KƆRƐNTE LƐIYE 8

1Ba unrunw, Maseduanɛ gana Ama inɛw mɔɔnu gɔbe nɛ Ama nɛɛma bana birɛ wo biru gɔ emɛ e bɛrɛ jugɔmɔuwɔin. 2Halu be ɔɲɛ diyɛ subɔrɔ logoro nɛ toin kanran, halu nau ɛjii bei yasɛ kanran, kinɛ ɛɛli diyɛ be sɛɛ gɔ bei damaa, numɔ maa kunɔmɔlu go, be bɛrɛ sin gaai kanranmaabe. 3Mu naran go e bɛrɛ sɔɔuwɔn, be gɔnrɔn bemɛ bana wɔɔ gin’ sin kanraanbɛin. Halu gɔnrɔn bemɛ dɛi gaa kanraanbɛin. Kuu bemɛ le, 4be maini le emɛ bɛrɛ gɛnyaan, Ama inɛw Judea nɛ wɔin gɔbe bɛrɛ sin kanrun birɛ gɔ nɛ numɔ unrunbemɛ kunɔmɔ gin. 5Be, be le emɛ ajubu dɛi sigɛ kanraanbɛin. Be, laa gɔ, kuu bemɛ Inɛw Baŋa bɛrɛ obaabɛin. Kɔɔ onu nɛ, Ama diŋɛ le kɛukɛu emɛ bɛrɛ obin. 6Kodigɛu, emɛ Titei gɛnyaan, ebe nɛ sin kanrun birɛ kɔɔ bana wo tɔlu le kɛukɛu, yai donugo gin. 7Kijɛ puu nɛ sɔɔ ebe sɛɛu wɔɔ. Gagawu nɛ wee, sɔɔ nɛ wee, jugɔ nɛ wee, sɔɔ tɔgu puu nɛ kuu kunu nɛ wee, emi ibɛɛ bii nɛ wee. Kɔɔ bana wɔɔ gin’, sin kanrun birɛ ɔn nɛ kanran sɔɔ ebe sɛɛu bojoi. 8Mu tɔɔrui e bɛrɛ obouwɔlɔn, kaa inɛw wajunw maini gɔ e bɛrɛ jugɔmu ye, ihibɛ ebe yɔgɔ baa wɔɔ ma yɛnɛdɔn dɛii. 9Sabu e Inɛw Baŋa emɛ Yesu Kirisito nɛɛma gɔ igii wɔi. Wo kijɛ baŋai bee kanran, ebaa nau unrunmɔ le digɛnu Ama oju dimi arusɛgɛ joo siyɛ ga, wo e sabu dɛi nauginɛi biyaabe. 10Nɛɛ, sɔɔ kɔɔ sibɛ go kinɛ ma ajubu e bɛrɛ mu tagamɔi: Gari baa, buudu ɔn sɛgu gɔ e laa tɔlu. Kɔɔ sai laa, buudu gɔ sɛgu dadaaru kanran ei laa ai. Kɔɔ biyaai ye, buudu sɛgu gɔ e donugoun jaain wɔɔ. 11Nɛɛ kai, wogɔ birɛ gɔ digi ye donugoi. Kinɛ ɛju le buudu gɔ sɛgu dadaaru ei ai gin’, kinɛ ɛju wogɔ le nimɛ kanran sɛgu donugoi. Gɔnrɔn ebe le kɛukɛu kanrain. 12Sabu sin kanran ga kinɛ ɛju yasɛu ye, kijɛ u sɛɛ u obojɛ gɔi Ama yabajɛ. Kijɛ sɛlɛ u wɔɔ gɔi laa. 13Ebaa inɛw wajunwin baradei giye ei dɛgugiyɛmɔ gɛɛnɛ. Kaa inɛw puu tunmɔ le kɛukɛu bii sɔɔi. 14Kanɛ e kijɛ siyaa nau bemɛ goouwɔi. Nɛɛ, be kijɛ siyaa be wɔnu, nau e bɛrɛ dɔwaai ye, be kanran nau ebe goo bɛbɛɛdɛin. Kunrin, e wooi kɛukɛu biyɛdo. 15Wogɔ, Ama Dɔn sɔɔ ɔn le sɛgɛraa wɔɔ: “Inɛ gaai turaabe baŋa gɔ, sigɛ sɛbele. Gaila turaabe baŋa gɔi baalu kanranlu.” 16Mamaa e dɛi emɛ sɛɛ tunkanrin, Ama, Tite kinɛ nɛ wo kunu gɔ dɛi, wo birɛpoo. 17Tite bɛrɛ gɛɛn emɛ gɛin gɔ, wo yabaabe. Sigiyaa, mamaa womɔ dɛi, wo kuu womɔ le gowaa e bɛrɛ yaado gi. 18Emɛ wo le digɛraa, Kibɛru Ɛju waaju tagu dɛi, bainɛ boi ɛju womɔ Ama inɛw mɔɔnu puu nɛ ginaa wɔɔ gɔi tiiuwɔin. 19Sigiyaa, Ama inɛw mɔɔnu gɔbe woi yɛmaa, sin kanrun birɛ emɛ bɛrɛ gawaraaɲu ɔn nɛ, yoi yaanɛ emɛ bɔɔnɛi biyɛ gin. Emɛ birɛ wogɔ, Inɛw Baŋa boi sɔmɔ dɛi lee, inɛw wajunwin bara ga maini le emɛ wɔɔ tagara dɛi lee birɛɲu. 20Buudu diyɛ ɔn le sin obu birɛ emɛ birɛjɛ gɔ dɛi, inɛw jarugu sɔɔ emɛ nɛ bɛɛnɔu ga, emɛ kajubauwɔin. 21Emɛ sɔɔ ɛju gɔi kanrun dɛnɛɲu. Ama giru nɛ ɛjii wɔɔ sai laa, inɛw giru nɛ kanran ɛjii wɔɔ gɔi dɛnɛɲu. 22Be le digɛraa emɛ, emɛ bainɛi kanran tiiuwɔin. Waaru joo, womaa maai wɔɔ ma, emɛ sɔɔ joo nɛ woi subɔraa yɛnaabɛin. Kanɛ iyaa e le ɛjii gawaa wo wɔɔ gɔ dɛi, mamaa womɔ sigɛ le bariyaai. 23Nɛɛ Tite, wo kai mu bɔɔnɛi. Mu le bariyaa e dɛi birɛuwɔ. Ba unrunw wajunw gɔ, Ama inɛw mɔɔnu inɛw tiibei. Be Kirisito boi sɔmi biyɛ dɛi birɛuwɔin. 24Kodigɛu, e ihibɛ yasɛi ga, emɛ kanran e dɛi kuu emɛ unɔu baa bee ga, wogɔ sɛɛrɛ, Ama inɛw mɔɔnu gɔbe be iyemɔi.

will be added

X\