. 3Kaa Inɛw Baŋa wo sɔɔ turu baŋai. Wo paŋa ei ohobodo, iyaa Mɔɲu kuu baŋa numɔ nɛ ei papaabado. 4Kijɛ ebaa kanran ga emɛ tɔɔru gɔbe, e wogɔbe kanraunwɔi, iyaa wogɔbe kakanrandei ga Inɛw Baŋa nɛ, emɛ e le gawaa wɔin. 5Ama, kinɛ ebe, ihibɛ e dɛi wo sɛɛ sibɛ go lee, Kirisito muyɔn ei obojɛ sibɛ go lee kigelemɔ. 6Ba unrunw, emɛ Inɛw Baŋa Yesu Kirisito boi le e bɛrɛ tɔɔrɔuwɔin, bainɛ aai kanran, wala le biyaa, deeru wo bɛrɛ emɛ obu gɔ le kɛukɛu yoi yaalɛ gɔ, e genɛ womɔ nɛ dɔrɔ gooi. 7Bana emi e deeun dagaa gɔ e kuu ebe le ɛjii igii wɔi. Sabu waaru e le emɛ bee le, emɛ wala walanɛ. 8Emɛ inɛ turu kanran pana tujɔlu go, bamai kayanɛ. Kaa ɔɲɛ lee, birɛ kirɛ lee emɛ iyaabɛin. Emɛ inɛ turu nɛ kanran logoro ebe nɛ dɔɔi biyɛnɔu ga, aga lee digɛ lee birɛ biraabɛin. 9Kunrin emɛ kanrun gɔ, wogɔ emaa e sagi biyɛ ga, e bɛrɛ tɔɔrɔun paŋa sɛnɛ dɛi laa. Kaa ebaa emi deewin biyɛ ga, emɛ emi giru taguru gin’ tagaraabɛin. 10Kunrin waaru logoro ebe nɛ emɛ tobe le, emɛ sɔɔ ɔn e bɛrɛ tagaubɛin: Inɛ aai kanran birɛ birɛ ga yabaalɛ ye, pana yaa wo kayaun jaanla. 11Sabu, inɛw gamuu logoro ebe nɛ wala walawin biyaa, be birɛ birɛɛnɛ, kaa sɔɔ be tolo nɛ aŋa kukunɔɲu ga emɛ ɛgɛuwɔin. 12Inɛw Baŋa Yesu Kirisito boi le, emɛ inɛw kɔɔbei tɔɔrɔuwɔin, be bɛrɛ gimaa gɛɛunwɔin: Bemaa sɛɛu birɛ birɛ wa, kuu bemɛ le pana be bɛi gɔ, wogɔ kaya wa. 13Kaa, e kai ba unrunw, e ɛju kanrun nɛ ɔɲɔnɔugi. 14Lɛtɛrɛ ɔn nɛ sɔɔ emɛ gi gɔ, inɛ turu wogɔ le yabalu ye, e inɛ wogɔi kajubai. Womaa dɔgɔ iye ga, e wo le mɔrin ye biyɛnɔugi. 15Kɔɔ wooi logoro nɛ e woi jaŋunɛ gin’ lugonɔugi. Kaa bainɛ gin’ woi tinwɛnrɛin. 16Inɛw Baŋa jamu obonɛ gɔ, yani biyaai kanran, waaru wooi, kuu womɔ le e bɛrɛ jamu obo. Inɛw Baŋa e wooi le biyɛ. 17Poo kunu ɔn, mu Pɔlu, numɔ ma le mu tɔŋu. Mu lɛtɛrɛ mabe wooi nɛ boi ma kɔɔ gin’ tɔŋɔuwɔn. Dɔn tɔŋu ma bana gɔ kɔɔ woi. 18Inɛw Baŋa emɛ Yesu Kirisito nɛɛma gɔ e wooi le biyɛ.

will be added

X\