KƆRƐNTE LƐIYE 4

1Ama, amasɔgɔ emɛ jugaa birɛ ɔn nɛ emi kunaabe dɛi, anrangaju emɛ dogoolɛ. 2Emɛ sɔɔ aboŋu le ma, sɔɔ dɔgɔgu ma, wogɔbe le onu dulaatin. Emɛ sakulu le yaauwɔnɛ. Iyaa, emɛ Ama sɔɔ gɔ dulomɔɔnɛ. Kaa naran gɔ wɛjɛii sɔi ye ɛjɛmɔɲu. Kunrin emɛ Ama giru nɛ, inɛ tuturu puu bɛrɛ, kinɛjugɔ womɔ nɛ boi ɛju emɛ boomu dɛnɛɲu. 3Kaa Kibɛru Ɛju emɛ tagajɛ ɔn sɔɔ gɔ nimɛ wɛjɛii wɔlɔ ye, inɛw suiyoidɛin bɛrɛ wɛjɛii wɔlɔ wɔɔ. 4Be sɔɔ gɔ le gawaanɛ, sabu aduna ɔn ama gɔ, bemaa Kirisito, Ama le murin wɔɔ baŋa gɔ, dooro womɔ Kibɛru Ɛju wijɛ be bɛrɛ wɛɛjɛ gɔ iyenɔu ga hakilɛ bemɛ dɛbaati. 5Emɛ, waaju emɛ tagajɛ nɛ kuu emɛ dɛi sɔɔnɛ. Yesu Kirisito, Inɛw Baŋa gɔ woi ga, emɛ waaju emɛ nɛ wogɔi tagaɲu. Emɛ kai Yesu dɛi, emi birɛbirɛnw ebei gɛɛɲu. 6Wijɛ, ɔlɔ logoro nɛ dodoorodo ga Ama sɔɔnɛ gɔ, kinɛ emɛ nɛ yaa wijɛ womɔ dooriyemɔnɛ gɔ woi. Ama dooro, Kirisito girupala nɛ iyemɔjɛ gɔ emaa ɛjii jugɔ bɛɛ ga, kinɛ emɛ nɛ wijɛ gɔ wo dooriyemu. 7Emi pɔnu toroi le kɛkɛu. Kokanran, kijɛ dɔnrun dɔɔmɔɔlɛ kɔɔ emɛ nɛ too. Kibɛru Ɛju gɔnrɔn diyɛ gɔ emɛ nɛ goolɛ, kaa Ama nɛ goojɛ inɛw bemaa jugɔ ga kɔɔ gin’ wɔɔ. 8Sabu, bana dɛin dɛin puu le emi ɔɲɔmɔuwɔin, kaa emɛ iŋiyaan wɔin. Emɛ jiire le wɔin, kaa diyɛdɔn emɛ dogolu. 9Emi tɔɔɲɔuwɔin, kaa Ama emi pajalu. Emi laga sunugouwɔin, kaa emi suiyolu. 10Emɛ waaru puu goju emɛ le Yesu yiun sɔɔ tagarauwɔin. Goju emɛ nɛ ɔnmɔ womɔ sɔɔ iyemɔ ga wogɔ biyɛuwɔ. 11Sabu, aduna nɛ kinrun le waaru emɛ too le, emɛ Yesu sabu dɛi waaru puu yiun le bɛrii wɔin. Goju yinwɛnjɛ emɛ nɛ, Yesu ɔnmɔ iyemɔ ga wogɔ biyɛuwɔ. 12Kunrin yiun, birɛ womɔ kɔlɔ emɛ nɛ birɛjɛ. Kaa ɔnmɔ gɔ, birɛ womɔ e nɛ birɛjɛ. 13Ama Dɔn sɔwaa gi: “Mu gawaabɔn. Kɔɔ sabu dɛi mu sɔɔ sɔwaabɔn.” Emɛ kanran gagawu turu wogɔ ajubui sɛin digɛu, emɛ gawaa wɔin. Iyaa wogɔ sabu dɛi emɛ sɔɔ sɔɔuwɔin. 14Emɛ igii wɔin, Inɛw Baŋa Yesui yiun nɛ bulomɔnɛ baŋa gɔ, emi yaa Yesu le bulogu ye, e lee, emɛ lee mɔɔnu ye Yesu giru nɛ jɛjɛɛlɛdo. 15Sɔɔ kɔɔbe puu e dɛi biyɛuwɔ. Kunrin, Ama nɛɛma gɔ bariyɛnu yaa, inɛw joo bɛrɛ dɔwaai dɛi, Amai birɛpoo tagu sɔɔ bari ye, boi sɔmu gɔ Ama mɔi biyɛ ga sɔɔ kɔɔbe biyɛuwɔ. 16Kɔɔ sabu dɛi, anrangaju emɛ dogoolɛ. Halu goju emɛ pɛyaa yanwaunwɔ kanran, kinɛ emɛ nɛ bai puu emɛ inɛ kanai taŋa taŋa yaauwɔin. 17Waaru gaila le ɔɲɛ dagi emɛ bɛɛjɛ gɔ, dooro diyɛ, kale jugɔmɔɔlɛ asuu sɔgɔjɛ emɛ dɛi yegerejɛ. 18Wogɔ digɛu, emɛ kijɛ iyemɔjɛ nɛ giru emɛ dɛɛraa gɛlɛlain. Kijɛ iyemɔɔlɛ nɛ giru dɛɛraa sɛin. Kijɛ iyemɔjɛ, waaru gaila kijɛi. Kijɛ iyemɔɔlɛ, asuu kijɛi.

will be added

X\