KƆRƐNTE LƐIYE 3

1Nɛɛ iyaa emɛ pilemaa kuu emɛ le emi sɔmɔuwɔin ma? Maa inɛw gamuu gin’, lɛtɛrɛ boi ɛju emɛ sɔɔ sɔɔjɛ e bɛrɛ emɛ jɛɛlɛun jaain wɔɔ ma? Maa emɛ bɛrɛ e oboun jaain wɔɔ ma? 2Lɛtɛrɛ boi ɛju emɛ sɔɔ sɔɔjɛ, kinɛ emɛ nɛ tɔŋaa too gɔ, ei. Inɛw puu jugɔ ye jaŋa bɛbɛɛɲu. 3Ei Kirisito lɛtɛrɛ, emɛ le tiin ga jɛnrɛin wɔɔ. Wogɔ dii tɔŋu tɔŋu le tɔŋɔnɛ, kaa Ama ɔnmɔ Kikinu birɛi. Tibu kɛbiriyɛun nɛ tɔŋɔnɛ, kaa kinɛ nɛ tɔŋɔ. 4Kirisito le digɛu Ama giru nɛ diyɛdɔn emɛ sɛɛ gɔ dɛi, emɛ sɔɔ kɔɔ sɔɔɲu. 5Emɛ kuu emɛ le birɛ kɔɔ birɛɲu gɔnrɔn yasin ga ajubaa wɔnɛ. Gɔnrɔn emɛ, Ama bɛrɛ goojɛ. 6Aaru kana birɛbirɛnwin biyɛ ga, gɔnrɔn gɔ emɛ bɛrɛ wo obu. Wogɔ tɔɔru tɔŋaaɲu aarui laa, Ama Kikinu aarui. Sabu tɔɔru tɔŋaaɲu gɔ, yiun wo nɛ goojɛ. Kaa Ama Kikinu ɔnmɔ obojɛ. 7Tɔɔru, lɛtɛrɛ ii tuturu tibu kɛbiriyɛun nɛ tɔŋaa waaru obobɛin le, Ama dooro iyemaabe. Halu dooro kɔɔ dooro galajɛi bee kanran, Isɛrɛlu unrunw Mɔisei yɛnɛ bɛɛubenɛ. Tɔɔru yiun jɛɛlɛjɛ gɔ dooro kɔɔ tunmɔ le wɛi ye, 8Kikinu birɛ gɔ kɔɔ dɛi sigɛ Ama dooro tagaraidolo ma? 9Tɔɔru birɛ, jarugu inɛ kuu nɛ duurɔjɛ gɔ dooro le bee ye, Kikinu birɛ, inɛwin teitai bojojɛ gɔ sigɛ le ɛjii dooro le biyɛidolo ma? 10Naran go, pɔɔlɔ kijɛ dooroi bee gɔ, iye dooro diyɛ gɔ le tunwaan ye, kijɛ kanmai laa. 11Sabu kijɛ galajɛ, dooro unrunmɔ yasɛbe biyaai ye, kijɛ galaalɛ dooro gɔ wogɔ dɛi sigɛ. 12Emɛ diyɛdɔn ɛju kɔɔ yasin dɛi, liyɛ sɛlɛ le wɔin. 13Emɛ Mɔise gin’ kanraannɛ. Wo, Isɛrɛlu unrunw bemaa dooro galajɛ gɔ mananu wo wɔnu iyenɔu ga, girupala unrunmɔ sɔi le dɛbɛube. 14Kaa Isɛrɛlu unrunw wogɔ paamu bɛɛubenɛ. Iye bai dɔɔ, aaru pɛi sɔɔ waaru be jaŋajɛ le, sɔi girupala dɛbu tunmɔ gɔ le, hakilɛ bemɛ dɛdɛbɛ. Sɔi gɔ dɛbɛlɛla, sabu Kirisito le digɛnu dɛbɛlɛjɛ. 15Halu, iye bai dɔɔ Mɔise dɔn gɔbe waaru be jaŋajɛ puu, hakilɛ bemɛ nɛ sɔi yadɛbɛ. 16Kaa Inɛw Baŋa sibɛ nɛ kigelemaa ye, sɔi dɛbɛ gɔ goiyaajɛ. 17Sɔɔ ɔn nɛ Inɛw Baŋa gɔ, Kikinu gɔ woi. Iyaa Inɛw Baŋa Kikinu yalu wɔɔ nɛ, liliyɛ wɔlɔ. Inɛw puu hɔɔlɔwin. 18Emɛ puu, girupala emɛ nɛ sɔi dɛbɛla. Wogɔ digɛu, emɛ kikinuyɛni Inɛw Baŋa dooro tagarajɛ gin’ wɔin. Kunrin, Inɛw Baŋa Kikinu gɔnrɔn le, waaru puu dooro bɛɛ bɛɛ yaanu, emɛ duli ye, Yesu Kirisito bana gin’ biyɛdɛin.

will be added

X\