JAN LƐIYE 1

1Mu, Ama inɛw mɔɔnu inɛ na gɔ, yaanran Ama yɛmaajɛ gɔ lee, unrunw womɔ lee, lɛtɛrɛ ɔn e, inɛw naran le mu ibɛ gɔbe bɛrɛ tɔŋɔuwɔn. Naran gɔ emɛ yasin. Iyaa, naran gɔ emɛ asuu sisiyɛdɛin. Kɔɔ sabu dɛi, inɛ ei ibɛ gɔ mu turu sai laa. Inɛw naran gɔ jugaa wɔin gɔbe wooi ei ibɛɛ wɔin. 3Ama emɛ Ba lee, Aini womɔ Yesu Kirisito lee, emɛ bɛrɛ nɛɛma lee, amasɔgɔjugɔ lee, jamu lee ohobodɛin. Sin obu kɔɔbe, naran le, iyaa ihibɛ le, emɛ le bibiyɛdɛin. 4Unrunw uwɔbe logoro nɛ, Ba Ama, emɛ bɛrɛ bana tɔɔru le kɛukɛu, gamuu naran le yoi yaauwɔin ga tɛmaa, kinɛ ma gaai ɛɛliyaabe. 5Nɛɛ, yaanran ɛju, mu u bɛrɛ gɛɛunwɔ emɛ tunmɔ ibɛi biyɛmɔi. Kɔɔ tɔɔru kanai u bɛrɛ tɔŋaa tiiu wɔlɔn. Kaa Kibɛru Ɛju sɔɔ emɛ yabu le baa, tɔɔru emɛ bɛi gɔ woi. 6Ihibɛ gɔ, Ama tɔɔru gɔbe le kɛukɛu yoi yai gɔ woi. Tɔlɔ gɔ le baa, bana e ɛgu gin’, tɔɔru digiyɛ gin gɔ, ihibɛ le bii gɔ woi. 7Yɛnɛi, aduna nɛ inɛw lelemɔw joo ginaa yɔɔin. Yesu Kirisito, emɛ gin’ inɛi biyaa aduna nɛ wɛi ga, be sɔɔ wogɔ le gawaanɛ. Inɛ kɔɔ gin’ wɔɔ gɔ, inɛ lelemɔnɛ gɔ woi. Kirisito jaŋunɛ gɔ woi. 8Kɔɔ sabu dɛi, ebaa birɛ emɛ tinɛ manamɔnɔu, kaa tujɔ ebe sɛɛu bɛɛ ga, kuu kajubu le biyɛi. 9Yɛnɛi, inɛ aai kanran, Kirisito deeru obu gɔ nɛ taŋaa ye, inɛ kɔɔbaŋa, Ama wo le wɔlɔ. Kaa, deeru gɔ nɛ inɛ biyɛjɛ gɔ, inɛ wogɔ baŋa, Ba Ama wo le yɔɔ. Aini gɔ yaa wo le yɔɔ. 10Inɛ turu e bɛrɛ wɛɛu, Kirisito deeru obu gɔ le wɛɛlu ye, ginrun ebe nɛ woi sɛgɛrɛnɔugi. Poo womɔ saa ga yabanɔugi. 11Inɛ poo womɔ saajɛ, birɛ mɔɲu womɔ nɛ wo le bariyɛuwɔ. 12Mu sɔɔ waja joo e bɛrɛ tɔŋɔ tiiun jaan yasɔn. Kaa, mu wogɔbe lɛtɛrɛ le tɔŋɔ ibɛlaun. Kaa, kuu ma le e bɛrɛ wɛi ye, emɛ wooi aŋa le, aŋa le, sɔɔ sɔɔ ga ibɛɛ wɔun. Kinɛ ɛɛlu emɛ kunrin kibedo. 13U saa Ama yɛmu gɔ, unrunw womɔbe ui poonɔuwɔin.

will be added

X\