KƆRƐNTE LƐIYE 7

1Ba unrunw ibɛ mabe, pui kɔɔbe emɛ le kuni wɔɔ. Kodigɛu, emɛ goju lɔgɔ ma, kinɛ lɔgɔ ma wooi nɛ emi ɛjɛmɔmɔi. Ama giriliyɛ le emi ɛjɛmu ye kale dɔɔnɔmɔi. 2Kinɛ ebe nɛ emi paai. Emɛ inɛ turu bɛrɛ kanran mɔɲu kanrannɛ, inɛ turui kanran suyonɛ, inɛ turui kanran punɔnɛ. 3Mu, jarugu kuu ebe nɛ duurɔdɔn dɛi sɔɔ kɔɔ gɛɛuwɔlɔn. Sabu bana sɔwaa mu galu gin’, ɔnmɔi ma, yinwin ma, ei kinɛ emɛ nɛ paa wɔin. 4Mu e le ɛjii gawaa wɔun. E dɛi kuu ma gaai unɔuwɔn. Kinɛ ma kaaliyaa dain dɔwaai. Ɔɲɛ logoro nɛ mu kinɛ ɛɛli diyɛ le wɔun. 5Naran go Maseduanɛ gana nɛ emɛ dɔi nɛ, emɛ deeliye turu kanran bɛɛnɛ. Emɛ ɔɲɛ tɔgu puu iyaabɛin. Bain go jaii, kinɛ emɛ nɛ liliyɛi. 6Kaa Ama, inɛw ɔɲaa wɔin kinɛ kaaliyɛmɔnɛ gɔ, Tite wɛɛgu le kinɛ emɛ kaaliyɛmaabe. 7Wɛɛgu womɔ sai laa, kaa iyaa kinɛ kaalu e le wo bɛi gɔ le, wo kinɛ emɛ kaaliyɛmaabe. Wo ebaa dadaaru ma le wɔi, kinɛ sɔmiyɛn le wɔi, mu dɛi maini diyɛ le wɔi ga emɛ bɛrɛ tagaabe. Wogɔ kinɛ ɛɛlu ma bariyɛmaabe. 8Halu lɛtɛrɛ ma gɔ kinɛ ebe jinwɛnmaabe kanran, kinɛ ma kɔɔliyaa wɔlɔ. Lɛtɛrɛ gɔ waaru gaila le kinɛ ebe jinwɛnmaabe ga iyaa, kinɛ ma kɔɔliyaabe. 9Kaa kanɛ mu kinɛ ɛɛli le wɔun. Kinɛ ebe jinwaan dɛi laa, kinɛ jiun gɔ e bɛrɛ bana duli wo obu gɔ dɛi. Kinɛ jiun ebe gɔ Ama diŋɛ le sɛgɛraa digɛu, emɛ e bɛrɛ mɔɲu dɔɔnɔnɛ. 10Kinɛ jiun Ama diŋɛ le sɛgɛraa gɔ, bana duli yayabu nɛ inɛi jɛyaajɛ jɛɛlɛjɛ. Wogɔ dɛi kinɛ kɔɔliyɛɛlɛ. Kaa aduna kinɛ jiun gɔ yiun jɛɛlɛjɛ. 11Iyaa, kinɛ jiun Ama diŋɛ le sɛgɛraa kɔɔ, sɔɔ gɔ dɛi aŋai kinɛ ɔgu le ei wo boju gɔ yɛnɛi. E sɔɔ gɔ nɛ ei pilɛmɔuwɔi, sɔɔ gɔ kinɛ ebe tɛgaa, sɔɔ gɔ liyaai. Mui iyi dadaaru le wɔi, maini diyɛ le wɔi, jarugu duuru dabulu dɛnaabei. E mainiyaan ei sɔɔ gɔ nɛ tolo ga tagaraabei. 12Nɛɛ e bɛrɛ lɛtɛrɛ mu tii gɔ, mɔɲu kanrannɛ gɔ dɛi laa, inɛ bɛrɛ mɔɲu kanrin gɔ dɛi laa. Kaa emɛ dɛi bana e mainiyɛnjɛ gɔ, Ama giru nɛ ebaa wogɔ jugɔ dɛii. 13Kɔɔ sabu dɛi kinɛ emɛ kaaliyaa wɔɔ. Kinɛ emɛ kaaliyaa gɔi laa go, e puu Tite hakilɛ e daanu gɔ dɛi, kinɛ ɛɛli wo bɛi gɔ sigɛ le kinɛ emɛ ɛɛliyɛmaabe. 14Mu giru womɔ nɛ e dɛi, kuu ma gaila unaabɔn. E dɔgɔ mu bɛrɛ tagarali. Waaru puu e bɛrɛ naran emɛ sɔɔjɛ gin’, Tite giru nɛ ei kijɛ dɛi emɛ sɔmu gɔ yaa narain bii. 15Kunrin, sɔɔ yabu ebe lee, bana woi liliyɛ lee, goju kinwun lee le, ɛjii e sɛguru gɔ lee ajubaa ye, e sibɛ nɛ ihibɛ womɔ sigɛ le bariyaai. 16Kijɛ puu nɛ e le gawu mu bɛɛjɛ gɔ dɛi mu kinɛ ɛɛli le wɔun.

will be added

X\