KƆRƐNTE LƐIYE 5

1Aduna ɔn nɛ kuru emɛ too ɔn, tiyɛ gɔ goju emɛ ɔn wologaatin ye, alagala nɛ, inɛ numɔ ginrun ujɔlu, kaa Ama kuu womɔ le ginrun wo ujaajɛ, asuu biyɛido gɔ emɛ yasin ga igii wɔin. 2Kunrin, kuru ɔn nɛ toun, emɛ duru durouwɔin. Emɛ alagala ginrun emɛ gɔ arugoi gin’ yoo ga dadaaru diyɛ le wɔin. 3Emɛ wogɔ yowaain ye, emi duŋu le biyɛidolo. 4Kuru ɔn nɛ waaru emɛ too gɔ le, emɛ duru durouwɔin. Emɛ dɔɔ duiyaa wɔin. Kokanran, emɛ goju ɔn arugoi gin’ pomɔ ibɛɛ wɔin gin’ wɔlɔ. Kaa emɛ alagala goju gɔ arugoi gin’ yoo ibɛɛ wɔin. Ɔnmɔ gɔ, kijɛ yinwɛnjɛ gɔi donugaati ga emɛ wogɔi dɛnɛɲu. 5Emi sɔɔ kɔɔ dɛi yegerenɛ baŋa gɔ, Ama woi. Wo giru duuni ga, Kikinu gɔ emɛ bɛrɛ obaabe. 6Emɛ kodɛi waaru puu anrangaju le jowaa wɔin. Emɛ goju ɔn le wɔin ye, Inɛw Baŋa le emi wagee wɔɔ ga emɛ igii wɔin. 7Emɛ giru iye le yoi yaauwɔnɛ, kaa gagawu le yaauwɔin. 8Emɛ anrangaju le jowaa wɔin. Iyaa goju ɔn nɛ goi ye, Inɛw Baŋa giru nɛ biyɛ ga, emɛ bɛrɛ wogɔ ire. 9Wogɔ digɛu, emɛ goju le wɔin ma, goju gɔ nɛ gowaain ma, kijɛ puu dɛi sigɛ sɔɔ emɛ Inɛw Baŋa kinɛ aamɔ ga ibɛɛ wɔin. 10Sabu waajibi, emɛ puu Kirisito saliyɛ kiru yalu gɔ nɛ wɛwɛɛdɛin. Inɛ tuturu puu goju womɔ le wɔu kijɛ wo kanrun, ɛjui ma, mɔɲui ma, wogɔ tujɔ bɛbɛɛdo. 11Inɛw Baŋai bana liyɛun jaan gɔ, emɛ wogɔ igii wɔin. Kodigɛu, inɛw bemaa tinwinrun emɛ le gawa ga emɛ be bɛrɛ gɛɛunwɔin. Ama emi ɛjii igii wɔɔ. E kanran kinɛjugɔ ebe nɛ emi igii wɔi ga wɔun. 12Emɛ pilemaa kuu emɛ le boi ɛju emɛ sɔɔi e bɛrɛ sɔɔuwɔnɛ. Kaa ebaa emɛ dɛi kuu ebe unu bɛɛ ga, e bɛrɛ banai obouwɔin. Kunrin, kinɛ bemɛ bana wɔɔ dɛi laa, kaa bain nɛ aŋai bei wɔɔ dɛi inɛw kuu bemɛ unɔw gɔbe, e aŋa bemɛ sai bɛbɛɛdei. 13Kuu emɛ duliyaa ye, emɛ Ama dɛi kunrin wɔin. Kaa kuu emɛ kɛu wɔɔ ye, wogɔ tinɛ ebei. 14Sabu inɛ turu inɛw puu dɛi yinwun ye, tiyɛ gɔ, inɛw gɔ puu yinwaain. Emɛ inɛw wogɔ le gawaa wɔin gɔ, Kirisito ihibɛ gɔ emi mamainiyɛnmɔjɛ. 15Wo, inɛw ɔnmɔi wɔin gɔbe bemaa kuu bemɛ dɛi ɔnmɔi biyɛnɔu, kaa inɛ be dɛi yinwaan bulu gɔ dɛi ɔnmɔi biyɛ ga, inɛw puu dɛi yinwun. 16Wogɔ digɛu, emɛ kanɛ baa, inɛ turui kanran, Adama unrunw bana inɛi yɛnɛjɛ gin’ yɛnɛɛnɛ. Halu emɛ Kirisitoi Adama ii bana inɛ yɛnɛjɛ gin’ yɛnaabɛin kanran, kanɛ emɛ kɔɔ gin’ woi yɛnɛuwɔnɛ. 17Inɛ aai kanran Kirisito le too ye, woi maŋu kanai. Sɔɔ pɛi gɔbe puu galaain, kijɛ puu kanai biyaai. 18Kɔɔbe puu Ama bɛrɛ goi. Wo Kirisito le digɛu, unrun lee, emɛ lee logoro nɛ sɔɔ yegeraati. Iyaa inɛw lee, wo lee logoro nɛ sɔɔ yeguru birɛ gɔ, wo emɛ bɛrɛ gawaraabe. 19Tiyɛ gɔ Ama, inɛw bɛrɛ hakɛ bemɛ lugolu kanraan, unrun lee, inɛw lee logoro nɛ sɔɔ yegere ga, Kirisito nɛ birɛ birɛube. Iyaa unrun le sɔɔ yeguru waaju taga ga emɛ bɛrɛ gawaraabe. 20Kɔɔ sabu dɛi, Kirisito dilɛ nɛ emɛ iŋɛ. Emɛ le digɛu, Ama kuu womɔ le ei tinwɛnrɛunwɔ gin’ wɔɔ. Emɛ Kirisito boi le e bɛrɛ gɛɛunwɔin, Ama lee, e lee logoro nɛ sɔɔ yegere ga yabai. 21Kirisito, inɛ hakɛ inɛɛ bee gɔ, emɛ sabu dɛi Ama woi hakɛi bojaabe. Kunrin wo nɛ, inɛw teitai ga Ama lugojɛ gɔbe, emi taŋaai.

will be added

X\