1 Kunrin, waja pilemu ye kinɛ jiun e bɛrɛ obonɔu ga, mu e bɛrɛ pilemɛ yaaidolɔn ga, kinɛ ma nɛ kɛjaabɔn. 2 Yɛnɛi, kinɛ ebe mu jinwɛnmɔjɛ ye, aa mu bɛrɛ kinɛ ɛɛlu obodo? Inɛw kinɛ mu jinwɛnmu gɔbei laa ma? 3 Lɛtɛrɛ kɔɔ kijɛ dɛi tɔŋaa mu tii gɔ, e inɛw kinɛ ma ɛɛliyɛmɔu jaan gɔbe, e bɛrɛ dɔwaaun ye kinɛ ma jinwɛnmɔnɔu dɛi tɔŋun. Kinɛ ɛɛli ma e puu kinɛ ɛɛlii ga mu gawaa wɔun. 4 Mu kinɛ aalu le, kinɛ jiun diyɛ le, giridii goou lɛtɛrɛ kɔɔ tɔŋun. Kinɛ ebe jinwɛnmɔ dɛi laa, kaa ihibɛ diyɛ e sibɛ go mu sɛɛ gɔ ebaa jugɔ ga tɔŋu. 5 Inɛ turu kinɛ jiun sɔɔ kanraanti ye, wo kinɛ mai jinwɛnmɔlu, e puu kinɛi jinwɛnmu. Kaa sɔɔ biɲɛnu doori dɛi, e gamuu kinɛi jinwɛnmu gɛɛmɔi. 6 E inɛw joo woi jarugaa, kijɛ wo bɛrɛ e kanrun gɔ, woi baa wɔɔ. 7 Nɛɛ kai, wo bɛrɛ jinwɛn galu ye, kinɛ womɔ yanwannɔu ga, woi yaabu kanraan ye kinɛ kaalu wo bɛrɛ e oboun jaain wɔɔ. 8 Kɔɔ dɛi mu e bɛrɛ gɛɛunwɔn, e woi ibɛɛ wɔi ga wo bɛrɛ jugɔmɔi. 9 Sabu lɛtɛrɛ gɔ, mu iyaa kijɛ puu nɛ ebaa sɔɔ ma yayabajɛi ma, ei marun yɛnɛdɔn ga tɔŋu. 10 Nɛɛ kai e inɛ bɛrɛ yaabu e kanranjɛ gɔ, mu yaa woi yaabu kanraunwɔn. Sɔɔ yaabu mu kanrun gɔ, mu sɔɔ yaabu kanranɲu yasɔn ma laa ye, Setanu kuu emɛ nɛ gɔnrɔn bɛɛnɔu ga, Kirisito giru nɛ e dɛi yaabu kanrun. Sabu Setanu sɔɔ kanranjɛ ga wɔɔ, emɛ igii wɔin. 12 Kirisito Kibɛru Ɛju taga ga, Toroasu ana nɛ waaru mu dɔi le, maa kɔɔ nɛ birɛ birɛ ga, Inɛw Baŋa Ama, taan pinɛlaabe. 13 Kaa mu bainɛ Titei tɛmɛlun gɔ dɛi, kinɛ ma jamu sɛbele. Kodɛi ba unrunw bemaa jamu biyɛmɔ giyaatiyaa, mu Maseduanɛ gana nɛ wiyaabɔn. 14 Ama birɛpoo, sabu Kirisito gɔnrɔn bɛɛjɛ gɔ nɛ, wo waaru puu emi yatoiyomɔjɛ. Iyaa lajukɔrɔ jiɲu, yalu puu bana dɔɔjɛ gin’, yalu puu nɛ emi Kirisito jugɔ tagarawin bojojɛ. 15 Naran go, inɛw yabaaɲu lee, inɛw suiyou wɔin lee logoro nɛ, Ama bɛrɛ Kirisito lajukɔrɔ gɔ emi. 16 Inɛw suiyou wɔin bɛrɛ emɛ yiun jiɲu, inɛ daajɛi jiɲiyɛnɲu. Inɛw yabaaɲu bɛrɛ ɔnmɔ jiɲu, ɔnmɔ obojɛi jiɲiyɛnɲu. Inɛ aa birɛ kɔɔbe birɛ bɛɛdo? 17 Inɛw joo Ama sɔɔ le tɔŋu tɔŋɔuwɔin gɔbe, emɛ be gin’ wɔnɛ. Kaa Ama emi tii dɛi, emɛ kinɛpilu le Ama giru nɛ Kirisito le pagu turu biyaa sɔɔ sɔɔuwɔin.
