TESALONIKE LƐIYE 1

1E inɛw Tesalonike ana nɛ Ama inɛw mɔɔnu nɛ toin gɔbe, e emɛ Ba Ama lee, Inɛw Baŋa Yesu Kirisito lee mɔi wɔin gɔbe, mu Pɔlu lee, iyaa Silasu lee, Timɔte lee, emɛ lɛtɛrɛ ɔn e bɛrɛ tɔŋaa tiiuwɔin. 2Ba Ama lee, Inɛw Baŋa Yesu Kirisito lee, e bɛrɛ nɛɛma lee, jamu lee obo. 3E dɛi, ba unrunw, waaru wooi Amai birɛpoo emɛ tagaun jaain wɔɔ. Kunrin kanran ga jaain wɔɔ. Sabu gagawu ebe gaai bariyɛuwɔ, iyaa e tuturu wooi, tunmɔi ibɛɛ bii ebe bariyɛ bariyɛ yaauwɔ. 4Kɔɔ sabu dɛi Ama inɛw mɔɔnu gɔbe nɛ, emɛ e dɛi kuu emɛ unɔuwɔin. Tɔɔɲɔ lee, ɔɲɛ lee muyaan e wɔɔ gɔbe logoro nɛ bana ɛɛn go iŋiyaan, gawaa e wɔɔ gɔ dɛi emɛ kuu emɛ unɔuwɔin. 5Kɔɔ puu Ama saliyɛ kiru gɔ teitai wɔɔ ga daii tagarajɛ. Dumɔ gɔ, Ama diinɛ, diinɛ dɛi ɔɲɔu e wɔɔ gɔ nɛ yoo ga e le jaain biyɛdo. E diinɛ wogɔ dɛi ɔɲɔuwɔi. 6Ama kijɛ teitai wɔɔ gɔ kakanrando: Wo inɛw ei ɔɲɔmɔw gɔbei ɔhɔɲɔmɔdo. 7E inɛw kanɛ ɔɲaa wɔin gɔbe, Ama kinɛ ebe kakaaliyɛmɔdo, kinɛ emɛ yaa kakaaliyɛmɔdo. Inɛw Ama inin gɔbe, inɛw Inɛw Baŋa emɛ Yesu Kibɛru Ɛju gɔ le yabanɛ gɔbe ɔɲɔmɔ ga, Inɛw Baŋa Yesu, mɛlɛnkɛ paŋagunw womɔbe le, yaun bije nɛ, alagala goo ye waaru unruin wo tagaraido le, Ama kunrin kanrando. 9Ama bei ɔhɔɲɔmɔdo, bei asuu susuyodo. Inɛw Baŋa bei unrun le wagee bobojodo, bei dooro diyɛ unrunmɔ le wagee bojodo. 10Inɛw Baŋa bai pilemɛ ye wɛɛido gɔ sɔɔ kɔɔ bibiyɛdo. Waaru pilemaa wo wiyaajɛ, inɛw womɔi wɔin gɔbe woi dedemɛniyɛnmɔdɛin. Inɛw wo le gawaa wɔin gɔbe puu woi bababadɛin. E yaa logoro bemɛ nɛ totoiyodei, sabu e sɔɔ womɔ e bɛrɛ emɛ tagu gɔ le yabaabei. 11Kɔɔ sabu dɛi, emɛ e dɛi Ama bɛrɛ waaru wooi gɛɛunwɔin. Ɔnmɔ nɛ ei boonaa wo jɛɛlu gɔ e le kijɛ jaain wɔɔi biyɛmɔ ga, womaa gɔnrɔn womɔ le, ɛju kanran ga daariyaa e wɔɔ puu ei kanrun bɛɛmɔ ga, iyaa gagawu ebe birɛ gɔ kibaai biyɛmɔ ga, emɛ wo bɛrɛ gɛɛunwɔin. 12Kunrin, Inɛw Baŋa emɛ Yesu boi gɔ e dɛi sɔsɔmɔdɛin, iyaa inɛw kanran wo dɛi boi ebe sɔsɔmɔdɛin. Ama emɛ lee, Inɛw Baŋa Yesu Kirisito lee nɛɛma gɔ dɛi kunrin biyɛdo.

will be added

X\